„Доколку се најде решение за ова спорно прашање со протоколите, останатиот дел од францускиот предлог е решение кое е прифатливо за нас“.

Ова во емисијата „10 Минути“ на ТВ21 го истакна шефот на дипломатијата Бујар Османи.

Османи посочи дека францускиот предлог не е одбиен, туку само оној дел кој е спорен за Македонија.

„Францускиот предлог, спорниот елемент, спорното прашање не го стави во документот како финално решение – го стави во заграда. Што значи дека тоа не е конечен предлог на француското претседателство, затоа не можам да кажам дека ние документот не го прифативме. Ние не го прифативме тој дел кој што е спорен за нас“, вели Османи.

Македонското обединувачко движење (МОД) од Битола денеска ќе одржи собор за „зачувување на семејните, традиционални и општествени вредности“, насловен „Семејството, пред се”.

– Наспроти сета неморалност и контроверзност која ни се наметнува, заеднички да искажеме дека нам семејните, традиционалните и моралните вредности ни се пред се! Без разлика на вашата религија, нација и партија ве повикуваме на овој собор. Време е да престанеме да се обојуваме на нации, партии и религии, но потребно е да се обединиме и важноста да ја дадеме на вистинските семејни, традиционални, етички и општествени вредности, наведуваат од МОД.

Според најавата, ќе се одржат два собора во истиот термин од 20 часот, едниот во Битола на плоштад Магнолија, а вториот во Скопје во Жена парк.

На 25.06.2022 околу 10.20 часот на магистралниот пат Гевгелија – Демир Капија, после клучка Марвинци во правец на с.Удово, полициски службеници од Полициска станица „Богородица“ ги лишиле од слобода Б.А.(50) и А.Д.(47), двајцата од Битола, поради постоење основи на сомнение дека извршиле кривично дело криумчарење мигранти.

Имено, при извршена проверка во товарно возило „цитроен џампер“, со прилепски регистарски ознаки, управувано од Б.А., во кое совозач бил А.Д., биле пронајдени 24 лица мигранти (12 од Пакистан, пет од Сирија, пет од Индија и две од Авганистан).

Во координација со ОЈО за гонење на организиран криминал и корупција лицата мигранти се сместени во Прифатно-транзитен центар „Виноjуг“ Гевгелија за понатамошна постапка, а по целосно документирање на случајот против двете лица ќе биде поднесена соодветна пријава.

Од полицискиот билтен на МВР

-На 25.06.2022 во 01.48 часот во Полициска станица Битола, С.Т. од Битола пријавил дека околу 01.30 часот во казино во Битола бил физички нападнат од едно лице кое било обезбедување во казиното. Се преземаат мерки за расчистување на случајот.

-На 24.06.2022 во 23.00 часот во Полициска станица Битола, битолчанка пријавила дека околу 18.00 часот на патот Битола—с.Бистрица, битолско, била физички нападната од А.К. од Битола, со кого претходно била во љубовна врска. Се преземаат мерки за расчистување на случајот.

-На 24.06.2022 во 18.25 часот во Полициска станица Битола Б.С.(39) од Битола пријавила дека околу 03.30 часот во угостителски објект во Битола била физички нападната од А.Н.. Се преземаат мерки за расчистување на случајот.

На 24.06.2022 во 11:45 часот на крстосницата од ул.„Гоце Делчев“ и ул.„Брегалничка“ во Битола патничко возило „опел астра“, со битолски регистарски ознаки, управувано од А.С.(74) од Битола удрило во велосипедист Ѓ.А.(59) од Битола.

Во несреќата велосипедистот се здобил со тешки телесни повреди, констатирани во Медицински центар Битола.

Увид извршила екипа од СВР Битола.

„Мене ме изненади што воопшто стигнавме како држава до предлог, а уште повеќе ме изненади што предлогот не беше одбиен првиот ден кога порциркулира во јавноста. Затоа што доколку сериозен беше односот кон државата прво не смееше Владата да дозволи воопшто да се стигне до таков предлог затоа што да не се лажеме од самиот старт биле вклучени и го тврдам во разговорите и во преговорите со бугарската страна со посредство на француското претседателство. А, второ кога веќе се стигна до таков предлог требаше да се отфрли уште првиот ден, истакна Александар Николоски, потпретседател на ВМРО-ДПМНЕ во гостување во централниот дневник на Сител телевизија.

Николоски додаде дека предлогот Бугарија го смета како освоена територија. И Бугарија сега нема да си дозволи да седне и да разговара за ништо помалку од она што веќе го има на маса, а тоа што го има на маса е катастрофа за Македонија и македонскиот народ.

„Јас бев свесен што ќе прават уште првиот ден кога почнаа да даваат едни смешни изјави од власта дека никој до нив официјално не го дал предлогот“, нагласи Николоски.

Тој посочи дека Ковачевски во Брисел глумеше задоцнет патриот.

„Ако внимателно се прочита што зборуваат круговите на власта откако во Бугарија се донесе одлуката пред ден и нешто, веќе има едно повторно вртење дека можеби предлогот не е лош. Дури и малку смешно како одредени поддржувачи на власта за 3-4 дена како даваат различни изјави. Така што доколку Бугарија имаше донесено одлука на денот кога беа во Брисел, јас се уште мислам дека Ковачевски ќе го прифатеше затоа што гледам дека оние кои што се блиски до Владата на СДСМ и ДУИ веќе се обидуваат да направат простор дека ова е добро. Дури вчера Бујар Османи беше директен во своето излагање во јавост во едно интервју каде што директно кажа дека тој мисли дека ова треба да се прифати што само говори дека немаат основно чувство за националните интереси на Македонија“, појасни Николоски.

На 25.06.2022 од страна на полициски службеници од ОВР Прилеп бил лишен од слобода Н.К.(53) од Ресен, затоа што претходно со неговото возило комбе „мерцедес спринтер” се обидел да прегази комунални инспектори и полициски службеник кои вршеле службени дејства, при што полицискиот службеник испукал со пиштол во гумите на возилото.

Според пријавеното, пред тоа во Градскиот пазар Прилеп, додека продавал производи со возилото, тој бил отстранет од страна на инспекцијата. Н.К. е приведен во полициска станица, а известени се Јавен обвинител и Одделот за внатрешна контрола, криминалистички истраги и професионални стандарди.

По документирање на случајот против сторителот ќе биде поднесен соодветен поднесок – стои во официјалното соопштение од МВР за денешниот настан пред градскиот пазар во Прилеп.