Во организација на основното училиште „Даме Груев“ и со поддршка на општина Битола, во Кристалната сала на Офицерскиот дом синоќа голема
поддршка добија македонските претставници на детската Евровизија, Ана Ванчевска и Алексеј Ивановски.

Со знамиња, транспаренти и други навивачки реквизити, битолчани, меѓу кои и градоначалникот Тони Коњановски, како и професорите и учениците од основното училиште „Даме Груев“, каде што учат нашите евровизиски претставници, со громогласен аплауз и овации го дочекаа и испратија
настапот на Ана и Андреј, на детската Евровизија, која се одржа во шпанскиот град Мадрид.

За прв пат од одржувањето на детската Евровизија, имаме битолски претсавници, кои одлично не’ претставија во Мадрид, со својот сценски
настап и музичка изведба на песната „Маратон“.

Градоначалникот Тони Коњановски, пред заминувањето во Шпанија, ги прими во својот кабинет Ана и Алексеј и изрази задоволство што овогодишните претставници се токму две млади лица од нашиот град, кои ја претставуваат Македонија и Битола, при што им посака успех и желба за што поголем пласман на овој настан.

Jaнко Пенафорт oд Колумбија и неговиот колумбиско-венецуелски бенд се вљубиле во македонската музика и фолклор и ја направија Фејсбук страната “Колумбиец пее на македонски”.

Уште со првото видео, каде ја маестрално ја изведуваат “Јовано Јованке”, ги собраа симпатиите од Македонците ширум светот и добија илјадници позитивни кометари и споделувања.

За тоа како се заљубил во македонскиот мелос, Јанко вели:

“Како музичар од Колумбија, мислев дека сум слушнал сè. Ритми, мелодии, приказни што ги раскажува музиката, но потоа ја открив македонската музика. И да ви кажам, тоа е нешто што никогаш досега не сум го слушнал.

Еве зошто толку ме фасцинира:

1️⃣ Спој на култури: Растејќи во Колумбија, сум навикнат на мешавина од звуци – но македонската музика? Тоа е ремек-дело на историја и култура. Од словенското срце до влијанијата на Отоманската Империја и понатаму, секоја песна е како патување низ времето.

2️⃣ Ритми што ја движат душата: Првиот пат кога ги слушнав тие 7/8 и 9/8 ритми, не можев да останам мирен. Тоа е ритам што зборува со твоите коски. Игра, длабок е, и го чувствуваш во градите – како срцев удар.

3️⃣ Емоција во секоја нота: Она што најмногу ме погоди беше суровата емоција во мелодиите. Без разлика дали се работи за љубов, загуба или копнеж, овие песни ти го допираат срцето на начин што е универзален. Без разлика од каде си, го чувствуваш тоа.

4️⃣ Инструменти што раскажуваат приказна: Звукот на гајдата, кавалот и тапанот е нешто што никогаш досега не сум го слушнал. Како секој инструмент да носи со себе илјадагодишни приказни. А гласовите? Моќни, душевни – го чувствуваш духот на Македонија во секоја нота.

5️⃣ Музика што ги спојува луѓето: Во Колумбија, музиката е заедница, славење. И го најдов истиот дух во Македонија. Од свадби до фестивали, музиката е срцето на секое собирање, спојувајќи ги луѓето во радост. Толку е слично на нашите прослави.

6️⃣ Прекрасна разновидност: Сакам како македонската музика ја прегрнува својата богата разновидност. Ги слушаш различните влијанија – од словенските традиции до звуците на албанската и ромската заедница. Тоа е прекрасен одраз на душата на земјата.

-По преземени мерки и активности на подрачјето на општина Аеродром во Скопје, полициски службеници од Единицата за интервентна полиција и Единицата за недозволена трговија при СВР Скопје во периодот од 23.20 часот на 15.11.2024 до 03.50 часот на 16.11.2024 лишиле од слобода 12 лица. Б.П.(29) од Скопје бил лишен затоа што кај него биле пронајдени таблети, кај Б.Ј.Р.(21) од Скопје била пронајдена бела грутчеста материја, кај А.С.(21) од Битола, а со живеалиште во Скопје, била пронајдена бела прашкаста материја, кај С.Т.(23) од Битола, а со живеалиште во Скопје, била пронајдена таблета, кај Н.Н.(28) од Куманово бела прашкаста материја, кај А.С.(24) од Прилеп таблети, кај Д.М.(20) од Битола грутчеста материја, кај О.С(30) од Битола прашкаста материја, кај М.К.(23) од Битола бела грутчеста материја, кај И.К.(21) од Велес таблета, кај К.Л.(31) од Скопје таблети и кај Д.Р.К.(24) од Тетово била пронајдена бела прашкаста материја.

По целосно документирање на случаите, против лицата ќе бидат поднесени соодветни поднесоци – информираат од МВР.

Во нови современи простории, лоцирани на улица “Партизанска” бр. 16, музичкото училиште “Матрикс” од Прилеп ја продолжува својата мисија за градење на бројни музички таленти. Во нивните училници досега блеснале голем број инструменталисти и одлични вокали, а сега поради големиот интерес, “Матрикс” воведува нова насока наменета за најмалите – МАТRIX KIDS.

Станува збор за група каде можат да се пијават дечиња од 4 до 7-годишна возраст, а ќе изучуваат теорија на музика, солфеж и хорско пеење. Низ тајните и убавините на музичките ноти ќе ги води Викторија Георгиоска, дипломиран соло пејач на Музичката академија во Скопје.

Наставата е предвидено да се одвива во групи по пет деца, програмата е забавна и освен што вашите најмали ќе научат многу за музичките правци, ќе започнат да го развиваат својот музички талент и сигурно да чекорат кон музичките скалила.

Целта е да се создаде модерен детски хор кој ќе настапува и ќе го претставува Прилеп на бројни манифестации и концерти.

Побрзајте, бројот е ограничен на три групи. Овозможете им на вашите најмали најсовремени услови за музички раст, развој и секако одлична забава и другарување.

Пријавувањата се во тек на телефонскиот број: 078278541 или во порака на ФЕЈСБУК СТРАНАТА НА УЧИЛИШТЕТО МАТРИКС: https://www.facebook.com/matrixmuzickouciliste

Денеска и утре, во едно од омилените места на младите во центарот на Прилеп, Coffee My Place (Бизнис центар – приземје) се одржува голем турнир во табла.

Денеска се играат натпреварите во групи, а турнирот започна во 11 часот. Утре исто со почеток од 11 часот ќе се играат шеснаесетфиналните, па четвртфиналните и полуфиналните натпревари, и на крај секако големото финале.

За најдобрите следуваат вредни награди:

ПРВО МЕСТО – 10.000 денари

ВТОРО МЕСТО – 5.000 денари

ТРЕТО МЕСТО – 3.000 денари

Додека за сите четвртфиналисти, организаторите подготвија ваучери од спонзорите на турнирот: Прилепска пиварница, Витаминка, пицерија Академи, Паренцо, Нептун, ЈК Травел, Porchella, бутик Аполо, теретана PROFESSIONAL и продавница за играчки Тргачо.

Натпреварите се играат на 5 добиени поени, а фрлањето на заровите е од чаша.

Повеќе од две децении во образование, инспиративен професор по англиски јазик, учениците ја обожаваат, а англискиот јазик им станува втор мајчин јазик. Девет години менаџер на ООУ “Блаже Конески”, образована институција која во тие години доживеа вистинска ренесанса. Еден од ретките доктори на науки по англиски јазик од нашиот град, жена која постојано се надоградува и вложува макотрпен труд во што и да работи.

Toa e Mарија Дулеска, една од омилените професорки од Прилеп, чии методи на работа, идеи, професионалност и умешност, заслужуваат внимание од највисоките институции и можат да се искорист за подобрување на целиот образовен систем кај нас.

Со еден збор Дулеска е одличен педагог, а со својата креативност, непосредност и желен пристап да го пренесе знаењето на учениците, остварува резултати со кои ретко кој наставник и професор може да се пофали. За неа подеднакво се важни и учениците во селска и учениците во градска средина.

Во продукција на “ФОТО БЕЏО”, a во чест на нејзините покојни родители, Д-р Марија Дулеска, неодамна сними и краток документарен филм за својот досегашен животен и професионален пат. Едно убаво 12-минутно видео кое веруваме дека ќе го изгледате од почеток до крај.

Премиерот Христијан Мицкоски најави дека очекува до крајот на месецот да има две нови инвестиции.

Едната, како што појасни, ќе биде проширување на веќе постоен погон, а другата ќе биде сосема нова инвестиција. Двете инвестициите ќе бидат во вредност до 50 милиони евра и ќе обезбедат до 500 нови работни места.

-Преговараме и очекувам до крајот на овој месец да имаме две инвестиции. Едната ќе биде проширување на веќе постојан погон, а другата ќе биде сосема нова инвестиција, кои ќе обезбедат до 500 нови работни места. Очекувам овој месец тие две да ги завршиме, а веќе во декември ќе имаме најмалку уште две, но и почеток на една нова инвестиција, поточно ставање на камен темелник, изјави денеска Мицкоски во одговор на новинарско прашање, за време на поставувањето на камен темелник за надградба на ООУ „Ацо Шопов“ во Бутел.

Тој рече дека инвестициите ќе бидат во секторот градежништво и автомобилската индустрија.

На новинарско прашање во врска со средбата што се одржала оваа недела со потенцијален партнер за инвестиција во когенеративна гасна постројка, и дали станува збор за грчката компанија „Митилинеос“, Мицкоски одговори дека не е вклучена оваа грчка компанија, туку станува збор за сосема нов концепт и посочи дека има три компании кои се сериозно заинтересирани за вложување во ваков тип на енергетска инфраструктура на когенеративни производни капацитети.

-Ние жестоко ја критикувавме грчката „Митилинеос“, затоа што ценевме дека е штетна таа инвестиција и дека нема да донесе добро за македонските граѓани. Сега би било непристојно шест месеци потоа, само затоа што сега сме Влада да го смениме мислењето. Јас така не функционирам. Може да се случи да се поместиме доколку добиеме во меѓувреме аргументи, но не само што не добиваме аргументи, туку убедени сме дека тоа е штетна инвестиција и не е одговор на потребата на скопјани, но и генерално на државата, рече Мицкоски.

Тој напомена дека имаме три компании кои се сериозно заинтересирани за вложување во ваков тип на енергетска инфраструктура когенеративни производни капацитети и нормално, и со сите се преговара, за да се види кои се најдобрите услови. Но, нагласи, тоа нема да биде ништо надвор од актуелните програми за поддршка на инвестициите, нема да биде инвестиција со која ќе биде загарантиран откупот или по принцип, туку ќе биде на основа на правилата на пазарот. Мицкоски додаде дека ќе биде инвестиција која ќе користи зелена енергија.

-Секако, ќе биде инвестиција која што ќе користи зелена енергија, бидејќи се обврзавме со планот за раст дека ќе овозможиме производите што ќе се извезуваат во Европската Унија, да имаат зелено брендирање дека се произведени од зелена енергија. Ние последни почнавме како Влада, споредено со другите пет земји од Западен Балкан, први ќе ја добиеме првата транша, бидејќи најквалитетно и први си ја завршивме домашната задача во овие четири месеци. Последни почнавме, први ја добиваме и сме многу понапред во сите други процеси од другите пет земји. Имаме амбициозен план и сакаме да го реализираме, додаде Мицкоски.

Со изведбата на претставата „Ѓоре Магаревски 80 години потоа“, Народниот театар – Битола го одбележа 80 годишниот јубилеј на театарот. Во преполната сала, претставата и ансамблот беа поздравени со бурни и долги аплаузи. Пред премиерата беше презентирано историското катче на НТБ, изложбата на 100 плакати, постери, каталози на Христо Бојаџиев и Владо Ѓорески, посветени на претставите во НТБ.

На почетокот многубројната публика ја поздрави директорот на Битолскиот театар, Васко Мавровски.

„Одговорноста беше голема и сеуште трае, бидејќи ова беше само еден дел од настаните, не очекуваат уште многу премиери, уште многу работа, но сметам дека заедно со целиот колектив 69 вработени, завршивме голема работа, направивме римејк на претстава која се одиграла пред 80 години. Се работи за интегралната верзија на текстот, онаа која се играла пред 80 години. Ги имаме истите проблеми, само што живееме во некое друго време. Повторувањето 3 пати на истиот текст од тројца различни режисери е да не дозволиме да заборавиме дека тоа може повторно да се случи“.

Како што рече Мавровски, театарот го користеле како медиум во минатото.

„И ние како модерна театарска институција ги пренесуваме пораките преку театарот. Наше е да ги повикуваме и освестуваме луѓето во однос на оние клучни прашања, бидејќи во театарот не постои партија, кај нас театарот е на прво место. Идентитетот, јазикот, тоа е нешто што ние сме должни да го негуваме и ќе продолжиме на истиот начин“.

Меѓу присутните бројни претставници на другите македонски театри и вљубеници во театарската уметност. Градоначалникот на Општина Битола Тони Коњановски, со своја честитка.

„Би сакал да изразам огромна благодарност за сето она што Битолскиот театар го прави, посебно на генерациите кои продефилираа овде и на сите оние кои сега не се со нас, за се она што го подариле на градот, на државата. Се надевам дека уште многу јубилеи заедно ќе славиме и ќе се радуваме на вашите успеси, а ние сме тука како град, како локална самоуправа да го поддржиме во секое време, затоа што Битолскиот театар е нашиот културен амбасадор во светот“.

Јубилејот преку порака го честитаа и Претседателката на Македонија, Гордана Силјановска Давкова и министерот за култура и туризам, Зоран Љутков.

„Со задоволство го чествуваме важниот датум на Народниот театар од Битола. Тој е една од најстарите и најпочитувани културни институции, надалеку позната по ширењето на духот на уметноста, не само дома во Битола, туку и на многу други престижни театарски сцени, на кои битолските актери и актерки изведоа маестрални претстави, добија бурни аплаузи и овации, се овенчаа со награди. Изминатите 80 години Битолскиот театар беше неуморен неимар и учесник во културниот и општествениот живот“, се вели во пораката на Силјановска Давкова.
„Битолскиот театар со својот квалитет потврди дека врвната уметност секогаш победува. Денес славејќи го минатото, гледаме во иднината.Уверен сум дека прославувајќи многу јубилеи, Битолскиот народен театар, со ангажираноста и со своите уметнички вредности, ќе остане пример за тоа како се создава и како се негува врвната театарска естетика“, истакнува Љутков.

Пред почетокот на изведбата беа поделени Плакети за допринос кон Битолскиот театар, на пензионираните театарски работници.
Претставата „Ѓоре Магаревски 80 години потоа“е составена од 3 дела во режија на Благој Мицевски, Софија Ристевска Петрушева, Јован Ристовски.

„Јас во театарот сум повеќе од 30 години, повеќето од актерите со кои работев на оваа претстава ги познавам од деца. Беше интересно да се работи со нив, да направиме еден проект кој јас го нареков мала рашомонијада, во смисла дека ја бараме вистината. Секоја вистина има повеќе вистини. Ние тројцата режисери се споивме да работиме еден текст со кој започна нашиот театар пред 80 години, да видиме како тоа ќе звучи денес. Чувствата после премиера се емотивни, јас сум еден од оние кој својот живот и кариера ги посвети на Битолскиот театар и своите најдобри дела ги направив токму тука“, рече Мицевски.

„Ми беше чест да режирам јубилеј на еден сериозен театар. Разликата тогаш и сега е во тоа што луѓето делеле една идеологија тогаш, а денес некоја друга. Затоа делот кој го режирав е посензитивен, политички ангажиран театар и она што мене ме интересира секогаш е вистината, она што го премолчуваме па и векови наназад. Овој народ најчесто е цензуриран, така што направив еден вид пародија и еден врисок на се она што ни се случува на политички план. После 80 години ние сеуште ја живееме истата историја, под многубројни влијанија. Мислам дека сме во фаза на освестување на народот да се одлучиме на свесно ниво да признаеме што не знаеме, и така можеме да станеме подобри да го градиме на свесно ниво идентитетот“,ни изјави Ристовски.

Софија Ристевска Петрушева додавде дека единствено што е важно за секој човек е честа, моралот, лојалноста и солидарноста, а никој на крај не го почитува предавникот.

Авторката и драматург Билјана Крајчевска истакна дека оваа едночинка од пред 80 години, го претставува политичкиот театар кој работи на самосвеста, претстава која го означува почетокот на културолошкиот, театарски идентитет на нашата земја.

„Чест и задоволство беше да се работи на овој текст, но пред се одговорност да се биде дел од јубилејот, бидејќи сето она што се случило во овие 80 години, треба да не освести дека треба го сочуваме тоа богатство кое сме го стекнале изминатите години, достојно да го сочуваме, Битолскиот театар. Текстот за прв пат бил изведен во партизанските одреди, во партизанската културна единица во Егејска Македонија во с.Робово, пред првата и втората бригада, а по ослободувањето се игра во Битола за прв пат претстава на македонски јазик во институција. Тука е и мојата лична приказна која ми даде уште повеќе мотив бидејќи потекнувам од Егејска Македонија. Ова сето го зборувам дека ние не треба да бегаме од сопствените приказни“.

Јубилејот на Битолскиот театар, се одбележа токму со текстот од првата претстава која се одиграла на македонски јазик во слободна Македонија, на 14 ноември, 1944 година, кога беше одиграна едночинката „Ѓоре Магаревски“ или „Петтоимениот Ѓоре“ од Владо Малески, во режија на Димче Стефановски. Во првото театарско јадро на овој град тогаш беа Јорго Цаца, Вера Вучкова, Димче Стефановски, Ацо Стефановски, Мери Бошкова, Симо Георгиевски,Славче Матевски, Георги Карев, Јован Бејко.На сцената во јубилјната претстава настапија актерки и актери од сите генерации, вклучувајќи ги и пензионираните. Во три кратки едночинки улогата на Ѓоре ја играат актерите од НТБ, Марјан Ѓоргиевски кај режисерот Благој Мицевски, Александар Димитровски кај Софија Ристевска, и Никола Пројчевски кај Јован Ристовски.

„Работевме во три екипи и цело време се трудевме да бидеме едно, како што доликува на прослава за 80 години на овој театар. Се обидов на мој препознатлив начин да го пренесам мојот лик. Според мене историјата не ни се повторува, нас во континуитет ни се случува“, рече Никола Пројчевски.

Еден од актерите во претставата сподели со нас што за него е Битолскиот театар.

„Ми беше носталгично, се вратив назад во времето на првата претстава која ја гледав во Битолскиот театар, 1981, на мои 5 години, кога сфатив дека сакам да бидам дел од оваа професија. Во 1997 беше моето деби на професионална сцена, потоа беше монодрамата „Најпосле крај“ и многу моменти кои ме потсетија на мојата поврзаност изминативе години со Битолскиот театар“, рече Александар Копања.

За сценографијата се погрижи Валентин Светозарев, костимографија Благој Мицевски, Андреј Папаз Ѓоргиевски, светло мајстор Игор Мицевски, Горан Петровски, тон мајстор Александар Димовски, шминка Стефанија Илиевски, видеооператор Владимир Переловски, автор на плакат Сашо Илковски, инспициент Димитар Михајловски. Со основањето на НУ Народен театар – Битола во 1944 година, почна процесот на основање на другите театри во земјава – во Скопје, Прилеп, Велес и во други македонски градови. Низ годините Битолскиот театар стана бренд кој со гордост ги негува македонскиот јазик и култура, претставувајќи ги насекаде во светот. Прославувањето продолжи во Свечената сала на Офицерскиот дом.

Убави вести секојдневно се шират од битолската болница „Плодност“.

ФОТО/илустрација

Благодарение на врвниот тим во специјалната болница по гинекологија и акушерство, 51-годишна жена успеа да забремени со близнаци.

По две неуспешни инвитро постапки, среќната трудница доби позитивен тест за бременост и за неколку месеци ќе може да се радува на две мали чеда.

Еве ја целосната објава од болницата:

На 51 година, постигната близначка бременост.

Овој пат, ембрините се инкубирани во Тајм Лапс инкубатор, единствен кај нас во Македонија, кој овозможува оптимални услови за раст и развој на емброните.

Актуелниот шампион Еурофарм Пелистер на свој терен без проблеми, синоќа во рамките од 11. коло во Супер лигата, триумфираше над Прилеп со 46:24.

За пелистерци ова беше 9-ти сезонски триумф во домашниот шампионат и загревање за важниот натпревар против Фредериција во Лигата на шампионите, а гостите од Прилеп го претрпеа шестиот сезонски пораз.

Избраниците на Божидар Мојсов имаа солидно прво полувреме, па иако на самиот старт пелистерци направија серија од 4:0, кон средината на првото полувреме Прилеп имаше само -2 гола разлика (13:11).

Тука шампионот се разбуди и до крајот на натпреварот не дозволи Прилеп одново резултатски да се доближи, за конечни 22 гола разлика.

Во наредното коло Прилеп гостува кај Пролет, а потоа на свој терен го дочекува Куманово.