Снежна убавина во кавадаречко Михајлово, каде вчера наврнаа 25цм снежна прекривка. Во крајна фаза се и работите околу скијачкиот центар, каде љубителите на зимските спортови ќе можат активно да ја користат ски стазата и ски лифтот веќе од крајот на декември.
Општина Кавадарци забрзано се развива, а скијачкиот центар во Михајлово ќе значи огромен бенефит како за општината, така и за сите кавадарчани, кои во наредниот период ќе бидат домаќини на голем број посетители од земјата и странство.
Екипата на Мега Баскет од Прилеп синоќа на домашен терен триумфираше и над силната екипа на велешки Борец. Крајниот резултат синоќа во “Добре” беше 78:69, победа која прилепчани ги донесе само на еден бод од врвот на табелата, а беше само втор сезонски пораз за Борец.
Мега Баскет беше одличен во текот на целиот натпревар, доби три од четири четвртини, а најрасположени беа Јаневски со 18 поени, Велески со 15 и Кузманоски со 16 постигнати поени.
На табелата сега прилепчани се трети со 13 бода, колку што имаат и Соколи, додека пред нашата екипа се Борец и Ангели со по 14 освоени бода.
Во наредното коло Мега Баскет гостува кај Охрид.
Единицата за трговија со луѓе и криумчарење мигранти при ОСОСК на МВР, во соработка со надлежен јавен обвинител и истражители од Истражниот центар при Основното јавно обвинителство за гонење на организиран криминал и корупција, вчеравечер (30.11.) реализираа случај во којшто од слобода се лишени четири лица. Имено, поради постоење на основано сомнение дека сториле кривични дела – „Посредување при вршење на проституција“ и „Перење пари и други приноси од казниво дело“ приведени се лицата Д.Ј.Н.М. (34), М.М. (57) и С.Д. (47), додека пак четвртоосомничениот Н.М. (23) за кривичното дело – „Перење пари и други приноси од казниво дело“.
Според досегашните сознанија, во периодот од декември 2023 година наваму првоосомничената, инаку бразилска државјанка, со дозвола за привремен престој во РСМ, заедно со второ и трето осомничените – македонски државјани, како и со две неидентификувани лица од Р.Португалија, од користољубие со умисла организирале врбување, прифаќање, превезување и сместување на женски лица од Бразил. Тие, во посочениот период, заради вршење на проституција, во РСМ, прифатиле пет бразилки од 26 до 38 години кои ги сместувале во претходно изнајмени станови во Скопје, во комплексот „Џевахир Холдинг“. Девојките во двата стана каде што биле сместувани давале сексуални услуги на клиенти кои со нив стапувале во контакт преку меѓународна веб страна наменета за понуда на ескорт девојки во цела Европа. На страницата девојките имале креирани еден или повеќе профили на кои биле постирани телефонски броеви, ценовник на сексуални и дополнителни услуги и фотографии со експлицитна содржина. Првоосомничената ги контролирала профилите на девојките, контактирала со потенцијалните клиенти: го организирала дневниот распоред на клиентите за секоја девојка; го определувала времетраењето на давање на услугите кои се движеле од 150 евра за половина час; 200 евра еден час; 300 евра два часа; 450 евра за три часа и 800 евра за цела ноќ за сексуални услуги; одобрувала дополнителни услуги за клиентите кои чинеле од 70 евра и повеќе; и гарантирала за безбедноста на девојките. За нејзиниот ангажман добивала 30% од заработувачката на девојките што ја делела со второ и третоосомничениот кои пак организирале прифаќање, превоз, сместување, безбедност и грижа за секојдневните потреби на девојките.
Со намера да го прикрие вистинскиот извор, локацијата, понатамошниот тек и вистинските сопственици на паричните средства стекнати со вршење на кривично дело „Посредување при вршење на проституција“, првоосомничената дел од паричните средства преку систем за електронски трансфер на пари за територијата на РСМ ги уплаќала, во износ од 26.151 евра, кон четири лица во Португалија и три лица во Бразил. Второосомничениот пак, во два наврати дел од паричните средства стекнати од претходно сторено кривично дело во износ од 3.000 УСД ги уплатил кон едно лице во Норвешка, а во повеќе наврати извршувал готовински исплати на парични средства во износи од 440 евра по основ на закупнина за становите, а направил и повеќе готовински исплати на парични средства за различни сопствени потреби и потреби на девојките. Третоосомничениот преку субагент за трансфер на пари износ од 1.965 евра испратил на првоосомничената на нејзина сметка во Португалија, а 150 евра испратил кон физичко лице во Колумбија.
Четвртоосомничениот пак, кој во повеќе наврати бил корисник на сексуални услуги од една од девојките, дури и со одобрување на првоосомничената и со паричен надоместок од најмалку 5000 евра по патување, што и било исплаќано на првоосомничената, бил придружуван од девојката при неговите патувања во Рим и Лондон. Откако ја стекнал довербата на девојката, со цел да ги пушти во оптек и да го прикрие потеклото на паричните средства што девојката ги прибавила со извршување на казнивото дело „Оддавање на проституција“ по чл.19 од Законот за прекршоци против јавниот ред и мир, ѝ креирал кориснички профил на веб платформа за тргување со електронски пари (крипто валути) иако знаел дека парите девојката ги прибавила со казниво дело. Преку профилот и со поседување на електронски паричник (wallet), девојката непречено можела да врши трансакции и да го прикрие изворот на паричните средства.
Инаку, врз основа на издадени наредби од Судија на претходна постапка од Основен кривичен суд Скопје, во рамки на активностите за расчистување и документирање на случајот, полициски службеници на подрачјето на Скопје и Куманово извршија пет претреси во дом и други простории кај пријавените лица. Од извршените претреси пронајдени и привремено одземени се 10 мобилни телефонски апарати, седум СИМ картички, лаптоп, огнено оружје (два пиштоли), одредена сума на девизни и денарски парични средства (2480 евра, 20 фунти, 27.100 денари), разна документација (шест потврди за брз трансфер на пари, договор за закуп на стан, четири банкарски картички) и друго.
На црниот петок, Американците купиле производи во вредност од 10,8 милијарди долари преку интернет, користејќи ги нивните мобилни телефони и компјутери, според ажурираните податоци на Adobe Analytics, пренесува Ројтерс.
Црниот петок, го означува официјалниот почеток на празничната сезона на шопинг во продавниците на мало.
Зголеменото купување преку Интернет ги фаворизира гигантите како Амазон и Волмарт. Волмарт, кој работи со 4.700 продавници во САД, инвестираше многу во достава до дома за да ја зајакне е-трговијата.
Трошоците на американскиот онлајн Црн петок се зголемија за 10,2 отсто оваа година, соопшти Adobe, кој води евиденција за уредите кои го користат нејзиниот софтвер за да овозможи повеќе од милијарда посети на сајтови за малопродажба во САД.
Минатата година, американските купувачи потрошија 9,8 милијарди долари онлајн на црниот петок и 9,1 милијарди долари во 2022 година, соопшти Adobe. Најдобрите продавачи на интернет вклучуваа козметика, производи за нега на кожа и коса, како и Bluetooth уреди и машини за еспресо.
Продажбата на играчки преку Интернет е зголемена за дури 622 отсто, во однос на просечната дневна продажба во октомври, додека продажбата на накит е зголемена за 561 отсто, а на различни уреди за 476 отсто во однос на октомври.
Регулаторната комисија за енергетика утре на прес-конференција ќе ги соопшти одлуките поврзани со цената на преносниот и дистрибутивен систем за електрична енергија (МЕПСО, Електродистрибуција, МЕМО).
АД ЕСМ на последниот тендер на ЕВН ХОУМ понуди цена од 62 евра за мегават часови што е за две евра повисока од досегашната цена што АД ЕСМ му ја продаваше на универзалниот снабдувач. Оваа цена има најголемо влијание врз цената на струјата што граѓаните ќе ја плаќаат од 1 јануари.
Премиерот Христијан Мицкоски неколкупати досега во изјави за медиумите рече дека не очекува големи промени во цената на струјата, а доколку дојде до такво нешто, тогаш според неги, зголемувањето би требало да биде минимално од еден до три проценти.
Ракометарите на Прилеп во натпревар од 13. коло од Супер лигата на домашен терен синоќа го совладаа Куманово со 32:31. Ова беше петти сезонски триумф за избраниците на Божидар Мојсов, па сега екипата има 12 бода и се наоѓа на шестото место на табелата.
Со овој триумф прилепчани одново фатија приклучок со горниот дел на табелата и одново имаат надеж за плеј-оф разигрување.
Куманово имаше водство со 5:11 во првиот дел, но прилепчани брзо се консолидираа и направија серија од 5:0.
На полувремето се замина со 14:14. Во вториот дел во најголем дел се играше гол за гол, но во клучните моменти од натпреварот Прилеп редовно имаше водство од 1-2 гола разлика.
Домаќините во победата ги предводеше Никола Цветаноски со осум гола, а на спротивната страна прв стрелец беше Дарио Симоноски, кој воедно беше и најефикасен на натпреварот со десет гола.
Во наредното коло Прилеп гостува кај одличниот сезонава Охрид.
Деца во униформи на УЧК и со пушки и пиштоли го прославуваа Денот на албанското знаме во тетовско Челопек.
Фотографии и снимки од „пригодната“ прослава ги преплавија социјалните мрежи, а министерката за образование, Весна Јаневска на Фејсбук напиша дека e згрозена од настанот.
Денеска во Прилеп започнува бизнис лигата во мал фудбал. Натпреварите се играат во салата од Градскиот базен, а лигата ќе започне со следните натпревари:
13:00ч – ВИК – Кабелнет
14:00ч – МВР – Нови бизниси
15:00ч – Адвокати – Тутунски
16:00ч – Мермер – Комуналец
17:00ч – Паркетар Горан – La Piazza
18:00ч – Витаминка – Спорт Лајф
19:00ч – Гентерм – АРМ
20:00ч – СОНК – Тренери
На Балканското Првенство за ветерани кое се одржа на ден 30.11.2024 во Аминдео, Грција, репрезентативците на Македонија и членови на ЏК “Сеишин”-Прилеп ги освоија следните резултати:
1. Киро Здравески -66 кг./ М9, Златен Медал
2. Марјан Димески -90 кг./М7, Златен Медал.
Со ова ЏК “Сеишин” има двајца нови балкански шампиони и тоа во највозрасната ветеранска конкуренција. Воедно покрај што беше натпреварувач, Киро Здравески ја предводеше и ветеранската репрезентација на Македонија како селектор.
Џудо клубот “Сеишин” им честита на своите членови, кои треба да претставуваат пример за помладите генерации, со што се докажува дека џудо спортот нема возрасни граници, како за тренинг, така и за натпревари.
Градоначалнико на Битола, Тони Коњановски вечерва заедно со директорот на „Нискогардба“, Зоран Талевски, се на терен со зимската служба.
„Во моментот зимската служба ќе пристапи кон чистење на селата кои се наоѓаат на повисоките места во Битола. Екипите ќе бидат цела вечер на терен“ вели Коњановски.
Во текот на денот беше соопштено дека Општина Битола e подготвена со зимската служба за интервенирање во претстојната зимска сезона.
