Германскиот синџир на маркети “ЛИДЛ” ќе отвори маркет и во Велес – објави на својот Фејсбук профил градоначалникот на оваа општина, Марко Колев.

-Изминатава година напорно работевме за завршување на сите потребни административни процедури кои завршија денес со усвојување на седницата на Советот на Општина Велес, со што овој светски познат бренд на маркети ќе може да ја направи својата инвестиција во Велес. Оваа инвестиција ќе значи нови вработувања и придвижување на локалната економија – напиша Колев.

Во срцето на Прилеп, на бул. Гоце Делчев бр. 6-3, наспроти “Ла Страда”, oд неодамна работи продавницата на Bonatti, единствено место каде љубителите на квалитетната и елегантна долна облека можат да го најдат совршениот избор за себе или за подарок на блиска личност.

Bonatti е бренд кој веќе долго време се препознава по својот модерен и иновативен пристап кон дизајнот, комбинирајќи стил, удобност и префинетост. Со врвен квалитет и внимание на секој детал, Bonatti создава парчиња што ги надминуваат сите очекувања. Без разлика дали станува збор за секојдневна долна облека или ексклузивни сетови за посебни пригоди, Bonatti секогаш успева да ги задоволи вкусовите на најпребирливите купувачи.

Новата продавница во Прилеп е совршено место за сите оние што сакаат да се чувствуваат убаво и самоуверено во својата кожа. Со широк асортиман на производи, вклучувајќи долна облека, пижами, аксесоари и други модни детали, посетителите ќе можат да го најдат совршениот избор за себе или за подарок на блиска личност.

А сега е вистинското време! Во Bonatti веќе започна празничната еуфорија со дури 40% попуст на одредени производи.

Празничната акција трае од 13.12.2024 до 11.01.2025

Побрзајте и направете ја неодоливата комбинација, изберете го совршениот подарок и препуштете се на магичните моменти!

Се е подготвено за утрешниот старт на мерката новогодишна кошничка која треба на граѓаните да им донесе производи со пониски цени од минимум 10 проценти, уверува Марјан Ристески, заменик министер за економија и труд. Бројката на производи кои влегуваат во „Новогодишната кошничка“ се очекува да достигне дури 1000.

– Со почетокот на мерката „Новогодишна кошничка“ очекуваме бројот на производи да достигне преку 1000. Оваа општествено одговорна акција произлезе од компаниите и маркетите, а ние како Министерство и Влада ја поддржавме. Опфатени се преку 80 компании, изјави Ристески денеска во Прилеп.

Тој ги повика граѓаните и синдикатите и тие со инспекторатот да вршат своевиден мониторинг на цените на производите и да ја пријават секоја неправилност.

-Ги повикувам граѓаните, синдикатите заедно со пазарниот инспекторат кој ќе биде постојано на терен, да следат и да се уверат дека производите во кошничката се намалени најмалку 10 проценти од најниската цена од претходниот месец пред да започне акцијата. Така што, не верувам дека има некои изигрувања, зашто компаниите и маркетите ја понудија оваа акција и не верувам дека самите ќе ја изиграат.

Во новогодината кошничка се опфатени месо и месни производи, млеко и млечни производи, алкохолни и безалкохолни пијалаци, риба, пекарски прооизводи, тестенини, кондиторски производи, овошје, зеленчук. Овие производи опфатени со мерката ќе се продаваат на преку 300 пунктови во сите градови во земјава.

-Очекуваме овие новогодишни празници граѓаните да ги поминат со пониски цени и да заштедат во домашниот буџет, вели тој.

Ристески објаснува дека од кошничката се изоставени маслото шеќерот, кафето и какаото за да не им се направеле големи штети на компаниите.

-Овие производи не ги ставивме во мерката зашто не сакавме да им наштетиме на компаниите кои зависат од домашниот пазар, но и од цените на суровините на светските берзи, кои во моментов се многу зголемени. Но, има и одговорни компании кои и на овие изземени производи дадоа одредени попусти, нагласува заменик министерот.

Мерката ќе трае од 15 декември до 15 јануари.

Интензивно се работи на изградбата на дневен центар за лица со телесна или ментална попреченост, што ќе располага со капацитет од 40 корисници, се наведува во објавата на страницата на „Фејсбук“ на кавадаречкиот градоначалник Митко Јанчев.

– Вкупната проценета вредност на проектот е 40.856.910 денари. За да им овозможиме подобар квалитет на живот на лицата со попреченост, се истакнува во објавата на „Фејсбук“.

Како што се појаснува, станува збор за проект што беше дел од изборната програма на градоначалникот Јанчев.

-На 14.12.2024 во 00.05 часот на ул.„Прилепски бранители“ во Прилеп, полициски службеници од ОВР Прилеп лишиле од слобода малолетник од Прилеп.

Тој бил фатен при извршување на тешка кражба во куќа во Прилеп.

Одземеното било вратено на сопственикот, а по целосно документирање на настанот против него ќе следува соодветна пријава – информираат од МВР.

Постигнавме историски највисока цена на откупен тутун по килограм од 400 денари, објави на својата Фејсбук страница премиерот Христијан Мицкоски.

Во изминатиот период заедно со Министерот за земјоделство, водостопанство и шумарство, Цветан Трипуновски имав интензивни средби со тутунарите и откупувачите на тутун.

Од денес откупувачите на тутун ја дополнија откупната цена од 375 на 400 денари за откупен тутун прва класа, со што тутунарите ќе ја добијат вкупната сума кои ја бараа. Дополнително Владата ќе ја зголеми и субвенцијата од 80 на 100 денари за килограм, што значи дека заедно со откупната цена и субвенциите секој тутунар ќе добие по 500 денари за килограм тутун.

Пресметките говорат дека само оваа година над 140 милиони евра ќе завршат во рацете на тутунарите.

На овој начин директно помагаме на земјоделците кои се р’бетот на нашата земја и кои со мака и труд заработуваат за пристоен живот.

Продолжуваме 100% посветени, пишува Мицкоски во својата објава.

Ракометарите на РК Прилеп вечерва пред своја публика го забележаа осмиот пораз сезонава, откако со високи 30:40 беа поразени од лидерот на табелата Алкалоид, кој е предводен од селекторот на македонската репрезентација, Кире Лазаров.

Прилепчани поведоа само на почетокот од натпреварот со 2:0, по што Алкалоид веднаш ги презеде работите во свои раце и дојде на 3:7. На полувремето се замина со плус пет за гостите 13:18.

Во вториот дел избраниците на Лазаров само ја зголемуваа разликата, а проблем за прилепчани беше и третото исклучување на пивотот Томислав Квастек, еден од најдобрите поединци во тимот, кој по црвениот картон остатокот од натпреварот мораше да го следи од трибините.

До крајот на натпреварот немаше изненадувања, а Алкалоид лесно дојде до посакуваните бодови.

Прилеп по ова коло останува на 12 освоени бода и продолжува да прима над 30 гола по натпревар. Одбраната останува рак рана на тимот, а играчите како да не покажуваат желба за натпревар против големите фаворити. Aко тимот сака да дојде во прилика да се бори за плеј-оф, тогаш мора да се покаже карактер и во натпреварите со екипите од горниот дел на табелата. Победи против Радовиш, Бисинов, Куманово и Струга, носат само нова борба за опстанок во суперлигашкото друштво.

Во наредното коло, избраниците на Божидар Мојсов гостуваат кај “фенерџијата” Радовиш.

По поразот од Охрид во минатото коло, екипата на Мега баскет има шанса за поправен пред своја публика викендов.

Утре во спортската сала на ООУ “Добре Јованоски”, со почеток од 19:30часот, гостува Маџари, екипа која во моментов котира со еден бод подобро од прилепчани.

Ова е десетто коло во Втората кошаркарска лига, а Мега баскет има шанса со триумф да се приближи одново до врвот на табелата.

Три часа порано, во истата сала, со почеток од 16:30часот, се игра и натпревар од младинската лига, каде екипата на Мега баскет до 16 години го пречекува Тиквеш.

Да ги поддржиме и двете екипи со големо присуство на трибината.

Заменик министерот за економија и труд Марјан Ристески денеска објави дека листата на производи од акцијата „Новогодишна кошница“ е зголемена на повеќе од 900 производи.

– Интересот за приклучување на компаниите во акцијата „Новогодишна кошница“ расте, за една недела листата на производи се зголеми од 650 на повеќе од 900 производи, напиша Ристески на социјалните мрежи.

Тој најавува дека од задутре, кога почнува акцијата па до 15 јануари граѓаните ќе можат да купат повеќе од 900 производи од 83 компании кои тие самите ги понудиле, со пониски цени од најмалку 10 проценти.

Ристески се заблагодарува на компаниите кои се дел од акцијата (производители, дистрибутери и маркети), кои, како што нагласува, излегоа во пресрет на повиците на јавноста и на дело ја покажуваат нивната општествена одговорност.

– Листата на производи не е затворена и сите заинтересирани можат да се пријават со свои производи на [email protected]. Апелирам компаниите доследно да ја почитуваат акцијата која што самите ја креираа, а доколку граѓаните имаат забелешки да ги пријават до Државниот пазарен инспекторат на бесплатниот телефонски број 191 или на веб страната www.dpi.gov.mk, наведува Ристески во објава на Фејсбук.

Претходно денеска премиерот Христијан Мицкоски рече дека бројот на производи опфатени со акцијата е зголемен од 600 на 800 и оти Државниот пазарен инспекторат ќе ја следи работата на маркетите.

Мицкоски уверува дека најавеното намалување на цените на производите опфатени со акцијата „Новогодишна кошница“ ќе го заштити семејниот буџет.

– Очекувам позитивни ефекти и очекувам за празниците потрошувачката кошничка да биде што побогата, изјави Мицкоски, по поставувањето камен темелник на нова фабрика во ТИРЗ Кичево.

Во листата на новогодишната потрошувачка кошничка спаѓаат леб и житарици, пекарски производи, месо и преработки од месо, риба, млеко и млечни производи, кондиторски производи, свежо, замрзнато и конзервирано овошје и зеленчук, безалкохолни (газирани и негазирани) напитоци, алкохолни пијалаци (вино и пиво) и друго.

Изминатите денови пазарните инспектори ги мониторираа сегашните цени на производите коишто ги содржи акциската листа заедно со најниските цени на истоимените производи кои биле применувани во последните 30 дена. Целта на мониторингот е да се утврди дали по почетокот на акцијата трговците ќе се придржуваат до дадената иницијатива од нивна страна за акциско намалување на цените од 10 отсто или повеќе на прехранбени производи кои најмногу се продаваат во текот на новогодишните празници.

Производите на листата кои ќе бидат понудени на полиците во трговските ланци ќе бидат обележани со налепница и лого „Помалку трошоци, повеќе за тебе“, како дел од кампањата на Владата.

Акцијата „Новогодишна кошница“ ќе се спроведува заклучно со 15 јануари 2025 година. Граѓаните може да пријават неправилности на бесплатниот телефонски број 191 или на веб страна на ДПИ www.dpi.gov.mk, на која е достапна и листата со производи.

Сите деца до 14 години во предновогодишниот период ќе имаат можност да ја искористат својата фантазија и својата креативност и да учествуваат во наградната игра што ја организира најголемата приватна пошта Еко Логистик Сервис (ЕЛС).

Ликовниот конкурс е на тема „Како ја замислувате најголемата приватна пошта ЕЛС“, а најмладите преку цртежи ќе можат да се изразат како замислуваат дека нивните пратки стигнуваат во нивни раце. Наградната игра започнува денеска, 11 декември 2024, а завршува на 29 декември 2024 година.

Сите цртежи што ќе пристигнат ќе бидат објавени на официјалната Фејсбук страница на ЕЛС, каде што преку „лајкови“ ќе се одвива и гласањето. Трите цртежи со најмногу лајкови ќе добијат преубави награди кои ќе пристигнат на наведените адреси на добитниците пред Новата 2025 година, a изненадувања ќе има и за останатите учесници.

Цртежите можат да се испратат на електронската пошта на официјалната Фејсбук страница на ЕЛС, на електронската адреса [email protected] или пак да се донесат во најблискиот хаб на ЕЛС со назнака: Новогодишен поштенски фаx, Дирекција на ЕЛС, 15 Корпус Автокоманда, 1000 Скопје.

Воедно, секое основно/средно училиште што сака да ги приклучи своите ученици во наградната игра, може да се обрати на електронската адреса [email protected] со цел да се постават кутии за цртежи во училиштето.

ЕЛС организираше наградна игра на истата тема и минатата година, а пристигнаа 53 цртежи. Децата својата креативност и фантазија ја изразуваа цртајќи камиони, авионски пратки, облаци. Според бројот на гласови, првата награда – душек за спиење ја доби Марко, втората награда – ранец со прибор за цртање ѝ припадна на Мила, а третата – новогодишно пакетче отиде во рацете на Димитар. Нивните цртежи можете да ги погледнете во прилог.

Еко Логистик Сервис и понатаму ќе продолжи редовно се вклучува во хуманитарни и донаторски акции од секаков вид, особено кога станува збор за децата и ранливите категории граѓани.