На 24.06.2024 во 17.50 часот во Градско, во близина на локалитетот Стоби, полициски службеници од СВР Велес ги лишиле од слобода Н.А.(32) и Е.С.(40), двајцата од Прилеп, кои одзеле предмети од викендица во близина на локалитетот Стоби, сопственост на С.С.(61) од Скопје.

Предметите биле пронајдени и вратени на сопственикот, а при извршениот преглед кај Е.С. биле пронајдени и одземени и фалсификувани банкноти. Н.А. и Е.С. се задржани во полициска станица, известен е јавен обвинител и по документирање на настанот против нив ќе биде поднесена соодветна пријава.

Европското првенство во фудбал се ближи кон втората фаза, па возбудувањата пред малите екрани се повеќе ќе растат, а атмосферата ќе се вжештува.

За среќа тука е Liquor Store – специјализираната продавница за пијалоци во Прилеп, да ја гаси жедта и со големи намалувања на различните видови пиво да ги разладува навивачите.

Не чекајте ни момент, веднаш упатете се во дуќанот на домот “Спиро Забрчанец” и наполнете ја кошничката со вашиот омилен вкус.

Граѓани и наши читатели деновиве испраќаат фотографии со купишта ѓубре од разни делови во Прилеп. Најновите се од типската населба и од старите градски гробишта.

Ај што дел од граѓаните ни се несовесни и неразбрани, па својот отпад го оставаат и фрлаат кај ќе најдат, по тротоари, улици, паркови, па и комуналното претпријатие не ни е за “машала”…

Фотографиите од градските гробишта се направени денеска, на втор ден Духовден, денови кога прилепчани масовно ги посетуваат вечните почивалишта на своите најблиски.

На оваа слика реагираат и свештените лица, кои ги повикуваат комуналците да обрнат повеќе внимание на гробиштата, пред се затоа што се во нивна надлежност.

„Не сакам да давам рокови, ние во нашата програма напишавме до крајот на 2026-та година, што мислам дека е реален рок. Јас секако ќе направам се заедно со мојот тим и заедно со новиот директор на ЈП за државни патишта, бидејќи сметам дека постојниот нема капацитет да го води тоа претпријатие“, истакна Александар Николоски, министер за транспорт и потпретседател на ВМРО-ДПМНЕ во „Тема на денот“ на Сител телевизија, одговарајќи на прашањето кога ќе се изгради автопатот Кичево – Охрид.

Николоски додаде дека ќе се залага рокот за завршување на автопатот Кичево – Охрид да биде пократок. Тој потсети дека што изградбата на сите магистрални, регионални и експресни патишта и автопатишта е надлежност на ЈП за државни патишта. А, министерството е контролор.

„Она што го знам и како мое сознание и што го видов денеска во министерството, бидејќи ова беше првото нешто што го побарав од вработените е дека имаат три проблеми, првиот проблем е со изведувачите, еден несериозен однос. Вториот проблем е имотно правни прашања односно прашањата на експропријација. И третиот проблем е проблем со свлечиштата или т.н. косини“, рече Николоски.

Тој посочи дека денеска видел една катастрофална постапка на проектот односно практично ништо не се работело. Се наиде на пустош, на една состојба за која што може слободно да каже дека е тотална неработа.

„Јас денеска испратив писмо до сите институции кои што се поврзани со министерството за транспорт вклучувајќи го и ЈП за државни патишта каде што барам написмено да ми дадат извештај до каде се со реализација на проектите и зошто проектите се закочени“, појасни тој.

„Така се работи, а не со раскажување на состаноци, кажување и образложување на приказни. Потребни се факти кои што се ставаат на хартија и кои што си се архивираат за утре и следни генерации после нас да можат да видат и да споредат“, додаде Николоски.

Николоски истакна дека владата на ВМРО-ДПМНЕ ќе направи многу за граѓаните.

Поради испуштање на непланирани големи количини на вода од страна на ЈП Студенчица, во одредени делови од градот може да се појави заматување на водата – информираат од ЈКП Водовод и канализација Прилеп.

-Екипите на ЈКП “Водовод и канализација” – Прилеп ја следат состојбата на водоснабдувањето во градот и во овој момент имаме нормално водоснабдување. ВОДАТА е технички и здравствено исправна, матноста на водата е во границите на нормалата.

Доколку дојде до поголема заматеност на водата ЈКП “Водовод и канализација” – Прилеп ќе излезе со официјално соопштение и препораки до граѓаните на Општина Прилеп – стои во соопштението од прилепски водовод.

Европската куќа на ракометот (ЕХФ) уште еднаш покажа голема доверба кон македонската судиска двојка Ѓорѓи Начевски и Славе Николов и им го даде да го судат финалето во Лигата на шампионите.

Во мечот за титула се судрија Алборг и Барселона, а победија Каталонците кои се рекордери во елитата. ЕХФ објави специјално видео за првпат со целата комуникација меѓу судиите на мечот.

Погледнете како Начевски и Николов го водеа финалето во ЛШ:

Премиерот Христијан Мицкоски денеска информира дека првата владина седница ќе се одржи кон крајот на неделата. Донесени ќе бидат, како што рече, неколку одлуки, од кои повеќето формални. Тој воедно најави и дека ќе се почне со работа на новото законско решение за линеарно зголемување на пензиите.

Одговорајќи на новинарски прашања по посетата на Штип каде го почна првиот работен ден како премиер, Мицкоски истакна дека новата Влада ќе гради онаму каде што нејзините претхоници оставија неуспешни проекти.

-Нема да има дуализми, ниту функционери кои ќе живеат од парите на граѓаните, ќе има намалување на институциите, ќе бдиеме тоа што го ветивме. Тоа што граѓаните го направија е доволно, сега татковината треба да направи за нив. „Граѓаните пред се“, ќе бидете мотото на нашата Влада, порача Мицкоски.

Соопшти и дека утре или задутре ќе има состанок со министерот за социјална политика, демографија и млади, Фатмир Лимани и со министерката за финансии Гордана Димитриевска Кочовска во врска со законот за покачувањето на пензиите.

-Кон крајот на неделата ќе се одржи првата седница на Владата. Донесени ќе бидат неколку одлуки, повеќето формални, но почнуваме да работиме и на новото законско решение за линеарно зголемување на пензиите. Тоа што го ветивме во предизборието – во првата година да имаме линеарно зголемување по 5 000 денари на пензиите. Почнуваме со министерот за социјална политика, демографија и млади, Фатмир Лимани и со министерката за финансии Гордана Димитриевска Кочовска. Утре или денот потоа ќе имаме работен состанок кај мене, почнуваме да го драфтираме овој закон кој набргу ќе се најде во Палрламентот. Новата Влада ќе гради онаму каде нејзините претхоници оставија неуспешни проекти и споменици на едно лошо, корумпирано време. Нема да се случува голобради момчиња да купуваат трговски центри во главниот град, нема да се случуваат ролс ројс возила, ниту фудбалчиња по канбиенти и неуспешни проекти во делот на производството на марихуана, туку ќе го правиме она што го ветивме пред граѓаните, подвлече Мицкоски.

Тој присуствуваше на поставување камен-темелник на новата спортска сала „Џексон”, направи увид во градењето на новиот булевар „Илинденска“, а потоа, заедно со министерот за здравство Арбен Тараври, направи увид во состојбата на штипската болница.

Американската амбасадорка во земјава – Анџела Агелер на социјалната мрежа Х упати честитки за формирањето на новата Влада.

– Додека премиерот и неговиот кабинет ја преземаат функцијата, со нетрпение очекуваме да го продолжиме нашето партнерство во зајакнувањето на владеењето на правото, подобрувањето на економскиот, енергетскиот и инфраструктурниот развој, социјалните структури и придвижувањето на земјата напред на нејзиниот евроатлантски пат – се вели во честитката на Агелер.

Congratulations to the new government on its formation. As the Prime Minister and his cabinet take office, we look forward to continuing our partnership in strengthening rule of law, improving economic, energy, and infrastructure development, social structures, and moving the…

— Ambassador Angela Aggeler (@USAmbNMacedonia) June 24, 2024

На 23.06.2024 во 17.20 часот во СВР Битола било пријавено дека во с.Тополчани, прилепско, патничко моторно возило „мазда” со прилепски регистарски ознаки, управувано од Д.Ч.(26) од с.Тополчани, удрило во Р.В.(80) од с. Тополчани.

На Р.В. во Градската болница во Прилеп и биле констатирани тешки телесни повреди – информираат од СВР Битола.

Регулаторната комисија за енергетика донесе одлука со која од полноќ поскапуваат нафтените деривати.

Согласно одлуката на РКЕ, цената на бензинот ЕУРОСУПЕР БС-95 се зголемува за 1,50 ден/лит. За два денари поскапуваат бензинот ЕУРОСУПЕР БС-95и Екстра лесното масло за домаќинство на (ЕЛ-1).

Цената на дизел горивото од полноќ ќе се зголеми за 2,5 денари, а мазутот М-1 НС, се зголемува за 1,040 ден/кг.

Цени на горивата кои ќе важат од полноќ:

– Моторен бензин – ЕУРОСУПЕР БС – 95 – 82,50 (денари/литар)
– Моторен бензин – ЕУРОСУПЕР БС – 98 – 85,00 (денари/литар)
– Дизел гориво – ЕУРОДИЗЕЛ БС (Д-Е V) – 76,50 (денари/литар)
– Масло за горење – Екстра лесно 1 (ЕЛ-1) – 75,00 (денари/литар)
– Мазут М-1 НС – 46,720 (денари/килограм)