„Образованието е стожер на општеството и главен фокус на делување на Социјалдемократскиот Сојуз на Македонија“, велат од Комисијата за образование и наука на владејачката партија.

„Новите образовни реформи на Владата на СДСМ, т.н. Концепција за основното образование се базира на обезбедување на квалитетно образование преку иновативни и креативни пристапи на настава и учење. Овие карактеристики се широко распространети во Европа и светот. Општествата во ова современо време се менуваат , а во согласност со тоа и образованието треба да биде во чекор со промените. Образовниот модел во основното образование е основа за оспособување на нашите деца да одговорат на барањата на брзото темпо на развој на општеството. Наставните планови се креирани да придонесат кон мотивација и стимул за критичко размислување, донесување заклучоци врз основа на факти, нешто на кое треба да се работи сериозно во општество во кое брзото обработување на привлечни информации знае да ја доведе во заблуда јавноста, често проследенo со лажни вести, испревртени факти и обвинувања без основа и издржани аргументи. Треба да ги научиме нашите деца да бидат критични, но и своите искази да ги базираат на докази. Токму тоа е едно од целите на основното образование. Насоките кои беа објавени од страна на Бирото за развој на образованието се само дополнително појаснување на образовниот процес, помошна алатка за просветните работници и директорите кои треба да го пренесат своето знаење и вештини на децата. Секое манипулирање со надлежностите на институциите кои имаат за цел да го помогнат процесот, да дадат насоки и сугестии за поуспешна реализација на воспитно образовниот процес е деструктивно и се спротивставува на развојот на образованието во целост.

Горди сме што овозможуваме образование достапно за сите под еднакви услови. Основното образование во нашата држава обезбедува инклузивност и вклучување на различности. Во новите реформи во основното образование ставаме акцент на интеркултурното образование, со кое се овозможува одржлив начин на заедничко живеење во нашето мултикултурно и мултиетничко општество“, велат од Комисијата преку писмено соопштение испратено до медиумите.

Потсетуваат дека воведоа национално тестирање кое нема да служи како алатка за деградирање на наставниците и нивно казнување, туку алатка на која ќе се базираат идните реформи во образованието. Токму поради лошите резултати на меѓународните тестирања, ја воведовме Концепцијата во основното образование како нова реформа која има конкретни решенија за унапредување на квалитетот на образованието, и истата се базира токму на резултатите од меѓународните тестирања и трендовите на европско образование.

„Апелираме да не се заборави дека во фокусот на владата предводена од СДСМ се на благодетот на наставниот кадар. На наставниците им се овозможи:

кариерно напредување во звања и обезбедивме квалитетна менторска поддршка на наставниците приправници. Наставниците не се подложни на познатиот процес на екстерно тестирање од кое трпеа последици на нивното работно место.
платите драстично се зголемија, за разлика од периодот кога ДПМНЕ беше на власт ги зголеми за само 850 денари. Ги зголемивме платите на наставниците за првпат после неколку години за 55%, односно 52.542 денари бруто плата без додатоци.
по децении за првпат го вративме регрес за годишен одмор на наставниците.
овозможивме развивање на професионалните компетенции на наставниците преку обуки на разни теми кои се од големо значење за унапредување на квалитетот на образовниот процес.
им се намали административната работа на наставниците оставајќи простор за нивна автономија во организација и реализација на наставниот час и времето поминато во училиште.

Да потсетиме дека успешно се справивме со наставата од далечина во пандемските услови. Искуството ни покажа дека и покрај предизвиците од користење на дигиталната технологија во образовниот процес, може да се користи како алатка за совладување на некои содржини. Набавивме бројни интерактивни табли, а доделивме и 10.000 таблети на ученици ширум државата. Во 264 училишта опремивме лаборатории за природните науки. Воведовме дигитални услуги за учениците, наставниците и родителите (упис на ученици во прво одделение, упис на ученици во прва година, електронско аплицирање за ученички и студентски стипендии, студентски оброк, ученички и студентски домови, нострификација и еквиваленција на документи и др.)

Во најголем дел од основните училишта во државата овозможивме екипирање на стручната служба од најмалку тројца стручни соработници: педагог, психолог и специјален едукатор и рехабилитатор ( дефектолог) . За инклузираните ученици со посебни потреби во редовната настава обезбедивме образовни асистенти и помош и поддршка на училиштата од Ресурсните центри и центрите за поддршка.

За талентираните ученици кои освојуваат државна и меѓународна награда обезбедивме финансиска поддршка и за ученикот и наставникот ментор на ученикот.

Создадовме база ЕДУИНО со примери од добра пракса и истата е веб платформа достапна за сите, која наставниците ја користат при реализацијата на наставните содржини, а истата може и понатаму да се надоградува со интерактивни содржини.

Изминативе години низ државата реконструирани се и предадени во употреба бројни основни и средни училишта, аопременувањето и реконструирањето продолжува“, велат од Комисијата за образование и наука на СДСМ.

„СДСМ како политичка партија која делува во интерес на развој и благосостојба на општеството и понатаму ќе се грижи за спроведување на политиките во образованието, ќе работи во иднина на предизвиците и проблемите со кои сите засегнати страни се соочуваат. СДСМ е партија која соработува и ќе соработува со сите засегнати страни (ученици, студенти, наставници, професори, родители, институции) и заедно со нив ќе се стреми кон надминување на тековните проблеми во образовниот процес. СДСМ е отворен и секогаш ќе биде отворен за соработка за разлика од ДПМНЕ, партија која секојдневно критикува, пласира невистини, и континуирано негира развој на образовниот процес“, се додава во писменото соопштение испратено до медиумите.

Додека исчезнува градската бања, се памети дека уникатно било одржувањето на хигиената на граѓаните до 1981 година, кога поради дотраеност се урна дрвената конструкција во главната просторија со шадрван во женскиот дел, а неколку години подоцна падна и машкиот дел.

Инаку, имало ред во капењето со врела вода загреана на дрва. Првин било парење, после триење и на крајот капење со сапун – самовар.

Се практикувало еднаш неделно пред половина век и повеќе, додека градот немал водовод и канализација.

Уште траат пријатните спомени на семејното капење.

Многу народ се слевал кон бањата особено во сабота. Се чекало ред со торбите со облека, ќесе за триење, крпи, канче за потурање и други реквизити за капење.

Градските повозрасни жени ги носеле снаите и младите невести во четврток.

Невестата ја триела свекрвата, старосватицата, нунката. Паѓале резил мајтапи на сметка на невестите, кои се црвенеле.

Бањата беше споменик на културата од 1958 и 1989 година. Се токмеше да се претвори во галерија.

Сопственици биле Илија и Крсте Арсоски и Методија Ристески – Бањарот. Ја купиле со “суво злато” од Турците во 1921 година.

Со Законот за денационализација, државата ја врати на наследниците на старите сопственици кои ја продадоа.

Mалопродажните цени на нафтените деривати согласно Методологијата за формирање на цените, се зголемуваат во просек за 0,99%.

Малопродажната цена на бензинот ЕУРОСУПЕР БС-95 се зголемува за 0,50 ден/лит, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 15.09.2023 година и со тоа малопродажната цена на ЕУРОСУПЕР БС-95 изнесува 90,50 ден/лит.

Малопродажната цена на бензинот ЕУРОСУПЕР БС-98, не се менува, односно останува на исто ниво како што била утврдена со одлуката за утврдување на највисоки малопродажни цени на нафтените деривати и горива за транспорт од 15.09.2023 година и со тоа малопродажната цена на ЕУРОСУПЕР БС-98 изнесува 92,50 ден/лит.

Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ1), се зголемуваат за 1,00 ден/лит, во однос на малопродажните цени утврдени со одлуката за утврдување на највисоки малопродажни цени на нафтените деривати и горива за транспорт од 15.09.2023 година и со тоа малопродажната цена ЕУРОДИЗЕЛ (Д-Е V) изнесува 87,00 ден/лит, додека малопродажната цена на Екстра лесното масло за домаќинство на (ЕЛ-1) изнесува 86,00 ден/лит.

На 19.09.2023 / вторник/ од 19.00ч. во Ликовниот салон од ЦК „Марко Цепенков“ ќе биде отворена изложбата „Уметничкиот свет на Владимир Георгиевски“ – дел од ретроспектива“. Изложбата се отвора во соработка со Музејот на град Скопје во рамките на проектот -MuseumLink 2023-.

Текст за изложбата од Емил Алексиев

Владимир Георгиевски (1942–2017) е еден од најзначајните македонски уметници.Зад себе остави скапоцена ризница од уметничко богатство. Во неговите дела болска златна нишкашто ги поврзува и води кон скриеното духовно благо закопано длабоко под површината на неговите слики.

Наспроти современите насоки на движење на ликовната уметност, спроти времето и актуелноста, Георгиевски ја започнува својата творечка авантура движејќи се во спротивна насока од своите современици – одејќи назад, до затрупаните извори на уметноста, таму каде што сè почнува, враќајќи се кон загубените вредности на сликарството и на сликата, кон класичната формула и мајсторската форма.

Овој „блуден син“ на современата македонска уметност тргна на неизвесно патување, осамен меѓу своите современици, барајќи ја вистината.Тоа беше пат на кој тој тргна и во потрага по сопствениот, личен творечки знак и сопственото себесознавање, низ привидот што го опкружува. Неговите творечки занеси го водеа на долги и неизвесни патувања по пустите предели на стварноста низ долините каде што врие, се прелева и се пресоздава животот до највисоките врвови каде што воздухот е студен и проѕирен како кристал, а видикот широк и јасно може да се види светот.

Творештвото на Владимир Георгиевски се опира на сите обиди да се класифицира и систематизира. Пропаѓа секој обид да се подреди во хронолошки ред поради идејата на сликарот за безвременоста на делата. Најголем дел од делата се недатирани, еден ист мотив е работен повеќе пати во различни временски периоди и во разновидни сликарски техники, сликите се преработувани и доработувани во обид да се пронајде најдобриот од сите можни модели… Неговото творештво е како животот – буи, блика, расте и се разгранува во својот природен развиток, не водејќи грижа за правилата и ограничувањата што ги наметнува современото општество, ниту пак води сметка за модните трендови и вкусот на неговите современици.

Во сликарството тој почнува од неговите онтолошки основи. Тој е во потрага по загубената духовност во свет кој одамна им се препуштил на површните задоволства и робувањето на телото и на телесноста. Наспроти модните стилови, трендови, наспроти лажниот мистицизам, комерцијализацијата, идолатрија и фетишизам на уметничкото дело; наспроти предрасудите, наметнатите безначајни теми, тривијалноста на уметноста, позерството, манипулациите со публика, наспроти уметноста разбрана како фриволна игра или забава за народот, уметноста како дневна политика, уметноста со тенденција, уметноста во функција на идеологијата, како оправдување на постојниот општествен дискурс, како пропаганда, како одраз на една замислена стварност, како проекција на таа стварност, како панаѓурска измама или како илузионистичка претстава – тој се враќа кон уметноста која е во функција на откривањето на вистината.
Владимир Георгиевски, уште на самиот почеток, го става човекот и неговата драма на постоење во центарот на својот сликарски свет. Тој создава дело за човекот од човекот.

Тој е сликар на современата стварност дури и кога е тешко препознатлива поради историската травестија. Симболизмот во неговото творештво, алегоријата, нарацијата и иронијата со која ги слика нештата не се противставени на основниот сликарски порив да ја направи видлива вистината за светот денес. Тие се само средства.
Протагонистите на неговите слики парадираат во историски костуми како во театар. Понекогаш тоа се современи ликови и сцени од секојдневниот живот претставени во историски костими и вкалапени во познати калапи од религиското сликарство или од книжевноста.

Во најдобрата традиција на светското сликарство, со мајсторство на кое нема што да му се забележи, Владимир Георгиевски се обиде да му го врати на сликарството загубеното достоинство и одново да го доближи до философијата разбрана изворно како љубов кон мудроста. А каква е таа мудрост што не е втемелена во вистината? Во својот сликарски манифест (2011) тој ќе напише: „Овој свет со својата вистинитост не е Космосот на бојата и астрономијата на цртежот! Не, тие Космички пространства на моите сликарски сновиденија се над светските нужности, над вистинитоста што може да ја видиме и да ја опипаме! Мојот вистински пат е пат на духовно слободно чувствување на светот и Човекот во него!“

Интернационалниот детски музички фестивал “Ѕвездички“ е натпревар за најдобра детска песна. Сите учесници настапуваат со авторска песна на јазикот на земјата од каде што доаѓаат. На фестивалот учествуваат деца од целиот свет на возраст до 14 години. Се одржува секоја година во првата половина на октомври во градот Прилеп.

На 7 и 8 октомври, во салата на центарот за култура „Марко Цепенков“ во Прилеп со почеток од 19:00 часот, по 23. пат ќе се одржи интернационалниот детски музички фестивал „Ѕвездички“. Ова е единствена фестивалска манифестација за деца во земјата, членка на ВАФ (Светска асоцијација на фестивали).

Годинава ќе има 25 учесници од многу земји како што се: Унгарија, Казахстан, Маврициус, Хрватска, Србија, Босна и Херцеговина, Црна Гора, Бугарија, Словенија, Македонија.

Фестивалот е вистински бренд во Македонија, кој низ годините донесе многу хитови. „Ѕвездички“ е креатор на детската музичка сцена во нашата земја.

Најдобрите учесници од Македонија официјално ќе ја претставуваат земјата на најголемите фестивали за деца во светот.

Регионалниот ЦУК Битола извести дека при пожарот во атарот с.Беранци, во Општина Могила, каде што гореле нискостеблеста вегетација и стрништа, пругата била оштетена на повеќе места.

Информацијата е добиена од ТППЕ-Битола и веднаш дежурните од ЦУК ги информирале СВР-Битола и надлежните од „Железници на Република Македонија транспорт АД – Скопје“.

По брзата проверка на железничката пруга, од вчера попладне од 17:42 часот железничкиот сообраќај е во прекин на делницата помеѓу Битола и Прилеп, а патничкиот воз 643 е на станицата во Прилеп и не сообраќа.

ЦУК примил известување од „ЖРС Македонија транспорт АД – Скопје“ дека другиот железнички (патнички и товарен) сообраќај се одвива нормално.

Во четврток се празнува големиот христијански празник, Рождество на Пресвета Богородица или Мала Богородица — еден од 12 големи празници во православието кој го слави раѓањето на Богородица. Богородица е родена во Назарет од стари и бездетни родители, благочестиви Јоаким и Ана како одговор на нивните молитви. Се слави на 8 септември според јулијанскиот календар или на 21 септември според грегоријанскиот календар.

Црквата го востановила овој празник поради посебното значење што го има пресвета Богородица, па во врска со тоа и нејзиното раѓање во Божјата економија на спасението. Онаа што подоцна ќе го роди Бога се роди од благочестивите родители Јоаким и Ана. Јоаким потекнуваше од еврејскиот царски род, а Ана од свештеничкиот. Долго време немаа деца, цели 50 години, но имаа цврста вера во Бога и срдечно се молеа да им биде дадено дете.

Се верува дека есента и зимата ќе бидат благи, без многу студени денови, ако на овој празник биде ведро без облаци и ако се види сонцето поголем ден од денот.

На Мала Богородица, исто како и на Голема, според народните верувања, постојат одредени забрани. Жените така денес не би требало да чистат низ куќата, да перат алишта и да извршуваат слични работи.

Постојат верувања дека на Мала Богородица ништо не трееба да се работат работи кои се работат со раце. На денешен ден наводно не е добро ниту да се започнуваат никакви нови работи, туку тоа треба да се одложи за некој од наредните денови.

18-годишната Матеа Христовска од Битола се закити со титула на престижното модно натпреварување Miss Tourism Universe 2023 кое оваа година се одржа на 15. септември во Бејрут, Либан.

Станува збор за натпревар во убавина на кое учествуваат девојки од целиот свет, а ова е втора титула за Матеа.

Помеѓу 32 натпреварувачки, убавата битолчанка ја доби титулата Runner Up, која и’ донесе место помеѓу 15-те најдобри светски модели.

Претходно годинава, на крајот од мај, Матеа учествуваше и на изборот за World Next Top Model за 2023г, кое исто така се одржа во главниот град на Либан, каде ја освои титулата за најдобро тело – MISS BEST BODY.

Најдобриот македонски автомобилист Игор Стефановски – Иџе денеска оствари историски успех станувајќи трикратен европски шампион.

Тој денеска на трките во хрватскиот град Бузет ја освои третата титула Европски шампион за ридски трки, по освоените титули во 2014-та и 2015-та година.

Со тоа Иџе ја завери третата шампионска титула, која и претходно беше очекувана бидејќи имаше бодовна предност од 204 бодови во однос на 176 бодови на Французинот Николас Вервер.

Веста за успехот тој ја сподели и на социјалните мрежи.

-Трикратен европски шампион, за мојата Македонија, за мојот народ 2014/2015/2023. Бидете горди, испишавме нова историја!- порача Иџе.

Тој имаше одлична сезона во европскиот шампионат на ридски патеки и денеска во Бузет дојде до седмата победа од вкупно десет трки колку што се возеа, на три беше втор.

За оваа трка во Хрватска, тимот на Игор Стефановски организираше и автобус за фановите. Околу 50 Македонци минаа преку 1.000 километри за да му дадат поддршка на автомобилистот на патот кон нов трофеј.