дома блог страница 612

Вечер на оперски арии во Прилеп: Концерт на Белистојановски и Мариновски

Во рамки на музичката програма при НУ Центар за култура „Марко Цепенков“ – Прилеп, на 11.02.2025 година, со почеток во 19:00 часот, публиката ќе има можност да проследи целовечерен концерт на оперскиот тенор Илија Белистојаноски во пијано придружба на Дарко Мариновски и да ужива во серија светски познати оперски арии.

Програмата на концертот ги опфаќа следните музички дела:

1. Amarilli – Џулио Качини – стари мајстори
2. Sento nel core – Алесандро Скарлати– стари мајстори
3. Caro mio ben – Џузепе Џордани – стари мајстор
4. O del mio dolce ardor – Кристоф Вилибалд Глук – арија од операта “Paride ed Elena” („Париде
и Елена“)
5. Un aura amorosa – Волфганг Амадеус Моцарт – арија од операта “Cosi fan tutte” („Така прават сите“)
6. Malinconia, ninfa gentile – Винченцо Белини – Sei ariette (од циклусот 6 мали арии)
7. Pourquoi me reveiller – Жил Масне – арија од операта “Werther” („Вертер“)
пауза
8. Che gelida manina – Џакомо Пучини – арија од операта “La bohème” („Боем“)
9. La donna e mobile – Џузепе Верди – арија од операта “Rigoletto” („Риголето“)
10. E lucevan le stelle – Џакомо Пучини – арија од операта “Tosca” („Тоска“)
11. Nessun Dorma – Џакомо Пучини – арија од операта “Turandot” („Турандот“)
12. „Кога падна на Пирина“ – македонска народна песна

Илија Белистојаноски е роден во Прилеп каде го завршил своето основно образование. Потоа се запишува во Државното музичко училиште во Битола, отсек теорија на музика.

Во текот на неговото школување беше забележан како исклучително талентиран пејач и го претставува училиштето на натпреварот за камерна музика во Скопје каде ја освојува првата награда.

Откако ги откри сопствените вокални способности, Илија решава своето понатамошно образование да го продолжи на Музичката Академија во Штип, во класата на реномираниот оперски пејач проф. Борис Трајанов.

Во склопот на академијата изучува правилно пеење и однесување на сцена (глума, движење и став). Учествува редовно на сите концерти во чест на проф. Коста Трпков заедно со оркестарот на Националната опера и балет.

Дебитира на сцената на Националната опера и балет во операта “Macbeth” од Џузепе Верди, во улогата Малколм, заедно со италијански кастинг.
Редовно одржува концерти низ сите градови во Македонија. Непосредно по дипломирањето, освојува прво место од стручното жири на натпреварот „Лазар Јованович” во Белград, Србија.

Потоа освојува Гранд При на натпреварот „Руска Романсијада” во Софија, Бугарија, и со тоа влегува во 12-те финалисти на финалниот натпревар во Москва, каде што ја освојува втората награда од стручното жири. Следи покана за концерт и настап во една од најголемите сали во светот „Кремлинскиот дворец” во Москва.

Учествува на натпреварот за „Руска вокална музика” во Скопје, каде што го освојува второто место при што во жири беше еден од најголемите басови во Русија, проф. Леонид Сметаников.

Влегува во финалните рунди на светскиот натпревар “Belvedere” во Рига-Латвија.

Илија соработувал со познати педагози од музичкиот свет како: Михаел Пабст и Линда Плех (Виена, Австрија), Дануса Лукнисова и Мигел Гомез Паез (Пезаро,Италија) Елда Ларо (диригент, Германија), Паола Мариоти (Италија) инаку последна и лична пијанистка на Лучиано Павароти, Николас Клептон (Англија) и др.

Редовен учесник на мастер-класите на една од најголемите примадони во Италија, Проф. Капучине Киаудани. 3 концерти во Југоисточна Македонија во месец мај 2022 год. 2 концерт за дуо клавири, труба и глас во Кавадарци и Скопје во септември и настап по повод 78 годишнина од ослободувањето на Куманово, месец ноември. Настап на Охридско лето по повод Денот на македонскиот јазик, 5-ти мај, во црквата ,,Св. Софија”, 2023 година. Концерт во Прилеп за тенор, сопран и пијано поддржан од македонското Министерство за култура во јули. Учество на фестивалот „Златна лира“ со изведба на преработени македонски народни песни во октомври, 2023. Во 2024 година се реализираа два семинари и настапи на ЗАМ – Здружение на академиски музичари, на коишто учествуваа музичари од целиот балкан меѓу кои и Белистојаноски. Исто така, има учествувано на светскиот натпревар по пеење “Byulbyul” во Баку, Азербејџан во јуни, 2024.

Дарко Мариновски – пијанист

Роден е во Скопје 1974 год. Основно и средно музичко образование завршува во МБУЦ ,,Илија Николовски Луј,, во Скопје. Дипломира на ФМУ- Скопје 1997 год. во класата на реномираниот професор Борис Романов. Магистерските студии ги завршува 2000 год. под менторство на проф. Јасминка Чакар.

За време на студиите одржува бројни настапи и концерти во Македонија во рамките на Скопско и Охридско лето како и концерти во Р.Бугарија.
Од завршувањето на студиите до летото 2013 работи како професор по пијано и корепетиција во МБУЦ ,,И. Н. Луј,, во Скопје. Неговите ученици бележат значајни резултати како награди на државни и мегународни натпревари.

Исто така учествуваше во работилниците по композиција во класите напроф. Илија Пејовски и проф. Томислав Зографски кај кои и редовно ги посетуваше часовите по модална хармонија.

Од јануари 2009 година е декан на Факултетот за применета музика на Универзитетот за аудиовизуелни уметности ЕСРА Париз-Скопје-Њујорк, функција која ја извршува до 2019 год.

На овој факултет ги предава предметите композиција на филмска и театарска музика, пијано, модална хармонија и музички стилови. Неговите студенти по композиција на филмска музика бележат значајни остварувања на разни манифестации низ земјава како и на мегународни филмски работилници и фестивали во БиХ, Бугарија, Хрватска, САД и други
земји.

Во април 2016 год. е избран во звање редовен професор од наставно-научниот совет на ЕСРА.

Автор е на музика на неколку краткометражни филмови кои земаа учество на повеќе филмски фестивали во земјава и странство. Автор е на музиката на театарската претстава „Косара“ од Загорка Поп Антовска чиишто 4 изведби беа реализирани во ноември 2013 год. во МОБ. Како член на квартетот „Коскаров“ го снима ЦД-то “The best of Jazz and

Blues” со музика од светската џез литература, издадено во 2011.

Автор е на оркестарските аранжмани на 5 македонски родољубиви народни песни кои премиерно беа изведени на 24.12.2015 год. на гала концертот во салонот на МОБ по повод 30 години од кариерата на маестро Борис Трајанов, под диригентската палка на маестро Џорџе Павловиќ од
Белград.

Од септември 2013 работи на Музичката академија при УГД – Штип со студентите во класата на проф. Борис Трајанов како пијано соработник, како и во оперското студио при истата академија.

Од септември 2015 работи и на Филмската академија при УГД – Штип каде ги предава предметите Звук на филм и Акустика со психоакустика, перцепција и анализа. Мариновски работи и како уметнички соработник со повеќе истакнати македонски уметници со кои настапува во Македонија, како и во концертните сали во Рим, Париз, Вашингтон, Истанбул и др.

Во Битола изложба на фотографии „Идни спомени“ на Дамијана Ристевска

Во Центарот за култура во Битола вечерва ќе биде отворена изложбата на фотографии „Идни спомени“ чиј автор е Дамијана Ристевска, ученичка во четврта година во гимназијата „Јосип Броз Тито“.

Фотографиите на Ристевска се со уметнички израз и ги претставуваат ликовите низ социјалната средина во гимназијата. Преку нејзините фотографии може да се почувствува атмосферата и енергијата која владее низ гимназијата, низ училниците и училишниот двор, во училишната библиотека, насекаде…

Изложбата „Идни спомени“ е четврта по ред самостојна изложба на Ристевска подготвена под менторство на професорот по ликовна уметност Александар Поповски и е во рамки на свечената програма посветена на јубилејот – 80 години настава на современ македонски јазик во СОУ Гимназија „Јосип Броз Тито“ во Битола.

Дамијана Ристевска е талентирана фотографка и составен дел од тимот на семејниот инфо-портал Bitolanews.

12 години од кобниот пожар во манастирот Трескавец – Моменти кога човек ќе ја почувствува вистинската беспомошност!

Изминаа точно 12 години од кобниот пожар кој ги пеплоса конаците во древното манастирско светилиште – Успение на Пресвета Богородица – Трескавец, кај Прилеп.

На 04.02.2013година Прилеп и Македонија ги обзеде голема тага, пожар изби во конаците на манастирот Трескавец, пожар кој до темел ги изгоре конаците на светилиштето кое датира од XIII век.

Прилепчани се сеќаваат колку беспомошни беа против огнената стихија, но за среќа успеаја заедно со пожарникарите да ја спасат древната црква.

Конаците денес се обновени и се поубави од било кога, но сеќавањата на кобниот датум ќе продолжат да живеат.

Виктор Николоски успешно опериран: “Ви благодарам на сите што ми подадовте рака, се надевам дека еден ден оваа добрина ќе ја вратам на некој друг”

Младиот прилепчанец, Виктор Николоски, кому му беше дијагностициран тумор на главата, успешно е опериран во Турција. 26-годишниот Виктор изминатата недела го обедини Прилеп во хуманост. За неколку денови се собра огромна сума на пари за операција и негово лекување, а сега тој преку социјалните мрежи упати благодарност до сите хумани граѓани и организации.

-Драги пријатели, познати, непознати хумани луѓе и сите што ми подадовте рака во најтешките моменти потребната сума е собрана.
Благодарност до Фондација Павел Андреев Македонија , до Општина Прилеп , до сите граѓани на општина Прилеп кои се заложивте за мене и моето семејство.

Од дното на срцето ви благодарам за вашата несебична поддршка, љубов и дарежливост. Благодарение на вашите донации, мојата операција беше изведена на 30.01.2025, професорот презадоволен од направеното, патологијата мора да ја чекаме некои 2 недели за да знаеме што понатаму и сега сум во процес на опоравување.

Не постојат доволно зборови со кои би можел да ја искажам мојата благодарност. Вашата помош ми даде надеж, сила и верба дека не сум сам во оваа борба. Вие сте доказ дека хуманоста и добрината сè уште постојат, и секој ваш гест значеше неизмерно многу за мене и моето семејство.
Се надевам дека еден ден ќе можам да ја вратам оваа добрина на некој друг кој ќе има потреба, исто како што вие ми помогнавте мене. Нека вашата добрина ви се врати со многу среќа, здравје и љубов.

Со огромна благодарност,

Виктор Николоски

Мицкоски одличен: Да се пријави секој што цени дека може да даде вредност и ќе биде вклучен на анкета

Премиерот Христијан Мицкоски очекува најголемиот дел од имињата за кандидати за градоначалници на коалицијата „Твоја Македонија“ предводена од ВМРО-ДПМНЕ да бидат познати во втората половина на мај, првата половина на јуни.

Одговарајќи на новинарски прашања за подготовките за Локалните избори наесен, на прес-конференција тој соопшти дека општинските комитети и коалициските партнери во рамки на, како што рече, внатрепартиска и демократска процедура, добиле порака да се пријави секој што смета дека има амбиција, програма, визија и платформа за да води некоја од општините.

-Да се пријави секој што цени дека може да додаде вредност и ќе биде вклучен во мерењата. Тоа е еден партиски и коалициски механизам кој ние го имаме, во мерењата помеѓу граѓаните, во средината во која поединецот има амбиција и, откако ќе ги сублимираме резултатите, тогаш ќе излеземе во јавноста со имиња, рече Мицкоски на прес-конференцијата со министерот за локална самоуправа Златко Перински за вториот повик за финансирање проекти на општините.

На прашањето дали ВМРО-ДПМНЕ на локалните избори ќе ги поддржи кандидатите на коалицијата Вреди и за кои општини би имало таква коалиција, претседателот на Владата одговори дека нема конечна одлука и оти во наредните седум месеци до стартот ана кампањата ќе разговараат со коалициските партнери во Владата, но дека „природен след на настаните“ е „соработката на централно ниво да се преслика на соработка на локално ниво“.

-Природно е Владата вака како што функционира, а функционира со исклучителна кохезија, да продолжи да функционира и во избори и надвор од изборни процеси. Нечесно е политика на двојни стандарди – да имате заедничка платформа и програма и така функционирате, а на Локални избори да препознаете друга платформа или политика, додаде Мицкоски.

Прашан за амбицијата и желбата да учествува како кандидат за градоначалник на Скопје на Локалните избори, министерот Перински одговори дека тој тоа му го соопштил на претседателот на партијата, а потоа и на јавноста. Нагласи дека најважно е во рамки на органите на партијата на транспарентен и, како што рече, „кристално чист начин да се избере најсоодветното решение“.

-Затоа што извесно е дека тој ќе биде и победникот. Сметам дека можам да одговорам на предизвикот затоа што имам визија, имам план како Скопје конечно да стане европска метропола, но, секако, таа одлука ќе ја оставам на претседателот и на извршните тела на партијата. Јас сум убеден дека кој и да биде кандидатот, ќе биде едногласно поддржан од сите нас, додаде Перински.

Витаминка ги претстави своите производи пред светската јавност на саемот ISM во Германија (ФОТО)

Витаминка и оваа година ги претставува своите производи на саемот ISM 2025 во Келн, Германија, кој се одржува од 2 до 5 февруари. Целосниот асортиман од слатката програма на Витаминка, кондиторски производи, солени и крцкави закуски се изложени на најголемиот саем кој претставува центар на иновациите и најновите трендови во кондиторската индустрија.

„Тука се презентираат нови трендови, иновативни производи и перспективи пред најголемите компании од секторот од голем број држави, почнувајќи од Германија и нејзините соседни земји, до Гана и Индонезија, преку Австралија и Костарика. Витаминка е редовен изложувач на ISM и во досегашното искуство сме се увериле во придобивките и реалните резултати. Нашето учество на овој саем има исклучително значење, бидејќи го претставуваме и промовираме македонското производство и воспоставуваме нови бизнис соработки“, вели Илија Наумоски, помошник оперативен директор на Витаминка.

На саемот беа присутни и претставници од секторите на Витаминка, Извоз, Производство и Развој.

Пред халите за влез, хостеси делеа флаери и познатиот Стоби флипс, со што учесниците и посетителите имаа можност да се запознаат со производите на компанијата и да го дегустираат уникатниот флипс.

Витаминка е една од 1500-те компании од 70 држави кои учествуваат на саемот ISM 2025. Со учеството на овој саем се отвора можност за запознавање со најголемите технолошки иновации и трендови во кондиторската индустрија, со главен фокус врз потребите на потрошувачите и стимулирање на компаниите за проширување на својот спектар со нови и иновативни производи што ќе одговорат на барањата на консументите.

(ФОТО) Одбележани 153 години од раѓањето на Гоце Делчев во Прилеп

По повод 153 години од раѓањето на Гоце Делчев, еден од најзначајните македонски револуционери, идеолог и визионер, Општина Прилеп оддаде почит на неговото бесмртно дело.

Делегација од Општина Прилеп, предводена од претседателката на Советот, Ирена Стерјовска-Локвенец, заедно со претставници од училиштата, наставници, ученици, претставници на политички партии и граѓански здруженија, положија свежо цвеќе и се поклонија пред бистата на Делчев во дворот на ООУ „Гоце Делчев“.

-Со својата борба за слобода Гоце Делчев останува светол пример за непокорот, единството и љубовта кон татковината. Неговата жртва и идеали се темел на македонската борба за самостојност и независност, а неговите зборови и дела сè уште горат како факел во срцата на Македонците. Учениците предводени од директорката и наставниците од училиштето, носејќи го гордо неговото име, преку различни наставни и воннаставни активности го одбележаа ликот и делото на револуционерот, потсетувајќи на неговата вечна порака за слободна и напредна Републија Македонија. Општина Прилеп и понатаму ќе го негува историското наследство, пренесувајќи ги вредностите на македонската самобитност и патриотизам и на идните генерации – стои во соопштението од општина Прилеп.

Битолчанка крадела во продавница во Прилеп – ја фатиле на дело

-На 03.02.2025 во 16.00 часот во продажен објект во Прилеп, полициски службеници од ОВР Прилеп ја лишиле од слобода Р.И. (41) од Битола затоа што била затекната при вршење кражба во објектот, при што одзела повеќе производи.

По целосно документирање на настанот против неа ќе следува соодветна пријава – информираат од ОВР Прилеп.

Мицкоски: Делчев е наш великан кој е дел од македонскиот идентитет, неговото дело не смее никогаш да биде заборавено

Премиерот Христијан Мицкоски на целата македонска јавност го честита родениот ден на македонскиот великан, идеолог и јунак Гоце Делчев.

Мицкоски положи свежо цвеќе во црквата Св. Спас во Скопје.

-Тоа што го правевме во минатото продолжуваме да го правиме и како Влада. Цениме дека македонската Влада треба да има традиција и во иднина да го чествува овој ден бидејќи ова е наш македонски великан кој е дел од македонскиот идентитет и неговото дело не смее никогаш да биде заборавено, рече Мицкоски.

Охридското Езеро станува нова дестинација – Туркиш ерлајнс на својата мапа го постави Охрид

Охрид и охридското крајбрежје станува нова дестинција за турските туристи и сите останите кои сакаат да ги истражат и да уживаат во убавините на Охрид, токму преку директниот лет Истанбул – Охрид, кој за прв пат се водведува со летниот ред на летање.

Туркиш ерлајнс на својата мапа на дестинации веќе го постави Охрид како атрактивна дестинација за патување и започна со продажбата на билети. Согласно летниот ред на летање, авиокомпанијата оваа линија започнува да ја оперира од 27 март со што официјално започнува и воспоставувувањето на директниот лет Истанбул -Охрид.

Туркиш ерлајнс на својата веб страна Охрид го опишува како “македонскиот бисер” најпопуларната туристичка дестинација на Балканот и дел од светското културно наследство.

Авиолинијата Истанбул – Охрид се воведува како резултат на политките на Владата и Мнистерството за транспорт за привлекување на нови дестинации. Со јавниот повик за финансиска поддршка освен Истанбул, од Охрид ќе се лета и кон Базел, а од скопскиот аеродорм се воведуваат летови кон Лион, Барселона, Штутгарт Дубаи, Париз, Женева и Истанбул.

-Многу со горд на оваа работа бидејќи направивме целосна промена на политиките на подршка на субвенционирање. Работиме проект кој што многу брзо очекувам да излезе во јавноста за реконструкција на терминалната зграда на охридскиот аеродром како и таму би се подобриле условите за работа. Работиме на најмалку уште две до три авиолинии кои што очекувам да излеземе со околу 12 и да заокружиме во овој период што ќе е дополнителен квалитет и патници во Македонија. Дел од тие линии се атрактивни и за дијаспората. На пример линијата Истанбул Охрид е многу атрактивна за дијаспората и за Австралија и за северноамериканскиот континнет бидејќи веќе се продаваат авионски карти Торонто-Охрид или Њујорк -Охрид или Вашингтон -Охрид или Сиднеј -Охрид. Исто така и линијата за Женева беше нешто што долго време ја бараше македонската дијаспора, така што мислам дека ќе имаме позитвни ефекти”– изјави недоамна вицепремиерот Николоски.