Премиерот Христијан Мицкоски од Самитот на Берлинскиот процес во Свети Стефан, Црна Гора, порача дека очекува во скоро време да биде валоризиран напредокот што земјата го постигнала во Реформската агенда и конечно да се отвори патот за преговори со Европската Унија.

– Факт е дека ние веќе имаме усогласена надворешна и безбедносна политика на Европската Унија, дека сме многу напред во испорака кога станува збор за Реформската агенда, дека буквално се што се бара од нас, а е поврзано со принципот по испорака да се оценува напредокот, ние тоа го правиме и го испорачуваме – рече Мицкоски во изјава за Националниот сервис.

Премиерот изрази очекување дека сè што е постигнато ќе биде наскоро валоризирано и дека ќе се даде шанса земјата да го започне процесот на преговори.

– Исто така истакнав дека постепеното или градуалното интегрирање претставува шанса и можност за сите нас, но тоа никако не смее да биде замена за полноправно членство во рамките на Европската Унија – подвлече Мицкоски.

Претходно, Мицкоски учествуваше на работниот ручек посветен на иднината на Берлинскиот процес и улогата на младите во обликувањето на иднината на Западен Балкан.

– Денеска присуствував на работниот ручек, посветен на иднината на Берлинскиот процес и улогата на младите во обликувањето на иднината на Западен Балкан. Регионалната соработка, размената на идеи и создавањето нови можности се важни чекори кон стабилен, просперитетен регион и забрзана европска интеграција – објави премиерот на својот Фејсбук профил.

Мицкоски ја предводи македонската делегација на Самитот, каде што се разговараше за економското поврзување на регионот, безбедноста и забрзувањето на интеграцијата во Европската Унија. Тој претходно изјави дека очекува силни пораки и конкретни резултати.

На настанот учествува и германскиот канцелар Фридрих Мерц, кој ја потврди поддршката за членство на земјите од Западен Балкан во Унијата, но порача дека владите мора да покажат политичка волја и да ги спроведат потребните реформи. Мерц се заложи за побрзо приближување на регионот и најави лична поддршка, истовремено барајќи засилување на реформските напори.

Берлинскиот процес е меѓувладина платформа покрената во 2014 година на иницијатива на Германија, со цел да се забрза евроинтеграцијата и да се продлабочи регионалната соработка на земјите од Западен Балкан.

Синоќа во Ликовната галерија од ЦК”Марко Цепенков” во Прилеп беше отворена изложбата на слики “Конгломерати” од академскиот уметник Сашо Ацковски, кој пред прилепчани се претстави со околу 25 дела, кои се изработени во акрилна техника и на нив е преставена организирана концентрација на различни елементи по својата природа.

Од една страна има апстрактни мотиви создадени од човечка рака, а од друга страна има електронски индустриски делови создадени од машина.На овој начин уметникот го пресликува современото општество во уметничкото дело.

“Целта со изложбата ми е да ја поттикнам публиката да размисли за балансирана и контролирана употреба на техниката и технологијата во секојдневниот живот. Да ја користи истата само како средство, односно алатка за подобро опстојување и функционирање во општеството, а со самото тоа да се постигне враќање кон реалните социјални интеракции и комуникации, односно да поттикне враќање кон природата и хармонијата -изјави Ацковски, кој има дипломирано на ФЛУ во Скопје, отсек сликарство со насока конзервација и реставрација во класата на проф. Благоја Маневски.

Реализирал повеќе изложби, самостојни и групни.Член е на ДЛУМ. Изложбата е поддржана од Министерството за култура и туризам.

Просечната месечна исплатена нето-плата во земјава во август 2026 година изнесувала 48.733 денари, што е зголемување за 7,6 проценти во споредба со истиот месец лани, објави Државниот завод за статистика.

Растот на просечната нето-плата на годишно ниво, пред сè, се должи на зголемувањето на платите во секторите Снабдување со вода; отстранување на отпадни води, управување со отпад и дејности за санација на околината за 11,9 проценти, Административни и помошни услужни дејности за 10,7 проценти и Преработувачка индустрија за 9 проценти.

Во август, во споредба со претходниот месец, зголемување на просечната исплатена нето-плата е забележано во секторите Снабдување со електрична енергија, гас, пареа и климатизација за 5,4 проценти, Уметност, забава и рекреација за 5 проценти и Административни и помошни услужни дејности за 4,2 проценти.

Просечната бруто-плата, пак, во август годинава изнесувал 73 336 денари.

Нина Талеска од танцовото студио BREAK A LEG го освои второто место на Светското првенство во хип-хоп во Келце, Полска, постигнувајќи историски успех за македонскиот танц!

Во конкуренција на најдобрите млади танчери од светот, Нина освои сребрен медал во категоријата Хип-хоп соло Мини кидс, остварувајќи го најголемиот успех за Македонија во оваа категорија досега.

„Овој успех е резултат на огромна посветеност, дисциплина и напорна работа. Горда сум на Нина и верувам дека ова е само почеток на нејзините големи успеси“, истакна нејзиниот тренер и кореограф Андријана Петковски.

Светското првенство, кое се одржува од 17 до 24 октомври, обединува околу 4.000 танчери од 34 земји.

Тимот на BREAK A LEG ги продолжува настапите во јуниорските и сениорските категории, со надеж за нови светски успеси.

Честитки за Нина, нејзините тренери и целиот тим!

На овој голем ден за нас Македонците, во чест на сите оние кои ја натопиле оваа земја со својата крв, за слобода, своја и за идните поколенија, денес се сеќаваме на сите херои и ги величиме нивните имиња. Од овој ден Македонецот почнал да ја исправа својата глава над острата душманска сабја и организирано да се спротивставува. Ова е денот кога напатениот, измачен и угнетен народ, започнал да ја реализира својата идеја, својата кауза.

Положбата на Македонците и пред тој конгрес не била во ништо подобра, но овој момент од историјата значел продолжување на агонијата, нови агресии, илјадници загубени животи.

Со други зборови Македонскиот народ бил културно, духовно, политички, национално и просветно обесправен.

Ваквата неподнослива состојба, како и пропангандите на соседните народи за асимилација, се причините за формирањето на Македонската револуционерна организација (МРО).

На 23 октомври 1893 година во Солун, шестмина револуционерни интелектуалци : Дамјан Груев, д-р Христо Татарчев, Петар Поп Арсов, Иван Хаџи Николов, Христо Батанџиев и Андон Димитров, со цел по пат на вооружена борба да се издвојува автономија за Македонија ја формираат организацијата и го започнуваат нејзиното ширење.

Усвоен бил Устав на организацијата, Централен Комитет ( претседател д-р Христо Татарчев, секретар Дамјан Груев ), како и мрежа на организации низ поголемите центри на Македонија. Особено организацијата добила на тежина кога кон неа се приклучиле Гоце Делчев, Јане Сандански, Пере Тошев и други револуционери кои ја делеле истата цел.

Цели на организацијата биле следните:

1. Организацијата да е тајна и револуционерна,

2. Нејзината територија да ја сочинува само Македонија со нејзините природни и географски граници,

3. Во неа да членуваат родени и лица што живеаат во Македонија без разлика на вера и народност,

4. Политичкото верују на организираните Македонци е автономна Македонија и

5. Да се чува самостојноста на организацијата за да не падне под влијание на политиката на соседните држави.

Започнала да се реализира паролата “Слобода или смрт за Македонија”. Сите надежи и сите погледи понатаму се вперени кон организацијата и нејзиното дејствување.

Конечно народот Македонски имал свој заштитник, луѓе кои ќе ја спроведуваат правдата на дело и ќе ги шират идеалите за слобода и самостојност.

Следувале Ресенското советување во летото 1894г. кога се формирани трите окрузи Скопски, Солунски и Битолски, па првиот Солунски конгрес во јануари 1896г. кога организацијата била преименувана во (ТМОРО) или Тајна македонско-одринска револуционерна организација.

По овој конгрес забрзано се обучувале и вооружувале чети. Со вооружените сили раководел Гоце Делчев кој го формирал и Четничкиот институт.

На Солунскиот конгрес во 1903 година, во отсуство на Делчев, влијателните луѓе на организацијата Груев и Сандански го наметнале своето мислење за кревање на Илинденското востание на втори август 1903 година.

Токму после овој настан на површина испливале внатрешните превирања, надворешните влијанија, предавствата и меѓусебните пресметки, како и борбата за превласт.

Тоа ја ослабнало организацијата до ниво што голем дел од лидерите биле убиени, а мекедонското ткиво било разединето.

На Рилскиот конгрес во 1905г. организацијата одново претрпува промени, името било заменето со (ВМОРО) или Внатрешна македонска одринска револуционерна организација.

Со вакво име организацијата постоела до 1908 и почетокот на Младотурската револуција кога и дошло до конечен расцеп и нејзин престанок.

Не смеат а да не се споменат значајните битки кој ги водела организацијата со Турците, би ги издвоиле битките кај: Могила, Готен, Трсје, Слива, Ножот, Маргара, Баница, Мечкин Камен, Арменско и мн. други.

Како пандан на претходната организација, кон крајот на 1919 година е формирана и (ВМРО) – Внатрешната македонска револуционерна организација, со Централен комитет (Тодор Александров, Александар Протогеров и Петар Чаулев).

И во овој период мисијата била иста автономија или независна Македонија, односно создавање на самостојна држава за Македонците.

Потсетувајќи се на овие денови од Македонската историја во секој еден од нас треба да се развива чувство на гордост, чувство на херојство.

Да вградиме такво чувство и кај идните генерации, за да ја пренесуваат вистината за македонското страдање, но и за македонското бунтовничко спротивставување против угнетувачите тогаш и сега.

ЧЕСТИТ ПРАЗНИК НА СИТЕ МАКЕДОНЦИ !

Денес, 22 октомври 2026 година, во Мултимедијалниот центар во Кривогаштани се одржа едукативната презентација „Изрази се – младите го кршат молкот“, посветена на менталното здравје на младите. Настанот се реализираше на иницијатива на Општина Кривогаштани, во соработка со СОУ „Ѓорче Петров“ – Прилеп.

На презентацијата присуствуваа учениците од деветто одделение од ООУ „Манчу Матак“ – Кривогаштани и ООУ „Јонче Смугрески“ – Обршани, кои имаа можност да проследат содржини за препознавање на стресот и анксиозноста, справување со училишните и врсничките притисоци и значењето на навременото барање поддршка.

Презентацијата се надоврза на настанот што СОУ „Ѓорче Петров“ го организираше по повод Светскиот ден на менталното здравје. Преку обработените теми беше истакнато колку е важно младите да можат отворено да зборуваат за своите чувства и грижи, да знаат кому можат да се обратат и да бидат охрабрени да побараат помош кога им е потребна.

Со организирањето на оваа активност, Општина Кривогаштани го отвора Мултимедијалниот центар за содржини што одговараат на потребите на младите и овозможуваат разговор за прашањата што ги засегаат во секојдневието. Грижата за нивното ментално здравје бара внимание и соработка меѓу семејствата, училиштата, стручните лица и локалната самоуправа.

Општина Кривогаштани упатува благодарност до СОУ „Ѓорче Петров“ – Прилеп и говорниците за соработката и споделеното знаење, како и до двете основни училишта и учениците за учеството на настанот.

Градоначалникот на Битола, Тони Коњановски, во Херцег Нови, Црна Гора, присуствуваше на одбележувањето на 50-годишнината од збратимувањето на двата града, при што беше потпишан Меморандум за потврдување на соработката.

Со меморандумот, Битола, Херцег Нови, Бања Лука, Крањ и Земун ја потврдија определбата за продолжување на партнерските односи и продлабочување на соработката во повеќе области.

Коњановски истакна дека во изминатите години соработката меѓу Битола и Херцег Нови се интензивирала преку заеднички настани и активности, нагласувајќи ја важноста на пријателските врски меѓу двата града.

„Со садењето на дрвото на пријателството, подадовме рака за нашата заедничка иднина, за желбата да бидеме поблиски, да си помагаме едни на други и, пред сè, цврсто да стоиме на темелите на заедништвото, пријателството и визијата за иднината“, истакна Коњановски.

На свеченоста ѝ претходеше садење дрво на пријателството на влезот во паркот „Бока“, како симбол на трајноста на врските меѓу градовите и нивното пренесување на идните генерации. Јубилејот беше заокружен со концерт на традиционална и класична музика, како и преработки на светски хитови.

Претставници на Витаминка од трите клучни сектори засегнати од европската Регулатива за амбалажа и отпад од амбалажа (PPWR) – Развој, Набавка и QA – на 21 и 22 октомври 2026 година учествуваат на меѓународниот PPWR Factory Execution Forum 2026, организиран од TBM Group во Дизелдорф, Германија.

Настанот обединува експерти и претставници на компании од различни индустрии, со фокус на практичната примена на новите регулаторни барања, одржливите решенија за пакување и предизвиците што нивното спроведување ги носи во реалните производствени услови.

Регулативата (ЕУ) 2025/40 – PPWR претставува значаен чекор кон намалување на отпадот од амбалажа, поефикасно користење на ресурсите и развој на циркуларна економија. Таа воведува барања поврзани со можноста за рециклирање на амбалажата, минималната содржина на рециклирани материјали кај одредени видови пластична амбалажа, намалувањето на непотребната амбалажа, повторната употреба и означувањето за правилно селектирање на отпадот. Регулативата стапи во сила во февруари 2025 година, а нејзината општа примена започна на 12 август 2026 година, со постепено воведување на дел од конкретните барања и рокови.

За прехранбената индустрија, усогласувањето со PPWR претставува повеќе од регулаторна обврска. Тоа бара внимателно преиспитување на постојните решенија за пакување, изборот на материјали и добавувачи, техничките спецификации и можноста амбалажата истовремено да ги исполнува барањата за безбедност и заштита на производот, квалитет, функционалност и одржливост.

Преку учеството на овој форум, Витаминка ги следи актуелните европски насоки, практичните искуства и индустриските решенија што можат да придонесат кон навремена подготовка и одговорно управување со промените во областа на амбалажата.

Целта е новите барања да се преточат во применливи и долгорочно одржливи решенија – со зачувување на безбедноста и квалитетот на производите, ефикасноста на производството и конкурентноста на компанијата.

Октетот Прилеп на 26 октомври (понеделник), со почеток од 18:00 часот во големата сала во Центарот за култура “Марко Цепенков”, ќе го одржи својот традиционален годишен концерт, на кој публиката ќе има можност да ужива во препознатливите звуци на староградската песна, но и во ново подготвени евергрин композиции.

Како гости на концертната вечер ќе настапат Сашо Башески, Викторија Георгиоска и Михаил Милошески, кои заедно со членовите на октетот ќе придонесат за една музичка вечер исполнета со емоции, убави мелодии и квалитетна вокална изведба.

Октетот Прилеп постои повеќе од 30 години и работи во рамките на Центарот за култура „Марко Цепенков“. Во текот на долгогодишното постоење, ансамблот посветено ја негува староградската песна, музичкото наследство и традицијата, настапувајќи на бројни концерти и фестивали низ Македонија. Зад себе има и неколку издадени албуми, со кои остава траен белег во зачувувањето и афирмацијата на македонската музичка култура.

Годишниот концерт е уште една можност публиката да ја почувствува убавината на песната што ги поврзува генерациите, но и да се запознае со новите музички содржини што ги подготвува октетот.

Влезници и информации на телефон: 078 664 701.

Во петок, на 30 октомври, во TABANA Caffee Club во Прилеп ќе се одржи собир на билјард играчи, клубови и љубители на овој спорт од цела Македонија, со една заедничка цел – да му дадат поддршка на Владe и да го поздрават неговиот пласман на Европското првенство во Полска.

Под мотото „Сите заедно во Табана – за другарот, за билјардот, за Владe!“, настанот има за цел да покаже дека билјардот не е само игра, туку спорт што ги поврзува луѓето, гради пријателства и создава силно чувство на заедништво.

Организаторите упатуваат повик до сите билјард играчи, клубови и љубители на билјардот, без разлика од кој град доаѓаат и за кој клуб настапуваат, да бидат дел од оваа спортска приказна и заеднички да ја покажат поддршката за Владe и неговиот успех.

Целта е да се соберат што повеќе луѓе на едно место, во атмосфера исполнета со другарство, почит и спортски дух, испраќајќи порака дека зад секој играч стои цело спортско семејство.

„Една Македонија, едно билјард семејство, едно големо срце!“ е пораката со која се повикуваат сите љубители на овој спорт да ја наполнат „Табана“ и да покажат дека вистинските спортски вредности се многу повеќе од резултатите на зелената маса.

Петок, 30 октомври 2026 година – сите патишта водат кон TABANA Caffee Club во Прилеп, за Владe, за билјардот и за македонското спортско другарство!