Денеска остварив работна средба со претседателот на Конфедерацијата на слободни синдикати (КСС), Благоја Ралповски на која разговаравме на повеќе теми околу правата на работниците во Македонија – напиша на ФБ, заменик министерот за економија и труд, Марјан Ристески.

-Одличната соработка и отворениот дијалог со синдикатите, како легитимни претставниците на работниците, се од голема важност за мене и министерството за економија и труд, бидејќи само преку транспарентно работење и отворен дијалог можеме да воспоставиме систем со кои ќе добиваме квалитетни решенија за сите важни социјални и економски прашања – стои во објавата од Ристески.

Од утре до 2 септември пратениците официјално ќе го користат годишниот одмор, кој годинава е со задоцнување поради ребалансот на Буџетот. Вообичаено пратениците секоја година се на одмор од 1 август до почетокот на септември.

– Пратениците ќе бидат на одмор од 15 август до 2 септември, но бидејќи Собранието е во постојано заседание не се исклучува можноста да се свикаат седници на работните тела или пленарна седница доколку се работи за некој итен случај, велат за МИА од Кабинетот на претседателот на Собранието Африм Гаши.

Од почетокот на работата на овој параламентерен состав на 28 мај се одржани десетина седници, а последната беше вчера кога беа донесени измените на Законот за здравствена заштита и се укинаа економските директори.

Гласен Текстилец на својата Фејсбук страна објави шокантна вест за фирма од Битола, „Стар Фешн ДООЕЛ“ која ги држела вработените под клуч како робови. Од таму додаваат дека откако поднеле претставка компанијата ја посетиле инспектори. Но на нивно изненадување вратите биле заклучени при што морала да биде повикана полиција за да може да се влезе во просториите на фабриката.

-Во ова правно лице, инспекторатот при вршење на инспекцискиот надзор наиде на заклучени врати додека работниците работеле во погоните. По неуспешни обиди за влез на инспекторите истите побарале асистенција од МВР. Пристапот на инспекторите бил овозможен дури после 20 минути чекање пред затворени врати“, се вели во објавата.

Внатре биле затечени 30 работници кои работеле под клуч. Притоа биле констатирани бројни неправилности но и немало евиденција за работното време.

-Исто така работодавачот организира и воведува прекувремена работа и саботи и ангажира и лица без регуларен работен однос. Работодавачот не им исплаќал додаток на плата по основ на минат труд на вработените што исто така е спротивно Законот за работните односи. За констатираните неправилности Државниот трудов инспекторат изрече соодветна инспекциска мерка за правното лице ДПТУ СТАР ФЕЈШН ДООЕЛ Битола“, се додава во соопштението на Гласен Текстилец.

Ракометарите на РК Прилеп минатата недела ги стартуваа подготовките за претстојната сезона 2024/25 на чело со тренерот Божидар Мојсов и стручниот штаб на клубот.

Клубот ги продолжи договорите со неколкумина свои првотимци, а нови имиња се бекот Никола Јеремиќ, голманот Стефан Христоски, кој се враќа во клубот по престојот во белградски Партизан, бекот Божидар Илиески, кој дојде од редовите на Мулти Есенс и Александар Тренчевски, кој пак во Прилеп се враќа по престојот во Финска.

Професионален договор потпиша и Филип Адамчески, еден од најдобрите поединци во младинската школа на РК Прилеп.

Нов капитен на тимот е Христи Бикоски, левото крило на РК Прилеп кој минатата сезона беше еден од најдобрите стрелци и чии погодоци често беа клучни за бодови.

Пред Бикоски е огромна одговорност, пред се’ затоа што на оваа позиција треба да го замени Филип Велески – столбот на одбраната на РК Прилеп, кој на крајот од минатата сезона стави крај на играчката кариера.

– Мотивирани, полни со елан и ентузијазам стартуваме и оваа сезона со амбиции за добра позиција во Супер лигата.
Подготовките во наредниот период ќе се одвиваат во рамките на нашиот град – напишаа од клубот на социјалните мрежи.

Да им посакаме среќа во новата натпреварувачка сезона и подобар пласман.

За православните христијански верници денеска почнува двонеделниот Богородичен пост, кој е посветен на Успението на Пресвета Богородица. Овој пост е востановен во молитвено сеќавање на Пресвета Богородица, а со цел во периодот на неговото времетраење уште поинтензивно да се изискува молитвеното застапништво од Пресветата Богомајка.

По својата временска должина тоа е најкраткиот од четирите годишни пости и трае 15 дена, односно секоја година започнува на денот на прославувањето на светите седум макавејци (1/14 август), а завршува на благденот Успение на Пресвета Богородица (15/28 август). Сигурни сведоштва за оформувањето на Богородичниот пост најнапред наоѓаме во списите на Теодор Студит (IX век), а тој е конечно утврден од Светата Црква на Цариградскиот собор во 1166 година, иако верните уште многу векови порано пребивале во пост исчекувајќи го денот посветен на Успението на Богородица.

И покрај постоењето на ориентирни правила во однос на позволените и забранети продукти за исхрана, никогаш не смее да се заборави дека сржта на православната антропологија е во тоа дека од човекот не треба да се стори проста маса, туку секој е и треба да остане конкретна личност. Оттаму, „строгоста“ на личното применување на физичката страна на постот зависи од личносниот совет од духовниот отец кон своето духовно чедо. Константата, пак, која треба да се следи во секој повеќедневен пост, а која никако не се „разблажнува“ е духовната страна на постењето.

Духовниот пост секогаш подразбира одрекување од сите облици на грешни и зли мисли, желби и дела, додека телесниот пост е само неопходно помошно средство за успешна духовна борба против страстите. Денот на празнувањето на Успението на Пресвета Богородица, 28 август, е неработен за граѓаните од православна исповед во земјава.

Од мала занаетчиска работилница до една од најреспектираните компании во својата област. Компанијата “АВТО КОНТРОЛ” од Прилеп во месец мај годинава прослави 10 години постоење, еден вреден јубилеј кој го одбележаа бројни успеси, бројни примери за општествена одговорност и илјадници задоволни клиенти.

Токму во чест на тој јубилеј, компанијата приредува едно интересно изненадување за своите верни клиенти.

Станува збор за ексклузивна наградна игра која е во организација на Станицата за технички преглед, Техничката служба за хомологација и атест, како и Сервисот за возила при “Авто Контрол”, а право на учество ќе земат сите оние кои од 10 јули до 30 септември:

– извршиле технички преглед при регистрација на возило во станицата за технички преглед;

– добиле два идентични наградни купони кои содржат сериски број внесен во дневникот за евиденција на техничките прегледи при регистрацијата на возила;

– eдниот од наградните купони го оставиле во кутијата за собирање на наградни купони, која ќе биде поставена на видно место во влезната просторија на компанијата – кај шалтерите

– вториот награден купон го чуваат кај себе како доказ за учество на наградната игра.

Еден среќен добитник ќе добие прекрасен ретро скутер oд марката Yuki Margherita 50 CC, како знак на неизмерна благодарност од компанијата за лојалноста и поддршката.

Извлекувањето на наградата ќе се изврши во вторник, 01.10.2024год., и ќе биде јавно спроведено од тричлена комисија, а видео материјалот ќе биде објавен на официјалната Фејсбук фан страна на компанијата.

-Ви благодариме што сте дел од нашата приказна и што ни ја укажувате вашата доверба, велат од “АВТО КОНТРОЛ”, а ние ви порачуваме дека и тоа како ВРЕДИ ДА СЕ УЧЕСТВУВА!

Алексеј Букелиќ е многу мал за сам да мине низ тешката битка за здравје која се наоѓа пред него. Тој боледува од церебрална парализа (деснострана хемипареза), не оди самостојно и нема развиен говор.

Неговата борба трае три години.

За неговото лекување се потребни 30.000 евра. Македонскиот народ безброј пати покажа дека хуманоста му е силна страна, а веќе извесен период се донира и за лекувањето на Алексеј.

Потребно е уште мал дел од потребната сума за да ја исполниме целта и Алексеј да замине на лекување.

Парите се потребни за трансплатација на матични клетки во Турција, од каде добиле уверување дека шансите за да прооди по тоа се многу големи.

Т-mobile 143153

A1 143460

Сметка за донации:

270-7000959720.40 – Алексеј Букелиќ / HALKBANK AD Skopje

IBAN code- MK07270700095972234

SWIFT- EXPCMK22

Општествено одговорната текстилна компанија „Скила“ од Прилеп, специјализирана за производство на медицински и ортопедски помагала, денесka на нашата иснтитуција и донираше седишта за инвалидски колички – информираат од прилепската болница “Борка Талески”.

-Во име на ЈЗУ Општа болница со проширена дејност Прилеп донацијата ја прими и воедно за истата се заблагодари новиот директор д-р Кире Јоноски. Со оваа донација ќе се обноват постојните седишта со што ќе се подобрат условите за пациентите кои со инвалидските колички се транспортираат до болничките одделенија – стои во соопштението од оваа здравствена институција.

Комисијата за финансирање и буџет при Советот на Општина Прилеп, одржа седница на ден 29.07.2024 година во состав Влатко Петкоски-претседател, Александар Китаноски, Дарко Андреески, Александра Димовa и Трајче Ржаникоски на која седница ги разгледа барањата за распределба на средства од буџетот на Општина Прилеп за 2024 година, наменети за финансирање на спортски клубови, професионални спортски клубови, здруженија и фондации во областа на спортот, културниот и општествениот живот, по Јавниот Повик бр. 03/2024, и одлучи за сумите кои од општинскиот буџет ќе бидат доделени на спортските клубови и здруженијата на граѓани кои аплицирале по гореспоменатиот јавен повик.

ЗАПИСНИКОТ ОД ОДРЖАНАТА СЕДНИЦА ЗА РАСПРЕДЕЛБА НА СРЕДСТВА МОЖЕТЕ ДА ГО ПОГЛЕДНЕТЕ НА СЛЕДНИОТ ЛИНК: https://www.prilep.gov.mk/zapisnik-od-odrzhanata-sednica-na-komisijata-za-finansiranje-i-budzet-2/?fbclid=IwY2xjawEoJmlleHRuA2FlbQIxMQABHcF5_3luh8Wkg0YfBot3xnj4SKqXO4V7im5ens1h2guyobBOi44Qv7Gmmw_aem_RnjFEh3oYn_4ANZoIlaC1Q

НАПОМЕНА: Здруженијата и спортските клубови треба да ги потпишат своите договори за исплата на средствата од 19.08.2024 до 23.08.2024 во приемното одделение на општина Прилеп од 09:00 до 11:00 и од 13:00 до 15:00 часот. Сите претставници на здруженијата и спортските клубови задолжително со себе да го понесат печатот од здружението / спортскиот клуб!

Дополнителни 4,2 милијарда денари за исплата на плати, 5,1 милијарда денари за исплата на пензии, 800 милиони денари за исплата на правото на гарантирана минимална помош, 1,7 милијарди денари за здравствена заштита, 1 милијарда денари за ТИРЗ зоните,1,7 милијарди денари за директна финансиска поддршка во земјоделскиот сектор, 437 милиони денари за студентски оброк, 207 милиони денари за исплата на стипендии, 300 милионии денари за блок дотации, дополнителни 0,8 милијарди денари за исплата на камати кон домашни меѓународни кредитори, како и 5,1 милијарда денари за исплата на гаранции кои претпријатијата до крајот на 2024 година година сукцесивно треба да ги вратат во Буџетот на државата, се само дел од проекциите предвидени со ребалансот на Буџетот за 2024 година што вчера беше донесен од Собранието.

Со ребалансот, вкупните приходи се планирани на 318,2 милијарди денари што е 2,6 проценти повеќе во однос на иницијалните проекции, вкупните расходи се планирани на 362,8 милијарди денари или за 5,6 проценти повеќе во однос на иницијалните проекции, капиталните расходи се планирани во висина од околу 44,7 милијарди денари, а дефицитот е планиран на ниво од 44,7 милијарди денари, односно од иницијално планираните 3,4 проценти на 4,9 проценти од БДП.

Обезбедени се и 6 милијарди денари за локални инфраструктурни проекти, како и капитални расходи во висина од 44,7 милијарди денари наменети за инвестиции во реконструкции и модернизација на јавните здравствени установи, капитални инвестиции во образованието, детската и социјалната заштита, патната, железничката и комуналната инфраструктура, исполнување на договорите во одбраната и безбедноста, како и за рурален развој.

Со ребалансот на Буџетот економскиот раст е ревидиран на 2,1 отсто од претходно проектираните 3,4 проценти, додека стапката на инфлација е проектирана на 3,5 отсто.

Според Владата, ребалансот треба да ја санира наследената „катастрофална состојба“ и „да ги закрпи дупките“ во државната каса.Како што рекоа пратениците од ВМРО-ДПМНЕ во текот на собраниската рапсрава, документот е обид да се прераспределат слабо или нереализираните средства, како и да се дочека крајот на годината во што понормална состојба.

Ребалансот не доби поддршка од СДСМ и коалицијата, а пратениците од Европски фронт ја напуштија седницата пред расправата со образложение дека е симнат од дневен ред Предлог-законот за изменување и дополнување на Законот за игрите на среќа и за забавните игри.

-Со предложениот ребаланс ги исправаме пропустите направени со иницијалниот Буџет – недоволно испланирани средства за законски предвидени права, средства за сервисирање на доспеани обврски и средства за поддршка на економијата. Тоа значи, обезбедуваме редовна исплата на плати кои ќе бидат усогласени согласно Закон во септември и редовна исплата на пензиите, а го реализираме и нашето изборно ветување за линеарно зголемување на пензиите во септември, исплата на доспеаните обврски без одложување, зашто тоа го бара економијата во која покрај најавениот поволен кредит за реализација на инвестиции ќе се вбризгаат дополнителни 6 милијарди денари преку нивно ангажирање во реализацијата на проектите на локално ниво. Тоа е еден од факторите со кои сакаме да ја поддржиме економијата, која, како што покажуваат податоците, забележа слаби резултати во првата половина од годината, истакна министерката за финансии Гордана Димитриеска Кочоска во експозето.

Пратениците од ВМРО-ДПМНЕ го повторија партискиот став, дека со ребалансот се обезбедуваат средства за плати, пензии, студентски оброк и стипанедии, земјоделски субвенции, средства за општините, за сервисирање на долговите, за спортистите,…

-Во делот на плати не се обезбедени средства за континуиран раст на платите и за пораст на минималната плата, ниту за раст на платите во образованието иако постојат поголеми приходи во Буџетот, не се предвидени средства за покривање на обврските од социјална заштита, ниту за покачување на правата за детска заштита, намалени се средствата за ИПАРД програмата, односно за земјоделците, како и средствата за авансна исплата на земјоделските субвенции,…, рече Димитар Ковачевски, објаснувајќи зошто СДСМ и коалицијата нема да го поддржат ребалансот.

Собранието го усвои ребалансот уште првиот ден од расправата, со 67 гласови „за“, седум против и без ниту еден воздржан.