Ракометарите на РК Прилеп во моментов го играат вториот натпревар од плеј-аутот, а противник им е екипата на Тинекс Пролет.

Со враќањето на Филип Велески на терените, значително се подобри и играта во одбраната, па така на ако на првиот натпревар против Борец, за 30 минути игра Прилеп прими 7 голови, денеска мрежата на домаќините во првиот дел беше затресена само 6 пати.

Резултатот на полувреме 9:6, што ветува неизвесен натпревар до самиот крај.

Со победа на овој дуел прилепчани ќе избијат на првото место на плеј-аут табелата, и ќе итаат кон обезбедување на нова суперлигашка сезона.

Првото електронско пријавување за упис во средно образование во учебната 2025-2026 година трае од 14 до 17 јуни, а второто е на 30 јуни. Конечните ранг листи по двете пријавувања, училиштата ќе ги објават на 2 јули. Како и во изминатите учебни години учениците ќе треба да достават хартиени документи до училиштата, а се прават напори од следната учебна година процесот целосно да се дигитализира.

За ова министерката за образование и наука проф. д-р Весна Јаневска информираше во емисијата „За или против“ на ТВ Алфа, потенцирајќи дека конкурсот е креиран во соработка со општините.

„Општините имаа обврска да направат анализа на пазарот на трудот и да го известат Министерството за образование и наука за кадарот кој им е потребен. Врз основа на тие информации го креиравме конкурсот, кој е објавен на нашата веб страна и во печатени медиуми“, рече Јаневска.

По однос на полагањето на државната матура, министерката информираше дека оваа година дел од учениците ќе полагаат во холовите и спортските сали во рамки на училиштата, а дел ќе полагаат во амфитеатрите на најблиските факултети, заради поголема објективност на целиот процес.

Рече дека е неопходно да има растојание од 1,5 метар помеѓу учениците, апелирајќи до нив да не се вознемируваат од просторот каде ќе полагаат и да се фокусираат на подготовките.

-На 05.04.2025 во периодот од 10.00 до 15.00 часот Секторот за сообраќајни работи при Одделот за униформирана полиција и Мобилната единица за безбедност на сообраќајот на патиштата спроведоа акциска контрола на територијата на СВР Битола, ОВР Прилеп за санкционирање на возачи кои не ги почитуваат сообраќајните правила и прописи.

При контролата санкционирани се 81 возач, од кои 22 за возење без возачка дозвола, пет возачи за возење со изминат рок на важност на сообраќајната дозвола, три возачи под дејство на алкохол. Изречени се осум санкции за возила со затемнети стакла без извршен А-тест, три мерки за возење со брзина поголема од дозволената, осум санкции за непрописно паркирани возила, шест мерки за претовар на товар и необезбеден товар, одземени се две возила по 344/4 од ЗБСП односно возила со изминат рок на важност на сообраќајната дозвола повеќе од шест месеци, одземена е една возачка дозвола по член 341 од ЗБСП…

На сите прекршители изготвени им се соодветни поднесоци.

Сообраќајните контроли продолжуваат и во наредните денови.

Апелираме до сите учесници во сообраќајот да ги почитуваме сообраќајните правила и прописи и заеднички да придонесеме за побезбедни патишта – информираат од МВР.

Пратеникот на СДСМ од Прилеп, Миле Талевски, на последната седница за пратенички прашања во Собранието, го обвини министерот за внатрешни работи, Панче Тошковски, за селективност во истрагата за пожарот во Кочани, при што наиде на жесток одговор.

Талевски го праша Тошковски за притворениот припадник на МВР од обезбедувањето на премиерот Христијан Мицкоски осомничен за тргување со информации.

-Мислите се уште дека е времето, каде ќе кренете некој телефон и ќе завршите работа и вашиот ќе го спасите. Умре тоа време, заврши. Јас знам дека ви е тешко да го прифатите тоа и дека ви е тешко да се соочите со одговорноста, ама дојде време кога секој што се огрешил да одговара, без разлика дали е градоначалник од ВМРО, дали е градоналник од СДСМ, без разлика дали е министер од ДУИ, што во ваше време беше незамисливо. Не можевте во очи да ги гледате, а не по случајно за нив процес да се води – рече Тошковски.

https://www.facebook.com/reel/1678722979395072

Фудбалскиот клуб Пелистер и навивачката група “Чкембари” собраа вредна донација за семејствата на настраданите и повредените од трагедијата во Кочани.

Во соопштението од клубот се вели:

„ФК Пелистер, љубителите на фудбалот во Битола, навивачката група „Чкембари“ го исполнија ветеното. Приходот од билетите од натпреварот од 25. коло на Првата фудбалска лига е дониран за семејствата на настраданите од трагедијата во Кочани. Исто така независно од натпреварот, навивачката група „Чкембари“ реализираше индивидуална акција во која собра дополнителни средства кои се додадени во донацијата. Нашиот град и нашиот клуб уште еднаш ја покажа својата хуманост и човечност во тешките моменти за нашата земја и нашите граѓани. Да не се повтори…“ 

Во Крушево оваа 2025 и 2026 година ќе се одржат Светско и Европско првенство за параглајдерство, покрај нив ќе се одржат британското и германското првенство – напиша на ФБ градоначалникот на општина Крушево, Томе Христоски.

-Официјална потврда добивме дека Крушево е прогласена за светска дестинација за овие спортови! Две меѓународни збиднувања и уште десетина други национални збиднувања со посета на најдобрите светски пилоти од целиот свет токму во нашето Крушево се потврда дека работевме напорно и посветено изминативе години со конкретни одржливи проекти кои значат раст и развој на туризмот, да станеме препознатлива и посакувана дестинација. Продолжуваме да градиме одржлива, напредна и развојна, препознатлива и посакувана дестинација 365 дена во годината – стои во објавата на Христоски.

Во координирана акција на повеќе надлежни служби, мечка која била заробена во криволовна замка, беше успешно ослободена во близина на селата Љубојно и Брајчино, Општина Ресен.

Случајот беше пријавен преку Единствениот број за итни случаи 112, по што реагирале регионалните служби и институции, кои веднаш започнале со операција за спасување на животното.

„Добивме пријава дека во атарот помеѓу Љубојно и Брајчино има заробено диво животно. Претпоставивме дека се работи за мечка поради гласното рикање кое се слушаше близу мостот на Брајчинска Река“, изјави претставник на Регионалниот ЦУК Битола.

„Веднаш беа информирани сите надлежни служби, вклучувајќи ја и Граничната полиција, Полицијата на Ресен, како и ловното друштво и други субјекти“, велат од ЦУК.

Акцијата беше брза и ефикасна, а животното беше ослободено со помош на ловците од Концесионерот, ветринарите од Националниот парк „Пелистер“, како и полицајците од МВР. Со употреба на средствата за успивање, мечката беше безбедно ослободена без повреди и пренесена на сигурно место.

„Благодарение на брзата реакција на сите вклучени, мечката е спасена. Ова е пример за одличната координација меѓу надлежните служби, што овозможи успешна акција“, додаваат од Центарот.

Инцидентот ја потсетува јавноста на важноста од брза реакција и координација во спасување на диви животни од незаконски стапици и криволов.

“Ајде да си зборуваме за растенија” е насловот на изложбата од уметницата Елена Димоска Николоска, што беше отворена синоќа во Ликовната галерија при ЦК”Марко Цепенков” во Прилеп.

На првата самостојна изложба оваа млада уметница, рече м-р Каролина Мицевска, новинар, се претставува со дела на кои се истражува убавината и упорноста на природата, наспроти човечката летаргичност и занемарување.

-Проектот ја истакнува дијаметралната спротивност помеѓу човечкото занемарување и упорната способност на природата да ја пополни празнината.Покрај илустрирањето на човечкото занемарување, проектот покажува како природата наоѓа начин да даде цел на напуштени места, трансфирмирајќи ги во живописни градини и шуми – рече Елена Димоска Николоска.

Уметницата има дипломирано на ФЛУ Скопје, каде наскоро треба да магиструра. Има реализирано повеќе групни изложби, а работи како професор по ликовно образование во училиште во Прилеп.

Изложбата е дел од годишната програма на ЦК”Марко Цепенков” поддржана од Министерството за култура и туризам.

Препис од чудотворната икона на Пресвета Богородица – Скоропослушница, ќе пристигне денеска во 16 часот во манастирот „Рождество на Пресвета Богородица“ во село Побожје, на Скопска Црна Гора, информира Скопската епархија на МПЦ-ОА.

Иконата ќе биде донесена од монаси од манастирот Дохијар на Света Гора и верници од Скопската епархија, а ќе биде дочекана пред манастирската порта од Архиепископ Охридски и Македонски г.г. Стефан, заедно со свештенство, монаштво и верен народ.

По пристигнувањето ќе биде отслужена Воскресна вечерна богослужба со која ќе началствува г.г. Стефан, а присутните ќе имаат можност да се поклонат пред чудотворната икона на Мајката Божја.

-На 03.04.2025 при контрола на видео надзорен систем на теренот на ПС за ГН Старавина, на местото викано „Брест“ било забележано моторно возило „дачија дастер“ со странски регистерски таблички.

По извршени проверки, во 19 часот, во близина на село Подмол, полициски службеници го пронашле возилото и при извршена контрола констатирано е дека во него биле J.M.(26), Ф.К. (53) и M.H. (47), сите од Р.Чешка, а сместени во закупен стан во Прилеп.

Тие се лишени од слобода и спроведени во ОВР Прилеп.

По наредба на надлежен јавен обвинител од ОЈО Прилеп, извршен е претрес во домот каде што престојувале трите лица, при што е пронајдена метална кутија во која имало 20 стари монети. Се преземаат мерки за расчистување на случајот.