Малопродажните цени на бензините ЕУРОСУПЕР БС-95 и ЕУРОСУПЕР БС-98 од полноќ се зголемуваат за 1,50 денари по литар, а на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) за 0,50 денари, соопшти Регулаторната комисија за енергетика.

Новата на ЕУРОСУПЕР БС – 95 ќе биде 75,00 денари за литар, на ЕУРОСУПЕР БС – 98 ќе изнесува 77,00 денари, а на ЕУРОДИЗЕЛ БС (Д-Е V) 67,50 денари.

Маслото за горење Екстра лесно 1 (ЕЛ-1) ќе се продава за 66,50 денари. За 0,499 денари поскашува Мазутот М-1 НС и еден килограм ќе чини 41,827 денари.

Општина Битола и Фудбалската федерација на Македонија како носител на проектот за рефлекторско осветлување на стадионот “Петар Милошевски”, ги финализираат активностите за центрирање и фотометрија на рефлекторското осветлување, неопходни за одигрување на ноќни натпревари на стадионот во Битола, согласно пропишаните стандарди.

На овој начин ќе се осигура безбедноста, квалитетот и усогласеноста на инсталираниот систем за осветлување, а рефлекторското осветлување ќе биде пуштено во употреба веднаш, по завршувањето на потребните постапки.

Рефлекторите на стадионот веќе се целосно функционални и обезбедуваат оптимална видливост и одлични услови за одигрување натпревари во вечерен термин, но проектниот тим останува целосно, професионално посветен на успешно завршување на целиот процес.

Фудбалската федерација на Македонија преку програмата „ХетТрик“ на УЕФА инвестираше во изградба на бетонски столбови високи 55 метри и во поставување на повеќе од 270 големи светилки кои го осветлуваат теренот и трибините на “Петар Милошевски”. Исто така, ФФМ инвестираше во поставување на тревна подлога со дренажен систем и систем за наводнување на тревникот на стадионот во Битола.

-На 22.09.2024 во 23.40 часот во ОВР Прилеп било пријавено дека на ул.„Васко Карангелески“ во Прилеп, патничко возило „пежо“ со прилепски регистарски ознаки, управувано од А.Г.(20) од Прилеп, удрило во оградата од касарната „Мирче Ацев“.

Во несреќата со тешки телесни повреди се здобил малолетен сопатник од Прилеп, а со телесни повреди се здобиле возачот и двајца други малолетни сопатници од Прилеп, констатирани во болницата во Прилеп, сите од Прилеп.

Извршен бил увид од увидна екипа од ОВР Прилеп – информираат од МВР.

Во прилепското село Чумово во тек е изградба на манастир кој ќе го носи името на Св. Василиј Острошки. Управата прави надчовечки напори и успева да ја турка оваа убава идеја, а се со цел на прилепчани да им подари уште едно свето место во убава природа.

На 27.09. (петок), ден кога православните христијани го слават празникот Крстовден, управата на овој манастир во изградба ги поканува верниците, да присуствуваат на света служба, што ќе се одржи во 10:30часот.

Посетете го и помогнете ја изградбата на овој нов свет храм.

Како долгогодишни спортисти, а веќе неколку години и рекреативни велосипедисти, полициските службеници при ОВР Прилеп и припадници на Посебната единица на полицијата (ПЕП), Драган Илиоски и Филип Спиркоски, во јули месец на велосипеди се упатија до манастирот Св. Василиј Острошки во Црна Гора и успешно ја завршија својата зацртана тура.

Двајцата колеги досега често организираа интересни тури во околината на Прилеп и Битола, како и подолги релации низ Македонија, а ова им беше прв пат да се упатат на толку далечна дестинација.

За неполни два дена двајцата колеги и другари извозија над 430км и пристигнаа пред портите на чудотворниот манастриски комплекс.

После овој подвиг, двајцата колеги направија уште еден гест кој сигурно ќе мотивира многумина.

На задоволство на вработените и дечињата во детската градинка “Наша иднина” во населбата “Тризла”, тие донираа клима уред, апарат кој со сигурност ќе ги подобри условите во овој објект.

-Голема БЛАГОДАРНОСТ и многу детски насмевки денес упатуваат децата и вработените од градинката “Наша Иднина” – објект Тризла, за хуманиот гест на двајцата полициски службеници Филип Спиркоски и Драган Илиовски за нивната донација клима за нашата градинка! Доброто со добро да Ви се врати – напишаа од градинката на ФБ.

Како што и веќе е информирана јавноста, градоначалникот Митко Јанчев од стапувањето на функцијата градоначалник на општина Кавадарци, а тоа се веќе цели седум години, не само што јавно се откажа од месечниот надомест- плата и користење на службено возило, туку и истиот надомест е пренаменет во хуманитарни цели – информираат од општина Кавадарци.

Соопштението од општината во целост го пренесуваме во продолжение:

-Но најважно од се е, што во прилог можете да погледнете табела на која можете да забележите дека градоначалникот Митко Јанчев преку општествено одговорните компании Кожувчанка, ЈА-МИ и Фондација Никола Јанчев, бележи огромна сума на донации и спонзорства за реализација на проекти за општина Кавадарци реализирани од 2022, 2023 и дел од 2024 година.

Вкупно 52.624.053,00 денари се средства кои градоначалникот Митко Јанчев преку овие компании ги донирал за општина Кавадарци и останати хуманитарни и општествени цели ширум Македонија.

Овие компании на чело со Кожувчанка, не застануваат овде. Всушност нивната визија и идеја отсекогаш била да помагаат онаму каде што е потребно. Ова не е само помош, ова е придонес воопшто за општеството.

Фудбалерите на прилепска Победа вчера се изборија за вреден бод на гостувањето кај Беласица во Струмица. Домаќините поведоа со голот на Димче Јовов во 25-та минута, а црвено-белите возвратија само десет минути подоцна преку Христијан Кукески.

Победашите сега се селат на домашен терен, каде во наредните две недели ќе одиграат дури три натпревари, во првенството против Арсими и Охрид и во фудбалскиот Куп против Гостивар.

Црвено-белите со новиот освоен бод имаат 4 и се наоѓаат на делба на деветтото место на табелата со Вардар Неготино.

Лидери на табелата се Македонија Ѓорче Петров и Кожуф со по 10 бодови.

Вчера пред Камената Бина во Прилеп, се одржа настанот „Малите тркала за голема промена“, а по повод Меѓународниот ден без автомобили. Оваа година во фокусот беа најмладите. Дечињата возеа тротинети низ центарот на градот, симболично придонесувајќи кон поеколошка иднина.

На голема радост на сите дечиња оваа дружба беше збогатена со убава музичка програма.

Настанот имаше за цел да ја подигне свеста за алтернативните начини на транспорт, да го намали загадувањето и да ја поттикне физичката активност кај децата.

На Тринаесетта недела по Педесетница – Света Архиерејска Литургија во храмот „Свети Кирил и Методиј“ (Параклис) во Прилеп.

На 22.09.2024 г., во Тринаесеттата недела по Педесетница (Недела пред Крстовден), кога го празнуваме споменот на Светите Јоаким и Ана, Митрополитот Преспанско-пелагониски г. Петар, во сослужение на протоереите Дејан Секулоски, Веле Спиркоски и ѓаконот Димитар Поп Атанасов, отслужи Света Божествена Литургија во храмот „Свети Кирил и Методиј“ (Параклис) во Прилеп.

На Божествената Литургија, верниот народ се причести со Светите Христови Тајни.

Митрополитот Петар после литургијата одржа проповед пред верниците која вреди да се проследи од збор до збор.

Прилеп и Македонија се закитија со бронзен медал од Европскиот Куп за џудисти ветерани, кој викендов се одржува во Хамбург Германија.

Заслугата за првиот европски медал за нашиот град ја има членот на ЏК “СЕИШИН”, Марјан Димески, кој со бронза се закити во категоријата М7 до 90 кг.

-Целта е остварена. Освоен Европски Медал за Прилеп и Македонија!!! Нашиот член Марјан Димески освои 3 то место (бронзен медал) на Европскиот Куп за Ветерани во Хамбург Германија, категорија М7 до 90 кг. Ова треба да биде поттик за младите генерации џудисти! ПРОДОЛЖУВАМЕ! – напишаа од прилепскиот џудо клуб на Фејсбук.