Вечерва се очекува да бидат објавени промените што произлегуваат од реконструкцијата на Владата, по седницата на Извршниот комитет на ВМРО-ДПМНЕ.

Премиерот Христијан Мицкоски вчера изјави дека со коалициските партнери „Вреди“ и ЗНАМ постои принципиелен договор околу распределбата на ресорите, но дека персоналните решенија ќе бидат соопштени дури по седницата на партиското раководство.

Тој посочи дека досега не се разговарало за конкретни имиња, туку за начелна поделба на ресорите, додавајќи дека јавноста ќе биде детално информирана вечер околу 20 часот.

Мицкоски најави дека во текот на овој месец се очекува да се реализира реконструкцијата на Владата, заедно со ребалансот на буџетот и, доколку има потреба, донесување на реформски закони поврзани со реформската агенда. Според него, Собранието во август ќе биде на летен одмор, по што активностите ќе продолжат во септември.

Според изјави на претставници на коалициските партнери, по реконструкцијата „Вреди“ би требало да раководи со неколку министерства, меѓу кои за животна средина, економија, правда, евроинтеграции, култура и односи меѓу заедниците, при што дел од ресорите би добиле нови кадри.

Од ЗНАМ најавуваат дека ќе раководат со две министерства, а конечната распределба на ресорите се очекува да биде соопштена денеска.

Засега е познато дека Арбен Фетаи, досегашен вицепремиер за добро владеење, нема да биде дел од новиот владин состав. Во јавноста се споменуваат и можни промени во дел од министерските позиции, но официјална потврда сè уште нема.

Премиерот претходно изјави дека реконструкцијата не се прави само поради досегашните резултати, туку и поради промена на приоритетите, нагласувајќи дека обемот на кадровските измени сè уште не е дефиниран.

Според најавите, предлог-составот на новата Влада ќе биде доставен до Собранието веднаш по објавата, по што ќе следува собраниска процедура за негов избор.

Собранието денеска го усвои Законот за игрите на среќа и забавните игри, со 60 гласа „за“ и 20 „против“.

Со новите законски измени се предвидува дислокација на објектите за игри на среќа на најмалку 500 метри од основни и средни училишта, со цел намалување на нивната достапност за младите.

Законот воведува и значајни ограничувања во рекламирањето на оваа индустрија. Се укинуваат светлечките и агресивни реклами, а во иднина ќе биде дозволено само истакнување на називот на компанијата во строго ограничени димензии, без слогани и пораки кои сугерираат лесна заработка или успех.

Дополнително, се воведува задолжително дигитално следење на работењето на индустријата, вклучително и GPS поврзување на системите и пообемна контрола од страна на Управата за јавни приходи. Целта е поголема транспарентност и спречување на нелегално работење.

Министерот за спорт Борко Ристовски, денеска, на прес-конференција во Владата, даде отчет за сработеното во изминатите две години од формирањето на Министерството за спорт, презентирајќи ги реализираните активности, капиталните инвестиции во спортската инфраструктура и проектите што ќе се реализираат во наредниот период.

Ристовски истакна дека Министерството за спорт за само две години реализира и започна 60 спортски проекти, со вкупна вредност од повеќе од 21 милион евра, за разлика од претходната власт која за четири години реализираше само 33 спортски проекти и нагласи дека Владата повторно го поставува спортот меѓу националните приоритети.

„Денеска не сме тука да зборуваме за ветувања, денеска сме тука да дадеме отчет. Отчет за сработеното. Отчет што може да се види, да се измери и да се спореди. За само две години реализираме и започнуваме 60 спортски проекти со вкупна вредност од повеќе од 21 милион евра. Тоа не е политичка пропаганда, тоа е факт. Тоа е и најдобриот доказ за разликата помеѓу оние што зборуваа за спортот и оние што денес го градат спортот“ – истакна министерот Ристовски.

Тој посочи дека во изминатиот период се реконструирани и започнати повеќе капитални инфраструктурни проекти, меѓу кои спортската сала „Расадник“, атлетските патеки во Велес и во Гевгелуија, спортската сала во Радовиш, реконструкцијата на салата на УКИМ, како и изградбата на нови спортски сали во Општина Аеродром, во Крушево и во Воената академија во Скопје. Воедно, започната е изградбата на новите трибини на Градскиот стадион во Тетово, изградени и реконструирани се бројни игралишта, мултифункционални терени и спортски објекти, а во различни фази на реализација се и девет базени низ државата.

Министерот нагласи дека покрај инвестициите во инфраструктурата, Министерството воведе потранспарентен систем за распределба на средствата, со јасни критериуми и со цел државната поддршка за спортот да биде насочена кон спортистите, клубовите и федерациите.

„Ова не се само бројки. Ова се објекти во кои ќе тренираат нашите деца. Ова се инвестиции што ќе останат за генерациите што доаѓаат. Некој четири години ја убедуваше јавноста дека нема пари за спортот. Ние покажавме дека проблемот никогаш не бил во парите, проблемот бил во приоритетите. Кога спортот не е приоритет, се градат само изговори. Кога спортот ќе стане државен приоритет, тогаш се градат сали, базени, атлетски патеки и игралишта. Инвестираме таму каде што претходно никој не инвестираше“ – рече Ристовски.

Во своето обраќање министерот се осврна и на активностите за зајакнување на законитоста и транспарентноста во спортот, потенцирајќи дека Министерството активно соработува со надлежните институции во расчистувањето на сите сомнежи за незаконско работење и корупција.

Ристовски најави дека Министерството продолжува со нов циклус капитални инвестиции, изградба на нови спортски објекти и уште посилна поддршка за спортските федерации, клубовите и младите спортисти.

„Продолжуваме со нови капитални инвестиции, нови спортски сали, нови терени, нови проекти и уште посилна поддршка за федерациите, клубовите и младите спортисти. Нашата цел е да изградиме систем што ќе создава шампиони и инфраструктура што ќе служи со децении“ – истакна Ристовски.

Министерот за спорт во во своето обраќање истакна и дека ниеден од овие резултати немаше да биде возможен без јасната визија и довербата од претседателот на Владата и претседател на ВМРО-ДПМНЕ, проф.д-р Христијан Мицкоски.

„Неговата определба спортот повторно да стане национален приоритет беше силен мотив и обврска за сите нас. Истовремено, сакам да им се заблагодарам и на моите колеги во Владата, на сите институции, на локалните самоуправи, националните федерации, клубовите и на секој кој е дел од оваа заедничка приказна. Големите резултати никогаш не се дело само на еден човек. Тие се резултат на тимска работа, взаемна доверба и заедничка визија“ – посочи министерот Борко Ристовски и нагласи дека целта е „да изградиме систем што ќе создава шампиони, да изградиме инфраструктура што ќе служи со децении и Министерство што ќе биде запаметено по тоа што работело, а не по тоа што ветувало“.

Во тек е комплетна обнова на овој омилен простор за рекреација и уживање, псбно за најмладите. Извршено е целосно кастрење на дрвјата, темелно е исчистен целиот простор, а обновени се и клупите и корпите за отпадоци, со што се создава поуредна и попријатна атмосфера за сите посетители – информираат од Јавното комунално претпријатие “Комуналец” Прилеп.

Од Комуналец велат дека се работи на целосно обновување на кафезите, се прават подобри услови, а Рајската градина ќе биде збогатена со нови украсни и птици, кои ќе внесат уште повеќе живот, убавина и привлечност во овој уникатен парк.

-Овој парк предизвикуваше најголема радост кај најмладите, но по неколкуте кражби, и игинување на украсните птици, како и намерното уништување, овој простор подолго време беше запоставен. ЈКП,, Комуналец’’- Прилеп, во Соработка со Локалната самоуправа ги уредуваат јавните простори и создаваат подобри услови за одмор, рекреација и дружење за сите граѓани. Веќе најавивме дека ќе се посвети внимание на сите паркови. Односно, парк по парк, за чист, убав и зелен Прилеп, велат од ова јавно претпријатие.

Кога ќе стигнете во Крушево, можеби прво ќе ги забележите старите куќи, тесните калдрми, природата која остава без здив и погледот кој се памети. Но, вистинската приказна на овој град не е само во местата, туку во луѓето кои му ја даваат душата.

Токму тоа е идејата зад кампањата на А1 Македонија за овогодишното издание на фестивалот When in Krusevo, да го претстави Крушево преку неговите жители, нивните животни приказни, спомени и љубовта кон градот.

Зад секоја улица, секоја куќа и секој познат крушевски пејзаж стои некоја приказна. Приказни на луѓе кои ја чуваат традицијата, го пренесуваат духот на градот и секојдневно покажуваат зошто Крушево е едно од најпосебните места во Македонија.

Од луѓето кои со години ги градат своите професии, преку оние кои ја чуваат културата и историјата, па сè до новите генерации кои носат свежа енергија, секоја приказна покажува дека Крушево не е само место кое се посетува. Крушево е чувство кое се доживува.

Затоа, следниот пат кога ќе бидете во Крушево, поздравете ги. Запознајте ги луѓето кои стојат зад приказната на градот. Зашто токму тие се причината поради која Крушево останува во срцето на секој посетител.

А дел од таа енергија повторно ќе ја донесе When in Krusevo 2026, outdoor фестивалот кој од 3 до 5 јули ќе го претвори Крушево во центар на музика, природа, авантура и дружење.

Годинава фестивалот носи уште едно незаборавно издание со бројни outdoor активности – планинарење, велосипедски тури, трчање, параглајдинг, кајак, јавање, адреналински активности, музички настапи и можност посетителите уште подобро да ја запознаат природата, културата и историјата на Крушево.

When in Krusevo одамна е повеќе од фестивал – тоа е средба со градот, со природата и со луѓето кои ја создаваат неговата атмосфера. Три дена исполнети со енергија, нови пријателства и спомени кои остануваат.

Крушево не е само дестинација.
Крушево се луѓето.
Крушево се приказните.
Крушево е традицијата што продолжува.

Шампионките од Боречкиот клуб 7-ми Мај од Прилеп, Ангела Трајкоска и Тамара Цветкоска деновиве во Триберг, Германија ја темпираат формата за престојното Европско првенство до 20 години.

Девојките од Прилеп во Германија подготовките ги започнаа на 22.06, а дома се враќаат на 30.06., а со нив е тренерот Филип Јованоски.

Европското првенство во борење до 20 години, ќе се одржи во Скопје од 06. јули и ќе трае до 12. јули.

Да им посакаме што подобро да се подготват и да не израдуваат со нови медали!

ФК Пелистер го почнува својот нов проект за сезоната 2026/27 со изборот на новиот претседател.

По оставката на раководството на клубот и стручниот штаб, прва задача на акционерот – Општина Битола е изборот на новиот претседател. По заминувањето на Александар Стефановски довербата да го води клубот му е доверена на Димитар Митревски.

-Единствениот и за нас најдобриот кандидат за претседателското место, на наше задоволство, прифати да го предводи проектот и заеднички да се обидеме да го вратиме клубот во самите височини на македонскиот фудбал. Митревски има 38 години, зад себе остварил успешни проекти од сферата на маркетингот и спортот, а во јавноста најпознат е по раководењето на РК Еурофарм Работник и РК Еурофарм Пелистер. Тој веднаш ќе започне со работа и наскоро ќе го објави и планот на работа и ќе го избере новиот шеф на стручниот штаб. Клубот ќе го официјализира и стартот на подготовките и планот на припреми ова лето – стои во соопштението од ФК Пелистер.

Од утре попладне до сабота времето ќе биде променливо облачно и нестабилно наместа со повремен дожд и грмежи особено во попладневните часови и во текот на ноќта, прогнозира Управата за хидрометеоролошки работи (УХМР).

Локално процесите ќе бидат поинтензивни во форма на невреме со пообилен пороен дожд, електрични празнења, силен ветер (над 60 км/ч) и појава на град.

Од среда температурите ќе бидат во опаѓање, особено за време на викендот, кога ќе дува умерен до засилен северен ветер.

Регулаторната комисија за енергетика (РКЕ) донесе нова одлука со која од полноќ, односно од 00:01 часот на 30 јуни 2026 година, се менуваат цените на нафтените деривати.

Според одлуката, малопродажните цени на нафтените деривати во просек се намалуваат за 0,27 проценти во однос на претходната одлука од 22 јуни.

Сепак, ќе има различни промени кај поединечните горива. Бензините ЕУРОСУПЕР БС-95 и ЕУРОСУПЕР БС-98 поскапуваат за 0,50 денари по литар, додека ЕУРОДИЗЕЛ БС (Д-Е V) поевтинува за 0,50 денари по литар. Цената на екстра лесното масло за домаќинство останува непроменета, а мазутот поевтинува за 0,796 денари по килограм.

Од полноќ ќе важат следните максимални малопродажни цени:

ЕУРОСУПЕР БС-95 – 84,50 денари за литар
ЕУРОСУПЕР БС-98 – 86,50 денари за литар
ЕУРОДИЗЕЛ БС (Д-Е V) – 80,00 денари за литар
Екстра лесно масло за домаќинство (ЕЛ-1) – 79,50 денари за литар
Мазут М-1 НС – 41,495 денари за килограм
Од РКЕ информираат дека промените се резултат на движењата на референтните цени на светскиот пазар, каде што во изминатиот период е регистрирано намалување на цените на дизелот, екстра лесното масло и мазутот, додека курсот на денарот во однос на американскиот долар е повисок за 1,5132 проценти во однос на претходната пресметка.

Регулаторната комисија потсетува дека станува збор за максимално дозволени малопродажни цени, а трговците имаат можност горивата да ги продаваат и по пониски цени од утврдените.

Имаме јасна визија за комплетна промена на железничкиот сообраќај. Ако наследивме претпријатија на раб на пропаст и пред банкрот, сега имаме карго сообраќај кој бележи сериозен раст, имаме раст на број на патници, имаме крупни инвестиции во изградба на нови пруги, водиме политика на развој на Железницата како срцевина на економијата, се обрати денеска заменик претседателот на Владата и министер за транспорт Александар Николоски, на потпишувањето на Договорот за грант со директорката на Светска банка за Македонија, Керол Межеван.

Договорот кој е во износ од еден милион евра треба да даде поддршка во реформата во преструктурирање на МЖ Транспорт со цел создавање на функционално претпријатие.

Николоски истакна дека со изборот на оваа Влада, приоритет е МЖ Транспорт да се надградува и да се модернизира.

​“Најпрво направивме законски измени со коишто практично го зачувавме претпријатието, имајќи предвид дека последните одлуки на претходната Влада значеа затворање на Железница Транспорт. Потоа влеговме во сериозна реформа внатре во Железница Транспорт и веќе првите резултати се гледаат. Оваа година имаме позитивни бројки во првите четири месеци. Имаме раст и во бројот на превезени патници и она што е особено значајно и што мене многу ме радува, сериозен раст на карго сообраќајот”-истакна Николоски.

​Тој додаде дека со ЕУ се работи на трансформацијата на двете желенички претпријатија како дел од Планот за раст на ЕУ.

“Tокму овој проект којшто го започнуваме денеска со потпишување на овој грант од страна на Светска банка, за што сакам да се заблагодарам, е почеток на реализација на овој проект кој што ќе значи една темелна и суштинска реформа. Паралелно ќе одиме и со набавка на возови, да се обнови флотата, нешто што е особено значајно. Паралелно со една друга финансиска институција веќе потпишавме договор за набавка на електрични локомотиви, коишто многу значат во делот на развој на карго сообраќајот. Треба да се купат најмалку пет електрични локомотиви”– истакна заменик претседателот Николоски.

Во однос на крупните инвестици во железницата, тој додаде дека во финална фаза е изградбата на првата линија од Градски воз, а очекува оваа година да се распише и тенедерот за изградба на втората линија од Илинден до Новата железничка станица како и третата линија од Ѓорче Петров до Новата железничка станица и истите да бидат завршени до крајот на 2027 година или првата половина на 2028 година.

​“Ако на тоа се додадат исклучително сериозните инвестиции кои што ги правиме заедно со ЈП Железница Инфраструктура, тогаш е јасна визијата на Владата дека сакаме комплетна промена на железничкиот сообраќај во државата. Првата делница од пругата, односно железничкото поврзување со Бугарија беше готова минатиот јануари и заеднички ја ставивме во функција. На втората активно се работи и се надевам дека по потпишувањето на анексот за продолжување на рокот, тоа ќе биде финалниот рок со којшто ќе се заврши втората фаза. Исто така, во постапка на избор сме на изведувач за третата фаза – имено, тендерот за надзор е веќе објавен и претквалификацијата тече, а очекуваме за многу скоро време да биде објавен и тендерот за изградба”– рече Николоски.

Тој додаде дека во рамки на Планот за раст се работи и на западното крило на Коридорот 8.

“Првично тоа би било Скопје -Јегуновце – Тетово – Гостивар, втора фаза Гостивар – Кичево и трета фаза од Кичево до Охрид, Струга и поврзување со Албанија. Ако на тоа се додаде и брзата пруга на Коридорот 10, за која што веќе ги финализираме документите, тогаш е јасно дека имаме една визија за целосна трансформација на Железницатa”– се обрати заменик претседателот Николоски.

​Тој се заблагодари на Светска банка за грант средствата и за континуираната подршка за Македонија.