Прилепчани се познати по својата итроштина и снаодливост, па ниту горештините од 35 и плус степени не им можат ништо, ако решиле пладневното кафе да го испијат со пријателите во чаршија.

Дека тоа е така, најдобро ќе ви покаже чичко Перо Чорбе, кому му текнало на оригинален начин да се заштити од жешкото сонце.

Неговата мала иновација вчера наиде на насмевки и пофалби од прилепчани, кои се криеја под чаршиските ладовини.

Алал вера! Нека учат помладите како треба!

Народниот театар од Битола ќе учествува на Македонскиот театарски фестивал „Војдан Чернодрински“ вечерва во 19.30 часот на сцената на Центарот за култура „Марко Цепенков“ во Прилеп. Претставата е во режија на Ќендрим Ријани и е дел од официјалната програма на фестивалот. Улогите ги толкуваат: Соња Ошавкова, Валентина Грамосли, Елена Моше, Илина Чоревска, Викторија Степановска – Јанкуловска, Маја Андоновска – Илијевски, Марија Стефановска, Сандра Грибовска Илиевска, Анастазиа Христовска, Иван Јерчиќ, Петар Спировски, Мартин Мирчевски, Александар Димитровски, Никола Пројчевски, Александар Стефановски и Никола Стефанов.

Во 22 часот на сцената на театарот „Војдан Чернодрински“ ќе биде изведена „Домот на куклата“ во продукција на Турскиот театар од Скопје. Улогите ги толкуваат: Сузан Акбелге, Селпин Керим, Фунда Ибрахим и Емине Халил.

Во рамките на придружната програма на полноќ во кафе-бар „Тротоар“ ќе биде изведена „Поол“ во режија на Шенај Мандак. И денес продолжуваат придружните програми – во 11 часот во фоајето на Центарот за култура ќе се одржи промоција на наградените драми од „Еуродрам“. Точно на пладне почнуваат разговорите на тркалезната маса, овојпат за претставата „Црна дупка“ во режија на Љупчо Ѓоргиевски, на Струмичкиот театар. Оваа програма на фестивалот предизвикува големо внимание кај публиката која е желна да разговара за претставите.

Вчерашниот ден на фестивалот беше посветен на делото на Горан Стефановски, кој е автор во фокус на 58. МТФ „Војдан Чернодрински“. Група од 20-ина учесници основци и средношколци и наставници презентираа што научија во изминатите осум месеци во рамките на едукативната програма на фестивалот „Чернодрински за деца“. Учествуваа ученици од средното училиште „Ристо Ристески-Ричко“, „Мирче Ацев“, „Ѓорче Петров“ и основните „Добре Јованоски“ и „Блаже Конески“. Тие ја изведоа претставата „Јане Задрогаз“, а работеа под менторство на актерите Игор Трпчески и Илија Волчески.

Како дел од програмата на фестивалот беше промовирана книгата „Од текст до претстава: Феноменологија на сценскиот говор“ од Тодорка Балова. Според професорката д-р Јелена Лужина, книгата има чуден наслов со поднаслов.

-Ако насловот е разбирлив, поднасловот е синтакса која збунува, затоа што содржи термин, феноменологија кој е термин од 20 век и се дефинира како свест или нештото во свеста. Тоа е говорот кој можеме да го разбереме, односно зборува за сценскиот говор, кој има задача и функција…..- рече Лужина.

Во грижата за сценскиот гвоор таа се наврати на професорите по сценски говор, како Илија Милчин и Мето Јованоски, кој не случајно се наоѓа на самата корица на книгата.

-Книгата користи методологија ПРААД, што значи една медицинско терапевтска методологија. Таа ќе им помогне на сите актери кои што сакаат да работат врз себе. Тодорка Балова им направи прирачник, кој е прв научен труд за сценскиот говор. Тоа е необична книга и слободно можам да кажам дека македонската театарологија се занимава посериозно и поквалитетно од другите за сценски говор, а тука ја додавам и книгата од Роберт Вељановски – посочи Лужина.

Авторката Тодорка Балова објасни дека користела неколку дисциплини и дека е задоволна од успешната мисија и дека и е задоволство што се зафатила со Горан и со неговата култна претстава „Диво месо“.
Факултетот за драмски уметности од Скопје во фоајето од Центарот за култура „Марко Цепенков“ ја промовираше фондацијата „Горан Стефановски“, а Драмски театар од Скопје ја претстави штотуку востановената награда за драмски текст „Горан Стефановски“.

Сашо Кокаланов, продекан за настава при ФДУ во Скопје образложи дека Горан Стефановски секогаш беше тука да ги поддржи младите автори, да им биде „ветер во грб“ особено во онаа, почетна фаза.

-Прилично скоро се роди идејата да се направи фондација „Горан Стефановски“ за да се зачува сета онаа оставштина од нашиот драг професор. Не се само драми напишани на македонски, на англиски, не се само изведбите на тие драми, туку тоа е една драмска школа која треба да продолжи, драмска традиција која треба да се пресоздава. Сакаме да ги објавиме сите негови драми во едно големо издание, сакаме да го дигитализираме целото творештво на Горан Стефановски, да биде достапно на повеќе светски јазици. Вториот сегмент се однесува на поддршката на младите автори. Фондацијата ќе го поддржува и формалното и неформалното образование кај младите драмски автори, ќе ги стипендира. Поддршка, финансиска имаме веќе и од приватниот и бизнис секторот, рече Кокаланов.

Директорот на Фондацијата, режисерот Александар Поповски нагласи дека пораката што ја имавме од Горан Стефановски објаснува сѐ.

-Благодарен сум што сум дел од оваа „приказна“. Токму затоа, ќе прочитам дел од она што е есенцијата од намерата за основањето на фондацијата. Дел е од она што Горан ни го пренесуваше и ни го раскажуваше. Велеше: Сите живи суштества се раѓаат со инстинктот на преживувањето. Пајаците за да реживеат имаат совршен вроден инстинкт за ткаење мрежи. Луѓето за да преживеат имаат совршен вроден инстинкт за ткаење приказни, за тоа кои се, што се, од каде доаѓаат и каде одат. За нас нема ништо поважно од овие приказни. Тие се срж на нашиот живот, столб на нашиот идентитет. Идентитетот е приказна за тоа кои сме, што сме, што сакаме, за да можеме да преживееме во суровиот свет. Ова приказна мора да е точна, заснована на познавањето на теренот, на длабок увид. Погрешната приказна може скапо да нѐ чини. Да не одведе во заблуда, во ќорсокак….Ниедна култура не може да опстане без точна, силна, автентична приказна, велеше Стефановски. Оваа навидум едноставна порака беше дел и од предавањата и од соработката со Горан. Најстојуваше фантастичното, пребогато минато кое го имаме, на автентичен начин, да го носи во некаква иднина, рече Поповски.

Викторија Рангелова Петровска, директорка на Драмски театар од Скопје образложи зошто се востановува наградата „Горан Стефановски“ за најдобар драмски текст.

– Оваa година Драмски театар ја востановува наградата за најдобар драмски текстна млад автор до 30 години, награда која ќе го носи името на Горан Стефановски. Идејата е многу благородна и стовремено е оддавање должна почит на авторот кој, практично, направи голем успех и за себе, и за Драмски театар во периодот кога се изведуваа неговите текстови. Најголемите успеси на Драмски се врзуваат кога се изведуваа претстави според текстови на Стефановски и ние сме должни да му оддадеме почит. Им даваме поддршка на младите драмски автори да се реализираат и да го продолжат дејствувањето и да го продолжат континуитетот на македонската драматургија. За анс тоа е битно, зашто мислам дека младите автори се најпрогресивни, најотворени во делата кои ги пишуваат, рече Рангелова Петровска.

Струмичкиот театар ја изведе претставата „Црна дупка“ која е дел од официјалната програма, а истиот текст на Стефановски го изведоа и студентите од ФДУ.

Покровители на 58. МТФ „Војдан Чернодрински“ се: Министерството за култура и Општина Прилеп. Спонзори на фестивалот се: Пакомак, Витаминка, Прилепска пиварница. Пријатели на фестивалот се: Центарот за култура „Марко Цепенков“ – Прилеп, Градската библиотека „Борка Талески“ – Прилеп, Театар за сите, Самоглас, Умно.мк, Јавен простор – Прилеп, Гледај.мк, Театроск, Факултет за драмски уметности, Донирај компјутер, Урбан ера. Пријатели на фестивалот се: Бит крафт, Карé и Смарт Ливинг, Македонија осигурување, Крин производство Прилеп, Аура, Клуб Калинка, Кафе-бар Тротоар, Кафе бар Чоше, Кафе бар Лувр, Брос бургерс, Монарка гастробар, пекара Алекс, Национален ресторан „Македонска куќа“, Центарот за современа ликовна уметност – Прилеп, Такси 5, Лусио Стор и хотелите Кристал Палас, Атлас и Салида. Медиумски покровители се Македонската радио-телевизија и Трн.мк.

Францускиот претседател Емануел Макрон ќе го распушти Националното собрание по дебаклот на изборите за Европскиот парламент, јавува Би-би-си.

По оваа одлука Франција ќе оди на нови парламентарни избори.

Тие ќе се одржат на 30 јуни и 7 јули, јавува Би-би-си.

Да потсетиме, партијата на Марин Ле Пен на изборите за Европскиот парламент освои 31,5 отсто, што е двојно повеќе од партијата на претседателот Емануел Макрон.

Неговата партија доби 15,2 отсто поддршка, што е двојно помалку од Марин Ле Пен.

Во организација на велосипедскиот клуб “Екстрим бајк” од Битола, вчера се одржа трката “Апхил Смолево”, каде учество зедоја и велосипедистите од В.К. & Сервис “ИЛИНДЕН” од Прилеп.

-Влатко Лозаноски го освои првото место во мастерс – прва трка и прва победа за него.

-Андреј Маџоски беше прв во јуниори – две од две победи оваа година во МТБ за Андреј

Честитки за нашите велосипедисти и нивниот тренер Драган Димитријоски, и им посакуваме многу успеси на престојните државни првенства.

Вчера во Тетово се одржа 3.коло на Првата и Младинска бокс лига, кое донесе доста интересни дуели, а за нас од најголем интерес е настапот на прилепските боксери од БК “АС”.

Николче Житошански во категорија до 75кг. кај сениорите ја оствари третата победа, а противник му беше Леонтин Димитров од БК “10-60” од Скопје.

Николче со оваа трета победа во неговата кариера потврди дека е добар и амбициозен боксер кому му претстои добра кариера.

За жал Димитар Талинче остана без противник во категоријата до 60кг кај кадетите, па во ова коло остана без борба.

Борбите можете да ги проследите на линкот во продолжение:

Во саботата на 8. јуни, по четврт пат се одржа планинарскиот марш под мотото: “Господи Исусе Христе чувај ја Македонија”. Вљубениците во природата и убавините на Македонија, се искачија на планинскиот врв Козјак на Бушева Планина, или како што велат крушевчани: “Кај крстовите”.

Традицијата која започна од 2021 година се одржува во првата сабота од месец јуни, а откако планинарите ќе се искачат на планинскиот врв, свештено лице служи света литургија, а секоја година има и кум.

Оваа убава традиција ја започнале Вецко и Менка Божиноски од крушевското село Пуста Река, луѓе за кои крушевчани велат дека се вистински легенди, кои постојано се инспирирани за нешто ново.

Нивната мисија да го направат ова место свето започнала пред 13 години, кога прво навезиле знаме на кое пишувало “Христос помеѓу нас, е и ќе биде!”, кое го поставиле на највисоката точка од врвот Козјак, а неколку години подоцна, заедно со Симе Стојкоски, на раце го однеле и првиот крст.

Oттогаш, па секоја година, носеле материјали на раце – цименто, вода, камења…. па така се издигна ова прекрасно свето спомен обележје.

Во 2021 година се служела и првата литургија, а така беше и во саботата, кога за кум се пријави Вецко Иваноски од Крушево.

Една убава традиција која од година во година расте и привлекува уште поголема посетеност. Нека е за многи години и напомош!

Лобирањето, расправиите, заканите и предавствата често се увертира за изборите за Европскиот парламент, пишува Индекс.хр.

Главната причина за тоа, како што пишува Индекс.хр, се пред се високите материјални права на претставниците на ЕУ парламентот, а влезот може да го обезбеди човек доживотно. Платата е само дел од надоместокот. Пратениците имаат право да ги финансираат канцелариските трошоци во матичната земја, дневници, патни трошоци, платени патарини, еднократна готовинска исплата на крајот на мандатот и дополнителна пензија.

Плата од 10.000 евра, пензија 1.750 евра, дневници, бесплатно службено возило, надомест од 20.150 евра…

Бруто платата на пратеник во ЕУ е 10.075 евра месечно, т.е. околу 7850 евра нето. Се финансира од буџетот на Собранието, т.е. од буџетот на ЕУ. Дополнително, секој претставник има право на 4.950 евра месечно за исплата на канцелариски трошоци во матичната земја, што се однесува на трошоците за кирија, опрема и вработените во таа канцеларија.

За секој ден што пратеник ќе го помине во Европскиот парламент му се исплаќа дневница од 350 евра за сместување, храна и други трошоци. Овие други трошоци не го вклучуваат автомобилот, бидејќи е обезбедено бесплатно користење на службениот автомобил.

А неофицијални патувања се исплаќаат до износ од 4.886 евра за една година. На крајот од мандатот тие имаат право на т.н „преоден надоместок“, кој е еднаков на една месечна плата годишно во која биле на функција најмногу две години. Во моментов таа изнесува најмногу 20.150 евра.

По влегувањето во ЕУ Парламентот, пратениците повеќе не треба да се грижат ниту за пензиите, бидејќи имаат право на дополнителна пензија (покрај стандардната, која веќе ја заработиле во матичната земја) во висина од 3,5 отсто од нивната плата за секоја цела година на функција и една дванаесетина за секој нареден цел месец, но не повеќе од 70 проценти вкупно. На сегашните плати тоа изнесува околу 1.760 евра дополнителна пензија, но откако ќе наполнат 63 години.

До среда ќе се задржи сончево и многу топло време со мала до умерена локална облачност. Дневната температура насекаде ќе биде над 30, а на места ќе достигнува до 40 степени.

Во попладневните часови, особено утре, ќе има услови за изолирана појава на пороен дожд и грмежи.

Времето денеска сончево и многу топло со мала до умерена локална облачност. Ќе дува слаб до умерен ветер од јужен правец. Попладне ќе има изолирана појава на краткотраен пороен дожд и грмежи. Максималната температура ќе биде во интервал од 29 до 36 степени.

Времето во Скопје сончево и многу топло со мала до умерена облачност, со слаб ветер од југоисточен правец и температура до 35 степени.

По повод Светскиот ден за на животната средина 5 јуни, СОУ„Ѓорче Петров“ Прилеп, организираше модна ревија од креации изработени со реупотреба на стара облека и текстилни производи.

Оваа година фокусот беше ставен на џинсот, облека која е омилена кај различни популациски и возрасни групи.

Креациите и модните додатоци ги изработија вредните раце на учениците од училиштето, кои редизајнираа, реупотребуваа и апциклираа фармерки, тексас јакни…, како и комбинации со други материјали, на кои им ,,всадија” нов живот.

-Овој настан го организираме за да ја поттикнеме еколошката свест, одржливото живеење и општествената одговорност кај учениците низ креативност, тимска работа, едукација, истражување, забава, другарување. Мотиви од хипи стилот беа вметнати во креациите, а слоганот на ,,Траш Фешн 2024” е да има мир и слога низ целиот свет. Благодарност за реализациајта до директорката на СОУ,,Ѓорче Петров”, Жанета Видевска, донаторитe на наградите за креациите: ,,Тритекс”, маркет Стибера, пицерија ,,Ла Стрaда”, пицерија ,,Леоне” , ,,Дуки Дасо”. слаткарница ,,Дизниленд Трејд. Благодарност и до конфекција ,,Кули”, конфекција ,,Жалфија”, креативните тимови од ученици, како и до сите присутни гости модната ревија ,,Траш Фешн 2024” – напишаа од училиштето.

🥇1 место : Тим составен од модел: Јана Чергоска и креатори Андреј Бошески, Даниел Главчев и Лејла Башевиќ,

🥈2 место :Тим од :модел Доротеа Илиеска, креатори: Милана Здравеска, Ангела Петреска, Андреј Макрески, Надица Максимоска, Христина Талеска, Анабела Јованоска, Фросина Митреска,

🥉3 место: модел: Јана Пирганоска, креатори Елена Бошеска и Фросина Стојческа.

Ментори на тимовите се професорките по ликовна уметност: Марта Макеска и Емилија Димоска како и професорките од текстилно-кожарската струка Здравка Најдоска и Наташа Мирческа

Освен главните три, беа доделени и уште неколку специјални награди.

Честитки до наградените ученици и до училиштето за одлично организираниот настан.

Со денешното гласање во 21 земја членка на ЕУ, завршуваат овогодишните избори за 720 членови на Европскиот парламент. Изборите започна во четвртокот со гласање во Холандија, во петокот се гласаше во Ирска, во петокот и вчера во Чешка, а вчера гласаа жителите на Летонија, Малта, Словачка и на француските прекуморски департмани и територии. Во останатите земји, вклучително и во европскиот дел на Франција, ќе се гласа денеска, исто како и во Италија каде гласањето почна вчера.

Најголем број европратеници или 96 се избираат во Германија, по што следува Франција со 81, Италија со 76, Шпанија со 61, Полска со 53, Романија со 33, Холандија со 31, Белгија со 22, Грција, Португалија, Унгарија, Чешка и Шведска со по 21, Австрија со 20, Бугарија со 17, Данска, Словачка и Финска со по 15, Ирска со 14, Хрватска со 12, Литванија со 11, Летонија и Словенија со по девет, Естонија со седум и Кипар, Луксембург и Малта со по шест членови во Европскиот парламент.

Според последните анкети на јавното мислење и излезните анкети од земјите каде гласањето заврши, се очекува десно центристичката Европска народна партија (ЕПП), да освои меѓу 173 и 181 мандати, пред лево центристичката Прогресивна алијанса на социјалистите и демократите (СД) со од 138 до 143 места и либералниот блок „Да ја обновиме Европа“ на кој му се предвидува да освои меѓу 75 и 85 европратеници. Рамо до рамо со либералите е националистичка и десничарска групација Европски конзервативци и реформисти (ЕРЦ), која се очекува да освои од 76 до 82 мандати, пред екстремно десничарската група Идентитет и демократија (ИД) со меѓу 67 и 69 пратеници, блокот на Зелените и Европска слободна алијанса (ЕФА) кој би требало да освои меѓу 41 и 58 европратеници и Левицата со од 32 до 42 места.

Партиите што не се членки на ниту една европска група се очекува да освојат околу 55 места. Меѓу нив се и екстремно десничарската Алтернативата за Германија (АФД), италијанското популистичко Движење Пет ѕвезди (М5С), национал-конзервативната и десно популистичка Фидес на унгарскиот премиер Виктор Орбан, лево популистичката и националистичка Насока-Социјална демократија (Смер-СД) на словачкиот премиерот Роберт Фицо, социјалдемократската Глас-Социјална демократија (Хлас) на претседателот на Словачка, Петер Пелегрини и германската левичарска и популистичка Алијанса на Зара Вагенкнехт (БСВ).

Но, вистинската битка стартува од утре, ден по завршувањето на изборите, кога ќе почнат да се прваат комбинаторики и сценарија врз основа на изборните резултати и ќе стартуваат подготовките за преговорите и пазарењата меѓу политичките групации за поделбата на четирите водечки функции – претседателите на Советот на ЕУ, на Европската комисија и на Европскиот парламент и висок претставник на Унијата за надворешна политика и безбедност, кои ќе го постават компасот на блокот во следните години до 2029-та.

Иако формално преговорите ќе се водат меѓу групите во Европскиот парламент, во суштина клучниот и конечниот избор на носителите на овие функции ќе го направат 27-те шефови на држави или влади на ЕУ, што дополнително го усложнува целиот процес.

Доколку се остварат прогнозите дека ЕПП ќе освои најмногу пратеници, тоа ќе ја охрабри групата и официјално да ја номинира актуелната претседателка на Европската комисија, Урсула фон дер Лајен за втор мандат. Во такви услови ЕПП ќе почне со математиките за обезбедување на неопходните 361 глас во Европскиот парламент за нејзиниот реизбор, што нема да биде едноставно имајќи предвид дека и во редовите на самата партија ќе има европратеници кои не се расположени да ја поддржат Фон дер Лајен.

Од друга страна, во првите неколку недели по изборите во Европскиот парламентот ќе се одвиваат и пазарења на политичките групи за евентуално привлекување на некои партии кои досега не биле членки на ниту една групација или се незадоволни со позицијата во сегашната група, како и евентуално партиско прегрупирање и формирање на нови групации.

Во такви услови претседателката на Европскиот парламент, Роберта Мецола, која се надева на нов мандат во следните две и пол години, најверојатно уште во текот на следната недела ќе свика средба на досегашните први луѓе на политичките групи за да направи преглед на изборните резултати.

Веќе од следната недела (по 17 јуни) се очекува да почнат состаноците на политичките групи што ќе дејствуваат во новиот Европарламент и изборот на нивните раководства, процес што се очекува да заврши до почетокот на јули.

До крајот на месецот ќе се одржат и две лидерски средби, прво Самитот на Г7 во Апулија од 13 до 15 јуни и потоа неформалниот Самит на ЕУ на 17 јуни во Брисел. Во Апулија првпат по изборите во живо ќе се сретнат Фон дер Лајен, претседателот на Европскиот совет, Шарл Мишел, францускиот претседател Емануел Макрон, германскиот канцелар Олаф Шолц и италијанската премиерка Џорџа Мелони, па неизбежно се очекува да „разменат мислења“ за можните кандидати за водечките позиции во ЕУ.

Два дена подоцна ова прашање ќе биде и тема на вечерата на неформалната средба на лидерите на ЕУ. Пред тоа истиот ден, шефовите на држави или влади на членките на ЕУ ќе имаат средби во рамките на нивните политички групи на кои ќе треба да ги усогласат своите ставови и да ги одредат своите преговарачи во процесот на поделбата на функциите.

Така, се очекува главни преговарачи на ЕПП да бидат премиерите на Грција и Полска, Кирјакос Мицотакис и Доналд Туск, кои речиси сигурно на неформалната средбата со своите колеги ќе ја потврдат поддршката за Фон дер Лајен.

Евентуална одлука за кандидатите за водечките функции најрано може да се очекува на Самитот на ЕУ на 27 и 28 јуни во Брисел. Иако тоа не е задолжително, лидерите на ЕУ веројатно ќе сакаат да ги договорат имињата на носителите на четирите водечки позиции, имајќи ги предвид соодносот на силите меѓу политички групи, географската застапеност и полова рамнотежа. Притоа ќе треба да се најде баланс меѓу апетитите на политичките групи и интересите на земјите членки.

Пред Советот на ЕУ конечно да излезе со усогласените кандидати за водечките функции, Мишел најверојатно ќе одржи консултации со првите луѓе на политичките групи во Европскиот парламент.

Сето ова води до заклучокот дека ќе претстои „жешко“ политичко лето во ЕУ, па не е исклучено доколку нема договор пред август, консултациите и разговорите да продолжат и за време на августовската летна ферија на институциите на ЕУ.