Oд ЕВН Македонија информираат дека денеска (23.07.) и утре (24.07.) планиран е прекин на електричната енергија во Старата прилепска чаршија и пазарот од 09:00 до 15:00 часот.
Прекин во истиот временски период ќе има и на улиците: УЛ. ТОДОР ПАНИЦА, УЛ. ИЛИНДЕН, УЛ. ЈАНЕ САНДАНСКИ, УЛ. ЛАЗО ПОПОСКИ, УЛ. ОРЦЕ НИКОЛОВ, УЛ. ХЕРОЈ КАРПОШ, УЛ. БЛАГОЈА ЦАНЕСКИ – ЧЕЛОТО.
Кавадарци утре (23 јули) ќе добие еден од најсовремените спортско-рекреативни комплекси во државата со официјалното отворање на целосно реконструираниот Градски базен. Информацијата на социјалните мрежи ја сподели градоначалникот на Општина Кавадарци, Митко Јанчев.
Програмата започнува во 11:00 часот со официјален почеток на Школата за пливање и упис на деца на возраст од 8 до 11 години. Со најмладите ќе работат стручни професори по физичко и здравствено образование, кои ќе ги воведат во основите на пливањето преку безбеден и професионален пристап.
Во 12:00 часот е предвидено официјалното отворање на Градскиот базен, на кое, според најавата, ќе присуствува и претседателот на Владата, Христијан Мицкоски.
Како што информира градоначалникот Јанчев, станува збор за целосно обновен спортско-рекреативен комплекс со нови содржини, наменет за рекреација, спорт и забава за сите генерации. Во реконструкцијата се инвестирани околу еден милион евра, а со оваа инвестиција Кавадарци добива еден од најмодерните и најубавите градски базени во Македонија.
Од Општина Кавадарци ги повикуваат граѓаните да присуствуваат на отворањето и заедно да го одбележат почетокот на новата летна сезона на базенот.
-На 21.07.2026 во 18:30 часот во ОВР Крушево, 52-годишник од Крушево пријавил дека во обложувалница во Крушево бил физички нападнат од неговиот брат П.Б.. Се преземаат мерки за расчистување на настанот, информираат од МВР.
-На 21.07.2026 во 20:40 часот од с.Чепигово, прилепско, полициски службеници од ОВР Прилеп го лишија од слобода Г.Ц.(52) од с.Чепигово поради сомнение дека предизвикал пожар на отворено, при што изгорела сува трева на поголема површина. По документирање на настанот, против него ќе биде поднесена соодветна пријава, информираат во полицискиот билтен на МВР.
Во магичниот амбиент на црквата „Света Софија“ во Охрид, и оваа година ќе се одржи традиционалната Австриска вечер, еден од најпрепознатливите настани во програмата на фестивалот „Охридско лето“. Како ексклузивен спонзор, Касинос Австрија Интернешанал Македонија и годинава со гордост ја поддржува реализацијата на овој врвен музички настан.
Во рамките на 66. издание на фестивалот, на 24 јули (петок), со почеток во 21:00 часот, во црквата „Света Софија“ ќе настапи светски познатото пијано дуо Маки Намекава и Денис Расел Дејвис, уметници чија долгогодишна меѓународна кариера е препознаена по исклучителниот музички израз и врвната интерпретација.
Австриската вечер традиционално се реализира со поддршка на Амбасадата на Република Австрија во Република Северна Македонија и Владата на Република Австрија, претставувајќи симбол на пријателството, културната соработка и заедничките вредности што ги поврзуваат двете земји.
Со својата континуирана поддршка на културата и уметноста, Касинос Австрија Интернешанал Македонија останува посветен партнер на настаните кои создаваат трајни вредности и го збогатуваат културниот живот во земјата.
Музиката ги надминува границите, а уметноста станува универзален јазик, со што се создаваат вечери што остануваат во сеќавање. Токму и затоа, Касинос Австрија Интернешанал Македонија со особено задоволство е дел од оваа традиција, која веќе со години претставува едно од најзначајните културни случувања во рамките на фестивалот „Охридско лето“.
Просечната месечна исплатена нето-плата по вработен во мај годинава изнесуваше 49.544 денари, а во однос на мај лани е повисока за 8,2 проценти, објави денеска Државниот завод за статистика.
Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Снабдување со вода; отстранување на отпадни води, управување со отпад и дејности за санација на околината за 11,9 проценти, Уметност, забава и рекреација за 11,3 проценти и Транспорт и складирање за 10,9 проценти.
Зголемување на просечната месечна исплатена нето-плата по вработен, во однос на претходниот месец, е забележано во секторите: Трговија на големо и трговија на мало; поправка на моторни возила и мотоцикли за 6,3 проценти, Рударство и вадење камен за 5,8 проценти и Транспорт и складирање за 5,7 проценти.
Во мај 2026 година просечната месечна исплатена бруто-плата изнесувала 74 482 денари.
Кога ќе се спомне летување во Грција, едно од првите места што им паѓа на ум на македонските туристи е токму Калитеа. Живописното место на првиот крак на Халкидики со години важи за една од најпосетуваните летни дестинации – благодарение на кристално чистото море, долгите песочни плажи, одличната гастрономска понуда, вечерната атмосфера и бројните содржини кои нудат вистински одмор за сите генерации.
Во оваа прекрасна летна приказна свое место има и Athina Mare-Sole, модерен и целосно реновиран хотел кој на своите гости им нуди удобност, функционалност и чувство како да се дома.
Веднаш штом ќе зачекорите во хотелот ќе ја почувствувате современата естетика која е присутна во секој детал. Светли, уредни и пространи соби, нов мебел и пријатен амбиент создаваат совршени услови за вистински одмор по ден исполнет со сонце и море.
Особено внимание е посветено на удобноста на гостите. Собите располагаат со нови, модерни кревети со висококвалитетни анатомски душеци, кои обезбедуваат мирен и квалитетен сон, додека целосно реновираните бањи со нова санитарна опрема и фен за коса го надополнуваат чувството на комфор.
За оние кои сакаат денот да го започнат со кафе или појадок во мирна атмосфера, секоја сместувачка единица располага со опремена кујна, овозможувајќи им на гостите сами да подготват лесен оброк и да уживаат на пространиот балкон.
Athina Mare-Sole нуди различни типови на сместување, погодни за парови, семејства и помали друштва. Комбинацијата од современо уредени студија и апартмани, функционалноста и вниманието кон секој детал го прават овој хотел одличен избор за сите кои сакаат квалитетно сместување во една од најубавите туристички дестинации на Халкидики.
Она што дополнително го издвојува хотелот е неговата мирна атмосфера и близината до прекрасната плажа на Калитеа, па гостите можат лесно да уживаат во сите убавини што ги нуди ова познато летувалиште, а истовремено да имаат место каде навистина ќе се одморат.
Доколку ова лето сакате спој од удобност, модерен амбиент, гостопримство и незаборавни денови покрај Егејското Море, Athina Mare-Sole е избор кој вреди да го разгледате.
Резервирајте го вашиот престој преку Booking и обезбедете си незаборавен летен одмор во прекрасната Калитеа.
Ова е улицата “Ѓорѓи Сугаре” во Прилеп, новоасфалтирана улица во 2024 година, две години подоцна речиси и да нема здраво место на асфалтот.
Водоводни цевки пукаат речиси секој месец, дефектите се санираат од Водовод и канализација, а дупките и пресечениот асфалт остануваат и се множат.
Поради тоа дефектите одново се појавуваат секогаш кога по улицата ќе помине потешко возило. И така одново пивка вода тече по улицата со денови, а крајот на проблемите на жителите на оваа улица не се гледа.
Иако ова е само една улица, и веројатно истиот проблем го имаат жители и на многу други улици низ градот, ова е класичен пример како нечовечки и без грам совест и одговорност се трошат народните пари.
Да асфалтираш целосно улица, да потрошиш милиони денари, а притоа да не ги промениш дотраените водоводни цевки и потоа да вршиш сечење на асфалтот, што е ако не КРИВИЧНО ДЕЛО?
Кај кого лежи одговорноста нема да зборуваме, нека се пронајдат сами, но ова е класичен пример КАКО НЕ ТРЕБА!
Погледнете ги фотографиите и споредете со состојбата на улиците каде што живеете:
Со музички портрет посветен на една од најголемите македонски интерпретаторки, легендарната прилепчанка Нина Спирова, Македонскиот Културно информативен центар (КИЦ) во Белград започна серија настани посветени на големите музички имиња кои оставиле траен белег на македонската и регионалната сцена.
Настанот „Портрети: Нина Спирова“ се одржа во просториите на КИЦ Белград, каде присутните имаа можност повторно да ги слушнат безвременските песни на уметницата која со својот препознатлив глас обележа цела една епоха.
Нина Спирова (Прилеп, 1938 – Коштуниќи, Србија, 2020) е запаметена како еден од најмаркантните вокали што се појавиле на просторите на поранешна Југославија, а нејзините изведби на „Еден бакнеж“, „Молчи, молчи“, „Ти езеро мое“ и бројни други песни и денес се дел од музичкото наследство.
Нејзините вечни мелодии и староградски песни добија ново музичко руво преку настапот на дуото формирано специјално за оваа пригода – интерпретаторот Александар Стоименовски и професорот Саво Милетиќ на клавијатури.
Со проектот „Портрети“, КИЦ Белград им оддава почит на македонските уметници кои живееле, работеле и стекнале голема популарност во Белград и Србија. Минатата година во рамките на истиот проект беше претставен музички портрет на Зафир Хаџиманов, со учество на Бисера Велетанлиќ и неговиот син Васил.
Нина Спирова останува симбол на македонската забавна и традиционална музика, а нејзиниот глас и денес продолжува да живее преку песните кои ги сакаат генерации слушатели.
Прилеп може да биде горд што ја дал една од најголемите музички легенди на македонската сцена.
Младите ентузијасти зад иницијативата „Мој Прилеп“ повторно покажуваат дека со визија, знаење и желба за промени може да се создадат решенија кои ќе им го олеснат секојдневието на граѓаните.
Иако летниот период е време на високи температури и годишни одмори, за тимот на иницијативата „Мој Прилеп“ нема пауза кога станува збор за развојот на идеи кои можат да донесат вистински промени во градот.
По бројните активности на терен, младите ентузијасти сега се во завршна фаза од развојот на, како што велат, првата мобилна апликација од ваков тип во Македонија, па и пошироко, која ќе ги обедини најважните информации и услуги за граѓаните на едно место.
Новата апликација ќе претставува вистинска дигитална платформа за Прилеп, каде што секој граѓанин ќе може едноставно да пријави проблем или недостаток во градот, да го следи градскиот превоз, да ја пронајде најблиската локација за рециклирање, да биде информиран за културни, спортски и забавни настани, како и да користи уште многу дополнителни функции кои ќе бидат достапни во иднина.
Според информациите од тимот, апликацијата ќе биде достапна и за Android и за iOS уредите. Во моментов се наоѓа во фаза на одобрување и финално тестирање, по што ќе биде официјално пуштена во употреба за сите граѓани.
Од „Мој Прилеп“ најавуваат дека ова е само почеток и дека платформата постојано ќе се надградува со нови функционалности, со цел да стане корисна алатка за секој прилепчанец.
Со вакви современи решенија, иницијативата уште еднаш покажува дека младите луѓе, кога имаат визија и желба да придонесат, можат да креираат проекти кои не само што го подобруваат секојдневниот живот, туку го прават Прилеп попаметен, подостапен и подобро поврзан град.
