Градоначалникот на општина Битола, Тони Коњановски, до Основното јавно обвинителство поднесе иницијатива за отворање на постапка и спроведување на истрага во врска со пријавите за каснување од кучиња скитници кои се доставуваат до општината. Со иницијативата, градоначалникот бара обвинителството да спроведе соодветна постапка врз основа на која ќе се направи целокупна и опсежна анализа, но и истрага при што ќе бидат отстранети сите сомнежи кои постојат или ќе се утврди кривична одговорност против сите оние кои извршиле злоупотреба и го оштетиле буџетот на Општина Битола, а се стекнале со материјална корист за себеси на сметка на истиот.

Иницијативата произлегува по укажувањата од страна на надлежните служби, но и правните застапници на Општина Битола, дека постои основан сомнеж за сторени злоупотреби од страна на сите вклучени субјекти во постапката во предметите за надомест на материјална и нематеријална штета предизвикана како резултат од напад на куче – скитник кои во изминатиот период се со зголемен број, а врз основа на што Општина Битола трпи сериозна материјална штета.

„Имајќи предвид дека сум известен дека постои голема база на предмети со ваков основ за надомест на материјална и нематеријална штета
предизвикана од куче скитник во кои има сериозни индиции дека настанале неправилности и се извршиле злоупотреби, а притоа истите имаат правна разрешница, но голем дел се и сеуште незавршени, стоиме на располагање на Ваше барање да ги доставиме сите потребни списи од овие предмети, но и останата потребна документација на увид со цел успешно и непречено завршување на постапката и истрагата“, стои во иницијативата на градоначалникот Коњановски до ОЈО. Покрај укажувањата, правните застапници до градоначалникот и општинскиот Совет, предлагаат изнаоѓање на можни начини за разрешување на проблемот со енормниот број на судски предмети за надомест на штета од каснувања
на куче скитник. Во нивните предлози се наведува потребата од систематска соработка со Клиничка болница Битола и МВР и тоа:

Преку соработка со Клиничка Болница Битола потребно е:

1) Да се издејствува објективност во извештаите на докторите кои ги прегледуваат пациентите. Потребно е да се побара секој доктор во
извештајот јасно да наведе дека анамнезата е исклучиво по кажување на самиот пациент, А ДЕКА ТОЈ КАКО ДОКТОР НЕ МОЖЕ ДА ПОТВРДИ ДАЛИ РАНАТА Е НАНЕСЕНА ОД ЖИВОТНО ВООПШТО, А НЕ ПАК КАКО ШТО Е СЛУЧАЈ СЕГА ДЕКА Е ОД КУЧЕ, па дури во најголем број случаеви и скитник.

2) Да не се поставува дијагноза W54 која значи рана од каснување од куче, туку дијагнозата да биде РАНА, а тоа дали е од куче или воопшто животно или нанесена на друг начин да биде предмет на докажување.

3) ЗАДОЛЖИТЕЛЕН ОПИС НА РАНИТЕ – во смисла големина во сантиметри или милиметри, опис на местото на раните, нивниот број, старост на
повредите, со сите останати карактеристики.

Преку соработка со МВР Битола потребно е:

1) Со секоја пријава за каснување од куче скитник – МВР Битола преку крим техника да изврши фотографирање и опис на раните

2) При секоја пријава да бара податок за приближно точно време на настан како и точна локација на настанот, како врз основа на таквите податоци би се извршило проверка на самата локација во смисла на видео снимки од околни објекти или лице кои биле на тоа место (во смисол вработени во околни објекти или околина)

На ваков начин, лесно би се докажало дали воопшто се случил настан на самото место, а би се овоможила проверка на објективноста на описот на раните на самиот доктор.

„Без помош и соработка од овие две институции, не би можело воопшто да се очекува каква и да била можност за реално постапување во судските
постапки како и утврдување на кривична одговорност на лицата инволвирани во евентуалните невистинити случаи каде се бара штета, иако истата не била причинета од куче скитник“, се нагласува во предлогот од правните застапници.

Православните христијани денеска го празнуваат Светиот цар Константин и неговата мајка Елена.

Царот Константин Велики и неговата мајка царицата Елена за нивните заслуги во признавањето и ширењето на христијанството Светата црква ги прогласила за светители и рамноапостолни, што значи по значење рамни на апостолите. Царот Константин спаѓа меѓу најзначајните личности во историјата на човештвото, бидејќи по подолго прогонување на христијанството тој е првиот влател на големата Римска империја што ја признал оваа вера.

Марко Цепенков забележал дека во Прилеп св. Константин и Елена биле покровители на базриѓанскиот (трговскиот) еснаф. Нивниот празник кој го викале „Свети цареи“ го празнувале на 21 мај (стар стил).

Под манастирот Свети Наум Охридски – Чудотворец, до самото езеро, има извор со лековита вода. Според верувањето оваа вода секогаш е лековита, но најмоногу на празникот Св. Константин и Елена.

Според едно предание Свети Наум му рекол на таткото на една ќелава девојка да појди на денот свети Константин и Елена под карпата каде што течела вода и да ја измие девојката. Така направил и таа веднаш оздравела, и пораснала убава и густа коса.

„Од тогаш на празникот на свети Елена и Костадин редовно идат луѓе да се мијат со водата од изворчето под карпите на манастирот Свети Наум. Таа вода е лековита и друг пат, ама на празникот најмногу”, заклучува народниот раскажувач.

Македонскиот алпинист, Здравко Дејановиќ во тешки услови го искачил четвртиот највисок врв во светот, Лотсе, по што паднал во бессознание и бил симнат со спасувачка мисија.

Дејановиќ на социјалните мрежи раскажа за својата авантура и тешкиот предизвик да се искачи овој врв кој е висок 8.516 метри.

-На ден 19.05 околу 12h, го искачив врвот Lhotse 8516m без да користам помош од други лица (шерпаси) и дополнителен кислород. Врвот го искачив во тешки и неповолни временски услови, пропратено со врнежи, олујни наноси од снег, со јачина на ветар до 50km/h. Поради таквите временски услови јас и другите искачувачи добивме смрзнатини на долни и горните екстремитети.

Во одреден момент на висина од 8400m, јас и алжирскиот искачувач Насир и неговиот личен шерпас (кои за цело време користеа дополнителен кислород), бевме принудени 2-2:30h, да останеме во место на таа висина поради силните наноси од снег.

На оваа висина бев виден од повеќе качувачи, боливискиот качувач Хуго, шерпасот Лама, еден кинески качувач, и уште двајца кинески качувачи (кои го прекинаа искачувањето на врвот поради смрзнатини). Од страна на искусниот шерпас Лама бев советуван да се откажеме од искачувањето и да се вратиме во четвртиот камп. Но, ние тројцата сепак продолживме кон врвот. На врвот околу 10 min пред мене беа Насир и неговиот шерпас, кои веќе се симнуваа кога јас пристигнав на врвот.

На врвот поради сериозните смрзнатини на прстите неможев веќе смрзнатиот патент од качувачкото одело, да го отворам, да го извадам мобилниот телефон и да направам видеозапис. Заради мојата безбедност и здравствена состојба која веќе почна да се влошува (бев исцрпен и веќе имав изразени смрзнатини на прстите на рацете) неможев долго време да се задржувам на врвот, и веднаш се упатив кон пониските кампови.

Се спуштав колку толку успешно се до Yellow Band (вертикални карпи кои се наоѓаат на 7600m), и тоа место е последно нешто на што јас се сеќавам. Од тој момент имало спасувачка акција за мое извлекување до пониските кампови. Спасувачката акција била координирана од шерпасите од 8K тимот, мојата ќерка Стефанија, Славица Атанасовска и Билјана Огнененоска. Сите искачувачи беа дел од 8kexpeditions тимот.

Како и што се најавуваше веќе подолго време Килијан Мбапе ќе потпише договор со Реал Мадрид.

Италијанскиот експерт за трансфер Фабрицио Романо денеска објави дека Мбапе и Реал Мадрид го комплетирале трансферот и потпишани се сите потребни документи.

Официјалната потврда за трансферот се очекува во текот на неделата која следи, можеби и уште утре.

Се наведува и дека својата одлука да премине во Реал Мадрид, Мбапе ја донел уште во февруари.

Во редовите на ПСЖ, Мбапе пристигна во 2018 година од Монако за 180 милиони евра. Се поврзуваше Мбапе со Реал Мадрид и во тој преоден рок, како и често пати во следните, а сега конечно ќе го облече кралскиот дрес.

Од полицискиот билтен на МВР

На 02.06.2024 во 03.20 часот во ОВР Прилеп било пријавено дека на ул.„Ердован Шабаноски“ во Прилеп, С.Р.(26) и З.Р. (42), двајцата од Прилеп, го нарушиле јавниот ред и мир со учество во физичка пресметка. По документирање на настанот против нив ќе следува соодветна пријава.

На 01.06.2024 во 22.00 часот во ОВР Прилеп, М.Е.(20) од Прилеп пријавил дека М.С., М.Н. и М.С. се обиделе да го нападнат со употреба на метални предмети.

Се преземаат мерки за расчистување на двата настани – велат од СВР Битола.

„Ве информираме дека изминатиот период забележана е тенденција на физичко самоповредување кај повеќе ученици.“

Вакво предупредување добиле родителите во повеќе скопски основни училишта од наставниот кадар. Во него се вели дека е забележано сечење со жилети, ножеви од острилки, ножици, остри предмети и тоа најчесто се случувало на рацете и нозете, пренесува ТВ Сител.

Наставниот кадар ги предупредува родителите да им обрнат повеќе внимание и контрола на децата.

– Доколку забележите било каква промена што може да укажува на оваа појава ве молиме пријавете во училиште и бараме од вас како родители преку класните раководите да ни дозволите ненајавени проверки на учениците за навремено откривање и сузбивање на оваа појава бидејки состојбата е алармантна, се вели во предупредувањето.

Самоповредувањето не е изолирана појава само кај нас. Светските медиуми многу често известуваат за појава на трендови поради предизвици на социјалните платформи.

Поради ТикТок предизвик 17 ученици од Косово се самоповредиле во изминатиот период и го подигна алармот кај родителите за да ги натераат институциите да преземат поголема контрола врз социјалните мрежи кои ги користат децата.

Психотерапевтите во државата велат дека родителите можат да забележат промена кај своето дете кое е подлежно на самоповредување, но мора да реагираат веднаш и да побараат помош од стручните лица.

Целосниот прилог погледнете го на “СИТЕЛ”

Голем скандал се случил вчера на натпревар од Детска лига и тоа на теренот во Сарај во Скопје.

Имено, на мечот меѓу Сарај и Фит Кид, генерација 2012 година, се случила тепачка меѓу родители.

На видеото кое на јутјуб го објави Огнен Дојчиновски, се гледа како неколку возрасни лица, веројатно родители на дечињата се пресметуваат меѓу себе додека фудбалерчињата се чудат што се случува.

Од ФФМ го осудија инцидентот и одлучија наредните натпревари да се играат без публика.

-Тренерите на тимовите учесници во натпреварувањето се известени да го почитуваат кодексот за фер-игра и однесување. Секое спротивно однесување ќе подлежи на дисциплински сакнции.

Фудбалската федерација на Македонија изразува длабока разочараност од инцидентот што се случи на детскиот фудбалски натпревар од финалниот турнир на тренинг центарот “Петар Милошевски”.

Она што требаше да биде настан на кој се слави спортскиот дух, тимската работа и радоста на играта беше нарушено со неприфатливото однесување на дел од присутните родители.

Како организација посветена на промовирање на позитивна и фер-плеј средина за нашите најмлади фудбалери, најостро го осудуваме однесувањето на присутните родители кои го предизвикаа и учестуваа во инцидентот. Таквото однесување е спротивно на вредностите што ги поддржуваме и примерот што се стремиме да им го дадеме на нашите деца.

Од клучно значење е сите да се стремиме кон основната цел на детскиот спорт: поттикнување развој, забава и почит меѓу учесниците.

Фудбалската федерација на Македонија како организатор на Детска лига сериозно размислуваше за драстична одлука и суспендирање на понатамошните натпревари, но таа одлука би значело само штета за сметка на радоста на децата и нивната желба за игра.

ФФМ сепак донесе одлука понатамошните натпревари да се одиграат без присуство на публика.

Исто така, тренерите на тимовите учесници во натпреварувањето се известени да го почитуваат кодексот за фер-игра и однесување. Секое спротивно однесување ќе подлежи на дисциплински сакнции.

Ги повикуваме сите родители и гледачи во иднина да размислуваат за влијанието што нивните постапки го имаат врз децата и секогаш да се однесуваат на начин кој поддржува и поттикнува позитивен развој.

Наш приоритет е да обезбедиме секое дете да ужива во играњето фудбал во безбедна и позитивна средина – стои во соопштението од Фудбалската куќа на Македонија.

Две третини од родната куќа на писателот Димитар Талев во Прилеп купила приватна бугарска фондација „Манол Пејков и пријателите“. Ова е направено за речиси 84.000 евра собрани од донаторите. Преостанатата една третина е во сопственост на лице кое нема желба да ја продаде. Ова го соопштија бугарските медиуми БГНЕС и Нова ТВ.

Претходно, на 26 мај беше објавено дека се урнал дел од покривот на куќата на Талев.

Бугарската фондација информира дека сега треба да се изврши итна поправка на покривот, подготовка на план и тим за реконструкција и реставрација со експерти и градежници од Бугарија и Македонија, назначување на лице со трајна посветеност на одржување и стопанисување со куќата, пречекување луѓе и организирање настани во родното место на Димитар Талев во Прилеп, пишува БНР.бг.

Како што се пишуваше, одлука за стекнување на имотот од страна на бугарската држава била почната уште во јуни 2023 година, но само сопственичката на двете-третини од имотот се изјаснила дека сака да го продаде нејзиниот дел, а во 2023 година цената што таа ја побарала е 100.000 евра. Останатата една-третина е на друг сопственик, кој одбива да го продаде својот дел.

Во Бугарија, Талев се смета за еден од класичните бугарски автори од XX век.

Родум од Либан, од татко Верукиј и мајка Ромилија. Осумнаесетгодишно момче со прекрасен изглед, со коса црвеножолта. Лекар по занимање.

Пострада за Христа за време на царувањето на Нумеријан. Кога храбро ја исповедаше својата вера во Господ Христос пред мачителот, Нумеријан им нареди на двајцата џелати Александар и Астериј со сврдел да му ги дупчат колената, да му провлечат јаже низ издупчените коски и да го обесат за едно дрво.

Но, на џелатите како една невидлива сила да им го зеде видот и наместо Талалеј тие издупчија една штица и ја обесија на дрвото. Кога дозна за ова мачителот помисли дека тоа го направиле намерно и нареди да ги бијат.

Тогаш Александар и Астериј повикаа: „Жив Господ, отсега и ние сме христијани, веруваме во Христа и страдаме за Него!“ Кога го чу ова, мачителот нареди и ги убија со меч. Тогаш самиот мачител зеде сврдел за да му ги дупчи колената на Талалеј, но рацете му премалеа, па мораше да го моли Талалеј да го спаси, а овој тоа и го стори со молитва.

Потоа го фрлија во вода, но тој жив му се јави на мачителот. (Зашто Талалеј во себе Го молеше Бога да не умре веднаш, туку да му се продолжат маките.) Кога го фрлија на ѕверовите, тие се умилкуваа околу него и му ги лижеа нозете. Најпосле беше убиен со меч и се пресели во Царството Небесно, во 284 година.

Ракометарите на РК Прилеп попладнево пред преполната сала во “Ристе Ристески-Ричко”, ја декласираа екипата на Еурофарм Пелистер 2 и го освоија првото место во плеј-аут разигрувањето, а со тоа и директен опстанок во најелитното ракометно друштво кај нас.

Крајниот резултат на семафорот беше 31:24 (15-12 на полувремето). Прилепчани губеа само во првите минути со 1:2, а потоа до крајот на натпреварот не го испуштија водството.

Најефикасни во домашната екипа беа Христи Бикоски и Никола Цветаноски со по седум погодоци, пет додаде Денис Шабановиќ, а капитенот Филип Велески кој денеска се збогуваше со ракометот, постигна 3 погодоци.