Време е Прилеп да покаже срце!

На 05.04.2025 во О.О.У. “Рампо Левката”, петмина тренери од Прилеп: Ивона Крстеска, Бети Зин, Александар Наумоски, Ангела Гелинческа и Наумче Трајкоски, заедно ќе тренираат, а собраните средства ќе бидат донирани за семејствата на повредените и загинатите во Кочани.

Влезот за сите заинтересирани е 300 денари, а почетокот на настанот е закажан за 12:00 часот.

Актерот Димитрија Доксевски од Скопје, на свечено Собрание на Друштвото на филмски работници (ДФРМ) е избран за нов директор на Интернационалниот фестивал на филмска камера „Браќа Манаки“.

Според статутот на ДФРМ, мандатот на Доксевски важи за следните две изданија на фестивалот.

– Доксевски ја презентираше Предлог-програмата на фестивалот и се заложи дека ќе работи на зачувување на реномето што го има овој интернационален фестивал на филмска камера, соопшти ДФРМ.

Доксевски е македонски филмски и театарски актер, сценарист и продуцент, роден на 28 јули 1983 година во Скопје. Дипломирал актерска игра на Факултетот за драмски уметности во Скопје во 2006 година во класата на проф. Кирил Ристоски, а во 2014 година магистрирал режија на истиот Факултет во класата на проф. Слободан Унковски. Професионалната кариера ја почнал во Македонскиот народен театар во 2006 година каде останува до 2011 година. Продолжил кратко да работи во Кумановскиот театар во периодот од 2011 до 2013, по што во 2014 година се приклучил на ансамблот на Драмски театар Скопје и до денес е активен член на тој театар. Покрај настапите на матичната сцена, Доксевски има учествувано и во претстави на други театарски сцени низ државава, како и во филмски и телевизиски проекти во и надвор од земјава.

Учествувал во организирање и продуцирање на повеќе театарски претстави, организирање на повеќе од 20 музички настани со артисти од светот, продуцирање и организација на две големи музички (open air) фестивали со повеќе од 20 интернационални изведувачи, како и продуцирање и реализација на кратки филмови, играни видеа за деца и театарски претстави.

Согласно добиените задолженија од градоначалникот на општина Битола, општинскиот инспекторат изврши контроли на објектите за домување во колективни станбени згради, со цел утврдување на моменталната состојба во зградите во поглед на исполнетоста на обврските согласно Законот за домување, како и понатамошно задолжување за преземање мерки од страна на управителите на зградите и станбените сервиси.

Од страна на одговорните субјекти во зградите, беше побарано да достават информации за тоа дали зградата има хидрантска мрежа, дали хидрантите имаат црева за вода, колку од зградите поседуваат ПП апарати и дали има лица кои што знаат со нив да ракуваат.

Од досега утврдената состојба, констатирано е дека, на територијата на општина Битола, од вкупно 640 згради (согласно Закон за домување, од страна на инспекторот секој влез се утврдува како посебна зграда), 590 се под управување на станбените сервиси, а за останатите во тек е утврдувањето на нивната состојба.

Податоците од станбените сервиси, говорат дека од 590 згради:

Згради со хидрантска мрежа се вкупно 347, од кои 22 поседуваат и ПП апарати
Згради без хидрантска мрежа се вкупно 243 и истите не поседуваат ниту ПП апарати
4 згради имаат план за евакуација

Инспекторот во обука, согласно своите надлежности, достави известувања до сите станбени сервиси со кои истите се упатуваат дека се должни да постапат согласно член 6 став 3 и член 19 став 1 точка 2 од законот за домување и во најкус можен рок да ги отстранат сите неправилности во зградите кои се под нивно управување, а тоа вклучува: одржување, поправка и замена на хидранти, хидрантски црева и други хидрантски делови, набавка на нови противпожарни апарати и редовно сервисирање на постоечките, обезбедување на функционалност на противпожарните скали во зградата, одржување, поправка и сервис на лифтови, лифтовски простории и уреди, како и технички преглед на истите, поправка на оштетените и замена на дотраените фасади, фасадни облоги и елементи на фасади.

Известувањето со констатираната состојба, испратено е и до Државниот комунален инспекторат, како надлежен за постапување и утврдување на состојбата на терен.

Контролите спроведени во училиштата и детските градинки, покажуваат дека овие институции функционираат како безбедни средини. Истите се опремени со противпожарни апарати, како и обучени вработени, додека хидрантски мрежи, има секаде каде што може истите да се инсталираат. За исправноста на ПП апаратите или хидрантската мрежа надлежни се лиценцирани фирми кои ги одржуваат, а секаде каде што ќе се појави потреба од дополнување на опремата, истото ќе биде направено по изготвувањето на финалните извештаи во координација со сите надлежни институции, најдоцна до средината на овој месец.

ВИДЕОЛОТАРИЈА СО ДОНАЦИЈА ЗА ЗДРУЖЕНИЕТО АСОЦИЈАЦИЈА НА ПРАВАТА НА ДЕЦА И МЛАДИНЦИ СО ПОПРЕЧЕНОСТ – ЛАСТОВИЦА

Видеолотарија Касинос Австрија ја продолжува својата мисија како општестевно одговорна компанија. Обезбедивме донација за здружението Асоцијација на правата на деца и младинци со попреченост – ЛАСТОВИЦА во Скопје.

Видеолотарија Касинос Австрија обезбеди донација за Здружението Асоцијација на правата на деца и младинци со попреченост ЛАСТОВИЦА Скопје. Оваа донација ќе придонесе за подобрување на условите и поддршката која здружението им ја нуди на децата и младите со попреченост.

Со оваа донација ќе се обезбедат:

· опрема и дидактички материјали неопходни за стимулација и поддршка на детскиот развој,

· организација и реализирање на рехабилитациони третмани,

· едукативни програми-изучување на знаковен јазик и Браевото писмо,

· организирање на инклузивни или интерактивни активности и излети, кои ќе помогнат за социјализацијаа и интеграција на децата во секојдневието

Дел од вработените во Видеолотарија Касинос Австрија и доброволно се вклучија во изучувањето на знаковниот јазик. На овој начин сакаме да ја подигнеме свесноста и важноста за знаковниот јазик, но и да стекнеме способност за невербална комуникација. За нас, ова е голема одговорност. И во иднина ќе продолжиме да бидеме дел од иницијативите кои имаат директно влијание врз заедницата. Веруваме дека секое дете заслужува еднакви можности и се надеваме дека со оваа донација ќе им помогнеме да го достигнат својот потенцијал.

Под слоганот „Играј со најдобрите“, Државна Видеолотарија и во иднина ќе продолжи да го развива својот идентитет на модерна и општествено одговорна компанија преку поддршката на проекти кои позитивно ќе влијаат врз заедницата. Само за потсетување, во 2024 нашата посветеност кон оваа цел од која придобивки имаат сите граѓани, ја потврдивме со низа активности за што издвоивме вкупен буџет од 45.980.779 денари.

Народен театар – Битола започна со пробите за својата најнова претстава, познатата битова драма на Васил Иљоски, „Чорбаџи Теодос“. Истата ја режира Дамјан Димовски. Драмата напишана во 1937 година, којашто се смета за врвно уметничко дело на македонскиот драмски писател, е комедија на интрига инспирирана од анегдотата за присилното кумство. Дејството се случува во Скопје, во турско време. Драмата е составена од три чина, а драмското дејствие е развиено во четири етапи.

Истата ја носи пораката дека животот секогаш наоѓа начин да не соочи со сопствените неправди и да не врати на вистинскиот пат. Во претставата играат: Живко Борисовски, Марија Стефановска, Елена Моше, Никола Стефанов, Александар Димитровски, Сандра Грибовска – Илиевска, Никола Пројчевски, Александар Копања, Петар Спировски и Марија Цветановска. Премиерата се очекува на 26.мај.

Изминатиов период во Битолски театар беше промовирана Монографијата „80 години Народен театар Битола“, на авторот д-р. Иван Додовски, испишана на 310 страници, испечатена од Графопром Битола, беше изведена премиерата „Жиголо“, праизведба на македонскиот текст од авторот Игор Кузмановски во режија на Благој Мицевски. Оваа сезона НТБ ќе има вкупно 10 премиери, од кои 3 праизведби, една детска претстава, две претстави кои се дел од програмата во основните и средните училишта. Посетеноста на Битолскиот театар расте од ден на ден, па изминатите месеци немаше претстава во која имаше празно седиште. Во завршна фаза е и опремувањето на новата просторија во која ќе се чува архивата на НТБ, проектирана според барањата на Државниот архив на Република Македонија. Во овој архив, покрај архивските документи од работењето на НТБ кои истовремено се дигитализираат со новиот софтвер за дигитално архивско работење кој е во функција од 01.01.2025 год, ќе се чуваат повеќе од 250 драмски текстови од претстави поставувани на сцената на НТБ а некои од нив стари и повеќе од 60 години. Со сето ова се создава вистинска ризница на книги и текстови кои се во категоријата на културно наследство, истите во најскоро време ќе бидат дигитализирани и достапни за пошироката јавност во е-библиотеката на НТБ.

Со 87 гласа „за“, без гласови против и без воздржани, Собранието го поддржа Предлог-законот за изменување и дополнување на Законот за прекршоците против јавниот ред и мир. Законот беше предложен од пратениците на ВМРО-ДПМНЕ и усвоен по скратена постапка. Со ова, се забранува пиротехника во затворен простор, а доколку има следуваат драконски казни.

Измените се резултат на трагедијата во кочанската дискотека „Пулс“ на 16 март, во која загинаа 59 млади лица, а околу 200 беа повредени. Пратеникот Тони Јаревски изјави дека измените се неопходни за да се спречат слични несреќи во иднина.

Со новите измени:

Се забранува користење на експлозивни материи и пиротехнички средства во затворени простории.

Се зголемуваат глобите за прекршителите, а за повторен прекршок се предвидува притвор.

Полицијата добива зголемени надлежности за превенција и постапување во случај на нарушување на јавниот ред и мир.

Паралелно, Министерството за внатрешни работи работи на нов Закон за експлозивни материи за цивилна употреба, со кој детално ќе се регулира оваа област.

Фото/РК Прилеп/ФБ

Со две средби на домашен терен, ракометарите на РК Прилеп ќе ја започнат битката за опстанок во плеј-аут разигрувањето на Супер лигата.

Најпрво утре (среда), 02.04. со почеток од 19:30 часот, во Прилеп гостува екипата на РК Фрути Ленд Борец од Велес, а потоа во сабота (05.04) со почеток од 18:30ч. доаѓа и екипата на Пролет.

Ова се две средби на кои бодовите мораат да бидат императив, а секако поддршката од публиката не смее да изостане.

Затоа да ја исполнеме трибината во салата на СОУ “Ристе Ристески-Ричко” до последно место, да ги поддржиме момците и да се радуваме на две победи на стартот од плеј-аутот.

Над 340.000 пензионери во Република Македонија од денес ќе добиваат за 2500 денари повисока пензија. Со линеарното покачување на пензиите во месец Септември и мартовската пензија во месец Април, пензионерите добиваат за 5000 денари повисоки пензии за само 9 месеци мандат од оваа Влада.

Покачувањето на пензиите беше едно од предизборните ветувања на оваа Влада, која веднаш, на првата владина седница, започна со постапката за нејзино реализирање.

Како Влада и ресорно министерство ја потврдуваме грижата за нашата највозрасна категорија на граѓани. Продолжуваме и понатаму со креирање на политики и мерки кои ќе го унапредуваат квалитетот на живот на пензионерите.

Од среда Скопје и Париз се поврзуваат со директна авиолинија, а како што посочува генералниот директор на „ТАВ Македонија“, Неџат Курт, со слетувањето на авион на „ЕasyJet“ од аеродромот „Орли“ во Париз на Меѓународниот аеродром „Скопје“ ќе продолжи ширењето на мрежата на летови.

-Ќе го пречекаме првиот лет на „ЕasyJet“ до Меѓународниот аеродром „Скопје“, од аеродромот „Орли“ во Париз, што е важно поради две работи. Првата е дека аеродромот „Орли“ во Париз е управуван од групацијата АДП (Groupe ADP), групација во која „ТАВ Аеродроми“ се членка, а втората важна работа е дека од 2 април патниците на Скопскиот аеродром ќе имаат бенефит да патуваат до еден од најфреквентните аеродроми во Франција, кој нуди бројни домашни и европски летови, истакна Курт за весникот ВЕЧЕР.

Следните нови линии што ќе бидат воведени од Меѓународниот аеродром „Скопје“, од 3 мај, се Барселона и Лион, двете со авиокомпанијата „Визер“.

-Ова е уште една одлична вест за патниците на Скопскиот аеродром, особено во однос на повторното воспоставување на авиолинијата до Барселона, бидејќи е многу барана дестинација за патување, вели Курт.

Тој нагласува дека има постојана голема побарувачка за патување, што влева доверба дека аеродромите во Скопје и во Охрид ќе продолжат да се развиваат како клучни регионални портали.

-За да го поддржиме ова, во годината на нашата 15-годишнина во Македонија, како „ТАВ Аеродроми“, ја подобруваме аеродромската инфраструктура, ги оптимизираме операциите и обезбедуваме непречено патничко искуство. Посветени сме на тесна соработка со авиокомпаниите, воздухопловните власти, властите во областа на туризмот и со Владата за да ги направиме Скопскиот и Охридскиот аеродром уште поатрактивна дестинација за патници и за деловни можности, констатира Курт.

Во таа насока, тој потсети дека минатата недела, на Охридскиот аеродром беше пречекан првиот лет од Истанбул на „Turkish Airlines“, што ќе биде голема придобивка не само за аеродромот „Свети апостол Павле“ во Охрид туку и за целиот регионот на Охридското Езеро и за целата македонска економија.

-Турскиот национален авиопревозник ќе лета од Истанбул до Охрид и назад четири пати неделно, што ќе биде одлична можност за луѓето кои живеат во регионот и кои сега може да патуваат од Охрид директно до Истанбул и пошироко, како и одлична можност за турските граѓани, кои ќе може да откријат нова атрактивна дестинација за одмор, потенцира генералниот директор на „ТАВ Македонија“, Неџат Курт.

Тој потсетува дека на 2 март, на Меѓународниот аеродром „Скопје“ беше пречекана новата авиокомпанија „Transavia“, која започна да лета од/до Амстердам. „Transavia“, според него, е важна затоа што е дел од групата „KLM Air France“ и ќе лета до аеродромот „Шипхол“, кој е главен авијациски центар во Холандија.

Со летниот ред на летање, кој е на сила од 30 март (вчера), на Меѓународниот аеродром во Скопје, во летната сезона ќе има 47 дестинации управувани од 16 авиокомпании, без чартер-летовите. Од Охридскиот аеродром, во текот на летната сезона и на летниот ред на летање во 2025 година, ќе има седум редовни лета со шест авиокомпании.

Во Казнено-поправниот дом Прилеп се одржа шаховски турнир, каде осудените лица имаа можност да ја покажат својата стратегија, трпение и концентрација.

-Ова не е само натпревар, туку и начин за продуктивно исполнување на времето, развој на когнитивните способности и градење на дисциплина. Шахот е повеќе од игра – тој е вежба за умот, симбол на трпение и упорност. Ваквите активности се дел од нашата заложба за подобрување на процесот на ресоцијализација, создавање на нови можности и поттикнување на позитивни промени, велат од Управата за извршување на санкции.

Додаваат дека секој потег е важен – и на таблата и во животот.