Маалското пазарче во населбата Марино Маало во Прилеп е претворено во вистинска руина. Ако пред некоја година тука се продаваа свежи земјоделски производи, а за жителите на оваа населба тука беше единствената пилјара, денеска местото е целосно запуштено, затревено и унишитено.

Просторијата каде порано се чуваа вагите и другите мерни инструменти, сега е претворена во јавно ВЦ, па наоколу се шири неподнослива миризба.

Поранешните пазарџии кои тука држеа тезги под закуп, велат дека конкуренцијата си го направила своето, но и дека е неисплатливо повеќе да се продава, пред се’ поради, според нив, високите цени за закуп на тезга.

Ништо не е подобра ниту состојбата на маалското пазарче во населбата Точила. И таму треви, запуштени и корозирани тезги, празно…оставено на забот на времето.

Граѓаните бараат ЈП Пазари или да ги дислоцира овие пазарчиња и да го ослободи просторот, или истите да ги реновира, па со тоа одново да се вратат продавачите на обошје и зеленчук.

Регулаторната комисија за енергетика денеска ќе одлучува за новите цени на горивата.

Според последната одлука на РКЕ, новата цена на Еуросупер БС-95 е 81,5 денари за литар, Еуросупер БС-98 се продава по цена од 83,5 денари за литар, а дизелот по цена од 74 денари за литар. Новата цена на Екстра лесното масло за домаќинство е 72,5 денари.

Македонските ученички – информатичарки на четвртата по ред Европска олимпијада по информатика за девојки (ЕОИД 2024), која од 21 до 27 јули се одржува во Велдховен, Холандија освоија два бронзени медала.

Како што соопштија од Здружението на информатичарите на Македонија (ЗИМ), бронзените медали за Македонија ги освоија Јована Трифуноска од Тетово и Атина Рувинова од Охрид, а достоен резултат постигнаа и останатите две членки на македонскиот тим: Сара Стефановска од Крива Паланка и Антонела Владева од Свети Николе.

Две лица се степале во нотарска канцеларија по претходна расправија околу оставинска постапка, соопшти МВР.

На 25.07.2024 во 14.10 часот во СВР Скопје било пријавено дека во нотарска канцеларија на подрачјето на Центар бил нарушен јавниот ред и мир со физичка пресметка помеѓу С.Ј.(59) и С.С.(67), двајцата од Скопје.

На 27.07.2024 во 18.10 часот во СВР Битола било пријавено дека на ул.,,Климент Охридски“ во Битола се случила сообраќајна несреќа помеѓу мотоцикл со битолски регистарски ознаки, управуван од Г.Ч.(48) и велосипед управуван од Љ.А.(75), двајцата од Битола.

Во несреќата со тешки телесни повреди се здобил возачот Г.Ч. констатирани во Клиничка болница Битола. Извршен бил увид од увидна екипа од СВР Битола.

Како долгогодишни спортисти, а веќе неколку години и рекреативни велосипедисти, полициските службеници при ОВР Прилеп и припадници на Посебната единица на полицијата (ПЕП), Драган Илиоски и Филип Спиркоски, во четвртокот на 26.07. на велосипеди се упатија до манастирот Св. Василиј Острошки во Црна Гора.

Двајцата колеги досега често организираа интересни тури во околината на Прилеп и Битола, како и подолги релации низ Македонија, а ова им е прв пат да се упатат на толку далечна дестинација.

За неполни два дена двајцата колеги и другари извозија над 430км и во саботата попладнето пристигнаа на својата дестинација – едно од најголемите светилишта на Балканот.

“Нашата цел е постигната, го остваривме замисленото возење со велосипед од Прилеп до Острог. Голема благодарност до сите пријатели, другари и спонзори кои дадоа свој придонес за остварување на овој подвиг. Ви благодариме за искрените честитки и ви возвраќаме со молитва за здравје од Острог”, порачаа тие.

На 25.07.2024 во 23.30 часот, полициски службеници од ОВР Прилеп го лишиле од слобода Б.Б.(32) од прилепско село, постапувајќи по претходна пријава дека во семејниот дом упатувал закани кон својата 62-годишна мајка и се обидел физички да ја нападне.

По целосно документирање на случајот ќе следува соодветен поднесок – информираат од МВР.

По четврти пат, а во чест на Илинденците кои својот живот го дале за слободна Македонија, битолската коњаница “Галоп” се упати до славно Крушево.

Патот ќе ги води низ 9 села, а во Крушево ќе пристигнат на големиот христијански празник Илинден, на 2. август.

20 коњаници и една девојка, се дел од годинешното патешествие. Кон Крушево се упатија вчера, на големиот празник и заштитник „Архангел Гаврил“ од истоимената црква, која се наоѓа во населбата Довлеџик.

По добиениот благослов од Владиката Петар, илинденците од Битола се упатија во Цапари, каде синоќа се одржа прекрасна церемонија, со музичка програма, а присуствуваа над 1000 луѓе.

Се положи цвеќе на спомен обележјето на загинатите илинденци и борци во народноослободителната борба, а коњаниците положија и заклетва. На крајот беше избран и нов војвода кој ќе ги води до Крушево.

Да им посакаме патот да им биде лесен, а за Илинден заедно да празнуваме кај Мечкин Камен.

На 30.07. во с. Ропотово – прилепско, ќе се организира свечен пречек на илинденската коњаница. Настанот ќе се одржи на спортското игралиште, со почеток од 18:30часот, а свој настап ќе има музичката група “Нота бенд”.

Заеднички да ги поздравиме учесниците на коњаницата со што помасовно присуство, и да одбележиме 121 година од Илинденското востание.

Министерството за внатрешни работи по повод прославата на државниот празник 2-ри Август, кој традиционално се одбележува во Крушево ги известува граѓаните дека поради изведување на градежни работи за санација на регионалниот пат Р-1306, делница: Прилеп – Крушево, поради што истиот е затворен за сообраќај во делот од село Големо Коњари до село Кривогаштани, за доаѓање на манифестација во Крушево на ден 01 и 02.08.2024 година треба да се користат патните правци: Прилеп – Битола – по регионален пат Р1305 до Демир Хисар кон Крушево, и Кичево по регионален пат Р1305 до клучка Сладуево (Демир Хисар) по регионален пат Р1306 до Крушево.