Универзитетот „Св. Климент Охридски“ – Битола, како членка на Алијансата на европски универзитети COLOURS, е домаќин на дводневен колабораториум (CoLab) посветен на примената на вештачката интелигенција, одржливите прехранбени системи и зелените технологии како двигатели на регионалниот развој.

На настанот се вклучени претставници од бизнис-секторот, Стопанската комора, Агенцијата за поттикнување на развојот на земјоделството и државните институции. Активно учество земаат и студентски тимови од Технолошко-техничкиот факултет – Велес, Факултетот за информатички и комуникациски технологии – Битола и Техничкиот факултет – Битола.

Меѓународната димензија на настанот ја надополнуваат гостите од партнерските универзитети во рамките на COLOURS, проф. д-р Ивана Мајиќ од Универзитетот во Осиек, Хрватска, и Бенгт Фелбе, претставник на Општина Бјув и соработник на Универзитетот Кристијанштад од Шведска.

Главната цел на CoLab е да се поттикне поврзување на научните сознанија, потребите на стопанството и иновативниот потенцијал на студентите, преку разгледување на можностите што ги нудат дигитализацијата, вештачката интелигенција и зелените технологии.

На отворањето се обратија претставници на академската заедница и бизнис-секторот. Проректорот за наука на УКЛО, проф. д-р Горан Илиќ, ја нагласи определбата на Универзитетот да биде активен партнер на заедницата и да придонесува кон остварувањето на целите за одржлив развој.

Тој посочи дека концептот на COLOURS се темели на принципот на четирикратен хеликс, односно соработка меѓу академската заедница, јавниот сектор, бизнисот и граѓанското општество. Притоа, истакна дека УКЛО континуирано работи на промоција и афирмација на Целите за одржлив развој на Обединетите нации.

За предизвиците поврзани со дигитализацијата на производствените процеси и значењето на младите во нивното унапредување зборуваше проректорката за студентски работи, проф. д-р Светлана Николоска. Таа ја истакна потребата од особено внимание при управувањето и заштитата на податоците, нагласувајќи дека и малите пропусти во дигиталните системи можат да предизвикаат сериозни последици. Воедно, ги охрабри студентите да бидат поактивни во ваквите иницијативи и да ја зајакнуваат соработката со академскиот кадар.

Претседателот на Регионалната стопанска комора на Битола, м-р Мирко Велковски, ја потенцираше важноста од партнерството меѓу Универзитетот и компаниите. Според него, УКЛО претставува значаен мост меѓу науката и стопанството, овозможувајќи научниот потенцијал да се преточи во практични придобивки за бизнис-заедницата и поголема конкурентност на европските и светските пазари.

Програмата на првиот ден опфаќа два мастеркласа и тркалезна маса на тема „Четирикратен хеликс – Регионални потреби и предизвици“. Преку нив, претставниците на академскиот, јавниот, бизнис и невладиниот сектор заеднички ги разгледуваат најважните потреби и предизвици со кои се соочува регионот.

Вториот ден ќе биде посветен на практичната работа. Ќе се формираат интердисциплинарни студентски тимови кои ќе развиваат конкретни предлози и решенија врз основа на идентификуваните регионални потреби. Предвидено е презентирање на резултатите, стручни коментари и дискусија за можностите за примена на предложените решенија.

Професорката Елизабета Тошева, раководителка на работниот пакет 9, во чии рамки се организира настанот, најави дека најдобрите студентски идеи ќе добијат можност за почетна финансиска поддршка.

Таа истакна дека посебната вредност на ваквиот пристап е во директното поврзување на студентите со реалните потреби и очекувања на компаниите, при што стопанството добива можност да го препознае и искористи потенцијалот на младите.

По завршувањето на колабораториумот, УКЛО планира да објави посебен повик за почетно финансирање (seed funding), преку кој ќе се поддржи понатамошниот развој на идеите создадени во текот на настанот.

Со оваа иницијатива, УКЛО продолжува да ја зајакнува соработката меѓу универзитетот, стопанството и институциите, отворајќи простор за иновативни решенија кои можат да придонесат кон одржливиот развој и економскиот напредок на регионот.

Од понеделник, 16 ноември, со работа ќе започне и експозитурата на „АЛТА банка“ АД Битола во Прилеп, со што се проширува достапноста на услугите за клиентите, информираат од Народната банка.

Во прилепската експозитура, граѓаните кои имаат платежна сметка, но немаат платежна картичка, ќе можат да подигнат готовина до 20.000 денари во период од две недели. Истовремено, со работа продолжуваат и филијалите во Струмица и Тетово, како и експозитурата во Трговскиот центар „Бисер“ во Скопје, каде клиентите можат да подигнуваат готовина на шалтер, да плаќаат комунални услуги и да отплаќаат кредити.

Дополнително, од 10 ноември во функција се и електронското и мобилното банкарство. За клиентите со платежни картички останува да важи лимитот за располагање со средства до 15.000 денари неделно, додека за оние без картички ограничувањето е до 20.000 денари на две недели. Овие лимити се применуваат збирно за сите сметки и канали, вклучувајќи плаќања во трговијата, на интернет, повлекување од банкомат, на шалтер и преку електронско банкарство.

Физичките лица можат без никакво ограничување на износот да располагаат со новите приливи на нивните сметки, доколку тие средства пристигнуваат од сметки отворени во други банки и даватели на платежни услуги. Компаниите, пак, можат да исплаќаат плати заедно со даноците и придонесите, под услов тоа редовно да го правеле преку сметките во оваа банка во последните три месеци.

Од Народната банка посочуваат дека продолжуваат внимателно да ја следат состојбата во „АЛТА банка“ АД Битола и да преземаат чекори за олеснување на пристапот на клиентите до нивните средства.

-На 12.11.2026 во 20:45 часот на ул.,,11 Октомври“ во Прилеп, полициски службеници од ОВР Прилеп го лишија од слобода А.Ц.(55) од Прилеп. При контрола во сообраќајот полициските службеници сопреле патничко возило „опел“ со прилепски регистарски ознаки, кое А.Ц. го управувал и по преземени мерки било констатирано дека го управува возилото под дејство на алкохол, односно му биле измерени 3,04 промили алкохол во крвта. По документирање на настанот, ќе следува соодветен поднесок, информираат од СВР Битола.

Сите билети за „Виена во Битола“ на Оркестар ДИВА се распродадени. Тринаесеттото издание на новогодишниот концерт, чиј автор и диригент е Владимир Димовски, ќе се одржи на 23 декември во Центарот за култура во Битола. По распродажбата на билетите, публиката веќе се интересира дали ќе има уште една изведба.

Со „Виена во Битола“, Димовски ѝ даде нов формат на новогодишната концертна традиција во градот. Со текот на годините концертот стана дел од празничниот календар на Битола, а во изминатите три години се одржуваа по две изданија годишно.

Битола памети новогодишни оркестарски концерти и од порано, кога ги приредувал професорот Зоран Маневски. Подоцна, Владимир Димовски, Зоран Маневски и Никола Трајановски заедно го возобновија Битолскиот камерен оркестар, денешен Оркестар ДИВА. Тогаш Димовски го врати новогодишниот концерт на битолската сцена со своја авторска замисла и му го даде името „Виена во Битола“. Неговата идеја беше битолската публика да ја доживее свечената атмосфера на виенските новогодишни концерти во својот град, во изведба на својот оркестар. Димовски веќе долги години сам го води оркестарот.

„Ви благодариме, Битола! Веќе 13 години ја споделуваме оваа традиција со вас. Особено ни е драго што „Виена во Битола“, концерт создаден целосно во македонска продукција, и оваа година толку брзо ја исполни салата“, изјавуваат од Оркестар ДИВА.

За можноста за втор концерт, од оркестарот додаваат: „Годинашната програма ја осмисливме во два дела и токму затоа концертот на 23 декември ќе започне во 19:00 часот. Кога планираме уште една изведба, треба да ги земеме предвид и времето на почеток и траењето на целата програма. Затоа сè уште разгледуваме дали има услови за дополнителен термин. Доколку го потврдиме, датумот и деталите за билетите ќе ги објавиме преку нашите официјални канали.“

Градоначалникот на општина Кривогаштани, Игор Каравилоски, изврши увид на почетните градежни работи за пречистителната станица во населеното место Бела Црква. Со оваа фаза од проектот за доградба на фекалната канализација, Бела Црква и Воѓани ќе добијат заедничка станица за третман на комуналните отпадни води.

Станицата е проектирана за 1.000 еквивалентни жители и ќе врши механичко и биолошко пречистување. Предвидени се монтажа на постројката со пумпи, таложници и филтер, поставување на електричните инсталации и уредување на локацијата. Работите опфаќаат и чистење на 700 метри од постојниот одводен канал, во кој ќе се испушта пречистената вода.

Договорната вредност на изградбата изнесува 8.991.592,04 денари со ДДВ. Финансирањето е предвидено преку капитална дотација, согласно договорот на Општина Кривогаштани со Министерството за животна средина и просторно планирање.
Изведувач на работите е „Игнација ФМ“ ДООЕЛ Битола, а стручниот надзор го врши „МГ Проект“ ДООЕЛ Скопје.

Договорениот рок за изведба е шест месеци од воведувањето на изведувачот во работа. Со пуштањето на станицата во употреба, отпадните води од двете населени места ќе се пречистуваат пред испуштањето, со што ќе се намали ризикот од загадување на околните води и почвата.

По повод одбележувањето на Светскиот ден на дијабетесот – 14ти Ноември, нашата здравствена установа реализираше повеќе активности со цел подигнување на свеста за дијабетесот, неговата превенција, раното откривање и навременото лекување.

Во рамките на одбележувањето беа реализирани следните активности:

-Стручно предавање на тема „Рано дејствување кај дијабетесот“, одржано од супспец. д-р Катерина Чешлароска Маркушоска, со акцент на важноста на раното препознавање и навременото лекување на болеста.

-Бесплатно мерење на гликемија и артериски крвен притисок во холот на нашата болница, во кое учествуваа и учениците од ДСУ „Ѓорче Петров“ – Прилеп, заедно со нивниот стручен наставник Ленче Јованоска. Со нивното учество беше даден значаен придонес во промовирањето на превенцијата и здравствената едукација.

-Активности во Инсулинската аптека – депо при Здравствен дом – Уред Прилеп, насочени кон поддршка и унапредување на грижата за лицата со дијабетес.

Со овие активности ја истакнуваме важноста на превенцијата, редовните здравствени контроли, едукацијата и заедничката грижа за здравјето.

Дијабетесот бара внимание, знаење и навремено дејствување. Превенцијата и раното откривање се чекор кон подобар и поквалитетен живот!

ЈЗУ Општа болница со проширена дејност – Прилеп останува посветена на унапредување на здравствената заштита и грижата за здравјето на граѓаните.

Пишува: Љубица Ангелкова од Битола, истакната македонска новинарка, медиумски професионалец и експерт за односи со јавност (ПР)

Има луѓе кај кои прво одиш за да ти ја средат косата, а со годините веќе одиш и за да се видите.
Косата, се разбира, останува сосема добра причина 😉

Кај Сашо од Прилеп, одам од минатиот век. Еден период и тој доаѓаше во Битола. Се менуваа адресите, фризурите, поводите. Од тие средби остана пријателство што одамна има за што да разговара и надвор од огледалото.

Годинава Сашо одбележува 40 години работа. А мене повод да седнам и да му го посветам овој текст ми даде една фотографија. Баба, ќерка, внука и правнука. Четири генерации од едно семејство кај истиот фризер. Замислете колку различни вкусови, карактери и ставови за должината на косата и за формата, а сите се согласуваат кај кого да одат.

Ми беше убава таа мисла. Дека можеш толку долго и толку добро да ја работиш својата работа, што некој еден ден ќе ти го донесе и правнучето. А ти ќе се наведнеш до неговата висина и ќе почнеш да ја заслужуваш довербата одново.
Сашо, среќни 40 години работа. Овој текст е мојот мал подарок за твојот голем јубилеј. И за сето она што со години се подразбира кога велиме „одам кај Сашо во Прилеп“.

„Кај Сашо, во четири генерации“. Мојата приказна за него, инспирирана од нив.

КАЈ САШО, ВО ЧЕТИРИ ГЕНЕРАЦИИ

Постојат семејства во кои се наследуваат куќи, накит, рецепти и расправии што никој веќе не памети како почнале. Во едно прилепско семејство, меѓу работите што вреди да се зачуваат е и бројот на фризерот.

Бабата, ќерката, внуката и правнуката одат кај Сашо Костадиноски.

Четири генерации. Само помислете колку различни идеи за убавина има во таа реченица. Колку пати нешто било модерно, престанало да биде, па се вратило со ново име и повисока цена. Колку ќерки одлучиле дека нема да личат на своите мајки. И сепак, сите седнале кај истиот човек.

Во професија што живее од промени, Сашо успеал да стане константа.

Годинава одбележува четириесет години работа. Убава, заокружена бројка, зад која стои многу работа што воопшто не е свечена. Часови на нозе. Концентрација и кога денот е при крај. Разговори, процени, повторувања. Обврската и последниот клиент да го добие вниманието на првиот.

Занаетот има таа незгодна особина што минатите успеси не те ослободуваат од денешната задача. Можеш да имаш одлична репутација, но некој штотуку седнал пред тебе и очекува добра фризура. За својата глава, луѓето имаат оправдано високи критериуми.

Со годините, „кај Сашо“ станало дел од секојдневието на Прилеп. Адреса што се пренесува во разговор, препорака поради која се доаѓа и од друг град.

Така, впрочем, се создава и добар дел од угледот на градовите. Преку конкретни луѓе поради кои вреди да отидеш таму.

Прилеп е познат по скарата. Јас одамна го поврзувам и со добри фризери. Не гледам причина градот да се задоволи со една репутација, особено кога и за другата има докази.

Салонот на Сашо има дрвени огледала, камен, бели завеси, старо радио. Предмети со карактер, собрани во простор што не изгледа како да побарал дозвола од Пинтерест. Тука има вкус кој веќе поминал низ неколку моди и очигледно нема намера да се вознемирува поради следната.

Тоа му прилега на еден добар салон. Фризерството постојано преговара меѓу она што се носи и она што некому му стои. Разликата е мала само додека не ја видиш во огледало.

Денес можеме да донесеме стотици фотографии за да објасниме што сакаме. Сепак, потребен е некој што ќе ја погледне нашата коса, нашето лице, начинот на кој се движиме и ќе процени што од таа замисла може да живее со нас. И во деновите кога немаме време. Особено тогаш.

Тука знаењето станува лично. Истата техника, применета врз различни луѓе, бара различни одлуки. Некому треба да му предложиш. Некого треба да го сослушаш. Со некого треба внимателно да го договориш значењето на зборот „малку“.
А потоа, сето тоа треба добро да го направиш.

Затоа фотографијата со четирите генерации кажува толку многу за Сашо. Довербата можеби почнала како семејна препорака, но секоја од тие жени имала можност да избере и некој друг. Лојалноста кон фризерот, за среќа, не се регулира со тестамент.

Тие останале.

Најмалата допрва го запознава човекот кому нејзиното семејство одамна му верува. На фотографијата тој е спуштен до нејзината висина, со чешелот во раката. Таа го гледа сериозно. Неговиот четириесетгодишен стаж засега не ѝ значи ништо. Важен ѝ е начинот на кој ѝ приоѓа.

Во тој кадар има нешто многу точно за добрите мајстори. По сите години, повторно почнуваш од почеток со секој нов човек.

На другата фотографија Сашо е во столот, а околу него се неговите три деца. Александра и Александар, постарите близнаци, и Адријан, кој го продолжува занаетот.

Адријан учел во познатата Академија Пањковиќ во Белград. Покрај можноста да учи од татко му, стекнал и свое школување, искуство во друга средина, основа врз која ќе го развива сопствениот начин на работа.

Тоа е важен дел од продолжувањето на една семејна професија. Да има место и за она што следниот човек ќе го донесе. Наследството бара доволно почит за да го зачуваш и доволно слобода за да направиш нешто свое со него.

На фотографијата на која потстрижува, Адријан е сосредоточен на праменот меѓу прстите. Семејната приказна тука станува негова работа. Презимето може да ја отвори вратата. Клиентот повторно ќе дојде поради раката.

За Сашо, ова се две убави мерки за изминатите четириесет години. Од едната страна, луѓе што му ги доверуваат своите деца. Од другата, неговото дете што ја избрало истата професија. Во двата случаи, некој одблизу гледал што прави и решил дека вреди да продолжи со него.

Таков углед се создава бавно. Често и без големи зборови. Еден задоволен човек му кажува на друг. Некој доаѓа по препорака, па останува со години. Името на мајсторот влегува во семејните разговори, во плановите за неделата, во подготовките за важен ден. Станува едно од оние имиња на кои не им треба презиме.

Јас одам кај Сашо од минатиот век. Доволно долго за да немам потреба да го идеализирам, а да имам добра причина да го напишам овој текст. Знам што значи да седнеш кај човек со кого објаснувањето не почнува секогаш од нула. Со време, и тоа станува дел од добрата услуга.

Но најдобрата приказна за неговиот јубилеј сепак е на фотографијата со четирите генерации. Еден човек ја работел својата работа доволно добро и доволно долго за да стане заеднички избор на луѓе што речиси сигурно не се согласуваат за сè друго.

Четириесет години подоцна, Сашо има нешто што секоја реклама се обидува да го постигне.

Некој што го сакаш ти вели „Оди кај него“.

И ти одиш.

Во рамките на проектот WATERVILL, кој го спроведува Општина Битола, ЈКП „Водовод“ – Битола беше домаќин на претставници на Политехничкиот универзитет (UPV) Валенсија од Шпанија и на Универзитетот (UOWM) од Кожани, Грција.

На средбата, проектниот тим на Општина Битола ги претстави активностите на проектот. Директорот на ЈКП „Водовод“ – Битола, Андреј Гинов, и дипломираниот машински инженер Александар Велјановски ги запознаа проектните партнери со состојбата на водоснабдителниот систем, тековните предизвици и плановите на претпријатието за модернизација на опремата за управување со водоводната мрежа.

Посебно внимание беше посветено на примената на дигитални и автоматизирани технологии за континуирано следење на протокот и притисокот во мрежата. Податоците од мерењата ќе помогнат во навременото откривање на загубите и во поекономичното планирање на производството на вода според потребите на корисниците.

На работниот состанок, партнерите се запознаа со функционирањето на системот SCADA и разговараа за десетте локации во руралните подрачја на кои се планира примена на иновативни решенија за подобрување на водоснабдувањето со средства одобрени во рамките на проектот.

Во теренскиот дел од програмата, партнерите ја посетија филтерницата во село Дихово каде заедно со стручниот тим извршија увид на неколку од локациите предвидени за вградување на новата опрема.

Во рамките на проектот, кој е финансиран преку програмата Interreg Euro-MED, партнерите претходно реализираа теренски посети во општините Илирска Бистрица и Теслиќ. Планирана е посета и на Општина Жабљак.

Проектот WATERVILL е насочен кон справување со недостигот на вода во руралните и планинските подрачја на Медитеранот. Тој предвидува истражување и развој на стратегии за поефикасно управување со водните ресурси, како и пилот-примена на напредни решенија во четири општини од четири земји. Меѓу предвидените решенија се дигиталното откривање на загубите на вода и развојот на инфраструктура отпорна на климатските промени. Резултатите и добрите практики ќе се споделат во 14 земји со цел нивна долгорочна примена. Се очекува овие решенија да им помогнат на
локалните власти и водоводните претпријатија да обезбедат подобар пристап до безбедни и одржливи водни услуги за илјадници граѓани.

Покрај активното учество во проектот WATERVILL, ЈКП „Водовод“ – Битола работи и на други проекти за унапредување на автоматизацијата и дигитализацијата на водоснабдителниот систем. Со овие проекти се предвидува попрецизно следење на состојбата во мрежата, навремено откривање и побрзо отстранување на дефектите, како и поефикасно управување со системот. Целта е посигурно водоснабдување за населението.

Јошевски најави заложба дел од средствата да стигнат до земјоделци, стартапи, претприемачи и бизниси управувани од жени во нашата земја

Вкупно 30 милиони евра за микрофинансирање во шест земји од Западен Балкан треба да овозможи програмата SAFE– Sustainable Access to Finance for Entrepreneurship, потпишана на 11 ноември во Сараево.

Средствата ќе се пласираат преку локални микрофинансиски институции, со цел да се подобри пристапот до кредити за микропретприемачите и малите бизниси.

За нашата земја, која е меѓу опфатените земји, програмата отвора можност за дополнителни извори на финансирање на домашните компании. Никола Јошевски, претседател на Групацијата на небанкарски финансиски институции при Стопанската комора на Северна Македонија, најави дека Групацијата ќе се заложи дел од овие средства да стигнат до земјоделци, стартапи, претприемачи и бизниси управувани од жени во земјава.

Оваа заложба се надоврзува на повеќегодишната меѓународна соработка на Групацијата и на контактите остварени за време на МикроБалканс 2026. Во фокусот е поврзувањето со финансиски партнери што можат да помогнат во надминувањето на една од главните пречки за раст на малите компании, пристапот до соодветно финансирање.

На регионалниот панел во Сараево, Јошевски ги истакна потребите на бизнисите што имаат редовни клиенти, побарувачка и планови за инвестиции, но поради недоволно обезбедување или кратка кредитна историја тешко доаѓаат до традиционални банкарски кредити.

„Овие бизниси имаат потенцијал. Имаат клиенти, имаат идеи и сакаат да растат. Понекогаш им е потребен само мал кредит за да купат опрема, да го зголемат производството или да вработат уште едно лице. Токму тука микрофинансирањето може да помогне“, истакна Јошевски.

За да се прошири поддршката за овие компании, потребни се и попристапни извори на капитал за институциите што ги финансираат. Во своето обраќање, претседателот на Групацијата ја нагласи важноста на механизмите за споделување на ризикот и соработката со европските финансиски институции.

„Ако имаме поевтини извори на финансирање, можеме да им понудиме подобри услови на нашите клиенти. А ако го споделуваме ризикот со партнерите, можеме да финансираме повеќе мали бизниси“, посочи Јошевски.

SAFE, Sustainable Access to Finance for Entrepreneurship, е иницијатива на CDP со поддршка од Европската Унија преку Инвестициската рамка за Западен Балкан (WBIF). Покрај Северна Македонија, ги опфаќа Албанија, Босна и Херцеговина, Косово, Црна Гора и Србија, со посебно внимание на бизнисите управувани од жени и млади.

Програмата вклучува и инвестициски грантови и техничка помош за јакнење на оперативните капацитети, еколошките, социјалните и управувачките практики и долгорочната одржливост на микрофинансиските институции.

За земјoдoлците и малите производители, таквата поддршка би можела да овозможи инвестиции во опрема и поголемо производство. За стартапите и претприемачите, таа би отворила простор за развој на производи, проширување на работењето и нови вработувања. Во обраќањето беа истакнати и можностите за поддршка на руралните заедници и вложувањата во дигитални технологии и енергетска ефикасност.

„За мене, успехот не е само во бројот на кредити што ги одобруваме. Успехот е во тоа на колку бизниси сме им помогнале да пораснат, колку нови работни места сме помогнале да се создадат и колкава вредност сме донеле во нашите заедници“, порача Јошевски.

Целосно опремена просторија за стоматолошки интервенции на деца со попреченост беше ставена во функција во ЈЗУ Универзитетски стоматолошки клинички центар „Св. Пантелејмон“ – Скопје, со цел да се унапредат условите за нивниот третман и да се овозможи побезбедна и поквалитетна здравствена грижа.

Како дел од донацијата обезбедена од Фондацијата д-р Верица Механџиска, на Универзитетскиот стоматолошки клинички центар му беа донирани стоматолошки стол, автоклав и рендген апарат, опрема која ќе придонесе за модернизирање на условите за работаи унапредување на квалитетот на стоматолошките услуги.Дополнително, компанијата Зегин донираше два болнички кревети со душеци, наменети за просторијата за будење од анестезија по извршен стоматолошки зафат.

Министерот за здравство, Сашо Клековски, посочи дека оваа донација од страна на Фондацијата д-р Верица Механџиска претставува значајна инвестиција во јавното здравство и вистински пример за општествена одговорност. Тој истакна дека соработката меѓу јавните здравствени установи, деловниот и граѓанскиот сектор придонесува за подобри здравствени услуги и поголема грижа за пациентите.

На настанот по повод отворањето и ставањето во функција на просторијата присуствуваше и Викторија Механџиска, претседателка на Управниот одбор на Фондацијата д-р Верица Механџиска и косопственичка на Зегин, која истакна:„Децата со попреченост и нивните семејства секојдневно се соочуваат со многу предизвици. Затоа веруваме дека нашата задача е да направиме барем еден дел од нивниот пат да биде полесен, побезбеден и поедноставен. Нашата донација придонесува да се создадат подобри услови, да се подобри динамиката и намали времето на чекање за стоматолошки зафат. Особено сме горди што со оваа иницијатива поддржуваме институција која има исклучително важна улога, бидејќи токму тука се обезбедува стоматолошки третман за деца со попреченост од целата држава.“

Со оваа донација се создаваат подобри услови не само за пациентите, туку и за здравствените работници кои секојдневно се грижат за нив. Новата опрема и унапредувањето на просторијата за будење од анестезија овозможуваат посоодветен процес на третман и постоперативно следење на најмладите пациенти.

Фондацијата д-р Верица Механџискаостанува посветена на иницијативи насочени кон унапредување на квалитетот на живот на лицата со попреченост, подобрување на нивниот пристап до здравствени и други услуги и создавање еднакви можности за достоинствен и квалитетен живот.