Во чест на прерано починатиот Благојче Хаџи Спиркоски, кој пред 40 дена ја загуби битката со тешката болест и не’ напушти, неговите другари од навивачката група “Мајмуни”, синоќа му оддадоа почит, палејќи 43 бакли во форма на крст. Бројот на баклите ги симболизираа годините кои Благојче ги имаше.

Благојче Хаџи Спиркоски е роден на 9 септември 1981 година во Прилеп. Потекнува од скромно семејство, мајка и татко, тој и неговите две сестри. Основно образование завршил во Општинското основно училиште “Кочо Рацин” во Прилеп, средно образование завршил во Електро-машинскиот училиштен центар “Ристе Ристески Рицко” во Прилеп, а студираше на Универзитетот “Свети Климент Охридски” во Битола.

Од мал е љубител на хип-хоп музиката, бил дел од македонската музичка група “Македонски синови”. Голем љубител е на уметноста, посебно на ликовната уметност. Бил член на прилепската навивачка група “Мајмуни”.

Последните години од неговиот живот се предаде на Бога. Беше ревносен исповедник на верата Христова, знаеше да каже “Само од Христа се плашам, само на Него да не му згрешам!“

Во периодот од 2 – 3 октомври 2024 година во Скопје се одржува “WOMEN ECONOMIC FORUM” – G100 Meeting – Balkans 2024, кој настан е поддржан и од страна на „Витаминка“ АД како златен спонзор. Во рамките на третиот панел, учество како панелист зеде д-р Орде Ѓорѓиоски, Директор на правни и општи работи. Присутни беа и Натали Петреска, Директор на Контрола и Душица Неделкоска, Маркетинг и ПР Координатор.

-Панелот беше насловен “Shaping a Business Landscape for Women’s Career Success”, а нашиот претставник се осврна на многуте практики кои ние како компанија ги имаме за поддршка на жените, презентирајќи го фактот дека „Витаминка“ е компанија во која доминираат жените вработени со повеќе од 50% во вкупниот број, но и компанија во која најмалку 1/3 жени се на раководни позиции, а дури 60% од вкупниот број технолози се жени. Исто така, директорот изнесе и лични согледувања поврзани со темата, особено за подобрувањето на положбата на жената во компаниите и потребата од зголемување на бројот на жени претприемачи, за што се разви исклучително корисна дискусија. Овој Форум претставува извонредна можност да се научи нешто ново и да се споредат компаниските практики со светските трендови, а во правец на уште поголема инклузија и давање приоритет на знаењето и индивидуалните способности.Нашите колеги присуствуваат на настанот во овие два дена. Ја користиме приликата да се заблагодариме на организаторот за одличниот Форум, со желби да продолжи соработката за вакви и слични иницијативи во иднина – стои во соопштението од компанијата.

Одделот за криминалистичка полиција – Сектор за економски криминал и корупција во координација со Одделот за сузбивање на организиран и сериозен криминал, до Основното јавно обвинителство Скопје, поднесе кривична пријава против градоначалник на една скопска општина, пет лица вработени во Секторот за урбанизам во истата општина и правно лице од Скопје поради постоење основи на сомнение за сторено кривично дело „злоупотреба на службена положба и овластување“.

Имено, по поднесено барање за утврдување на правен статус на бесправен објект од страна на пријавеното правно лице, пријавените пет вработени во општината излегле на местото, бил изготвен записник за увид на место, во кој спротивно на Законот за градење и Законот за утрдување на правен статус на бесправно изградени објекти, констатирале дека наводно објектите за спорт и рекреација – тениски игралишта ги исполнуваат условите за нивна легализација, иако таков вид на објекти се времени објекти и не можат да бидат предмет на легализација, по што изготвиле и заедно со пријавениот градоначалник потпишале урбанистичка согласност, а по плаќањето на одредениот данок на имот, изготвиле и потпишале решение за утврдување на правен статус на бесправен објект.

На тој начин му овозможиле на пријавеното правно лице да ги запише наводно бесправните објекти во вкупна површина од 3993 метри квадратни, односно да се стекне со противправна имотна корист во износ од 147.341.700 денари.

Со длабока болка, тага и неизмерна жалост, ја примивме веста за тешката загуба на нашиот медицински персонал, кој денес загина во сообраќајна несреќа. Прим. д-р Александар Ристески, врвниот македонски радиолог, спец. гинеколог д-р Никола Василески и радиолошкиот технолог Фанче Јованоска, ги загубија животите во тешката сообраќајна несреќа утринава, доаѓајќи на своите работни места од Прилеп. Менаџерскиот тим и целиот персонал на Болница Плодност со неверување во текот на денот ја примија веста и со длабока тага им изразуваат почит на прерано загинатите колеги.- напишаа предмалку од болницата “Плодност” на социјалните мрежи.

„Изразуваме длабоко сочувство до семејства на нашите колеги, за прераната загуба на нивните членови на семејствата. Секој од нив имаше свое посебно место во нашата болница и во нашите срца. Прим. д-р Александар Ристески беше врвен бренд во македонската радиологија, но и во светски рамки. Неговата десна рака и соработник, радиолошкиот технолог Фанче Јованоска, беше неизоставен дел од Одделот за рентген дијагностика. Спец. гинеколог д-р Никола Василески долги години беше дел од гинеколошкиот тим на доктори во нашата болница. На достоен начин, Болница Плодност секогаш ќе ги памети нивните дела, но и нивните насмевки, топли зборови и секогаш отворени срца за пациентите и за колегите. Нивниот придонес ќе биде вечно запаметен и врежан во историјата на македонската медицина, но најмногу во аналите на историјата на Болница Плодност“, рече прим. д-р Таше Трпчевски, менаџер и сопственик на Болница Плодност.

Со соодветен комеморативен настан, Болница Плодност ќе им оддаде почит на трагично загинатите колеги.

Утрово во 7 часот и 51 минута, на патот Прилеп-Битола кај селото Лагово, се судрија патничко возило „тојота“ со прилепски регистарски таблички управувано од Н.В. (42) од Прилеп, со сопатниците А.Р. и Ф.Ј., сите од Прилеп, и товарно возило „волво“ со скопски регистарски таблички управувано од Г.Р. (51) од Битола, информира Министерството за внатрешни работи (МВР).

Патничко возило се движело во правец кон Битола, а камионот се движел во обратен правец кон Прилеп.

„Во несреќата патничкото возило се запалило и на самото место починале тројцата патници. Смртта ја констатирал лекар од Итната медицинска помош во Прилеп“, се вели во соопштението од МВР.

На местото на несреќата се врши увид од страна на јавен обвинител и полициски службеници од ОВР Прилеп.

Сообраќајот на магистралниот пат Битола-Прилеп е затворен за сообраќај во двата правци.

Во животот човек не се станува со пари. Богати сме доколку помагаме, богати сме доколку имаме човечност, срце… Големината на човекот е во помагањето на другите. Колку сме богати и големи зависи од нас. На 9.10.2024 на Могилата на непобедените во Прилеп во големиот стадион дојдете, бидете хумани и покажете дека заедно можеме да спасиме живот – стои во поканата од “Дрим тим од деца за деца” кои организираат хуманитерен концерт за помош на Никодим Мидоски, малото ангелче од Прилеп кое боледува од тумор на мозокот.

На концертот ќе настапат голем број музички имиња од естрадата, меѓу кои и: Јордан Митев, Стојне Николова, Ламбе Алабаковски, Елена Јовческа…

Влезницата чини 150 денари, а концертот е со почеток од 18 часот.

Секоја купена влезница е ваша директна донација за да помогнеме Никодим да ја победи болеста и да живее здраво и среќно детство.

Дојдете, забавувајте се и донирајте за Никодим, за повторно да покажеме дека Прилеп е град на хуманоста!

Ракометарите на РК Прилеп стигнаа до вториот триумф сезонава во Супер лигата. Во рамките од петтото коло во “Ричко” гостуваше фенерџијата на табелата, екипата на Радовиш.

Прилепчани забележаа рутинска и висока победа со 11 гола разлика. Крајниот резултат на семафорот беше 35:24 (19:12 на полувремето).

По почетните изедначени минути, при резултат 8:8, Прилеп направи серија од 6:0 и го трасираше патот кон нов триумф.

Вториот дел разликата постојано растеше и во ниту еден момент Радовиш не успеа да се врати резултатски во натпреварот.

Кај домаќините синоќа најдобар поединец беше Божидар Илиески со 8 погодоци, а го следеа Денис Шабановиќ со 5 и Христи Бикоски со 4 погодоци.

Во наредното коло Прилеп му гостува на Бутел.

Времето денеска ќе биде сончево со мала до умерена облачност. Попладне и во вечерните часови во западните делови ќе има зголемена облачност и повремен локален дожд. Ќе дува умерен, а наместа долж Повардарието повремено засилен ветер од јужен правец.

Во Скопје времето ќе биде сончево со умерена облачност, која кон крајот на денот ќе се зголеми. Ќе дува умерен, во делови од котлината повремено засилен ветер од југоисточен правец.

Минималните температури ќе бидат во интервал од 4 до 18, а максималните дневни ќе достигнат 26 степени.

Под влијание на циклонска активност утре и во деновите од викендот времето ќе биде променливо облачно со повремени врнежи од дожд. Наместа врнежите ќе бидат пообилни, локално во форма на невреме, проследени со грмежи и со засилен ветер.

Teшка сообраќајка утрово околу 7:30 часот се случи на патот Прилеп-Битола, пред индустриската зона, кога се судриле камион и две патнички возила.

Од сударот настанал пожар во товарното возило и во едно од патничките возила, при што неофицијалните информации говорат дека загинати се три лица кои се превезувале во едно од патничките возила.

Повеќе информации во текот на денот…

По повод празникот, Денот на вооруженото востание 11-ти Октомври, во вторник (08.10), со почеток од 19:30ч. во големата сала на Центарот за култура “Марко Цепенков”, концерт ќе одржи ансамблот “МАКЕДОНИЈА”.

Ансамблот МАКЕДОНИЈА е репрезент на македонската традиционална култура при Музичката Академија на Универзитетот „Гоце Делчев“ – Штип.
Единствен во државата, од ваков тип, ансамблот работи со кадар – професионалци кои се едуцираат низ споменатите институции. Со него раководат врвни професионалци и стручен кадар од областа на традиционална игра, традиционалните инструменти и пеење.

Репертоарот на Ансамблот Македонија е категоризиран според орските и музичките стилски карактеристики обработувајќи сценски адаптации од сите играорни подрачја во Македонија: Западно; Југозападно; Јужно; Источно и Северно играорно подрачје. Орскиот репертоар или традиционалното играње се презентира преку обредната и соборската традиција како на пример:

Обредни содржини – Џамалари од Скопска Блатија; Божиќарќе од Гора; Машки обредни поворки за Водици од Мијаци, Мала Река; Лазарице од с. Луке; Лазарки од Дебар; Велигденски игри од Порече; Ѓурѓевен од Азот; Тешкото – Мијаци, Мала Река и др.

Соборски содржини – Ораовички собор од Радовишко Поле и Радовишки Шоплук; Овче Поле; Нашето село од Скопска Црна Гора; Каршијак – Скопска Блатија; Чангулово- Малешевија; Шетнала се Јана -Пијанец; Пустец – Долна Преспа; Буките и Поседница – Воден/Меглен и многу други.

Главно обележје на орскиот и музичкиот репертоар се сценско-уметнички сегменти од традиционалната културата како на Македонците, така и на останатите етноси во Македонија. Изоставена е секаква стилизирана форма, а на широката лепеза од сценски адаптации, би ги споменале: Нели си се наспало (помуслиманети Македонци) од Струшки Дримкол; К`на геџаси – Турци Јуруци; Мама ми купи шарени чорапи – Мегленски Власи; Заигрување на бајракот – Хламбура – Власи Карагуни; Ромска свадба од Скопје; Роми Лазарки- Битола и останати.

Репертоарот на Ансамблот Македонија работејќи во правец на веродостојно афирмирање на македонските традиционални вредности, негува и презентира повеќе музички стилови и тоа:

– традиционален оркестар од тапан, гајда, зурла, кавал, шупелка, сворче, двојанка, тамбура,ќемане,
– чалгиски оркестар од канон, ут, кларинет, виолина, дајре, тарабука, прим,
– плех оркестар од тапан с`с саан, грнета(кларинет), жута (труба), тарамблок (тарабука).

Изразно средство со голема важност е и вокалниот елемент, без кој играта не може да се замисли и опстане. Вокалниот репертоар на Ансамбл Македонија истражува и се интерпретира низ неколку категории негувајќи различни стилски карактеристики: традиционално едногласно, двогласно (бордунско) и трогласно (гртено) пеење поделено според обредната или соборската практика, како од селската така и од градската музичка традиција.

Кон ова би го припоиле и фактот дека посебен сценско – естетски белег оставаат и оригиналните облековни елементи – носиите, со повеќе од 5000 облековни елементи и над 150 комплетни носии од различни етнички предели на Македонија кои датираат од крајот на XIX век и почетокот на XX век (Скопска Блатија, Скопска Црна Гора, Средорек, Жеглигово, Славиште, Пијанец, Малешево, Радовишко и Струмичко Поле, Костурско, Воден/Меглен, Леринска Река и Леринско Поле, Мала Река, Долна Река, Горни и Долни Полог, Азот, Прилепско и Битолско Поле и др.)

Облековниот инвентар на Ансамблот Македонија се презентира и преку различни модни стилови карактеристични за историското минато на македонската култура. Модни стилови карактеристични за градските центри како ала Турка од крајот на XIX и поч. на XX век со турско-ориенталното влијание во облековната култура, како и ала Франга – западноевропскиот градски моден стил од почетокот на XX век. За сценско презентирање на селската традиционална култура, ансамблот располага и со автентични традиционални носии од различните етнички предели во Македонија, нагласени преку различни социјални атрибути и реквизити, прикажувајќи ги различните социјални статуси во културата на живеење.
Младите функционални, сестрани уметници – играорци, исполнители на народни инструменти и пејачи, достојно го претставуваат она што се нарекува минато, она што претставува духовна и материјална култура, она што претставува генетскиот код на еден народ.

Основната порака од концертите на македонските културни амбасадори може само да се почуствува и доживее. Ансмблот Македонија, е оформен 2012 година, и во краткиот временски период на активно творење реализираше голема турнеја во Јапонија во 2013 год,турнеји и гостувања во Холандија, Бугарија, Германија, Србија, Турција, Полска, Литванија како и голем број на концерти во повеќе градови во Македонија. Во изминатите седум години ансамблот има реализирано повеќе од 500 концертни активности низ Македонија и светот.

Награди:

• Гранд при награда на интернационален фоклорен фестива „The Podlasque“, Octave of cultures 2015.
• Специјална награда за негување и афирмирање на традиционалната музика на 42 – ри Фестивал на анродни инструменти и песни Пеце Атанасовски, Долнени.
• „ПРИЗНАНИЕ ЗА МАКЕДОНСКИ КВАЛИТЕТ 2016 ГОДИНА“ доделено од Сојуз на стопански комори на Република Македонија.
• ГРАНД ПРИ НАГРАДА – X DANCE НАТПРЕВАР
• ПРИЗАНАНИЕ од Универзитетот „Гоце Делчев“ – Штип за Интернационална афирмација на универзитетот и македонската традиционална култура.