Компаниите и јавниот сектор до крајот на месецов имаат обврска да им исплатат регрес за годишен одмор на своите вработени. Вработените во администрацијата ќе добијат по најмалку 11.000 денари, додека за приватниот сектор, износот ќе биде околу 16.800 денари, што е 40% од просечната плата исплатена во последните три месеци.

Исплатата на К-15 треба да се заврши до крајот на годината. Услов за исплата на регресот е работникот да работи најмалку шест месеци во календарската година кај ист работодавец. Регрес им следува и на оние работници што ја смениле работата, ако претходно непрекинато работеле половина година во иста компанија.

За работодавците што нема да им исплатат регрес за годишен одмор на своите вработени, Законот предвидува казна до 4.000 евра, од кои од 2.000 до 3.000 евра за компанијата и од 500 до 1.000 евра за одговорното лице во неа.

За работодавачите, пак, кои бараат да им се вратат исплатените пари, предвидена е и затворска казна од три месеци до една година.

Градоначалникот Орце Ѓорѓиевски го користел саботниот ден од продолжениот викенд за комуникација со граѓаните.

Од општината информираа дека жителите во изминатиот период изразиле желба да контактираат со него, да го информираат за некаков проблем или да споделат некоја своја идеја, а дел дошле и на средба во општината.

„Денес, сабота, од рано наутро сум во мојот кабинет каде што досега остварив телефонски разговор со повеќе од 80 мои сограѓани, кои имале потреба или оставиле свој контакт на службите во општината. Со оние кои имаа потреба од лична средба, веќе ја остваривме или ќе ја остваривме во текот на денешниот ден. Мојот тим ги запишува барањата и веднаш пристапуваме кон нивно решавање. Она што особено ме радува е тоа што некои граѓани немаат никаков проблем, туку им треба само пријателски разговор во кој ќе споделат и некоја идеја од која ќе произлезе проект во иднина. Пријателски разговор, чисто да се видиме и да дадат поддршка за она што досега е сработено. Некои се дури и пријатно изненадени, велат дека во минатото немале шанса да стигнат до градоначалникот, а не пак да ги побара телефонски. Приемот е многу позитивен и тоа е уште еден показател дека сме на вистинскиот пат. Ќе останам тука цел ден, а ако треба ќе продолжиме и утре. Ќе разговарам или остварам лична средба со секој оној кој има потреба, во мојот кабинет или надвор, на пријателско кафе. На проблемите ќе им погледнеме во очи и директно ќе ги решаваме. Мојот народ мора да е задоволен“, изјави градоначалникот Орце Ѓорѓиевски.

Синоќа во Ликовната галерија на ЦК”Марко Цепенков”Прилеп, беше отворена изложбата “Сеќавање” од Васил Костов. Изложени се 27 дела со кои се заокружува и се остварува замислата на Васил Костов – комплетна презентација на уметничкото достигување, најголем успех во ликовната дејност кој остава печат на уметник на прилепската, македонската ликовна сцена и пошироко.

Изложбата ја отвори Елена Чагороска, историчар на уметност, која рече дека се презентирани дела со разновидна техника и материјали: масло на платно, акварел, гваш, графика, обиди на работење во дрво и други материјали.

– Последните години од животот ги посветува на непополнети моменти, сеќавања од детството, како бегалец од Егејска Македонија, со многу страдања и слики од доживеани настани. Полн со емотивни чувства, уметникот започнува секоја слика, сеќавања и доживувања да ги сублимира, со идеја да започне серијал на слики насловени како „Сеќавање“ – бегалски сеќавања од 1945 – 1952 година….Костов претпочита посредно да ја вознемири нашата индолентност, нашата духовна пасивност, да го поттикне нашиот интелект на размислување, акција, определување. Творбите на Костов во богатството на своите потенции, содржат извонредно доследен, естетски, сублимиран вид создавање, на едно колористички и обликувано, диференцирано и специфицирано ликовно творештво…..Делата предизвикуваат естетско доживување, ја покренуваат фантазијата кај гледачите, а уметникот умее да си поигра со колоритот на боите, хармоничност и потези кои го напојуваат окото на гледачот, посочи на отворањето Елена Чагороска.

Васил Костов реализирал бројни самостојни изложби во земјата и во странство, бил дел од групни изложби, а добитник е на бројни награди.

Eкипата на РК Прилеп вечерва со почеток од 18:30ч, а во рамки на 14-то коло од Супер лигата, гостува кај одлилниот Охрид.

Охриѓани кои сезонава имаат 10 победи и само 3 порази, котираат зад водечката тројка Еурофарм Пелистер, Алкалоид и Вардар. На своето конто имаат 20 бодови, а ветер во грб им е македонската ракометна икона, тренерот Стевче Алушовски, како и одличната публика.

Прилеп треба да направи чудо за да освои бодови на овој натпревар, особено ако се земе во предвид дека одбраната не им е најјака страна сезонава.

Целата спортска јавност знае дека во тој дел се чувствува празнината која ја остави Филип Велески, па не случајно тимот речиси редовно прима над 30 гола во утакмица.

Како и да е, доколку прилепчани прикажат добра игра на сите полиња, ќе имаат шанса да ја продолжат добрата серија од три победи, еден нерешен резултат и еден пораз во последните пет натпревари.

Секојдневно расте бројот на производите кои ќе бидат опфатени со новогодишната кошничка. Досега се 713, а се очекува да надмине 800 производи кои ќе добијат пониски цени за 10 проценти, изјави во Прилеп заменик министерот за економија и труд Марјан Ристески. Додаде дека на една недела пред примената на мерката се пријавени 63 компании.

-Оваа новогодишна кошничка е поразлична од другите зашто, прво , е креирана од бизнис секторот и влегувата производителите, увозниците, дистрибутерите и трговците на големо и мало. Интересот е многу голем и секојдневно се пријавувата компании. Почетно беа околу 650 производи, сега бројката надминува 700, односно, досега се вклучени 713 производи или 63 компании кои учествуваат во оваа мерка, изјави Ристески.

Тој има поголеми очекувања од оваа новогодишна кошничка и опфатот на производи да стигне над 800.

-Очекувам заштедата да биде многу поголема од претходните кошнички. Тогаш беа опфатени окоу 520, а сега бројката сигурно ќе оди над 800 производи. Секако анализите и на Министерството и на Заводот за статистика допрва ќе се прават од ефектите на кошничката, рече Ристески.

Примената на мерката за новогодишната кошничка ќе почне на 15 декември и ќе трае до 15 јануари со сите производи кои му се потребни и ќе ги користи семејството за празниците, а опфатот се зголемува. До секој производ ќе стои назнаката „Помалку трошоци, повеќе за тебе“, но и претходната и цената опфатена со намалувањето. Граѓаните не им веруваат на трговците и сметаат дека тие манипулираат со цените. Ристески уверува дека Инспекторатот на терен будно ќе ја следи примената на мерката.

-Мониторингот ќе го врши пазарната инспекција која ќе биде на терен, во маркетите. Инаку, според Законот за заштита на потрошувачите, кога има одредени акции, треба да биде земена најниската цена од претходниот месец, значи од 15 ноември до 15 декември и на таа цена да има најмалку 10 проценти намалување, објаснува Ристески.

Министерството за економија и труд ги повикува другите компании да се вклучат во мерката која стартува на 15 декември.

-Денеска (07.12.2024) во 05.11 часот во СВР Битола било пријавено дека на ул.„Прилепска“ во Битола патничко возило „ауди“ со битолски регистарски ознаки управувано од Т.Б.(19) од с.Крклино,битолско удрило во Б.В.(39) од Битола.

Во несреќата со тешки телесни повреди се здобила Б.В., констатирани во Клиничката болница Битола.

Извршен бил увид од увидна екипа од СВР Битола – информираат од СВР Битола.

Премиерот Христијан Мицкоски денеска на прес-конференција најави две реформи во сферата на социјалната заштита. Едната, рече, ќе биде изготвување софтверско решение кое јасно ќе детектира кои корисници на социјална помош го злоупотребуваат системот, а втората е издавање платежна картичка со која 50 отсто од сумата приматели на социјална помош ќе ја користат за купување македонски производи.

Како што истакна Мицкоски, досега се евидентирани голем број злоупотреби. Некои лица примале социјална помош и до 60 000 денари месечно.

– Некои корисници примале помош до 60 000 денари, некои се починати, некои долго се отсутни од државата. Има големи злоупотреби во центрите и од службеници. Дел се веќе и санкционирани, против дел се покренати кривични постапки, истакна Мицкоски, додавајќи дека на софверското решение се работи со Светска банка.

Дополни дека и во однос на здравството се работи на реформи.

– Мора да сме свесни дека здравствениот систем бил многу злоупотребуван и затоа сега некои се милионери, а некои милијардери додека граѓаните не ги добиваат услугите. Се преговара со две европски земји за изградба на две здравствени установи, клиничката болница во Штип и Кичево. Работиме и на набавка на апарати неопходни за добивање здравствени услуги. Размислуваме и за структурна реформа во здравството, за регионализација. Некои објекти може од болници ќе станат поликлиники или други од поликлиники амбуманти, објасни премиерот.

Денеска ја славиме Св. Великомаченица Екатерина, а именден празнуваат: Катерина, Ката, Катица…

Житието раскажува дека светата великомаченица Катерина потекнува од царско семејство од градот Александрија.

Живеела кон крајот на третиот и почетокот на четвртиот век. Мајка ѝ била христијанка, но поради тоа што христијаните биле прогонувани, таа тоа свое верување не го кажувала јавно. На 18-годишна возраст Катерина била ретко убава, паметна и образована девојка со познавање на филозофијата, литературата, а особено ги совладала медицинските науки.

Многу богати кнезови сакале да се оженат со неа, но на сите што ја убедувале да се омажи им одговарала дека ќе се омажи тогаш кога ќе ѝ најдат момче што ќе биде рамно на неа со богатство, убавина и образование. Но такво момче немало. Имало и богати и образовани, но убави и мудри како неа немало.

Во близината на градот живеел еден праведен човек кој Катерина ја упатил во тајните на христијанството. Тој ѝ зборувал за чудесното раѓање на Исус од Пресвета и пречиста Дева Марија, која поради својата светост и чистота станала мајка на Спасителот, а подоцна била однесена на небото каде што ангелите ја служеле и ѝ се поклонувале како на царица. Подоцна Катерина ја сонувала Божјата мајка со својот син и го прифатила христијанството со сета своја душа и разум.

Еднаш кога царот и останатите пагани принесувале жртви и се молеле на паганските идоли Катерина му се обратила со зборовите. „Царе, нели ти е срам што се молиш пред гнасните идоли. Зошто не го запознаете вистинскиот Бог, кој слегол на земјата и зел човечка форма поради нашето спасение. Тој не сака жртви, туку само да живееме според неговите заповеди“. За ова Катерина требало да биде жестоко казнета, но поради нејзината убавина царот посакал да ја придобие за жена, ветувајќи ѝ раскошен живот и богатство, но и да ја оттргне од христијанството.

Но, Катерина сето тоа го одбила со гнасење. Кога царот помислил дека е недостојно за еден цар да се расправа со една жена, повикал педесетина мудреци кои требало да ја разубедат убавата девојка. Но, мудрата Катерина сите нив и многу народ убедила во вистинската Христова вера и ги придобила за христијанството. Поради тоа била осудена на смрт и пратена на губилиште. Главата ѝ била отсечена со меч на 18-годишна возраст на 7 XII/24 XI 305 (според други 310) година.

Преданието раскажува дека подоцна ангелите ѝ го однесле телото на Синајската планина.

Кога царот Декиј еднаш војуваше против варварите, во неговата војска имаше еден војвода над ерменскиот полк наречен Мартензес.

Тој војвода се викаше Меркуриј. Во борбата на Меркуриј му се јави Ангел Божји, му даде меч во рацете и му рече дека тој ќе ги победи непријателите. И навистина, Меркуриј покажа чудо од храброст косејќи ги непријателите како трева.

По оваа славна победа царот Декиј го произведе за прв војвода во својата војска. Но, некои завидливи луѓе го обвинија Меркуриј дека е христијанин, а тој ова пред царот не го скри тоа, туку го објави. Беше мачен долго и тешко: од него со ножеви сечеа каиши, го гореа со оган. Во затворот му се јави Ангел Божји и го исцели.

Најпосле царот изрече пресуда војводата Меркуриј да се убие со меч во Кападокија. Кога го убија телото му стана бело како снег и од него излегуваше мирис на темјан. Од неговите чудотворни мошти се исцелија многумина болни. Овој прекрасен Христов војник пострада меѓу 251 и 259 година.

Пивара Скопје во 2023 година, креираше 139 милиони евра додадена вредност во македонската економија, што претставува 1% од БДП, од кои 71 милиони евра се даноци исплатени во државниот буџет. Над 8700 работни места во земјава на директен или индиректен начин се одржуваат од остварените приходи на Пивара Скопје, за кои годишно се обезбедуваат плати во износ од 37 милион евра. Секое 1 отворено место во Пивара поддржува уште 21 работно место во земјата. На секое потрошено евро од купувачите назад во општеството се враќаат 68%.

Ова се само дел од наодите содржани во новата Студија за социо-економско влијание на Пивара Скопје во Македонија која беше промовирана синоќа во , изработена од независната консултантска куќа „Стјуард Редквин“, преку анализа на податоците на работењето на компанијата во 2023 година. Целта на оваа Студија е на објективен и транспарентен начин, со помош на научен пристап, да се квантифицира и оцени придонесот и значењето на Пивара Скопје за развојот на македонската економија и просперитетот на заедницата.

На промоцијата присутен беше и заменик министерот за економија и труд, Марјан Ристески, кој имаше и свое обраќање на настанот.

-Честитки на Скопска Пивара за одличниот настан каде ја презентираа Студијата за социо-економско влијание на компанијата во македонското општество. Студијата покажува дека Пивара Скопје има голем придонес и влијание на развојот на македонската економија, заедницата и животната средина. Оваа компанија е одличен пример за општествено одговорна компнија која инвестира во локалната заедница – напиша Ристески на социјалните мрежи.