Црвените јајца во христијанството се симбол на воскресението Христово и на самиот празник Велигден. Формата го претставува гробот на Христос, како што од јајцето излегува живот кога ќе се испили, така од гробот излегол Исус Христос.

Црвената боја има симболика на победа. Нејзиното значење на овој голем Христијански празник е дека Господ Исус Христос со своето воскресение ја победил смртта.

Црвената боја ја претставува божјата сила и моќ, а воено ја симболизира и христовата крв, која Исус ја пролеал на крстот за спасение на сите луѓе на земјава. Така, бојата на јајцето не потсетува на крвта христова и спасението.

Оваа црковна традиција потекнува од првиот век по Христа, односно тоа се практикувало уште во времето на светите апостоли – христови ученици и нивните наследници.

За тоа сведочи Светото предание. Велигденското јајце е старо колку и Христијанството и црквата го прифатила во својата традиција и практика како симбол на Христовото Воскресение.

Првите христијани и современици на апостолите почнале да бојадисуваат јајца и да ги подаруваат на Велигден, поздравувајќи се со поздравот Христос Воскресе! На тоа отпоздравувале: Вистина Воскресе!

Според Светото предание се смета дека Марија Магдалена, една од жените мироносци прва го започнала овој обичај за велигденските црвени јајца.

Интеракт клубот од Прилеп, или подмладокот на Ротари клуб во нашиот град, донираше маса и столчиња за мајчината школа – место каде идните мајки ќе добиваат поддршка, знаење и охрабрување, како и заштитни прекривки за јоги за одделението за гинекологија и акушерство.

-Од срце благодариме на Интеракт клуб Прилеп, подмладокот на Ротари клуб Прилеп, за нивната донација. Ваквите гестови ја исполнуваат нашата заедница со топлина, солидарност и вистинска човечност. Благодариме што верувате во доброто. Благодариме што сте со нас – напишаа од болницата “Борка Талески” на ФБ.

Oдичниот прилепски рок бенд The Doctors со задоволство ви ја претставува нивната прва авторска песна, насловена како “Татнеж во тишината”.

Бендот кој го сочинуваат Сергеј Попоски – вокал, Марко Стојаноски – гитара, Ѓорѓи Петкоски – бас гитара и Вилијам Спироски – тапани, е веќе добро познат помеѓу младите во Прилеп, а на нивните свирки атмосферата е секогаш одлична.

Тhe Doctors се познати по својот одличен рок, поп-рок и фанк репертоар, а четворицата членови на бендот секогаш звучат како едно и пружаат неверојатен перформанс на сцената.

Во продолжение слушнете го и уживајте во нивниот прв авторски проект:

Градоначалникот на општина Битола, Тони Коњановски и советникот Бојан Бојкоски, извршија увид на денешните активности за асфалтирање на улицата, кои согласно динамиката на изведувачот ќе се изведуваат денес и утре, на потегот помеѓу новопроектираната улица „Индустриски пат“ до „Пивара“, односно делот кон А.Д Фабрика за квасец и алкохол и Фабриката за шеќер.

Реконструкцијата на коловозот на оваа важна сообраќајница, значително ќе го олесни функционирањето и ќе придонесе за растоварување на сообраќајот од тешки товарни возила на улица “Македонски гемиџии“.

Овој проект, претставува реализација на уште едно долгогодишно барање на стопанствениците од овој дел на Битола, со што значително се подобруваат условите за нивна непречена работа.

Реконструкцијата на улицата се врши во должина од 2418 метри, во вкупна вредност од 37.600.000 денари, а средствата се обезбедени од Светска банка во рамките на проектот за поврзување на локални патишта.

-На 16.04.2025 во 00:00 часот на ул.”Орде Чопела” во Прилеп, полициски службеници од ОВР Прилеп ги лишиле од слобода В.А.(22), С.А.(36), Б.И.(26) и Г.А.(32), сите од Прилеп.

При преглед кај Г.А. била пронајдена прашкаста и грутчеста материја, додека при преглед во патничко возило “опел” со битолски регистарски ознаки во кое се превезувале, а го управува В.А., била пронајдена марихуана.

По документирање на настанот ќе следуваат соодветни поднесоци – информираат од ОВР Прилеп.

Министерот за економија и труд Бесар Дурмиши денеска на јавна расправа која се одржа во Собранието го образложи Законот за работно ангажирање на лица.

Дурмиши истакна дека Министерството активно работи на мерки за намалување на сивата економија и обезбедување на социјална заштита за работниците, а една од целите на законот е да се спречи иселувањето на младите како и да им се даде на македонските компании легален однос да ангажираат работници да дојдат до што е можно поголем број на работници.

Министерот смета дека на тој начин компанијата можат да ги прошируваат своите економски дејности.

-Исто така преку овој закон целиме да ја зајакнеме економијата бидејќи кога ќе биде направена легална рамка и на работниците ќе се даде можност легално да заработуваат тогаш истите тие работници по основ на примена плата, ќе исплатат даноци спрема државата, но и преку индиректините контрибутори во економијата ќе најдат начин да ја засилат личната потрошувачка, да наплати државата даноци итн. Со овој закон се овозможува поедноставена постапка за работно ангажирање на лица за повремени и сезонски работи во одредени дејности, добиваме поголем број на придобивки во повеќе различни области. Овој закон е во насока за задоволување на потребите од работна сила кај работодавачите, каде се дозволува да се ангажираат лица со старосна пензија, како и редовни студенти, без притоа тие да ги изгубат другите бенефиции, како што се корисниците на социјалната и детската заштита, евидентирани невработени лица (право на паричен надомест и не се бришат од евиденција на невработени), корисник на старосна и семејна пензија, корисник на право на социјална сигурност, статусот на редовен студент…, објасни министерот пред пратениците.

Овој закон, рече тој, помага во борбата против неформалната „сива“ економија, преку формализирање на непријавената работа и е дел од стратешките определби на државата за стимулирање и поддршка на формализацијата на неформалните економски активности преку воспоставување систем на превентивни и стимулативни мерки за поддршка.

Дурмиши појасни дека со ова решение со донаторска поддршка ќе се воспостави регистар за евиденција на работно ангажирање, поточно ќе се воведе институционален механизам за работно ангажирање на лица за вршење работи од повремена и сезонска природа во одредени дејности во поедноставена постапка.

Со законот опфатени се три области: земјоделство, шумарство и рибарство, објекти за сместување и сервисни дејности за храна како и дејности на домаќинство како работодавач.

Работното ангажирање во поедноставена постапка ќе се врши со пријава на лицето преку регистарот за евиденција на работно ангажирање на Агенцијата за вработување на Република Македонија, додека наплатата на даноците и придонесите ќе се врши преку надградба на системот за наплата на даноците и придонесите на Управата за јавни приходи.

По велигденските пости, како по традиција во Прилеп започнуваат прославите… Венчавки, крштевки, матури, разни семејни свечености… Па доколку се’ уште се двоумите како и каде да ги прославите најсреќните мигови во животот, дозволете ни да ви дадеме совршен предлог.

Ве носиме во срцето на прилепската Стара чаршија, во ресторанот со огромна традиција, кој буди многу пријатни спомени од минатото и гради блескава иднина, кога во прашање е угостителската понуда во градот под Марковите Кули.

Ве носиме во РЕСТОРАН ПОРТА, репрезентативен бренд на Прилеп и совршена локација каде вашите семејни свечености ќе добијат нова димензија.

Со капацитет до 100 гости, модерен ентериер и топла атмосфера, РЕСТОРАН ПОРТА е број еден избор за кршевките на вашите најмили, роденденски прослави, разни семејни свечености и секако за матурските прослави кои се на самиот праг.

Менито е по ваш избор, а тимот на ресторанот е тука да ви даде најдобри совети и да се погрижи се’ да изгледа перфектно. А кога велиме перфектно тоа подразбира од домаќински пречек на гостите, одлично сервирани маси, послуга која е на ниво, до храна и вкусови за кои не треба многу да се зборува, затоа што се најдобри.

Ваквиот однос кон гостите и нивните потреби е граден цели 20 години, и токму затоа во ПОРТА знаат како треба и што е најдобро.

Не двоумете се ни миг повеќе и резервирајте на време!

Телефон: 078 368 111

Вашата доверба е нивно најскапоцено богатство! Изберете амбиент, изберете топлина, изберете врвна услуга и квалитет, изберете го РЕСТОРАН ПОРТА!

ТРЕТА ГОДИНА ПО РЕД – ВЕЛИГДЕНСКА ЛИТУРГИЈА ВО ХРАМОТ „СВ. ПЕТКА“ ВО ПРИЛЕП

Почитувани браќа и сестри, драги родители, баби и дедовци,

Со голема духовна радост и благодарност кон Бога, ве известуваме дека и оваа година во храмот „Св. Петка“ во населбата Точила во Прилеп, покрај полноќната воскресенска богослужба и Божествената Литургија која ќе се отслужи после полноќ, ќе биде отслужена Божествена Литургија и на првиот ден на Воскресението Христово – Велигден, на 20 април 2025 (недела), со почеток во 9:00 часот и ќе трае до 10:15.

Оваа Литургија ќе се богослужи по трет пат во нашиот храм, поттикната од исклучителната посетеност и силната духовна доживеаност на претходните две Велигденски Литургии. Стотици верници, особено многу деца, учествуваа со верба и љубов, и се причестија со Телото и Крвта Христови, вкусувајќи од вистинската радост на Воскресението. Токму поради таа силна потреба и желба на верниот народ, оваа убава и значајна духовна пракса продолжува и оваа година!

Литургијата е наменета за сите верници особено за оние кои поради различни причини не можат да присуствуваат на полноќната пасхална богослужба, како и за најмладите – дечињата. Ги повикуваме сите родители да ги доведат своите деца, кои, според учењето на Црквата, од најмала возраст треба да се воспитуваат во верата и љубовта кон Бог. Препорачуваме, каде што е можно, децата да постат неколку дена пред најголемиот празникот. За дечињата до седумгодишна возраст постот не е задолжителен.

Во духот на радоста, и оваа година, за сите деца кои ќе присуствуваат на Литургијата, храмот „Св. Петка“ подготви велигденски подароци.
Ако дозволат временските услови, Литургијата ќе се одржи под отворено небо, на платото пред храмот, каде сите заедно ќе можеме свечено да ја прославиме Пасхата Христова.

Христос Воскресе! Навистина Воскресе!

Очекуваме со љубов и радост да се собереме и оваа година во голем број, за да ја доживееме убавината на Воскресението во полнота, преку Литургијата и Светата Причест.

Со благослов,
Протоереј Љупче Петрески, в.д. старешина
со управата и вработените при храмот „Св. Петка“ – Прилеп

Одделот за внатрешна контрола, криминалистички истраги и професионални стандарди при МВР до надлежното Основно јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворската полиција поднесе кривична пријава за кривично дело „тешки дела против општата сигурност“ по член 292 став 2 од Кривичниот законик во врска со кривично дело „предизвикување општа опасност“ по член 288 став 2 и став 3 од Кривичниот законик против 10 лица и тоа: П.С. (во времето на извршување на кривичното дело на работно место помошник началник во СВР Штип), Ј.Т. (во време на извршување на кривичното дело на работно место главен инспектор за сообраќајни работи во Одделение за полиција во СВР Штип), С.Д. (во времето на извршување на кривичното дело на работно место главен инспектор за сообраќај во Одделение за полиција во СВР Штип), М.С. (во време на извршување на кривичното дело на работно место началник на одделение во Одделение за полиција во СВР Штип), Љ.Т. (во време на извршување на кривичното дело на работно место началник во СВР Штип), В.П. (во времето на извршување на кривичното дело на работно место главен инспектор по сообраќајни работи во Одделение за полиција во СВР Штип), Д.А. (во време на извршување на кривичното дело самостоен инспектор за јавен ред и мир во СВР Штип), А.А. (во време на извршување на кривичното дело на работно место помошник началник на СВР Штип), В.И. (во време на извршување на кривичното дело на работно место документарист во ПС ОН Кочани во СВР Штип) и А.Т. (во времето на извршување на кривичното дело на работно место командир на ПС ОН Кочани).

Првопријавениот П.С. на 07.12.2012 потпишал акт и истиот го доставил до Министерство за економија со кој дал согласност дека кабаре „ПУЛС“ поседува елаборат за заштита од пожари и опасни и експлозивни материи и ги исполнува законските услови во делот на сообраќај со што придонел на правниот субјект ДПТТУ „Класик ДМ“ ДООЕЛ Кочани од страна на Министерството за економија да му биде издадена лиценца за вршење на угостителска дејност на кабаре “Пулс“ од 13.12.2012.

Второпријавениот Ј.Т. и третопријавениот С.Д. на 10.02.2018 доставиле мислења и не извршиле целосна проверка пред да ги изготват мислењата и согласноста, каде спротивно на член 6 став 3 од Законот за угостителска дејност констатирале дека кабаре „Пулс“, претставувано од ДПТТУ „Класик ДМ“ ДООЕЛ Кочани ги исполнува законските услови во делот на заштита на јавен ред и мир и во делот на сообраќај.

Четвртопријавениот М.С. и петтопријавениот Љ.Т. иако знаеле и биле должни да знаат дека кабаре „Пулс“, претставувано од ДПТТУ „Класик ДМ“ ДООЕЛ Кочани не ги исполнува законските услови во делот на заштита на јавен ред и мир и сообраќај, на 10.02.2018 и 24.01.2019 одобриле и потпишале известување до Министерството за економија во кое е констатирано дека се исполнети законските услови во делот на заштита на јавен ред и мир и сообраќај.

Шестопријавениот В.П. на 24.01.2019 и 21.01.2022 изготвил акт до Министерството за економија со кој доставил известување и констатирал дека кабаре „Пулс“ ги исполнува законските услови во делот на сообраќај на начин што не ги извршил потребните проверки со кои би утврдил дека не се исполнети законските услови за давање на согласност во делот од сообраќајот.

Седмопријавениот Д.А. на 21.01.2022 изготвил акт со кој на ДППТУ „Класик ДМ“ ДООЕЛ Кочани – кабаре „Пулс“ му издава согласност за вршење на угостителска дејност и истото го доставил до Министерство за економија, спротивно на член 6 став 3 од Законот за угостителска дејност. Иако знаел дека во кабаре „Пулс“ имало нарушувања на јавниот ред и мир, не извршил никакви проверки, туку се повикал на одговорот од ОВР Кочани во однос на нарушувањата на јавниот ред и мир, во кој пак не била правилно отсликана вистинската фактичка состојба, по што констатирал дека кабаре „Пулс“ ги исполнува законските услови во делот на јавен ред и мир и сообраќај.

Осмопријавениот А.А. и второпријавениот Ј.Т. на 21.01.2022 одобриле и потпишале известување до Министерството за економија, во кое е констатирано дека се исполнети законските услови во делот на заштита на јавен ред и мир и сообраќај.

Деветтопријавениот В.И. на 21.01.2022 изготвил телеграма во која наместо да даде точни и целосни податоци дека во кабаре „Пулс“ и во близина на истото кабаре има пријавени нарушувања на јавен ред и мир и пријавени кривични дела, истиот дал податоци само дека во кабарето, односно во правното лице ДПТТУ „Класик ДМ“ ДООЕЛ Кочани во 2021 година имало едно нарушување на јавниот ред и мир, а истиот иако знаел дека има нарушувања на јавниот ред и мир и пријавени кривични дела во 2019 и 2020 година, не дал никакви податоци за истите.

Десеттопријавениот А.Т. иако знаел и бил должен да знае дека има повеќе пријавени нарушувања на јавниот ред и мир во близина на кабаре „Пулс“, истиот вака изготвената телеграма ја контролирал, одобрил и потпишал со своерачен потпис.

Со чинење на наведените дејствија, пријавените како службени лица овозможиле правното лице ДПТТУ „Класик ДМ“ ДООЕЛ Кочани да се стекне со лиценца за вршење на угостителска дејност – кабаре „Пулс“ во Кочани на начин што не постапиле според прописите за мерките за заштита и не извршиле целосна проверка пред да биде издадена позитивната согласност за издавање на лиценца за кабаре, со што предизвикале опасност за животот и телото на луѓето на место каде што се собираат поголем број луѓе, при што на 16.03.2025 во кабаре „Пулс“ настанат е пожар во кој животот го загубија 61 лице.

Од пријавените, лишени од слобода се шест лица, по едно се трага, а тројца од претходно издржуваат мерка притвор.

Очекувам дека во брзо време ќе видиме инвестиции од Обединатите Арапски Емирати во Македонија. Потпишавме неколку договори за економска соработка што се услов за идната соработка. Посебно е важно тоа што Дубаи станува центар за извозот кон Истокот, што е одлична можност за домашно извозните компании да ја користат помошта и логистиката што ја нуди Владата на ОАЕ, истакна вицепремиерот Александар Николоски, кој е дел од владината делегација која е во работна посета на Обединетите Арапски Емирати.

-Министрите за надворешни работи потпишаа договор за економска соработка, исто така има договор и во образованието и културата, како и договор за заштита на инвеститорите и одбегнување на двојното оданочување. Овие договори се предуслов за да можеме да одиме кон следната фаза, а тоа се конкретни инвестиции и конкретни проекти кои што ќе ги видиме во Македонија. Она што е исто така значајно, што е можеби комплетна новина за македонскиот бизнис и стопанство, а тоа е дека ОАЕ особено Дубаи, стануваат центар за трговијата кон Истокот, особено во овие комплицирани и турбулентни времиња во светот, имајќи ги во предвид геополитичките игри. Постои огромна можност за македонските компании кои што извезуваат да го користат Дубаи и Владата на ОАЕ како помош и сервис при нивниот извоз, како би се отвориле бројни нови пазари, кои што во моментов не се достапни за македонските компании – изјави Николоски.

Како што соопшти Министерството за транспорт, по средбите со стопанските комори во Шарџа и Дубаи, тој потенцирал дека има голема заинтересираност за соработка во делот на туризмот, инфраструктурата и земјоделскиот сектор.

-Морам да кажам дека фокус број еден е туризмот, кој сериозно расте и потенцијалите кои ги нуди Македонија навистина се нешто што е препознаено. Секако тука е и инфраструктурата, коридорите 10 и 8, како и коридорот 10Д, како потенцијални места за инвестирање, тука секако е и земјоделието, тука се и недвижностите. Така што ова се области каде што има огромна заинтересираност од страна на Обединетите Арапски Емирати да инвестираат во Македонија, очекувам во периодот кој што е пред нас ќе одиме кон втората фаза, а тоа е конкретизирање на проекти и за брзо време ќе можеме да видиме делегација на ОАЕ во Македонијa, како и инвестиции тука – рече Николоски.