Денеска се празнува Воведение на Пресвета Богородица. Народот овој празник го нарекува Пречиста, што одлично ја доловува неговата смисла. Тоа е празник на воведувањето на пресветата девојка Марија во Ерусалимскиот храм.
Евангелистите сведочат дека праведните Јоаким и Ана долго немале деца. Го молеле Бога да им даде рожба ветувајќи му дека ќе му ја посветат нему, односно ќе ја дадат да му служи во храмот.
Така им се родила Марија.Светото предание натаму сведочи дека бидејќи Марија била измолена со солзи и ветена да му служи на Бога, нејзините родители уште кога наполнила една година сакале да ја одведат во храмот. Но се плашеле дека малото девојче може да плаче за нив, па се одлучиле тој чин да го направат кога таа ќе наполни три години. И така кога наполнила три години останувајќи доследни на ветувањето, а и исполнувајќи го долгот кон Бога, ја повеле во храмот.
Во свечената поворка што три дена патувала од Назарет до Ерусалим најнапред оделе девојчиња променети во бела облека, со запалени свеќи во рацете, по нив Јоаким и Ана за рака ја воделе малата Марија, а по нив оделе многу роднини и пријатели. Со нив, невидливи за човечкото око, патувале и многу ангели. Малата Марија била облечена во свечена облека, со многу украси, како што и приличи на царска ќерка и божја невеста. Од Назарет до Ерусалим имало три дена пат, но овој пат, бидејќи се работело за патување иницирано со божји благослов, поворката со леснотија го изодела ова растојание.
Пред храмот свечената поворка ја пречекале свештеници на чело со првосвештеникот Захарие, пеејќи црковни песни. Храмот бил на поиздигнато место и во него се влегувало по 15 скали.
Родителите ја оставиле малата Марија на почетокот на скалите и таа самата, со сила и сигурност на многу поголема возраст, се искачила весело гледајќи во храмот и не свртувајќи се кон своите родители и кон народот што ја придружувал. Тамо ја пречекал првосвештеникот Захарие, (таткото на свети Јован Крстител), кој на општо изненадување на насобраниот народ, а по божја повелба, ја внесол во најсветото место во храмот, еден одделен олтар наречен “Свјатаја свјатих”, (или Светиња на светиите).
Во спомен на воведувањето на тригодишната Марија во храмот светата црква го востановила празникот Воведение што се празнува на 4 декември.
Празникот Воведение на Пресвета Богородица во храмот ни го истакнува за углед односот на праведните Јоаким и Ана, нивното исполнување на ветеното, но и нивната грижа за правилно воспитување на нивното дете.
Но овој празник и денес е актуелен со тоа што укажува на потребата родителите да се заложат за правилно воспитување на своите деца, за осознавање на вредностите на верата, но и за одбрана од негативните пороци кои што денес ја уништуваат младината.
Го слават жените за полесно да раѓаат и одгледуваат деца. Тие кои немаат деца на овој ден се молат да добијат.
Во насока на проширување на грижата за вработените Витаминка организира бесплатни специјалистички прегледи за околу 300 мажи вработени во компанијата. Станува збор за прегледи на доброволна основа кои веќе се спроведуваат од почетокот на декември, а ќе траат до крајот на март следната година. Прегледите кои ќе се изведуваат во приватна здравствена установа во Прилеп, вклучуваат ехо на абдомен (бубрези, црн дроб, простата, жолчно кесе, панкреас, слезина, абдоминална аорта).
Со спроведување на ваквиот вид прегледи, компанијата покажува грижа за здравјето и добросостојбата на мажите од сите возрасти вработени во компанијата и поттикнува самосвесност за потребата од редовни прегледи. Оваа активност е уште една од низата практики за заштита и унапредување на безбедноста и здравјето во работењето.
„Искуствата покажуваат дека кога компанијата дава приоритет на здравјето, безбедноста и благосостојбата на вработените, бенефит има самата компанија, но многу поважен е бенефитот за вработените. На овој начин кај вработените се поттикнува свесност за грижа за сопственото здравјето и се создава култура на редовни прегледи. Грижата за вработените не треба да се сведува само на унапредување на нивниот придонес за компанијата, туку и за нив самите. Ние во Витаминка ставаме приоритет на здравјето на сите наши вработени со цел да создадеме здрава и продуктивна работна средина и да ги поттикнеме вработените да вршат редовни здравствени прегледи“, велат од Витаминка.
Витаминка континуирано се грижи за здравјето и добросостојбата на своите вработени со редовно организирање на разни специјалистички прегледи, кои неретко се спроведуваат и во самата компанија. Прегледите за рак на дојка се организираат два пати годишно, ехо-прегледи на дојка и тироидна жлезда, анализа на витаминско-минерален статус за вработените а отсега и специјалисти прегледи за мажи.
Во прилепското сивило на понуда за ноќен живот, тие се светла точка во градот. Клуб Déjà Vu и оваа зимска сезона ќе ги понуди најдобрите ноќни журки со најдобра музичка понуда.
Диџеи, музички групи, популарни домашни и балкански изведувачи…. забавата веќе започна, а атмосферата во Déjà Vu дополнително ќе се загрее во претпразничниот период.
На 14. декември, со почеток од 21:00часот, свој настап пред прилепчани ќе има еден од најпопуларните српски изведувачи, Дарко Филиповиќ. Ѕвездата на Гранд најавува одлична забава со сите негови познати хитови и незаборавен помин.
Во Битола се гради како никогаш досега, изјави Тони Коњановски, градоначалник на Општина Битола.
„Во моментов се работи на над 15 локации во урбаниот дел од општината и руралните средини. Изминативе три години комплетно се реконструирани улици во должина од над 50 километри, а се градат и повеќе значајни објекти од високоградбата. Иако, дневно информираме за сите отпочнати проекти, како и за фазите на реализација во кои се наоѓаат истите, денес сакам да потенцирам неколку важни работи, кои ја одбележуваат годинава која изминува или – најважните проекти кои се реализираа во последните дванаесет месеци во Општина Битола.
Тоа се проекти со кои во Битола се чувствуваат промените кои значајно ја подобруваат инфраструктурата и овозможуваат подобри услови за живот на сите граѓани, за збогатување на културно – туристичката понуда, но и за економско заживување на градот и нови инвестиции. Накратко би ги споменал:
– Изградбата на влезот во Битола од страната на Прилеп, проект на кој активно работиме.
-Изградбата на улица кај новоотворениот трговски центар БЛИС.
-Изградбата на нова противпожарна зграда каде исто така активностите се во полн ек.
-Изградбата на новата детска градинка во АРМ во партнерство со Кромберг и Шуберт, која е во напредна фаза.
-Во завршна фаза е и адаптацијата на новата детска градинка во Домот за доенчиња и мали деца, по што ќе следува опремување на просторот, а веќе работиме и на решавање на проблемите кои беа затекнати за изградба на новата детска градинка кај основното училиште „Свети Климент Охридски“ за што сме во комуникација со ресорното министерство. Постоечкиот објект во состав на ДГ Славејче кој во минатото се користел од страна на градинката сега е адаптиран за згрижување на деца, со што се потврдува нашата заложба за зголемување на згрижувачките капацитети за најмладите.
-Започнавме изградба на велосипедски патеки во должина од над 5 километри и конечно започнуваме со реализација на идејата „Битола вело град“.
-Со поддршка на ПСК Пелистер го возобновуваме опожарениот планинарски дом „Копанки“ и веќе со радост и гордост можеме да кажеме дека таму новиот објект е во фаза на карабина и дека ќе се заложиме ова култно место за битолчани конечно повторно да ги отвори вратите за граѓаните.
-Во соработка со ФФМ го подготвивме стадионот „Петар Милошевски“ за ноќни натпревари и таму веќе се одиграа првите натпревари под рефлектори.
-После многу напори и долги процедури, отворено е прифатилиштето за бездомни животни „Хачико“, како системски пристап во справување со проблемот со уличните кучиња.
-Изградена е пешачка патека на потегот Тумбе кафе – Смолево, омиленото место за рекреација на битолчани.
-Уреден е Новиот парк во Нова Битола и поставена е урбана опрема и спортски реквизити.
-По примерот на светските метрополи, осветлени се сите значајни архитектонски градби со што блесна најпознатата и најамбиентална улица во Битола, Широк Сокак, каде е поставена и нова урбана опрема.
-Реконструирани или во завршна фаза на реконструкција се над 18 километри патна инфраструктура, од кои голем дел имаат целосна реконструкција на водоводната, канализационата мрежа, коловозот, а каде што е потребно и улично осветлување. Во инфраструктурните проекти се вбројуваат улиците во урбаниот и руралниот дел од општината, меѓу кои би ги издвоил : улиците во Горно Оризари, Долно Оризари, Цапари, локалниот пат до с. Магарево, улицата Захарија Шумљанска кон новите Светонеделски гробишта, Стив Наумов, Индустриска, Бурса, „Нико Фундали“, „Солунска“, улицата „Крушевска република“ и други улици, потоа уредени се нови паркинг простори, направени се хуманитарни паркинг простори, направен е нов кружен тек, реконструирани се спортските игралишта во ОУ „Елпида Караманди“ во Брусничка населба и други инфраструктурни проекти за кои најмногу сакам да им се заблагодарам на граѓаните за нивните предлози за време на буџетските форуми, но и за нивното трпение во оваа интензивна градежна офанзива на општината, во која работиме на многу локации, со цел колку е можно повеќе да ги подобриме условите во општината и да реализираме повеќе проекти. Битола повторно станува привлечна за инвестиции, се отвори трговскиот центар Блис, наскоро најавено е отворањето на брендот „Лидл“, а очекуваме и нови инвестиции во Индустриската зона „Жабени“, една ја најави и премиерот Мицкоски. Реализирани се и повеќе проекти за подобрување на условите во основните и средните училишта во градот, проекти за поддршка на младите, учениците и студентите.
-Во делот на енергетската ефикасност, преку проектот „Сончеви училишта“, 6 основни училишта ќе добијат фотонапонски централи за производство на електрична енергија. Фотоволтаици ќе бидат поставени на основните училишта Стив Наумов, Елпида Караманди, Коле Канински, Кирил и Методиј, Александар Турунџев во с. Кукуречани и Крсте Петков Мисирков во с. Бистрица. Веќе една година, во објектот на подрачното основно училиште Даме Груев и градинката во населбата Долно Оризари, работат поставените фотонапонски централи и веќе, по една година, треба да ги добиеме првите резултати на заштеда. Во постапка на поставување фотонапонски централи се и средните училишта д-р Јован Калаузи, Ѓорѓи Наумов и гимназијата Таки Даскало. Ова значи дека до крајот на годинава, 10 училишта во Битола ќе имаат фотоволтаици.
-Преку проект со УСАИД, во процедура е подготвување на комплетна проектна документација за енергетска ефикасност на три училишта и една градинка, а преку 16-те проекти од Владата, основното училиште Стив Нумов, ќе добие нова енергетски ефикасна фасада. Започнавме со засадување на 1500 различни видови садници, односно дрвја, на 10 локации во градот, преку проектот EU4CleanAir (ЕУ фор клин ер), проект кој го работиме заедно со Европската Унија и УНОПС. И од овој проект очекуваме дополнителни бенефити околу грејните инсталации на неколку јавни објекти. – За прв пат во државата, нашата општина беше домаќин на Форумите за праведна транзиција, од кои произлезе и Визијата за Битола, како заеднички осврт на барањата на претставниците на сите засегнати страни од јавниот сектор, образованието, науката, приватниот сектор и невладините организации.
-Општина Битола е лидер во транспарентноста и отвореноста во државата според анализите на Центарот за граѓански комуникации и Метаморфозис, за што континуирано сме насочени кон подобрување на услугите на граѓаните преку постепено воведување на електронски услуги и зголемување на ефикасноста и ефективноста на работата на локалната самоуправа. Ова се дел од проектите на кои работиме изминатата една година. За 16 нови проекти веќе добивме владина поддршка во висина од 230 милиони денари, а подготвуваме и проектна документација за реконструкција на девет спортски игралишта и изградба на две спортски сали во општина Битола“, изјави Коњановски.
-Како што ја започнавме годинава што изминува, така и завршуваме со асфалтирања на повеќе локации. Но, не го забораваме ниту културно туристичкото раздвижување на градот, кое оваа година, по четврти пат низ прекрасната „Зимска приказна“, од 20 декември до 06 јануари ќе создаде прекрасна атмосфера во Битола.
Градот веќе се украсува, не премногу, не премалку, туку доволно за Битола повторно да блесне во својата уникатна светлина, која изминативе три години, навистина го враќа својот сјај во повеќе области, потемцира Коњановски.
Новогодишната кошничка се подготвува, ќе има значителни намалувања, со цел да се заштити стандардот на граѓаните, најави денеска заменик министерот за економија, Марјан Ристески во Куманово, одговарајќи на новинарски прашања. Тој кажа дека деталите за производите, за намалувањата ќе бидат сооопштни на прес-конференција.
– Се знае дека кошничката е при крај, ќе има повеќе стотина производи, сигурно повеќе од претходната „есенската кошничка“ и мислам дека ќе бидат задоволни граѓаните од производите мои ќе бидат понудени во таа кошничка. Ќе има значителни намалувања коишто ќе бидат позитивна мерка во однос на заштита на стандардот на граѓаните, задржување на стабилност на цените, стабилен процент на инфлацијата којашто засега е на задоволително ниво, рече заменик министерот.
Вакви мерки владата ќе спроведува и во иднина, дополни Ристески, особено околу празниците, кога е евидентирана најголема потрошувачка. Во оваа кошничка како што соопшти ќе бидат опфатени традиционални производи, храна и пијалаци за празниците, пред и после Нова година. Кошничката е направена со претходна детална поопсежна анализа во која учествувале стопанските комори, синдикатите, организација на заштита на потрошувачите.
– И да најавам дека оваа кошничка ќе биде многу поразлична од претходните во начинот на определување на производите, кажа заменик министерот.
Одговарајќи на новинарски прашања, тој посочи дека во наредниот период, по кошничката во зависност од условите ќе се разгледуваат решенија за подобрување на животниот стандард на граѓаните. Мерките кои ќе се предложат ќе бидат во насока на стабилизација на цените и подобрување на животниот стандард. Влијание ќе има и општествената одговорност на фирмите, маркетите, увозниците, производителите …
-Ако ги прашате економските експерти ќе ви кажат дека не е добро да се преземаат мерки и директно да се мешаме во бизнисот, во понудата и побарувачката на пазарот. Меѓутоа кога во услови во државата имаме стабилна и ниска инфалција во услови кога претходно имаме намалување на енергенсите, намалување на транспортните трошоци и дел од суровините, бевме сведоци дека во претходните период и години имавме драстично зголемување на цените на производите. Со тоа, бевме предизвикани да направиме вакви мерки во кои беа и овие кошнички коишто беа спроведени во претходниот период и што ќе ги има во наредниот период и како што кажав на почетокот дел од нашата иницијатива за продуцирање вакви мерки е пред сè подобрување на животниот стандард, стабилизација на цените на производите и стабилизација на инфлацијата. Ќе видиме како ќе се движат цените во наредниот период, да видиме колку ќе покажат општествена одговорност, самите фирми, производители, добавувачи, увозници, маркети, од сето тоа ќе зависат и идните мерки или носење идни законски решенија, предложени од министерството за економија, донесени од владата, рече Ристески.
Претходно, беше донесена есенска потрошувачка кошничка која траеше до 31 октомври. Со неа беа опфатени околу 70 производи на кои им беа ограничени профитните маржи.
Министерството за внатрешни работи ги потсетува граѓаните дека важноста на возачките дозволи со старото уставно име, согласно со промената на законот за безбедност во сообраќајот, е заклучно со 31.12.2024 година. Министерството ги повикува сите граѓани кои се уште имаат возачка дозвола со старото уставно име, да ја обноват својата возачка дозвола, до истекот на рокот, со цел да не се создаваат непотребни гужви.
Сите капацитети на министерството и шалтерите на управните служби функционираат во полн капацитет и можат да ги услужат граѓаните да ги заменат своите возачки дозволи во редовниот рок до 31.12.2024, без никакво доцнење и гужви.
На 28.11.2024 во основното училиште „Мите Богоевски“ во Ресен, се одржа Државното првенство во шах за основни и средни училишта.
На натпреварот настапи и Теодора Ѓорѓиоска, ученик во I година во Гимназијата “Мирче Ацев” од Прилеп, и забележа одличен резултат освојувајќи го првото место во категорија на ученици средношколци во женска конкуренција.
Честитки за Теодора и желби за уште поголеми успеси во иднина.
7-годишниот Амар Ајвазоски oд Прилеп, ученик во ООУ “Добре Јованоски” од Прилеп, боледува од церебрална парализа и потребно му е итно лекување во Турција.
Неговите родители не се во можност да ги соберат потребните средства и бараат помош од сите хумани и добронамерни граѓани и општествено-одговорни компании.
Колективот на ООУ “Добре Јованоски”, ги повикува сите хумани граѓани да му помогнат на малиот Амар.
-Драги пријатели, на нашиот ученик Амар Ајвазоски му е потребна нашата помош за лекување во Турција. Ве замолувам да не го одбегнувате овој пост со кој сите можеме да помогнеме да се соберат средства за да се изврши операцијата. Неговите родители не се во можност да ги обезбедат овие средства, ама затоа ние сите заедно можеме да помогнеме. Ве повикувам сите што сте во можност да донирате, посебно фирмите и добронамерните граѓани! Верувам во вас и вашите благородни срца. За повеќе информации ѕвонете на мојот телефонски број 078230041! Ви благодарам – напиша на ФБ директорката на училиштето, Панде Николоска.
Освен на приложената жиро сметка, секој граѓанин парични средства може да донира и во училиштето.
На 5.12.2024 /четврток/ од 19.00 часот во кино Мис Стон ќе биде прикажан филмот „Ескорт“ / драма/ трилер.
Возрасна категорија: 18+
Влезници ќе се продаваат на билетарницата од киното среда и четврток од 10 до 12.00 часот и еден час пред проекцијата на филмот!
ЗА филмот ЕСКОРТ
Приказната го следи Миро кој за време на службено патување, за прв пат во животот, вечерта ја поминува со ескорт дама кој некој ја испратил во неговата хотелска соба. После страстниот секс, тој ја наоѓа девојката мртва во тоалетот. Успешен, среќно оженет и татко на две деца, Миро ја прикрива несреќата со помош на двајца вработени во хотелот, кои набрзо почнуваат да бараат од него да им ја возврати услугата. На почетокот, тоа се мали нешта, но наскоро нивните барања почнуваат да излегуваат од контрола. Двајцата соучесници во неговото „злосторство“ одеднаш добиваат голема улога во неговиот живот, кој никогаш повеќе нема да биде ист.
Авторски потпис на филмот ставаат и Фране Памиќ како кинематографер, Славен Зеќевиќ – монтажа, сценографијата е на Иван Вељача, костимографија –Жељка Франуловиќ, шминка – Мојца Горогранц Петрушевска, автор на оригиналната музика е македонскиот композитор Александар Пејовски, а дизајнот на звук е на ИгорПоповски. Продуценти на филмот се Хрвоје Перван, Драган Јуриќ и Анкица ЈуриќТилиќ, а како копродуценти се потпишуваат Томи Салковски и Фатмир Спахиу.
Главните улоги ги толкуваат Живко Аночиќ, Крешмир Микиќ, Никша Бутијер, Хрвојка Беговиќ, Игор Ковач, Хрвоје Баришиќ, Пашко Вукасовиќ и Лена Медар.
„Ескорт“е копродукција на Кинорама од Хрватска со Скопје Филм Студио и Бука Продукција од Косово, и е направен со поддршка од Агенцијата за филм на Република Северна Македонија, Хрватскиот Аудио визуелен Центар, ХРТ и Косовскиот Центар за кинематографија.
