Бадник се нарекува денот пред роденденот на Исус Христос (Божиќ), според христијанската традиција. Бадник се слави еден ден пред Божиќ и со коледарските огнови и со малите деца коледарчиња се најавува Рождеството Христово.

Бадник претставува ноќ на мирот, радоста и на сплотеноста. Овој празник е поделен на два дела – периодот од полноќ до пладне на 6 јануари е Коледе, а од пладне до полноќ се слави Бадник.

Бадник паѓа на 6 јануари секоја година, а Божиќ на 7 јануари. Суштината на празникот е во радоста на христијаните пред големиот ден — Христовото раѓање. Истовремено, со овој ден завршуваат и божиќните пости.

Божиќ е најрадосниот празник за Македонците. Првиот ден е секогаш 7 јануари и се празнува три дена. Луѓето се поздравуваат со: „Христос се роди!“, а се отпоздравуваат со: „Навистина се роди!“

Македонскиот народ со многу внимание и почит го празнува Божиќ, кој започнува да се слави со Бадник.

Денот наспроти Божиќ се празнува со низа обичаи. Со традиционална бадникова посна трпеза, со желби за многу здравје, среќа и бериќет во претстојната година и годинава православните христијани ќе ги дочекаат божикните празници, претежно во кругот на најблиските.

Бадникови гранчиња

Бадниковите гранчиња се симбол на среќата, љубовта и светлината, со кои православните верници ги украсуваат домовите за бадниковата вечер, во пресрет на Божиќ, најголемиот христијански празник.

Обичаите за Коледе-Бадник почнуваат во ноќта пред празникот, со палење големи коледарски огнови, кои горат до доцна во ноќта, со песна, оро, греана ракија и вино, како и неизбежната погача.

Во раните утрински часови, најмладите коледари во духот на традицијата ги пеат своите бадникови песни и ќе ни го најават раѓањето на Исус Христос. Со традиционалните коледарски песни, малите дечиња од рано утрината по стариот добар обичај одат од врата до врата на христијанските домови, чин што според црковните верувања, го навестува скорешното Христово раѓање. Вредните дечиња за својот труд и испеана песна добиваат костени, бонбони, јаболка, портокали и симболично пари. Продуктите што ги добиваат коледарите треба да бидат посни, бидејќи сè уште трае божиќниот пост.

Бадникова трпеза

Во Македонија традиционално се собира семејството на вечера на Бадник. Се приготвува богата трпеза исклучително со посна храна, со што симболично треба да обезбеди богат род на земјоделските култури во следната година. Специфичната традиција за македонската прослава на Бадник е во секоја куќа да се меси кравајче, пита или погача, во кои се става паричка.

Вечерта кога сите ќе седнат на вечера, домаќинот, откако ќе се прекрсти и ќе ја благослови трпезата, го крши кравајчето на онолку делови колку што има членови во семејството, оставајќи уште дел за Бога и за куќата. Сите присутни во својот дел ја бараат паричката во лепчето и оној што ќе ја најде ќе се смета за најсреќен во годината што претстои.

Бадник е верски празник кога, според традицијата, семејството се собира на посна, богата вечера. Се вади од сè по нешто како адет, но и за бериќет, годината да биде богата.

Според верувањата и обичаите, на богатата бадникова посна трпеза ќе се најде и лепчето со паричка, а оној што ќе ја најде, се верува дека ќе има среќа и здравје во текот на годината. За вечера на Бадник се приготвува посна вечера од повеќе видови јадења.

Меѓу јадењата, најпочесно место заземаат посниот грав, питата со зелка или со праз, посните сармички, рибите, урмите, сушените смокви, бадемите, нескршени ореви (постои верување дека ако оревот кога ќе го скршите не е црвлив, ќе имате бериќет во претстојната година), јужните овошја (мандарини, портокали), јаболката, костените и баклавата. На масата треба да стои и запалена свеќа украсена со бадниково гранче.

Обичај е по вечерата, посната трпеза да не се раскрева, туку заедно со храната се остава така сè до утрото, затоа што постои верување дека дедо Боже ќе дојде преку ноќта да се нахрани.

Со Божиќ е поврзана и поговорката „Пред Божиќ, зад Божиќ, дома да си“, што има посебно значење дека за време на овој голем празник секој треба да биде дома и во кругот на семејството да го прослави овој голем христијански празник.

(Главнoтo празнувањe му e на 23 дeкeмври/5 јануари, а на 20 јуни/3 јули му e лeтeн празник)

Православните верници денеска го слават Свети Наум Охридски – Чудотворец, ученик на Светите Методиј и Кирил и еден од Петточислениците коишто најревносно соработуваа со овие словенски апостоли. Свети Наум патуваше во Рим, каде што се прослави со чудотворна моќ и со голема ученост.

Знаеше многу јазици. Со помош на царот Борис Михаил, по враќањето од Рим тие се населија на бреговите на Охридското Езеро. Додека Свети Климент дејствуваше како епископ во Охрид, дотогаш Свети Наум основаше манастир на јужниот брег на езерото.

Тој манастир и денес го краси брегот како што и името на Свети Наум ја краси историјата на словенското христијанство и низ вековите беше извор на чудотворна сила и засолниште за болните и за неволните. Околу Свети Наум се насобра мноштво монаси од сите страни на Балканот.

Беше мудар учител, единствен раководител на монасите, одлучен подвижник, чудотворен молитвеник и духовник. Неуморно се трудеше и на преведувањето на Светото Писмо и на другите црковни книги од грчки на словенски јазик. Вршеше чуда и за време на животот и после смртта. Неговите чудотворни мошти до ден денес восхитуваат со многубројни чуда, посебно со исцеленијата од тешки болести, особено од лудило. Се упокои во првата половина на 10 век.

Прилепчани празникот традиционално го одбележаа пред храмот посветен на Св. Наум кај “Паркот на револуцијата”.

Во Прилеп за прв пат се изгради православен храм во чест на овој светител и посветен на него. Камен темелникот за изградба на овој велелепен храм беше поставен во 2012 година и тој е еден од 4-те храмови во Прилеп кои се изградија за само неколку години, а останатите се: “Св. Петка” во населба Точила, “Св. Пантелејмон” во кругот на општата болница и “Св. Константин и Елена” во типската населба.

За многу години!

-На 05.01.2025 во 00.00 часот во СВР Битола било пријавено дека на ул.„Глигор Прличев” во Битола настанал пожар во патничко моторно возило марка „пежо” со битолски регистарски ознаки сопственост на В.А .од Битола.

Пожарот бил изгаснат од страна на Територијалната против пожарна единица Битола, при што повредени лица нема, a причинета била материјална штета.

Увидот го извршила увидната екипа на СВР Битола.Се преземаат мерки за расчистување на настанот – информираат од СВР Битола.

Покана од храмот Св. Кирил и Методиј Параклис до верниците – Донесете ги дечињата на Божик на причесна! Секое дете ќе добие и пакетче!

-Децата се споредуваат со ангелите. Свети Јован Златоуст вели дека доколку сакаме да го наследиме небесниот живот, треба да се тру­диме во здобивање на добро­де­телта смирение и да ги соединиме мудроста со простотата. Таков е, всушност, ангелскиот живот, а таква е и детската чистота.

Христос рекол на такви е царството небесно, за да нè натера да го правиме и ние она што го прават децата. Славејќи го Рождеството Христово ги повикуваме сите деца да го посетат нашиот храм да го вкусат Христос, причестувајќи се, а по светата БОЖИКНА литургија која започнува во вторник од 08 часот, како и секоја година, ќе се поделат БОЖИЌНИ ПАКЕТЧИЊА за секое дете, па така радоста да ја умножиме во срцата на најмалите наши ангелчиња, со тоа славејќи го Бог во неговото за нас спасоносно раѓање.

Исполнувајќи ја оваа Христова заповед:

„И како повика Исус едно дете, го постави меѓу нив и им рече: ‘Вистина ви велам, ако не се повратите и не бидете како деца, нема да влезете во царството небесно: кој, пак, ќе се смири како ова дете, тој е поголем во царството небесно’“.

Исто така повторно, советуваме децата и да се причестат. Во однос на подготовката за причест, според учењето на црквата се препорачува децата од мали нозе да се учат на пост, но во случајов барем последните неколку дена пред Божик.

Ова не е задолжително за децата до седумгодишна возраст. Убаво би било, но не мора да постат, ниту пак некој друг треба да пости за нив. За повозрасните деца се препорачува, поучно, да постат (пост на масло) како што рековме, барем последните два-три дена пред Божик. Утрото пред богослужбата младите треба да бидат гладни и жедни, освен бебињата до едногодишна возраст.

Братството на храмот св.св.Кирил и Методиј ви го честита ХРИСТОВОТО РАЃАЊЕ!

Пуштен во употреба експресниот пат Куманово (Страцин) – Крива Паланка на Коридор 8

Претседателот на Владата, Христијан Мицкоски, денеска присуствуваше на свеченото пуштање во употреба на експресниот пат Куманово (Страцин) – Крива Паланка, дел од Коридор 8. Изградбата на оваа сообраќајна инфраструктура започна во мај 2018 година, а патот има должина од 25,55 километри.

Со ова, се исполнуваат ветувањата на минситерот Александар Никколоски. Да се потсетиме што изјави пред неколку месеци.

Според информациите од Владата, вкупната инвестиција за изградбата на овој експресен пат изнесува 93,7 милиони евра. Од нив, 80,20 милиони евра се обезбедени преку Светска банка, додека 13,50 милиони евра се грант средства.

Министер за транспорт и врски и вицепремиер Александар Николоски оцени дека овој патен правец е витална артерија за поврзување со Бугарија и посака да се развиваат нови индустриски капацитети и да заживее источниот дел од државата

-Историски ден за Источна Македонија!Го отвораме експресниот пат Куманово (Страцин) – Крива Паланка.
Изминатите 6 месеци како нова власт интензивно работевме да се заврши овој проект којшто ќе значи поврзување на истокот со Скопје како и главна артеријата за поврзување со Бугарија.
Ја градиме Македонија!, напиша Николоски на социјалните медиуми.

Известување од црковниот храм Св. Петка Прилеп за Божикниот награден конкурс:

Почитувани учесници и почитувачи на Божикниот награден конкурс,

Со голема радост ве известуваме дека прогласувањето на победниците и доделувањето на наградите ќе се одржи на 06.01.2025 г. (понеделник) – на Бадник, со почеток во 11:00 часот, во храмот „Св. Петка“ во населбата Точила, Прилеп.

Свечениот чин ќе биде збогатен со музичка програма која ќе внесе дополнителна празнична атмосфера, а истовремено ќе биде отворена и уметничка изложба со дел од литературните и ликовни творби создадени од нашите млади учесници.

Со цел да ја зачуваме празничната таинственост, организациониот одбор одлучи имињата на наградените да не се откриваат однапред. Поради тоа, замолуваме сите учесници да бидат лично присутни на прогласувањето и доделувањето на наградите за да го збогатиме настанот со нивното присуство и да им ги врачиме наградите и пофалниците на лицата што ги заслужиле.

Доколку временските услови дозволат, свеченоста ќе се одржи на платото пред храмот, а за сите присутни е подготвено топло освежување.
Ве покануваме со радост да бидете дел од овој празничен настан кој го слави Рождеството Христово и го истакнува талентот и трудот на младите учесници.

Со почит,
в.д. старешина на храм „Св. Петка“
протоереј Љупче Петрески

Имплементирањето на новиот Закон за нефер трговски практики ќе го заштити животниот стандард на граѓаните, ќе го намали форсирањето на странските, на штета на домашните производиа, а истовремено ќе стави ред во односите на производителите и добавувачите, со трговците. Со законот до 10% ќе се ограничат надоместоците за складирање, реклама, маркетинг, персонал, наспроти досегашната пракса која била 20, 30 па можеби повеќе отсто, што индиректно ја зголемувало и малопродажната цена на производите.

„Меѓутоа сега се ограничени и остануват да работат и придонесите не ги надминат процентите од 10% во тековната година, што е добро бидејќи на подолг рок со овој Закон нормално ќе имаме поголемо регулирање на цените на производите како краен ефект, односно во интерес на потрошувачите, купувачите, граѓаните, заштита на животниот стандард, а од друга страна оној хаос кој постоел претходно и форсирање на странски производи, во однос на домашните производи, тука ќе имаме изедначување во однос, пред се на маркетите„ изјави заменик министерот за економија, Марјан Ристески.

Дали Законот за нефер трговски практики, се применува главен контролор ќе биде Комисијата за заштита од конкуренција. Таа ќе може да поведе прекршочна постапка доколку се прекрши било која одредба. Во мониторинг периодот кој беше даден до 1јануари регистрирани се 26трговски нефер практики.

„Имаме различни дојави. Има одредени проблеми околу поврат на роба, во маркетингот, некаде дури се имат појавено и два ценовници. Сето тоа треба да го испита КСК и по Законот за нефер трговски практики да постапи„ изјави заменик министерот за економија, Марјан Ристески.

Во зависност од прекршоците ќе се движат и казните. Глоба за најтежок прекршок ќе изнесува и до 20.000евра за голем трговец и од 350 до 500 евра за одговорното лице . Казните за полесните прекршоци ќе зависат од тоа дали прекршокот го сторил правно или физичко лице

Црквата Свето Благовештение од Прилеп и за овој Божик спроведе хуманитарна акција, при што собрани се средства за 131 ранливо семејство од Прилепското архиерејско намесништво.

Од храмот информираат дека за секое од овие семејства се обезбедени ваучери во вредност од по 2.500 денари, со кои семејствата ќе можат да си купат намирници по желба од маркет.

Средствата се обезбедени од црквата и благочестивите донатори!

ВО ПРЕСРЕТ НА ГОЛЕМИОТ ХРИСТИЈАНСКИ ПРАЗНИК – РОЖДЕСТВОТО ХРИСТОВО – БОЖИК, третоодделенци од ООУ “Блаже Конески” Прилеп, под менторство на наставничката Весна Арсиќ-Црвенкоска, создадоа ремек дело преку прекрасна хорска изведба на песната “Вечниот Бог”.

Уметничка поддршка на учениците им беа женските членови на Црковниот хор “Св.Петка” од Прилеп: проф. Наталија Гарбеска, проф. Весна Станкоска, проф. Маја Јорданоска, Анита А. Николоска, Софија Настоска, проф. Марјан Златески (пијано), проф. Андријана Дукоска (виолончело) и диригент, проф. Јулијана Д. Златеска!

Вербата ја прави секоја мисија возможна, надежта го прави секој подвиг достижен, љубовта ги прави сите наши дела, прекрасни! Срцата да Ви бидат исполнети со блаженство, домовите со мир и хармонија – порачуваат дечињата и нивната наставничка, кои упатуваат благодарност и до протоереј, Љупче Петрески за отстапениот простор во Храм „Св. Петка” населба Точила, Прилеп, како и до „KL Produkcija“ за прекрасното видео!

По 19-ти пат, традиционално, во организација на Детската Амбасада за Сите Деца во Светот, 400 деца ќе се дружат на свечен Божикен Ручек, во х.„Салида“ во Прилеп, каде ќе го слават Христовото раѓање. На оваа прослава Детската Амбасада за Сите Деца во Светот го доделува најпрестижното признание за општествена одговорност “ОРДЕН ЗА НОСИТЕЛ НА МИРОТ”. Оваа година ова меѓународно признание ќе биде доделено на реномираната компанија Млекара А.Д. Битола од Битола.

И оваа година гости ќе бидат традиционално деца од целата територија на нашата држава, кои на заедничка трпеза ќе го прослават Божик, денот на Христовото раѓање и на таа заедничка трпеза ќе седнат деца од различни целни групи, како и истакнати деца – членови на Детската Амбасада. Децата се од Прилеп, од Скопје, Битола, Куманово, Крушево, Струмица и од другите градови и општини ширум државата.

-Како и секоја година нашата порака е во рамките на нашето мото „Едно небо за сите деца“, а тоа значи децата да се почитуваат помуѓу себе, да нема дискриминација и насилна комуникација, да преовладува толеранцијата и сите ние заеднички да придонесуваме кон градење на нашето општество. Бидејќи децата се нашата иднина. Вредностите кои се промовираат со самиот настан се: еднаквоста, љубовта и мирот помеѓу децта. Тоа пак води до нашиот постулат на програмските задачи на Детската Амбасада дека сите деца се исти и еднакви во остварувањето на нивните права, односно дека ништо не е позначајно од среќата на детското лице, па затоа на оваа Божикна трпеза заедно се дружат деца од другите верски заедници, од исламската, католичката, еврејската и евангелско-методистичката, кои заедно ќе се дружат и ќе празнуваат. – велат од Детската амбасада.

Божикниот Ручек традиционално го благословува Неговото Високо Преоствештенство, Митрополитот Преспанско-Пелагониски и Администратор Австралиски и Новозеландски, Господин Петар, а на сите деца ќе им се доделат пакетчина за слатки сеќавања на Божикниот Ручек, за кои се погрижи Градоначалникот на Општина Прилеп г-дин Борче Јовчески. Како до сега, така и оваа година за збогатување на свеченоста ќе се погрижат од танц студио „Зодијак“ од Прилеп, а оваа година забавниот дел ќе го збогатат и малите ангелчиња Димитар Иваноски од Прилеп и Јована Ристановска од Битола.

И оваа година, покрај добитникот на Орденот за носител на мирот, ќе се додели и ПЛАКЕТА ЗА ПРИЈАТЕЛ НА ДЕЦАТА, за кои Детската Амбасада за Сите Деца во Светот одлучи да ги додели на: Градоначалникот на Општина Прилеп, г-дин Борче Јовчески и Каролина Јовеска истакната соработничка на детската амбасада од Прилеп.

Организацијата на овој 19-ти по ред Божикен Ручек за успешно се реализира благодарение на пријателите на децата и Детската Амбасада, ЕЛС на Општина Прилеп, Лукоил Македонија, Алкалоид А.Д. од Скопје, Кромберт и Шуберт од Битола, А.Д. Реплек од Скопје, Бимфуд Доо од Прилеп, Прилепска Пивара од Прилеп, Млекара А.Д. Битола од Битола, Винчини од Виница и Фан продукција Зоран од Прилеп. Медиумски покровители на овој настан се: Канал 5 Телевизија, Македонската Радио Телевизија, Наша ТВ Телевизија, Тера Телевизија, Радио Холидеј и Радио Пела, веб порталите Шеталиште, Маркукуле и Инфокомпас.