Сакам да ги уверам граѓаните дека владата на ВМРО-ДПМНЕ ќе ја врати цената на струјата со тенденција да ја намали кога ќе почне новиот период на регулирање на цената, а тоа е од први јануари, рече претседателот на ВМРО-ДПМНЕ Христијан Мицкоски, во своето интервју за централниот Дневник на телевизија Сител.

Потенцираше дека „универзалниот снабдувач, а кој претходно имаше маржа 11 проценти, сега има маржа 9,9 проценти, што значи дека кога сето тоа ќе се стави во конечната формула очекувам да нема поскапување на цената на електричната енергија за крајните корисници“.

Според Мицкоски друг проблем е што цената на дистрибуцијата, тоа е ниско напонското ниво на кое исто така е ЕВН сопственик и цената на преносот каде е МЕПСО, односно државната компанија МЕПСО се нивелираат еднаш годишно.

-Тоа е на почетокот на годината, не може сега да ги нивелираме односно на пола година. Само цената на електричната енергија со која што компанијата која конкурира на тендерот ја испорачува до снабдувачот може да се нивелира. Тоа е во случајот ЕСМ. ЕСМ нема според закон обврска да испорача 100 проценти, дури нема обврска николку проценти да испорачува Поентата е дека сето она кое сега се случува може да се корегира и ќе се корегира на први јануари“, вели Мицкоски.

Јас жалам, укажа Мицкоски, што експерти кои велат дека би можела владата сега да прави промени.

„Јас би сакал да слушнам како е тоа решение и одма ќе го имплементираме ама да не го загрозиме снабдувањето на потрошувачите. Ако се прекине тендерот ќе го загрози снабдувањето на потрошувачите затоа ветувам дека при следно нивелирање на први јануари истата ќе биде вратена со тенденција да ја намалиме“, изјави Мицкоски.

Во организација на иницијативата “Прилеп Култура” и општина Прилеп, втора година по ред ќе се одржи манифестацијата “Од 0 до култура”.

Музичките настани оваа година ќе започнат на 27.06 со концерт на прилепскиот бенд “Тhe Four”, а така ќе биде секој четврток до 22.08.

Како и минатата година, сите настапи ќе се одржуваат на Камената бина на плоштадот “Александрија”.

-Овој проект е замислен за елементарно музичко и културно описменување на граѓаните на Општина Прилеп, како и презентација на млади музичари од општината и Р. Македонија за нивна промоција.

Проектот е осмислен на локални млади музичари или пак локални веќе етаблирани бендови да им даде за задача да направат програма во времетрање од 90 – 120 минути со песни од светската популарната поп и рок култура која имаат големо влијание за културна наобразба на секој човек како Beatles, The Queen, Sting, Bob Dylan, Depeche Mode, Pink Floyd, U2, R.E.M, Michael Jackson итн, итн, со тоа што би биле тематски вечери за промоција на вакви великани на музиката кои се наградувани дури и со нобелова награда да им се презентираат на помладите, односно еден дел од вечерта би била посветена исклучиво на еден музичар, односно група , а вториот дел од вечерта бендовите би свиреле авторски песни и песни од останати групи, односно музичари – велат организаторите.

Настапот на прилепскиот бенд Тhe Four ќе биде посветен на музичката група “Меморија” и Kaролина Гочева.

Наставникот по географија во ООУ “Кире Гаврилоски – Jане” oд Прилеп, Милан Јаковоски, на оригинален начин избрал да им ги доближи убавините на Македонија на своите ученици, а со тоа и да им го збогати нивното знаење по наставниот предмет. Тој избрал седум дестинации за искачување, а учениците со задоволство ја прифатиле оваа идеја.

Главната цел на геофрафската секција која ја предводи Јаковоски, е да се потикнат учениците да ја запознаат подобро природата и планината во нивната околина и во иднина почесто да ја посетуваат планината, да ја негуваат и да ја одржуваат, но и да стекнат навика, за спор и рекреација што го подобрува нивото на здрав живот. За да биде предизвикот кај учениците уште поголем во оваа секција освен планините и врвовите во околината на Прилеп како предизвик ги ставив и трите највисоки врвови во Македонија (Пелистер, Титов Врв и Кораб). Ваква настава се практикува во голем дел од развиените земји од Европа и светот, се надеваме дека ќе потикнеме да почне да се практикува и кај нас бидеќи е од голема корист кај децата.

Oна што е за пофалба е дека учениците кои членуваат во секцијата, заедно со нивниот професор, во изминатите 3 недели ги искачија трите највисоки врвови во Македонија, Голем Кораб (2753 m), Титов Врв (2747 m) и Пелистер (2601 m).

-Знаев дека можеме! Знаев дека ќе успееме! Верував во Вас! Овој предизвик за некои беше лудост, за некои храброст, за нас реалност. Немам зборови со кои би опишал колку сум среќен и горд на вас – напиша професорот Јаковоски на својот ФБ профил.

Тимот на РК Прилеп ја продолжува традицијата и ова лето ќе го организира меморијалниот турнир „Миле Нешкоски“.

Ова лето ќе се одржи деветтото издание на турнирот посветен на прилепската легенда со учество на домашни и странски екипи.

Од клубот информираа дека годинешното издание на меморијалниот турнир „Миле Нешкоски“ ќе се одржи во периодот од 29.08 до 01.09.2024.

Во првите два дена како и секогаш ќе бидат одиграни натпреварите по групи, додека на последниот ден ќе се игра за пласман.

Во ланското издание победник на турнирот втор пат по ред беше екипата на Дубочица од Србија.

-Покана до сите љубители на ракометот да присуствуваат и да уживаат во ракометните игри. Наскоро ќе бидат објавени сите детали околу турнирот – се вели во соопштението од организаторите.

Пратеничката од СДСМ, и една од кандидатите за партиски лидер, Славјанка Петровска, смета дека со оставката на Зоран Заев од лидерската позиција се мислело дека ќе се решат проблемите во партијата.

„Можеби е една од грешките во 2021 година, уште тогаш имавме лош резултат на локалните избори, се проценуваше дека со оставката или повлекувањето на Зоран Заев од функцијата градоначалник и премиер ќе се надминат проблемите.

Но, се виде дека погрешна одлука, или недоволна анализа на резултатите доведоа до одредени процеси и затоа денеска во 2024 година резултатите се катастрофални за СДСМ“, рече Петровска за „Дејли клик“.

Градоначалникот на општина Битола, Тони Коњановски, денес имаше средба со новите 32 студенти од Универзитетот „Свети Климент Охридски“, кои се пријавија и беа избрани на јавниот повик на општината за „Универзитетска летна пракса“. Студентите, како и минатата година, за време на летниот период ќе извршуваат практикантска работа во општината и јавните претпријатија, со доследно исполнување на договорените задачи и обврски, за што ќе добијат соодветен месечен надомест.

Градоначалникот Коњановски и проректорката за студентски работи, Јасмина Буневска Талевска, ги истакнаа придобивките кои ги имаат институциите и студентите, од воспоставената соработка на општината и универзитетот. Особено значајно е директното вклучување на студентите во работниот процес, со цел дополнително стекнување на практични знаења и искуства, но истовремено нивната ангажираност е значајна поддршка за инстутициите во периодот кога дел од администрацијата користи и годишни одмори.

За реализација на овој проект, кој се спроведува втора година по ред, Општина Битола, согласно Програмата за спорт и млади, издвојува 500.000 денари. Минатогодишната универзитетска летна пракса успешно ја завршија 30 студенти.

Мечка со две мечиња е забележана во пределот на викендиците над оранжериите во Прилеп, информираат граѓани кои ги забележале животните во нивните имоти.

Тие велат дека веќе пријавиле во Центарот за управување со кризи и се очекува институциите да реагираат, затоа што стравуваат за нивната и за безбедноста на нивните имоти.

На фотографиите кои стигнаа до нашата редакција се гледа едно од мечињата, но очевидци велат дека во негова близина е неговата мајка.

Првиот претседател на Собранието на самостојна и суверена Република Македонија, Стојан Андов почина на 89 годишна возраст.

Андов е роден во Кавадарци на 30 ноември 1935 година. Основно образование и гимназија завршил во родниот град, а дипломирал на Економскиот факултет во Скопје и магистрирал на Факултетот за политички науки во Белград во 1972 година. Бил секретар на Средношколскиот и на Општинскиот комитет на Народната младина, професор во Гимназијата со економски паралелки „Ј. Б. Тито“ од 1959 до 1963 година и во Работничкиот универзитет „Моша Пијаде“ во Кавадарци.

Работел во Земјоделскиот комбинат „Тиквеш“ во Кавадарци од 1963 до 1964 година, каде што бил секретар на Основната организација на СКМ и директор на Аналитичко-планскиот сектор.

Потоа заминал на работа како професор во Политичката школа на ЦК на СКМ во Скопје (1964-1965) и советник во Извршниот совет на Собранието на СРМ (1965-1967). Бил претседател на Собранието на Општината Кавадарци од 1967 до 1970 година, а потоа претседател на Републичкиот центар за идеолошко-политичко образование и студии во Скопје од 1970 до 1971 година и член на Секретаријатот на ЦК на СКМ. Бил избиран и на разни републички и сојузни општествено-политички функции.

На Петтиот конгрес на СКМ бил избран за член на постојаниот дел на Конференцијата на СКМ, претседател на Комисијата на ЦК на СКМ за општествено-економски односи и економска политика, член на Претседателството на Постојаната конференција на градовите на Југославија, член на Управниот одбор на Здружението на економистите на Македонија и член на Економскиот совет на Собранието на СРМ.

Подоцна во три мандати бил член на Сојузниот извршен совет во Белград од 1971 до 1982 година, претседател на Сојузната комисија за економска соработка со земјите во развој, претседател на Меѓурепубличкиот комитет за девизен и надворешно-трговски систем, претседател на дел од Југословенскиот мешовит комитет за соработка со Египет, Либија, Тунис, Турција и Франција (1971-1982), претседател на Комисијата за координација на соработката со Европската економска заедница и земјите на ЕФТА (1978-1982), потпретседател на Извршниот совет на Собранието на СРМ (1982-1986), пратеник во Општествено-политичкиот собор на Собранието на СРМ, претседател на Одборот за прашања од областа на општествено-економското уредување, стопанската политика, народната одбрана, општествената самозаштита, безбедноста и односите со странство на Извршниот совет на Собранието на СРМ и член на Делегацијата на Собранието на СРМ во Соборот на републиките и покраините на Собранието на СФРЈ (1986-1987), претседател на Одборот за општествен план и развој, како и вонреден и ополномоштен амбасадор на СФРЈ во Ирак од 1987 до јануари 1991 година.

Претседателот на Сојузот на реформските сили на Југославија го назначи за главен координатор во формирањето на Сојузот на реформските сили на Македонија на 15 август 1990 година, по што стана основач и водач на политичката партија Реформски сили – Либерална партија (Скопје, 5 ноември 1990), регистрирана како Либерална партија на Македонија (16 октомври 1990), останувајќи нејзин претседател до спојувањето со Демократската партија (ДП, 19 април 1997), кога е избран за претседател на Советот на новоформираната Либерално-демократска партија (ЛДП, регистрирана на 12 јуни 1997). На првите повеќепартиски избори е избран за пратеник, а подоцна и на сите наредни избори во Македонија.

Во три мандати бил претседател на Собранието на Македонија (8 јануари 1991 – 19 ноември 1994; 19 ноември 1994 – 6 март 1996 – до раскинот на коалицијата Сојуз за Македонија; 30 ноември 2000 – 3 октомври 2002). По атентатот на претседателот на Македонија Киро Глигоров на 3 октомври 199 5година, извесен период ја врши и функцијата Претседател на Република Македонија (5 октомври 1995 – 10 јануари 1996). Исто така, по изборот за пратеник во 1998 година бил претседател на Комисијата за монетарна, кредитна и банкарска политика.

На изборите од 31 октомври 1999 година бил кандидат на ЛДП за претседател на Република Македонија, но не се квалификувал за вториот изборен круг. По обновувањето на Либералната партија во 1999 година, бил избран за член на нејзиниот Извршен комитет. Повторно бил избран за претседател на Седмиот (Вонреден) конгрес на ЛП (јуни 2001) и потоа пак реизбран на Осмиот Конгрес на ЛП (јули 2004).

Освен тоа, како пратеник, бил и претседател на Постојаната анкетна комисија за човековите права и слободи на граѓаните од 2002 до 2006 година и претседател на собраниската Комисија за уставни прашања од 2006 година. Познат е како политичар од времето на СФРЈ ориентиран кон пазарната економија, искусен и успешен политички преговарач во современиот домашен политички амбиент, но и како политичар со меѓународна репутација во преговорите со странските експерти од областа на економските односи, политичкиот систем и човековите права. Избиран е за потпретседател на Либералната интернационала.

Лидерот на ВМРО-ДПМНЕ, Христијан Мицкоски попладнево во 13:30 часот во Собранието на Република Македонија ќе го достави предлог составот за новата влада.

-Денеска 18.06.2024 година во 13:30 часот претседателот на ВМРО-ДПМНЕ Христијан Мицкоски ќе го достави предлог составот на владата во Собранието на Република Македонија, а веднаш потоа во прес центарот на Собранието ќе одржи прес конференција, информираат од партијата.

Претходно мандатарот за состав на влада, лидерот на ВМРО-ДПМНЕ, Христијан Мицкоски во неделата по седниците на Извршниот и Централниот комитет на ВМРО-ДПМНЕ на јавноста и ги соопшти предлозите за министри во новата влада.

-Предлог за заменик претседател на владата и министер за транспорт ќе биде Александар Николоски. Прелог за министер за одбрана ќе биде предложен Владо Мисајловски. Предлог за функцијата министер за финансии ќе биде Гордана Димитриеска Кочоска. Предлог за министер за надворешни работи и надворешна трговија ќе биде Тимчо Муцунски. Предлог министер за локална самоуправа ќе биде Златко Перински. Предлог за министер за информатичко општество и дигитална трансформација ќе биде Стефан Андоновски. Предлог за министер за спорт ќе биде Борко Ристовски. Предлог министер за енергетика, рударство и минерални суровини ќе биде Сања Божиновска. Предлог за министер за земјоделство, шумарство и водостопанство ќе биде Цветан Трипуновски. Предлог за министер за култура и туризам ќе биде познатиот актер Зоран Љутков. Предлог за министер за внатрешни работи останува Панче Тошковски кој во изминатите речиси четири месеци ја извршуваше функцијата технички министер во ова министерство. Предлог за министер за образование и наука ќе биде професорката Весна Јаневска. Од коалициските партнери на ВМРО-ДПМНЕ се предложени, Љупчо Димовски од Социјалистичката партија за заменик претседател на владата и министер одговорен за политички систем. Иван Стоилковиќ претседателот на Демократската партија на Србите во Македонија ќе биде предлог за заменик претседател на владата и министер кој ќе биде раководи со ресорот задолжен за односите меѓу заедниците. Шабан Салиу кој ќе биде предлог за министер без ресор задолжен за интеграција и имплементација на декада на Роми, истакна тогаш Мицкоски.

Од четврток (20 јуни) до вторник (25 јуни до 15 часот) ќе се спроведува првото електронско пријавување на учениците за запишување во средно образование за учебната 2024/2025 година. Второто пријавување во јунскиот уписен рок ќе биде на 1 и 2 јули до 15 часот.

Со цел да се оптимизира процесот за запишување во средните училишта, Министерството за образование и наука и оваа година овозможи електронско аплицирање. Пријавувањето е преку линк до порталот за електронски услуги на МОН (https://e-uslugi.mon.gov.mk) со специјална најава за средношколци преку сопствените кориснички сметки на schools.mk.

Од МОН појаснија дека регистрација на системот нема да биде потребна и најавата ќе се врши исклучиво со корисничките сметки на schools.mk.

-Упатството за логирање/најава во системот и пополнување на пријавата ќе биде поставено со линк на страната за логирање/ најава, посочи МОН.

На крајот на март МОН го објави Конкурсот за запишување ученици во јавните средни училишта за учебната 2024/2025 година. Во него се наведени потребните документи, начинот на аплицирање и конкурсните рокови.

Конечната ранг-листа со резултатите од запишувањето и слободните места по првото пријавување, секое училиште треба да ја објави на 26 јуни најдоцна до 9 часот, на јавно место во училиштето и/или на училишната интернет-страница.

Во училиштата каде што ќе има квалификациско тестирање ќе се организира на 28 јуни, а конечните ранг-листи со резултатите ќе бидат објавени на 28 јуни на јавно место во училиштето.