дома блог страница 594

Ученици од Битола наградени со 6.000 долари – изработија уред за чист воздух (ФОТО)

Шест ученици од Техничкото училиште “Ѓорѓи Наумов” од Битола, под менторство на професорката Александра Колевска-Јовановски, освоија прво место на првиот Climathon одржан во Факултетот за информатички и комуникациски технологии во Битола.

Тие развија уред со напредни сензори за мерење на квалитетот на воздухот, поврзан со апликација која овозможува следење на загаденоста во реално време.

Настанот беше организиран со поддршка на Фондацијата Отворено општество – Западен Балкан, имплементиран од CEED Hub Skopje, во партнерство со Факултет за информатички и комуникациски технологии – Битола при Универзитетот Св. Климент Охридски – Битола и Општина Битола – официјална страница.

Во победничкиот тим учестуваа учениците од СОТУ “Ѓорѓи Наумов”: Димитар Србиновски (IV-4), Ристијан Ристески (IV-9), Никола Алексовски (IV-9), Емилија Југовска (III-4), Христијан Атанасовски (II-6), Андреј Манасиев (II-6) под менторство на професорката Александра Колевска.

Тимот напорно работеше со цел да ја реализира идејата за иновативното еко решение со што ќе се придонесе за заштита на животната средина и енергетската ефикасност, како и за примената на обновливлите извори на енергија.

За карневалот “Прочка 2025”, три дена продолжено работното време на кафулињата и рестораните во Прилеп

По повод одржувањето на меѓународниот карневал „Прочка 2024“, работното време на угостителските објекти во градот се продолжува за 2 часа, согласно чл.23 од Законот за угостителска дејност: „Советот на општината, односно Советот на градот Скопје, за одредени туристички, културни и друг вид манифестации, содржани во годишните програми, можат да го продолжат работното време најмногу за два часа, за угостителските објекти од ставот 1 на овој член, но во времетраење најмногу до три дена.

Продолженото работно време се однесува само за деновите на одржување на карневалот, односно од петок 28 февруари до недела 02 март 2025 година.

Одлуката за продолжувањето на работното време на угостителските објекти за меѓународниот карневал „Прочка 2025“ е донесена од Советот на општина Прилеп, на седницата одржана на 29.02.2016 година и таа се’ уште е со важност.

Објавена програмата на каневалот “Прочка 2025”: Втора година по ред ќе биде претставен обичајот “АМКАЊЕ”

Општина Прилеп и Здружението на граѓани „ПРИЛЕПСКИ МЕЧКАРИ“, како организатори на годинешното 23 издание на Kарневалот „ПРОЧКА 2024“, се подготовуваат за одржувањето на оваа значајна манифестација, која во изминатите години постигна голем успех во поглед на промоција на градот Прилеп во пошироки рамки.

Активностите ќе започнат на 28.02. со отворање на изложба, богатство од креации на маски/сурати, изработени од учениците во основните и средните училишта, под менторство на нивните наставници по ликовно образование и оделенска настава, кои се партнери во целокупната организација.

Изложбата ќе биде поставена во Центарот за култура Марко Цепенков, каде ќе бидат прогласени и најдобрите избрани маски, а стручна жири комисија ќе го спроведе изборот.

Во сабота на 01.03. на платото кај Градскиот Саат, втора година по ред предвидена е презентација на народниот обичај АМКАЊЕ од страна на Здружението Преродба. Истата ќе биде изведена во автентичен амбиент, привлечен за минувачите, кои во тој период ги има многу, како прилепчани, така и гости, а настанот ќе биде збогатен со сет на DJ Robbie Ray.

Централен настан е дефилето на маски во недела, на кое ќе се претстават групни и поединечни маски од Прилеп и од други градови од Македонија, а стартот е од пред НУЦК Марко Цепенков. Трасата ќе се движи се до плоштадот Методија Андонов Ченто, каде што ќе биде главното претставување со изведена кореографија и музика, а дефилето ќе биде збогатено со жонглери, акробати, кловнови, куклари и многу други изненадувања!

Традиционалниот ручек и одбележувањето на „Чист Понеделник“ заедно со здружението „Прилепски Мечкари“ ќе биде на 3 март, во понеделник, во 12:00 часот на манастирот Св. Ѓорѓија во селото Присад.

За најдобрите и најкреативни фотографии стручното жири ќе додели соодветни парични награди.

РИСТЕСКИ: Собранието ги донесе измените на Законот, ова е голема работа за заштита на стандардот и интересот на граѓаните!

Собранието на Република Македонија ги донесе измените на Законот за заштита на потрошувачите, со кои се предвидува. Сите големи, мали и средни трговци ќе имаат обврска на своите веб страни да ја објават цената на секој производ во сите маркет. Од оваа обврска се ослободени трговец-поединец и микро трговците, а треба да се имлементира во рок од 45 дена од стапувањето на законот во сила – информираше на социланите мрежи заменик министерот за економија и туд, Марјан Ристески.

-Ќе се создаде можност за креирање на апликација каде што цените ќе бидат достапни за граѓаните и на тој начин ќе одлучуваат каде ќе ги трошат нивните средства. Со носењето на овој закон постигнување три значајни цели: транспарентност во работењето на трговците, фер конкуренција и лесен пристап на граѓаните до цените. Овој закон досега успешно е имплементиран во Израел, Италија, Франција и Хрватска и во овие држави резултира со намалување на цените. Владата на Република Македонија го штити стандардот на граѓаните, нивниот интерес е наш приоритет! – напиша Ристески.

„Еве ти ја вратата, излези“: Кога Трајковски му ја покажа вратата на Солана

Maкедонија денеска одбележува 21 година од авионската несреќа во која животот го загуби поранешниот претседател, Борис Трајковски, членовите на неговиот кабинет и екипажот на авионот.

Многумина ја паметат онаа негова легендарна изјава од времето кога беше заменик министер за надворешни работи, од 1999 година за косовските бегалци во Македонија.

Но, ретко кој го знае и моментот кога претседателот Трајковски му ја покажал вратата на високиот претставник Хавиер Солана. За време на неговото гостување во „Еден на Еден“ пред неколку години, тогаш министер за надворешни работи Никола Димитров, првпат откри што се случувало на една од преговарачките средби во 2001 година, кога тој бил дел од тимот на претседателот Трајковски.

Имаше 2001 со претседателот Трајковски едни тешки преговори со Хавиер Солана, кој во тоа време беше висок претставник во ЕУ. Во една ситуација претседателот Трајковски му рече – Еве ти ја вратата, излези! Солана излезе навреден, а минута после тоа претседателот рече излези по него и врати го. Не знам дали тоа беше спремно од претседателот Трајковски, не знам дека тоа го мислел претходно, но во моментот одлучил дека тоа може да биде корисно да покаже дека ова не оди!, рече Димитров.

Последен ден да поднесете барање за субвенции за инвертер клими во општина Прилеп!

Врз основа на Информација од Комисијата за спроведување на постапката за субвенционирање/надоместување на дел од трошоците на граѓаните на подрачјето на Општина Прилеп за набавка на грејно тело со инвертер, Градоначалникот на Општина Прилеп го издава следното:

ИЗВЕСТУВАЊЕ ЗА ПРЕКИНУВАЊЕ НА ЈАВНИОТ ПОВИК ЗА СУБВЕНЦИОНИРАЊЕ/НАДОМЕСТУВАЊЕ НА ДЕЛ ОД ТРОШОЦИТЕ ЗА НАБАВКА НА ГРЕЈНИ ТЕЛА СО ИНВЕРТЕР ЗА 2025 ГОДИНА

Се известуваат граѓаните на Општина Прилеп дека ЈАВНИОТ ПОВИК за субвенционирање/надоместување на дел од трошоците за набавка на грејни тела со инвертер за 2025 година, објавен на 17.02.2025 година, се прекинува заклучно со 26.02.2025 година поради исполнување на предвидениот број на барања и реализација на планираните финансиски средства. Комисијата ќе ги разгледа барањата доставени до 15:30 часот заклучно со ден 26.02.2025 година.

По завршувањето на постапката, Комисијата за спроведување на постапката за субвенционирање ќе изготви финална листа на граѓани кои го остваруваат правото на субвенционирање/надоместување на дел од трошоците. Листата ќе биде објавена на Веб-страницата на Општина Прилеп (www.prilep.gov.mk) и на огласната табла во Општина Прилеп.

Општина Прилеп им се заблагодарува на сите граѓани за искажаната заинтересираност и учество во јавниот повик.

Дваесет и една година од загинувањето на претседателот Борис Трајковски

Во Скопје, Струмица и во Ротимље близу Мостар денеска ќе бидат одбележани 21 година од авионската несреќа во која животот го загубија поранешниот претседател Борис Трајковски, членови на неговиот кабинет и екипажот на авионот.

Членови на семејствата, државни и други делегации ќе положат цвеќе на гробот на Трајковски Градските гробишта Бутел во Скопје и на спомен-обележјата во Ротимље и во Струмица.

Претседателот Борис Трајковски загина на денешен ден во 2004 година во авионска несреќа во близина на Мостар. Во несреќата, покрај Трајковски животот го загубија Димка Илкова-Бошковиќ, Ристо Блажевски и Анита Кришан Лозановска од кабинетот на претседателот, Миле Крстевски од Министерството за надворешни работи, Борис Велинов и Аце Божиновски, членови на обезбедувањето и пилотите Марко Марковски и Бранко Ивановски.

Владиниот „Кингер“ со кој претседателот Трајковски патуваше на Меѓународна конференција за инвестирање во Босна и Херцеговина, на 26 февруари 2004 година се урна во атарот на Матиќ Брдо кај селото Хусковиќи во близина на Мостар. Авионот требаше да слета на мостарскиот аеродром во осум часот по локално време. Остатоците беа пронајдени 24 часа по паѓањето на авионот.

Првичната истрага што ја водеа надлежните македонски и босански органи покажа дека причина за уривањето се пропусти на екипажот направени во процедурата за приоѓање на аеродромот Мостар во услови на сложена метеоролошка состојба, густа магла и облачност.

На барање на македонските власти, по собирањето на дополнителните докази од страна на македонското МВР, беше отворена нова истрага во јануари 2013 година, што ја водеше меѓународен тим предводен од Омер Кулиќ. И во нивниот извештај како клучни причини за несреќата беа наведени грешки на екипажот и системски пропусти.

Борис Трајковски е роден во Струмица на 25 јуни 1956 година. Беше втор претседател на Република Македонија во периодот од 15 декември 1999 година до 26 февруари 2004 година.

Трајковски дипломира на Правниот факултет во Скопје во 1980 година, специјализира деловно право и право на работни односи.

Од 21 декември 1998 година ја извршуваше функцијата заменик-министер за надворешни работи во Владата предводена од Љубчо Георгиевски. Трајковски исто така беше претседател на Комисијата за надворешно – политички односи на ВМРО-ДПМНЕ, главен политички советник за надворешна политика на претседателот на партијата, член на Претседателството на невладината организација Паневропско движење за Република Македонија и на меѓународната конференција „Решавање на конфликти“ со седиште во Атланта, САД. Бил претседател на младината на Обединетата методистичка црква во поранешна Југославија повеќе од 12 години.

За претседател на Република Македонија беше избран во 1999 година. Должноста шеф на државата ја извршуваше до 26 февруари 2004 година кога загина во авионска несреќа во близина на Мостар.

Прилепско-турска средба за унапредување на здравството

Во Општина Прилеп се одржа значајна средба со господинот Кадир Оз, претставник на Медипол Мега, најголемата универзитетска болница во Истанбул, Турција. На средбата присуствуваа претставници од Општина Прилеп, претседателката на Советот на општина Прилеп, директорот на прилепската болница, како и медицински работници.

-Со оваа првична средба поставивме темели за идна соработка во областа на здравството и едукацијата, при што инициравме потпишување меморандум за соработка кој што треба да овозможи:

– Едукација и усовршување – медицинскиот персонал од Општата болница во Прилеп (доктори и медицински сестри) ќе има можност за стручни обуки и размена на знаења со врвни експерти од Медипол Мега.

– Меѓународна пракса за ученици – ученици од Медицинското училиште и лабораториски техничари од хемиското училиште ќе можат да посетуваат едномесечна летна пракса во болницата во Истанбул.

– Донација на медицинска опрема – за подобрување на условите и услугите во прилепската болница.

– Опремување на медицински кабинети во средните училишта – со цел учениците да имаат современи услови за практична настава.

Ова партнерство ќе придонесе за подигнување на нивото на здравствената грижа, како и за создавање подобри услови за образование и професионален развој на младите медицински кадри во нашиот град. Прилеп чекори напред кон модерно и квалитетно здравство, градејќи мостови на соработка со водечки здравствени институции – стои во соопштението од општина Прилеп.

81-година од смртта на главниот организатор на НОБ: Училиштето кое го носи неговото име во Прилеп со богата програма го одбележа патрониот празник

Делегации предводени од Претседателката на Совет, Ирена Стерјовска Локвенец, денеска по повод 81 годишнината од смртта на еден од главните организатори на антифашистичкото движење и на НОБ во Македонија, Кузман Јосифоски Питу, положија свежо цвеќе пред неговата биста во средното општинско училиште кое го носи името на великанот во Прилеп, како и пред неговото спомен обележје и Могилата на непобедените.

Учениците во СОЕПТУ „Кузман Јосифоски – Питу“ својот патрон празник го одбележа со богата програма, низа предавања, спортски натпревари, а ја посетија и спомен куќата на народниот херој. Оддавајќи ја својата почит кон историското наследство и делото на патронот, учениците и нивните професори ја истакнаа важноста на образованието во создавањето на иднината.

Николоски: “Со законски измени ќе ги доизградиме патишата, зградите во Универзитетскиот кампус, зградата на Народна банка и се’ она што е заглавено од претходната власт”

Со законски измени ќе овозможиме да се доизградат патиштата, зградите во Универзитетскиот кампус, зградата на Народна банка и сите други заглавени проекти од претходната власт. Мораме да ги заштитиме државните интереси – напиша на Фејсбук министерот за транспорт и врски и вицепремиер, Александар Николоски.

Неговиот статус на социјалните мрежи во целост го пренесуваме во продолжение:

Во насока на заштита на државниот капитал и државните интереси, Министерството за транспорт направи измени на Законот за градење со кои измени се овозможуваат остварување на правата на градење кон јавните органи, односно се овозможува реализација на веќе започнатите градби на државните органи.

Измените на Законот за градење денеска беа изгласани на владина седница и согласно законските прописи ќе бидат испратени на разгледување и усвојување во Собранието.

Овие измени се насочени кон унапредување на процесите за издавање на одобренијата за градење и поедноставување на постапките за инфраструктурни проекти доминантно спрема јавните органи.

Целта на предложените измени е да се решат сите затекнати проблеми во текот на градбите, како и да се олесни користењето на објектите, со што ќе се овозможи побрза и поефикасна реализација на инфраструктурните проекти. На тој начин се овозможува реализација на веќе започнатите градби од страна на државните органи преку нивна доизградба и делот на ставање на употреба.

Со измените исто така се олеснуваат постапките за изградба на патна и железничка инфраструктура финансирани од буџетски средства.

Со предложените измени се прави и усогласување на Законот за урбанистичко планирање со Законот за градење во делот на новите градби за складирање на енергија до 1 и над 1 мегават, со тоа што со новите измени се прави законско регулирање на таквите градби преку издавање на одобрение за градење за кои што досега за нив немаше реулирана процедура.

” Имајќи предвид дека голем дел од наследените проекти од претходните влади се заглавени, започнати и не довршени, ова е неопходен чекор во заштита на државниот капитал. И заради тоа измените на законот се суштински за да можеме да ги доизградиме патиштата, зградите на Универзитерскиот кампус, зградата на Народна банка, желеницата и сите други проекти кои се платени со народни пари а стојат недовршени” истакна вицепремиерот Николоски.

Министерството за транспорт овие измени ги направи во тесна соработка со општините и јавните претпријатија, се со цел да се поедностави постоечката регулатива во областа на градежништвото и инфраструктурата.

Со сите овие измени сметаме дека ќе се создадат поповолни услови за реализација на капитални проекти.