Гевгелија е целосно подготвена за почетокот на Европското првенство во кошарка за играчи до 16 години – FIBA U16 EuroBasket 2026, Дивизија Б, кое ќе се одржи од 6 до 15 август.
Натпреварите од групите А и Б ќе се играат во спортската сала „26 Април“, која ги пречекува младите европски кошаркарски надежи и нивните репрезентации.
Во Групата А ќе настапат репрезентациите на Словачка, Ирска, Португалија, Црна Гора и Холандија, додека во Групата Б ќе се натпреваруваат Македонија, Украина, Швајцарија, Хрватска, Исланд и Кипар.
Посебно внимание ќе привлечат настапите на македонската репрезентација, која своите натпревари ќе ги игра пред домашната публика во салата „26 Април“.
Организаторите истакнуваат дека домаќинството на ваков значаен спортски настан е уште една потврда дека Гевгелија располага со услови за организација на врвни меѓународни натпреварувања и заслужено го носи епитетот град на кошарката.
Во пресрет на почетокот на шампионатот, упатен е повик до љубителите на спортот да ја исполнат салата до последното место и со силна поддршка да им дадат ветер во грб на младите македонски кошаркари, истовремено упатувајќи спортско добредојде до сите учесници на Европското првенство.