Од страна на полициски службеници од Одделението за внатрешни работи Кочани на 12.12.2022 околу 13.00 часот бил лишен од слобода Е.Х.(33) од Кочани.
Имено, по обезбедена наредба од Судија на претходна постапка од Основен суд Кочани, извршен е претрес на дом и други простории кои ги користел Е.Х., при што се пронајдени и одземени 105 пакувања марихуана, подготвени за продажба.
Дрогата е одземена, а лицето е приведено, известен е Јавен обвинител и по целосно документирање на случајот ќе биде поднесена кривична пријава по брза постапка согласно член 215 од Кривичниот законик.
Учениците од СОУ „Кузман Јосифоски – Питу“ Прилеп, последните денови од годинава, активно изработуваат новогодишни украси, кои ќе ги продаваат на 19.12.2022г. на плоштадот „Методија Андонов-Ченто“.
Парите кои ќе бидат собрани од продавањето на новогодишни украси ќе бидат наменети за хуманитарни цели – пакетчиња за деца со посебни потреби.
Ги покануваме сите добронамерни граѓани да купат од понудените украси, кои учениците ги изработија со голема љубов и ентузијазам.
Во рамки на Советот на Европа се одржува комисија за правни прашања и човекови права. Една од главните теми е злоупотребата на системите за преслушување како и нелегалното физичко следење. Се зборува за злоупотребата на преслушувањето со цел нелегално следење на политички активисти, опозициони лидери, новинари, активисти на невладини организации и сите оние кои што властите сметаат дека се закана за нивна тоталитарно власт, вели Александар Николоски потпретседател на ВМРО-ДПМНЕ.
Николоски истакна дека на сесијата потенцирал дека ваква злоупотреба има и во Македонија од страна на власта на СДС, додавајќи дека веќе подолг временски период високото раководство на ВМРО-ДПМНЕ е под физичко следење како и следење на комуникациите.
Она што го напоменав во рамки на сесијата е дека ваква злоупотреба има и во Македонија. Веќе подолг временски период раководството на ВМРО-ДПМНЕ е под физичко следење, а исто така и под следење на комуникациите. За ова неколку пати алармиравме во јавноста, но не се преземени соодветни чекори, додаде тој.
Николоски смета дека преслушувањето мора да престане и власта наместо да ги злоупотребува тајните служби за ставање во подредена позиција опозицијата, да се насочи и фокусира кон демократското владеење.
На мое барање состојбата со злоупотребата на следењето во Македонија ќе биде внесена во извештајот кој што треба да биде усвоен во рамки на јануарската сесија на Советот на Европа. Извештајот предвидува јасни мерки и чекори кои што треба да ги преземат земјите членки во Советот на Европа, со цел да престане нелегалното преслушување. Исто така предвидени се и казнени мерки доколку земјите не ги имплементираат овие чекори, рече Николоски.
Преслушувањето мора да престане. Физичкото следење мора да престане, затоа што тоа не може да биде начин на кој се добиваат политички поени или начин на кој се става во подредена позиција опозицијата затоа што власта ги злоупотребува овие системи. Еднаш засекогаш властите во Македонија мора да стави крај на злоупотребата на тајните служби, крај на опиеноста од моќта на тајните служби и да се фокусираат кон демократско владеење, вели Николоски.
Регулаторната комисија за енергетика донесе одлука за намалување на цените на горивата од полноќ.
Малопродажните цени на бензинот ЕУРОСУПЕР БС-95, ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се намалуваат за 1,50 ден/лит, додека малопродажната цена на бензинот ЕУРОСУПЕР БС-98, се намалува за 1,00 ден/лит.
Малопродажната цена на Мазутот М-1 НС се намалува за 0,686 ден/кг и сега ќе изнесува 39,370 ден/кг.
На 13 декември 2022/ вторник/ во Гевгелија ќе гостува театарот „Војдан Чернодрински“ со претставата „Мистерија Буфо“ во режија на Андреј Цветановски.
„ЈОУ Дом на култура „Македонија“- Гевгелија во својата програма за работа во 2022 година, како организатор, ќе запише уште едно гостување на професионален театар во Гевгелија. Станува збор за изведбата на претставата „Мистерија Буфо“ од репертоарот на Театарот „Војдан Чернодрински“ при НУ Центар за култура „Марко Цепенков“ од Прилеп. Изведбата е закажана за 13 декември, 2022 година, во Народниот театар- Гевгелија, со почеток во 20:00 часот – велат од Домот на културата од Гевгелија“.
„Мистерија Буфо“ ги реактуелизира средновековните комични мистерии кои ги изведувале патувачките театарски трупи. Оваа претстава фрла мрачно-комичен поглед кон апсурдноста на секојдневните неправди, прикажува важни настани од религиозниот живот, но доживеани преку очите на обичните луѓе и случајните минувачи. Животот, чудата и страдањето на Исус се случуваат некаде надвор од сцената, додека во фокусот (барем, во поголемиот дел од сцените) е токму обичниот човек. Луѓето секогаш, па дури и во најтешките општествени прилики, наспроти сите прогласи и забрани, успевале да го изразат својот револт и своите потреби да критикуваат, да се бунат против оние кои ги угнетуваат и да се борат за подобрување на својата состојба. Токму во тоа се состои политичката моќ на средновековните религиозни драми: во субверзивната театарска моќ на патувачките изведувачи.
Во претставата играат: Наташа Ачански, Илија Волчески, Димитар Ѓорѓиевски, Михајло Миленкоски, Ангела Наумоска, Марија Спиркоска – Илијески, Александар Тодески и Димитар Црцороски. Режијата е на Андреј Цветаноски, сценографијата на Сергеј Светозарев, костимографијата на Марта Дојчиновска, а за музиката одговорни се Томе Темелкоски, Димитар Ѓорѓиевски и ВИС „Војдан Чернодрински“. Драматургијата и преводот е на Лидија Митоска-Ѓорѓиевска.
И вториот натпреварувачки ден на турнирот во мал фудбал “Св. Никола 2022” е зад нас. Десетте одиграни натпревари синоќа ни донесоа голема неизвесност и 36 постигнати погодоци, а три натпревари се решаваа по изведување пенали.
На програмата денеска се 6 натпревари по следниот редослед:
Познатиот јутубер од Охрид, Wik Kakarotski и оваа година организира хуманитарна акција за собирање средства, кои ќе бидат наменети за набавка на новогодишни пакетчиња.
-Другарчиња, со огромна возбуда и радост ви го најавуваме стартот на овогодинешната хумана акција “Пакетчиња за сите дечиња” – сезона 3.
Во периодов до Нова Година, ќе собираме донации за пакетчиња за најголемата хуманитарно-забавна акција која досега подари над 8500 пакетчиња ширум државата.
Па така, драги пријатели, активисти, хуманисти, ве покануваме и вие да се приклучите со ваша донација, волонтерство или во најмала рака ширење на оваа позитивна вест!
Акцијата како и секоја година прво се фокусира на деца од ранливи категории, деца со попреченост и деца од руралниот заборавен дел од Македонија. А поради големиот интерес и донирани пакетчиња, секоја година оргнизираме и музички настан, ден два пред Нова Година, каде што за оваа година ви спремаме ГОЛЕМО ИЗНЕНАДУВАЊЕ!
Сите средства кои до сега се донирани на нашата организација се за набавка на ПАКЕТЧИЊА. До сега посетивме и подаривме на илјадници дечиња ширум Македонија. Од Народ за Народ!” велат организаторите на оваа хумано-забавна акција, Никола и Вик.
Помогнете му на Вик и Никола со донирање средства на следниот ЛИНК, или контактирајте го Вик на социјалните мрежи.
Иако работите беа познати уште по завршувањето на петтото коло, вчера и официјално боксерскиот клуб “АС” oд Прилеп ја освои шампионска титула во младинската бокс лига.
Со една победа и еден пораз во последното коло, прилепските “AСОВИ” ставија печат на првата шампионска титула за нив, но и за Прилеп.
И тоа не било каква титула, туку убедливо пред конкурентите. Со огромна бодовна разлика, прилепчани зад себе ги оставија “Хасан Бег” и “Фамилија Демирови”.
Оваа титула е шлаг на тортата, откако неодамна еден од најдобрите поединци во клубот, Матеј Чатлески, стигна и до титулата Државен првак во својата категорија.
Во изминатите години БК “АС” во два наврати го освојуваше второто место во ова натпреварување, за сега да донесат голема радост за целата спортска јавност во Прилеп.
Ова е валоризација на трудот и макотрпната работа на тренерот на клубот, Дарко Чатлески, кој е горд на своите ученици и верува дека во иднина ќе израснат во врвни спортисти и шампиони.
-Оваа титула ќе биде поттик за младите боксери да тренираат повеќе за следните натпреварувања на кои ќе учествуваат. Многу млади боксери од оваа Младинска лига во следната сезона влегуваат во сениорска конкуренција, а ако продолжат со вакви настапи во следната сезона Боксерскиот клуб АС ќе биде закана и во ова натпреварување, истакна Чатлески кој не го криеше задоволството за освоената титула.
Учесници од БК АС ПРИЛЕП на младинската лига во бокс на Македонија: Матеј Чатлески, Марко Петрески, Максим Стојановски, Стефан Иваноски, Демир Демиров, Теодор Тошески, Николче Соколоски, Илче Малиноски и Давид Наумоски
Во сениорската лига на Македонија настапија: Дамјан Талимче и Мануел Абдуловски.
Медали од Државното првенство во бокс на Македонија за 2022 год. освоија:
Златен медал: Матеј Чатлески
Сребрени медали: Максим Стојаноски, Марко Петрески, Теодор Тошески и Демир Демиров
Бронзени медали: Стефан Иваноски, Николче Соколески и Мануел Абдуловски
