На 13.08.2024, во 15:40часот, во ОВР Прилеп било пријавено дека во атарот на с.Мажучиште, на регионален пат Прилеп-Македонски Брод, паднал параглајдеристот П.В. (52) од Украина, кој се здобил со тешки телесни повреди и бил пренесен во болницата во Прилеп за укажување на лекарска помош.

Според пријавеното, тој заедно со уште еден параглајдерист од Украина, околу 12:00часот, полетале од полетувалиштето во Крушево кон Прилеп, по што на наведеното место, П.В. паднал со параглајдерот.

За настанот известен е јавен обвинител и се работи на негово расчистување и документирање – информираат од СВР Битола.

Во гостување во централниот Дневник на ТВ Сител, министерот за транспорт Александар Николоски понуди подготвеност да се изработи целосно нов Закон за урбанистичко планирање кое би го работела комисија од хетероген состав со претставници од најрелевантни невладини организации.

„Она што сакам еве вечерва да го понудам од тука еве нова работа да изработиме целосно нов Закон за урбанистичко планирање кое ќе ги опфати сите сегменти и сите сектори кој би го работела комисија од хетероген состав во кој би имало претставници од најрелевантните невладини организации, здруженија на граѓани што ќе е прв пат во историјата на изработување на закон да здружение на граѓани, односно невладини организации бидат вклучени од самиот старт на подготовка на законот“, посочи Николоски.

Тој исто така додаде дека со измените сто се донесоа ќе се олеснат постапките за изградба на здравствени и образовни објекти и катни гаражи.

„Факт е дека на Македонија и треба нов Закон за урбанистичко планирање. Ова што вчера го донесовме во Собранието се едни мали измени кои пред се се’ насочени кон олеснување на процедурата за изградба на училишта, градинки, амбуланти, болници и катни гаражи во 100% државна или општинска сопственост финансирани исклучиво од буџетот или буџетот на општините и затоа всушност ниеден амандман не поднесе никој од опозицијата и никој не побара збор од опозицијата нити од ДУИ, Левица или СДСМ нити на комисијата, нити на пленарната седница против овој закон“, истакна Николоски

Министерот Николоски потенцираше дека за овој закон освен отпор од едно здружение, засега нема забелешки од други субјекти.

„Јас еве нудам да изработиме заеднички нов Закон за урбанистичко планирање кое ќе ги опфати сите нивни грижи затоа што во овој закон тие работи воопшто не се опфатени“, објасни министерот Николоски во Дневникот на ТВ Сител.

Апокалиптични сцени од околината на македонскиот туристички бисер. Гори Галичица!

Од синоќа на социјалните мрежи се споделува апел до сите граѓани да помогнат во гаснењето на пожарот на планината, кој веќе премина од страната на Охрид откако претходно почна на страната на Албанија и се прошири на македонска страна кон Преспа.

Градоначалникот на општина Охрид, Кирил Пецаков, денеска информираше дека пожарот на планината Галичица од Македонска страна е под контрола и дека нема опасност по населените места и населението кое гравитира на овој потег.

-Во моментот во гаснењето на пожарот од земја се вклучени околу 120 лица, а се дејствува со два хелихоптери од страната на Охрид и од страната на Преспа. Очекувано е во текот на денот да се вклучат и уште три авиони за гаснење од воздух. Поспецифична е состојбата со пожарот од преспанска страна, каде што истиот има зафатено погуста и високостеблеста вегетација и гаснењето се одвива отежнато. Гаснењето од земја е отежнато и поради тоа што на овој терен постои неотстрането старо оружје и експлозивни направи, кои по налет на огнот експлодираат. Само во текот на вчерашниот ден се слушнале повеќе од 40 експлозии. Се надеваме и веруваме дека во текот на денешниот ден пожарот ќе биде локализиран и дека ќе се спречи неговото ширење понатаму. Благодарам на сите вклучени на терен, кои со несебичен напор, ден и ноќ се борат со огнената стихија. Упатувам апел до медиумите, новинарите, населението и туристите да не шират непотребна паника, да споделуваат проверени информации и да се информираат само од релевантни извори – напиша Пецаков.

„СКОПСКО“ ја лансираше новата кампања со која почнува прославувањето на 100-годишнината од постоењето на нашето најпознато пивско име.
Во 1924 година во „Пивара Скопје“ се точи првото пиво „СКОПСКО“.

Големината на „СКОПСКО“ се должи на сите тие што цели 100 години генерациски го пренесуваат неговиот дух . На пиварците што се грижат за неговиот беспрекорен квалитет, на спортистите, чиишто успеси се слават со „СКОПСКО“, на музичарите на чиишто концерти „СКОПСКО“ е најредовен гостин, на диџеите, актерите, водителите, другарите, странците, бабите, дедовците, старите, младите… на сите луѓе, кои со секоја испиена голтка „СКОПСКО“, со пивото создаваат нераскинлива врска, цел еден век!

Досега стотка со СКОПСКО прославија Струмица, Куманово и Охрид, а забавата викендов се сели во Прилеп. Од Скопска пиварница закажуваат супер забава во центарот на градот под Марковите Кули, и тоа два дена, петок и сабота (16.и 17. август), со почеток од 19 часот.

Ќе наздравиме за еден век постоење на СКОПСКО заедно со:

-петок (16.08) – DJ ЈОVAN, ТHE HOUNDS и ЉУБОЈНА
-сабота(17.08) – DJ MARTIN KAY, SHINE и НЕКСТ ТАЈМ

Дојдете да се забавуваме со прекрасна македонска музика!

Бидејќи секој од нас има приказна со „СКОПСКО“ вредна за споделување!

За наредните 100!

100 години „СКОПСКО“ и сè е можно!

View this post on Instagram

A post shared by СКОПСКО (@skopsko)

На 13.08.2024 во 20:00 часот на место викано „Рамно“, скопско, полициски службеници од СВР Скопје дале знак за запирање на товарно возило без регистарски ознаки натоварено со огревно дрво, но возилото продолжило со движење кон полициските службеници.

Притоа, еден од полициските службеници испукал два предупредувачки куршуми во водух, по што со службеното возило тргнале по товарното возило.

При движење, лице од товарното возило исфрлило дел од дрвата и го попречило патот на полициските службеници, по што товарното возило продолжило со движење кон с.Арачиново.

Се преземаат мерки за расчистување на случајот.

Викендот што следува на 17. и 18. август 2024г во организација на Форумот за Авангардна Креативност (ФАК) од Прилеп, ќе се реализира десеттото издание на фестивалот на отворено “КРУШЕВО НИЗ КОРИЈА”, кој во своите содржини ќе опфати: кампување во крушевската корија на Мечкин Камен, концерт на бендот The Dreamers, тандем летови со параглајдер, планински велосипедизам, планинарска тура низ крушевската корија, промоција на храна од Slow Food Prilep. Сите овие активности ќе бидат дополнети со дегустација и промоција на крушевски специјалитети, како и организирана посета на културните и природни знаменитости што ги нуди Крушево.

Велосипедската тура ќе се вози на 17.08.2024г(недела) на две патеки :

1.Рекреативна тура низ Крушевските знаменитости

Старт 10:15 ч. Мечкин Камен

Офроуд тура низ Крушевската корија

Старт 10 ч. Мечкин Камен

Планинарската тура ќе се одвива по следнава рута : Мечкин камен – Станич – Кипрово – Слива – споменикот Македониум – градски плоштад во Крушево….можеме да ја окарактеризраме како средно тешка тура со должина од 15км……истата ќе се реализира на 18.08.2024 (недела) со старт во 10.00ч од Мечкин Камен.

Тандем летови со параглајдер ќе има во сабота , 17.08.24  од 14.00ч – 19.30ч и во недела  18.08.24 , од 10.00ч – 19.30ч .

Форум за авангардна креативност-ФАК, е здружение на граѓани кое веќе  25 години работи во областа на културата и уметноста, во насока на промоција на културниот идентитет препознатлив во меѓународни рамки. Насочен кон заштитата на културното наследство, како и кон подобрување на условите на граѓаните за квалитетен живот,  Форум за авангардна креативност реализираше повеќе значајни проекти во областа културата и културниот туризам. Исто така мотивирани од трендовите на авантуристичкиот туризам, ФАК организира и помага во организација на неколку веќе традиционални  аутдор настани на полето на активниот туризам во повеќе региони низ Република Македонија.

За подетални информации за настанот можете да се информирате на ивентот од истиот и од нашиот фан пејџ чии линкови следуваат во продолжение!

https://www.facebook.com/events/1510520256174021?ref=newsfeed

https://www.facebook.com/Krusevonizkorija

По пауза од неколку сезони вечните фудбалски ривали Вардар и Пелистер одново ќе водат битка каде што им е местото – во Првата македонска фудбалска лига

По тој повод „Чкембарите“ на несекојдневен начин го најавија своето присуство на овој дуел, откако се качија на коњи и ги „пецнаа“ своите ривали „Комитите“.

A зошто на коњи, епа погледнете во видеото во продолжение:

Големото дерби меѓу Вардар и Пелистер е закажано за в недела на Националната арена „Тодор Проески“ од 20:00 часот.

Одделот за внатрешна контрола, криминалистички истраги и професионални стандарди при Министсерството за внатрешни работи, до Основно јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворска полиција, поднесе кривична пријава против К.С. – полициски службеник во Полициската станица Бит Пазар поради постоење на основи на сомнение дека сторил кривично дело „обљуба со злоупотреба на положбата“ по член 189 став 1 од Кривичниот законик.

На 31.07.2024 околу 22:30 часот на бул.„Крсте Мисирков“ во Скопје пријавениот вршел сообраќајна контрола и ја злоупотребил својата положба на тој начин што откако оштетената го запрела возилото на негов знак, ја отворил вратата од возилото и ја допирал по телото оштетената.

Одделот за внатрешна контрола, криминалистички истраги и професионални стандарди против полицискиот службеник К.С. ќе поднесе предлог за поведување на постапка за утврдување на дисциплинска одговорност и ќе изрече задолжителни мерки за отстранување од работно место се до завршување на дисциплинската постапка.

Членот на Советот на јавни обвинители, Иџет Мемети признал вина и се спогодил со обвинителството за условна осуда, дознава Телма. Тој беше осомничен за примање награда за против законито влијание, за што Кривчниот законик предвидува од 1 до 5 години затвор.

Заедно со провосомничениот, врховниот судија Наке Георгиев беа осомничени дека лажно ветувале дека ќе влијаат и ќе му овозможат олеснување на екс градоначалникот на Ново Село, Боро Стојчев во предметот за шверц со марихуана.

Дека не сторил ништо незаконско пред медимите тврдеше и и поранешниот народен правобранител Иџет Мемети. На крајот на истрагата одлучил да признае вина и да се спогодат. Мемети се брани од слобода додека Георгиев е во Шутка речиси три месеци.

Дополнително, Мемети поднел и оставка која веќе е доставена до Собранието и до Советот на јавни обвинители.

Во годишниот извештај за Индексот на активна транспарентност за 2024 година, министерството за внатрешни работи бележи голем напредок од 87.5% за 2023 година на 95.7% за 2024 година. МВР е рангирано во најдобрата група со скок од седум места, во рангирањето на министерствата според активната транспарентност.

„Нашата цел како Влада и министерство е да ја унапредуваме полицијата во отворена, отчетна и транспарентна институција пред Вас граѓаните. А преку активната соработка со медиумите да може да се презентира и нашата намера за постојано градење на доверба помеѓу полицијата и граѓаните. Кога намерата е искрена и чесна, резултатите се позитивни, а граѓаните тоа го препознаваат.“, истакна министерот Тошковски.

Под „активна транспарентност“ се подразбира објавувањето информации на сопствена иницијатива на институциите, без притоа некој да има доставено до нив барање за пристап до тие информации.

– Постои и законска основа за проактивно објавување информации, која се наоѓа, пред сè, во Законот за слободен пристап до информациите од јавен карактер, но и во низа други закони. Освен од регулативата, активната транспарентност произлегува и од добрата практика, а институциите имаат обврски за проактивно објавување информации и од акциските планови во рамките на иницијативата за Партнерство за отворена власт, велат од МВР.