Продолжуваат позитивните промени во прилепската Општа болница. По неодамнешните новини во здравствените услуги, уште една значајна инвестиција е ставена во функција – нов, современ апарат за електромиографија (ЕМГ), со кој пациентите од Прилеп и поширокиот регион ќе добијат можност за посовремена невролошка дијагностика во својот град.
Станува збор за високософистицирана медицинска опрема наменета за испитување на функцијата на периферните нерви и мускулите, која овозможува откривање и следење на различни невролошки и мускулни заболувања.
ЕМГ-испитувањето е особено важно при дијагностицирање на оштетувања на нервните корени поврзани со дискус хернија, синдром на карпален тунел, полиневропатии, мускулни заболувања, како и повреди и оштетувања на периферните нерви.
Со ставањето во употреба на новиот апарат, пациентите ќе имаат полесен пристап до оваа дијагностичка услуга, без потреба да патуваат во други градови, а се очекува да се овозможат побрзи прегледи, попрецизни наоди и подобри услови за навремено лекување и следење на здравствената состојба.
Новата набавка претставува уште еден чекор во модернизацијата на прилепската болница и унапредувањето на здравствената заштита, со директна корист за граѓаните.
Уште една позитивна новина од прилепската болница, која покажува дека вложувањето во современа опрема и подобри здравствени услуги е вложување во здравјето на граѓаните.































