На покана на директорот, на заменикот директор, на луѓето овде во Агенцијата за катастар на недвижности разговаравме за сите овие би рекол реформи коишто се прават, сите овие поевтинувања коишто се прават и коишто се важни за граѓаните и од тоа што го слушнав од директорот можам да заклучам две работи. Првата работа е дека услугите за четири, пет, шест па и повеќе пати поевтинуваат за граѓаните, Вие слушнавте од директорот дека до милион евра годишно ќе остануваат во паричниците на граѓаните, тоа е многу важно да се напомене дека услугите за четири, пет, шест па и повеќе пати за граѓаните ќе поевтинат, рече премиерот Христијан Мицкоски.

Втората работа којашто исто така е многу важна, дека катастарот полека но сигурно се ослободува од криминалот. Забележавте дека илјадници предмети биле не решени, директорот е скромен и не сака да каже можеби детали коишто допрва органите на редот и истражните ќе треба да се позанимаваат, но верувајте дека ќе има многу за истрага. Ценам дека сето она што во минатото било предмет на поинаков однос со граѓаните и поради тоа се создавала таа гужва, односно не биле решавани предметите, многу скоро ќе излезе на виделина и ќе бидат истите тие решени, иако сега илјадници предмети во овие помалку од два месеца веќе добиваат разрешница, нормално согласно важечките прописи, закони и Устав. Така што овие две работи се многу важни, дека четири, пет, шест па и повеќе се намалуваат услугите за граѓаните и она коешто е важно е дека катастарот полека но сигурно се ослободува од криминалот, како што впрочем и се ослободуваат сите институции со доаѓањето на новата Влада, главен приоритет е борбата против криминалот и корупцијата којашто е на ниво на безбедносна закана, рече тој.

Мицкоски посочи дека се додека имаме високо ниво или перцепција за криминал и корупција ние не можеме да се развиваме како држава.

-Да го охрабрам директорот, раководството, сите овде коишто се дел од новиот раководен тим на катастарот да продолжат со ваков тип на реформи и да работат во интерес на граѓаните, бидејќи граѓаните се тие коишто се најважни, се останато е од споредна природа, истакна премиерот.

Театарот „Војдан Чернодрински“ со претставата „Аудиција“ од Галин, во режија на Владимир Милчин, на 28 август 2024/среда/ од 20.00 ч. ќе се претстави во официјалната програма на 11-то издание на амбиенталниот театарски фестивал Нови Тврдина Театар, што се одржува од 26 август до 2 септември, во Чортановци, во близина на Нови Сад, Србија.

Нашиот театар со „Аудиција“ настапува во конкуренција на други пет претстави од регионот, а изведбата е во вила Станковиќ, која од неодамна е промовирана како нова амбиентална театарска сцена.

Според уметничкиот директор на фестивалот Вида Огњановиќ, темата на годинашниот фестивал, кој е под мотото„ Смета ли иднината на нас?“, се проблемите кои се случуваат денес, a претставите говорат за човечките проблеми.

Претставата „Аудиција“ во која играат Марија Спиркоска Илијеска, Даниела Иваноска, Ангела Наумоска, Сара Спиркоска, Јасмина Мицовска Станкоска, Наташа Ачански, Илија Волчески, Александар Тодески, Игор Трпчески, Зоран Иваноски и Михајло Миленкоски, зборува за копнежот по малку подобар живот, кој е можен само подалеку од провинцијата и татковината.

СВР Битола поднесе кривична пријава против Б.Д. (39) од Прилеп поради постоење основи на сомнение за сторено кривично дело „напад на службено лице при вршење работи на безбедноста“.

На 19.06.2024 во Прилеп, пријавениот физички нападнал полициски службеник кој извршувал службени дејствија – информираат од СВР Битола.

Повторно министерството за одбрана ја постави спомен-плочата со имињата на 10-те загинати бранители во месноста Карпалак на автопатот Скопје-Тетово.

Истата беше искршена на 9 август, еден ден после одбележувањето на 23-годишнината од трагедијата за време на воениот конфликт од 2001, кога конвој од бранителите беше нападнат од терористите од т. н. ОНА. Во нападот во кој биле користени ракетни фрлачи и тешки митралези, загинаа бранители, сите од Прилеп, кои со камиони биле упатени кон касарната во Тетово.

Откако е поставена оваа спомен-плоча на ова место седум пати е кршена, но досега ниту еден сторител не е откриен од надлежните служби.

При секое одбележување, од Здруженијата на бранителите се бара на ова место да се изгради достојно спомен-обележје кое ќе потсетува на големата жртва која ја дадоа бранителите на Македонија, а не вака, венци и цвеќе да се положуваат на банкината на автопатот, но досега ништо не е направено, се даваа само ветувања од досегашните Влади.

Фудбалскиот клуб Победа ги пушти во продажба сезонските билети за новата натпреварувачка сезона во Втората фудбалска лига.

-Обезбедете го вашиот сезонски билет на ФК Победа Прилеп и поддржете ја нашата иднина! Со секој билет добивате блуза од Победа Прилеп! Вашето купување и помага на ФК Победа да обезбеди финансиска поддршка за претстојната сезона, осигурувајќи дека можеме да продолжиме да се натпреваруваме на највисоко ниво – информираат од клубот.

Продажни места:
– Графика дизајн
– ⁠Релушко
– ⁠Кафе бар Мирор

Ограничена достапност – дејствувајте веднаш за да направите разлика!

НИКОЈ КАКО ПОБЕДА ПРИЛЕП!

Советниците на денешната 47 седница на Советот на Општина Прилеп на дневен ред ја донесоа одлуката за престанок на мандат на член во Советот на општина Прилеп и одлуката за верификација на мандат на нов член во Советот на Општина Прилеп.

Ваквата промена е направена поради преземањето на функцијата директор на ЈЗУ Општа Болница “Борка Талески“ – Прилеп од страна на Кире Јоноски, од редовите на владејачката советничка група на ВМРО – ДПМНЕ, и неговата поднесена оставка за советничкиот мандат, а на негово место е верификуван мандатот на Александар Алексоски, кој беше следен според советничката листа на од локалните избори во 2021 година.

Алексоски е дипломиран економист кој работи како супервизор на производство во компанијата “Гентерм”. Очекувањата на граѓаните секако се дека Алексоски ќе биде мост помеѓу Советот и компанијата, и дека со неговиот ангажман како советник, би можело да се поттикне уште поголема општествена одговорност и донации од оваа странска компанија во Прилеп.

Покрај промената во советничките редови, советниците одлучуваа и по други точки од дневниот ред. Тие денеска дадоа согласност за измена и дополнување на решението за формирање комисија за општествени дејности и права на децата, за измени и дополнувањата на Буџет на Општина Прилеп за 2024 година, за измени и дополнувања на програмата за субвенционирање на јавните комунални претпријатија за 2024 година, како и согласност за измени и дополнувања на планот на развојните програми на Општина Прилеп за 2023-2025 година.

Со мнозинство на гласови беше усвоена и предлог-одлуката за утврдување на приоритет на проектот “Изградба на фабрика за рециклирање на отпад„.

На денешната седница пред советниците, пред стартот на новата учебна година, се најдоа и беа разгледани годишните извештаи за работа за 2023/2024 година и годишните програми за работа за учебната 2024/2025 година на сите основни училишта во Општина Прилеп и беа прифатени од мнозинството советници.

Шумската и Граничната полиција на терен – прекинат еден ланец на дрвната мафија во Струга – информираше на својот Фејсбук профил, министерот за земјоделство, шумарство и водостопанство, Цветан Трипуновски.

-Во заедничка акција на Граничната полиција со Шумска полиција – Струга е контролиран камион со огревно дрво од државни шуми без документи за превоз. За сторителите поднесени се соодветни пријави до соодветните институции, камионот со кој е превезувано дрвото е одземено од сопственикот, дрвата се одземени и складирани во подружницата на Национални шуми во Струга. Најавувуваме зголемени акции во соработка со МВР, Шумската полиција и Национални шуми. Апелираме дека здружено ќе се вложиме за стопирање на криминалот и трговијата со нелегално дрво во борбата против нелегалната сеча на дрвата – напиша Трипуновски.

Прилепчани и крушевчани пак кои мака мачат со дрвокрадството, се надеваат дека со новата Влада ќе се стави крај на оваа појава и уништувањето на шумскиот фонд.

Од оваа зима кавадарчани ќе уживаат и во зимските спортови! Општина Кавадарци денес доби голема донација која означува почеток на развој на зимските спортови во кои ќе уживаат сите генерации.

Денеска со одлука на Совет на општина Кавадарци, нашиот убав град прими донација од 231.660,00 евра, од кои 115.000,00 евра се средства донација од Комерцијална Банка и 115.000,00 евра се средства донација од Кожувчанка ДОО.

Оваа донација е во материјални добра и услуги:
-ски лифт во должина од 370м со капацитет од 600 лица на 1 час
-скијачки појас со капацитет од 800 лица
-четири сезонски вртелешки
-мобилна пумпа
-црево со висок притисок 5броја x 20 метри мах 20 бар.
-филтри 4 броја
-хидрант 4 броја
-снежни топови 2 броја
-заштитна мрежа 20 броја

Градоначалникот Митко Јанчев вети во предизборната програма, а од денес овој проект станува реалност. Во претстојниот период започнува изградбата на овој скијачки центар, а веќе во месец декември истиот ќе биде во функција – стои во соопштението од општината.

Со спктакуларетн концерт синоќа, веќе традиционално во клуб “Калинка”, најпознатиот прилепски бенд THE HOUNDS, прослави 16-години постоење.

Во срцето на градот, во Старата прилепска чаршија, повторно вриеше како во кошница. Буквално немаше игла каде да се фрли. Прилепчани уживаа со своите миленици и пееја во еден глас.

Својата роденденска забава од THE HOUNDS ја збогатија со прилепското диџеј дуо Cyrillic и DJ NEOX, a свој допринос даде и еден од најдобрите прилепски актери, Илија Волчески.

За Златко, Крсте, Јане и Илија не беше потребна посебна најава. Со самата појава како и секогаш предизвикаа мал земјотрес и ја разиграа целата чаршија.

Дечки среќен роденден! Да си дочекате и “златна свадба” заедно, а ние да играме и уживаме заедно со вас!

Во продолжение ви пренесуваме само мал дел од атмосферата:

Денес, 21.08.2024 година, менаџерскиот тим на Бехтел ЕНКА кои ги градат автопатите на Коридор 8 и Коридор 10д имаше задоволство да се сретне со претставници на жителите на село Ореовец, прилепско. Целта на средбата, чиј домаќин беше градоначалникот на Прилеп, г-дин Борче Јовчески, беше да се разговара, во искрена и отворена атмосфера, за позајмиштето на камен (БП6), евентуални барања и решенија соодветни и прифатливи за сите страни. Претставниците на Bechtel ENKA ја повторија посветеноста на компанијата да работи со и за заедницата која е високо ценета и вградена во културата на вредности и визии за грижа на Bechtel ENKA – информираат од компаниите изведувачи на автопатските делници во Македонија.

Соопштението во целост го пренесуваме во продолжение:

Сите учесници ја признаа стратешката важност на изградбата на автопатите на Коридорот 8 и Коридорот 10д за Владата на Република Македонија и нејзиното население. Бехтел ЕНКА уште еднаш потврди дека како општествено одговорна компанија предходно ја извршила сета потребна длабинска анализа. Раководството на Бехтел ЕНКА, исто така, потсети дека пред почетокот на работата на терен биле исполнети сите законски и регулаторни барања. Bechtel ENKA останува посветена на практикување на безбедноста на сите a воедно и заштита на животната средина и заедницата долж трасата.

Претставниците на Бехтел ЕНКА со големо внимание ги ислушаа поентите што ги изнесоа претставниците на жителите на с. Ореовец во однос на заштитата на животната средина, водоснабдувањето, културното наследство или кој било ендемски вид кој хабитира во таа област. Целосно усогласени со тие ставови, Бехтел ЕНКА им потврди на присутните дека се преземени сите неопходни мерки за заштита на животната средина. Во текот на дискусијата се разговараше за потенцијални решенија кои Bechtel ENKA високо ги вреднува и понатаму ќе му ги пренесе и на инвеститорот на проектот, Јавното претпријатие за државни патишта (ЈПДП).

Состанокот беше заклучен со напомена дека вратата е оставена отворена за понатамошна дискусија и барање на најдобри можни решенија кои можат најдобро да ги искористат сите инволвирани страни. Бехтел ЕНКА останува многу благодарна за позитивниот и соработнички однос кој се одржува со жителите на село Ореовец и пошироко.