Во свечената сала на Владата, денеска во 11:00 часот ќе се одржи состанок помеѓу премиерот Христијан Мицкоски и претставниците на стопанските комори во однос на промоција на новогодишната потрошувачка кошничка, која се состои од листа на прехранбени производи и алкохолни и безалкохолни пијалаци предложени од страна на производителите и трговците, кои за време на новогодишните празници ќе бидат понудени на потрошувачите по ниски цени.

По состанокот, во 11:45 часот прес-конференција за медиуми ќе одржи претседателот на Владата, Мицкоски.

Благочестиви христијани,
Ве покануваме на соборно прославување
на патронот на нашата Македонска Православна Црква, а со тоа и на нашата држава Македонија и на македонскиот народ, Св. Климент Охридски – стои во поканата од храмот Св. Кирил и Методиј (Параклис) од Прилеп.

На 07.12.2024 година (сабота), со почеток во 16 часот, во храмот ќе се отслужи мало бдение со акатист на светиот Климент Охридски, а наредниот ден 08.12., (недела) со почеток во 7:30 часот, и света Божествена литургија, каде што ќе можете да се поклоните и помолите на светите мошти од светиот Климент Охридски. И светиот маченик Пантелејмон.

Достоинствено да го испочитуваме заштитникот на нашиот народ Македонски.

Трговско друштво ЕЛЕКТРО-ТОЧИЛА-ИНЖЕНЕРИНГ увоз-извоз ДООЕЛ Прилеп, повторно го доби тендерот за новогодишно украсување на Прилеп.

Фирмата и оваа година доставила најповолна понуда во општина Прилеп и веќе ја накити Новогодишната елка во центарот на градот, а започна и украсувањето на градскиот булевар “Гоце Делчев”.

Граѓаните очекуваат новитети и поубава празнична приказна во центарот на градот. Мислењето е дека градот треба да биде украсен, но со оглед на тоа дека се трошат народни пари, фирмата изведувач би било добро да воведува нови работи секоја година.

Записникот од вонредниот надзор е готов, инспекторите утврдиле неправилности поради што одговорност ќе понесе една од наставничките која била организатор на приредбата, изјави министерката за образование и наука Весна Јаневска во врска надзорот што завчера во училиштето „7 Март“ во Челопек го извршил Државниот просветен инспекторат.

-Ќе бидат информирани и директорот и градоначалникот за да постапат по закон, но она што е поважно, според мене, е дека и во ова училиште и во неколку други училишта каде што имавме пријави за нерегуларности, каде што, чесно ќе кажам не се утврдени нерегуларности, но имало некаков револт, ќе спроведеме обука за соживот, мултукултурализам, мултиетничност, и за тоа ќе побараме поддршка и од ОБСЕ, изјави Јаневска денеска во Ректоратот на УКИМ каде што учествуваше на конференција „Подобро образование за посилен раст“.

Инспектори го посетија училиштето во тетовски Челопек откако таму на 28 ноември била организирана училишна приредба во која учествуваат ученици облечени во воени униформи со амблеми на УЧК и со пушки во рацете.

За настанот реагираше министерката за образование и наука Весна Јаневска, која оцени дека таквиот чин е законски казнив и побара од ДПИ да изврши надзор во училиштето.

По повод 3. декември, Меѓународниот ден на лицата со попреченост, учениците од СОЕПТУ „Кузман Јосифоски-Питу“ Прилеп создадоа инспиративно видео посветено на инклузијата, прифаќањето и заедничкиот раст.

Ова инспиративно дело носи моќна порака за инклузија, прифаќање и заеднички раст. Преку креативност и тимска работа, учениците покажаа како различностите нè прават посилни.

Проследете го видеото во продолжение:

По повод Меѓународниот ден на лицата со попреченост вчера во хотелот Хилтон во Скопје, „Ability awards 2024“ им додели награда на 10 лица со попреченост кои ги споделија своите инспиративни приказни за надминување на бариерите и достигнување на својот успех. Признание добија и 10 водечки компании, за своите иновативни и инклузивни практики што го менуваат начинот на којшто го гледаме светот.

На настанот присутен беше и Заменик министерот за економија и труд од Прилеп, Марјан Ристески, кој имаше чест да ја додели наградата во категоријата – Бизнис Иноватор.

-Мораме заедно да работиме на унапредување на положбата на лицата со попреченост, мораме да работиме на зголемување на корпоративните социјални одговорности. Овој настан, кој се организира по повод 3 Декември – Меѓународниот ден на лицата со попреченост, е прекрасна можност да ги истакнеме позитивните примери и придобивките за сите во општеството – напиша Ристески на ФБ.

– Нашиот тим е нашата моќ, а задоволството и лојалноста на клиентите се наш поттик и инспирација, велат од компанијата.

Заокружувајќи ја десеттата година од основањето, овој 4-ти декември најголемото брокерско друштво во секторот на осигурувањето во земјата, СН Осигурителен Брокер АД Битола, заокружува уште една успешна година во процесот на постојан раст и развој.

„Денес, на 4ти декември, одбележуваме 10 години СН Осигурителен Брокер АД Битола, 10 години заедно со Вас! Да ни се множат годините, работата, партнерствата, пријателствата и успесите! Нашата приказна е спој на посветеноста на нашите вработени и лојалноста на нашите осигуреници. Ова е повод и до едните и до другите да упатиме искрена благодарност и да си посакаме уште долги години успешна соработка.“-соопштија денес од компанијата по повод јубилејот.

Континуираното вложување во професионален кадар и испорачувањето на врвна услуга за клиентите се основните постулати на нашето работење, на што ќе останеме посветени и во идната деценија. Нашиот тим е нашата моќ, а задоволството и лојалноста на клиентите се наш поттик и инспирација. Заедно чекориме кон нови успеси, велат од компанијата.

-На 03.12.2024 во 21.40 часот на место викано „Преслап” во Прилеп, полициски службеници од ОВР Прилеп ги лишиле од слобода А.К.(27) од Република Турција и К.Ц.(34) од Индија, двајцата со привремен престој во Прилеп.

При преглед во патничко возило „фолксваген” со гостиварски регистарски ознаки, управувано од А.К., биле пронајдени марихуана и метална дробилка.

По документирање на настанот, против нив ќе следува соодветна пријава – информираат од МВР.

Вo петок, на 6 декември во 18 часот во Ликовната галерија на ЦК „Марко Цепенков“ ќе биде отворена изложбата „Сеќавање“ со дела од уметникот Васил Костов. Изложбата што ќе ја отвори Елена Чагороска, историчар на уметност, е рестроспектива на дел од неговото творештво насловено „Сеќавања“.

Ликовниот профил на Васил Костов е претпознатлив, синоним на континутет и развој на ликовната уметност во Прилеп. Роден е 1939 година во село Ранци, Егејска Македонија. Училиште за применета уметност завршил во Скопје во 1960 година. Неговиот творечки опус започнува веднаш по завршеното образование. Со ликовната поставка насловена „Сеќавање“ се заокружува и се остварува замислата на Васил Костов – комлетна презентација на уметничкото достигување, најголем успех во ликовната дејност кој остава печат на уметник на прилепската, македонската ликовна сцена и пошироко.

Уметничкото достигнување во творечкиот период од шест децении како активен неуморен на речиси сите ликовни полиња со разновидна техника и материјали: масло на платно (каде што е доминантен), акварел, гваш, графика, обиди на работење во дрво и други материјали. Подолги години работи како сценограф во Народниот театар „Војдан Чернодрински“ и повремени студиски престои во Париз, Венеција, Москва, Варшава.

За одбележување е формирање на групата „2002“, во 1965 година, по иницијатива на Кирил Гегоски, Ѓорѓи Ачески и Васил Костов. Во тој период формирана е првата продажна галерија, единствена во овој период во Македонија. Костов, како член на ДЛУМ од 1966 година и член на ДЛУП од 1967 година, учествува на сите групни изложби. Од значење е што сите создадени и објавени ликовни дела се систематизирани и проучени од ликовните критичари. Последните години од животот ги посветува на непополнети моменти, сеќавања од детсвото, како бегалец од Егејска Макеоднија, со многу страдања и слики од доживеани настани.

Полн со емотивни чувства, уметникот започнува секоја слика, сеќавања и доживувања да ги сублимира, со идеја да започне серијал на слики насловени како „Сеќавање“ – бегалски сеќавања од 1945 – 1952 година. Така последните години од животот ги посветува во создавање на циклус ликовни дела со тематика бегалците од Егејска Македонија. Изработени се неколку дела и скици кои се недоработени, но со голема порака за болката и страдањата и доживеаното на бегалците.

На скиците и сликите, впечатлива е едноставноста на ликовниот пристап кој сведочи за едно време полно со тага, без правда, талкање и безнадежност. Костов претпочита посредно да ја вознемири нашата индолентност, нашата духовна пасивност, да го поттикне нашиот интелект на размислување, акција, определување.

Творбите на Костов во богатството на своите потенции, содржат извонредно доследен, естетски, сублимиран вид создавање, на едно колористички и обликувано, диференцирано и специфицирано ликовно творештво. Во ликовен план однесувањето на Костов е творечко активно и ангажирано.

-Уметникот се обидува да навлезе со ликовните инструменти, во една од основните противречности на нашето време. Во неговата ретроспектива на ликовен план, тематски обработува објекти, предели, мртва природа, камени површини. Костов успеваше да постигне ефекти на рамнотежа помеѓу формата, идејата, композицијата, тоналитетот и нарацијата. Делата предизвикуваат естетско доживување, ја покренуваат фантазијата кај гледачите, а уметникот умее да си поигра со колоритот на боите, хармоничност и потези кои го напојуваат окото на гледачот. Благодариме Васил Костов, што сме сведоци на големо незаменливо ликовно творештво, што си дел од темелењето на Прилепската уметност, респект кон твоето творештво и име и ликовните дела кои ќе бидат дел од Македонската ликовна ризница, пишува Елена Чагороска, историчар на уметност.

Македонската пејачка Каролина Гочева деновиве ја има својата турнеја низ Германија каде досега одржа концерти во Штутгарт, Нинберг, а настапи и пред своите обожаватели во Дизелдорф.

Имено, пејачката во текот на нстапот во Дизелдорф, на сцената го развиори македонското знаме. Каролина на социјалните мрежи објави фотографија од овој момент, што предизика бројни позитивни реакции и коментари од нејзините следбеници.

Генерален спонзор на турнејата на Каролина во Германија е компанијата “Витаминка”, од каде велат дека со гордост ги поддржа концертите во Нирнберг, Штутгарт и Дизелдорф.

-Енергијата на публиката беше заразна, а атмосферата – неверојатна!

Се гледаме на 13.12 во Хамбург и 16.12 во Берлин – напишаа од Витаминка на социјалните мрежи.