Еден од најдобрите ресторани во Прилеп, ресторанот “Деспина” подготви фантастична музичка понуда за предновогодишни забави. Атрактивни музички имиња, мени по мерка дури и за најпребирливите и најважно цена која ќе одговара за сечиј џеб.

Од ресторанот најавија одлична забава и за Новогодишната ноќ, кога гостите ќе ги забавува “Класико Бенд”.

-Нека оваа Нова Година започне со стил! Придружете ни се на најсветлата ноќ од годината и уживајте во спектакуларен амбиент, вкусна храна и музика која ќе ви го загрее срцето. Прекрасен вечерен мени, пијалоци по избор и незаборавен дочек со пријатели и сакани… Започнете ја 2025та со нас и нека оваа година биде полна со среќа и нови почетоци! Бројките се ограничени – резервацијата е задолжителна. Побрзајте и обезбедете го своето место за најголемата ноќ! Среќна Нова Година од целиот тим на Ресторан Деспина – велат во поканата од ресторанот.

Резервирајте навреме на телефонските броеви: 072 209 996 и 048 403 343

Денеска започнува најновото издание на турнирот во мал фудбал “Св. Никола 2024” во Прилеп. Фудбалското шоу ќе трае до 22.декември, за кога е закажано големото финале. Натпреварите ќе се играат во две спортски сали, сениорските во СОУ “Ристе Ристески -Ричко”, а помалите категории ќе играат во ООУ “Добре Јованоски”.

Вчера се одржа ждребот за групната фаза. Пријавени се 32 екипи, кои се поделени во 8 групи.

Во првиот турнирски ден ќе се одиграат 5 натпревари, а ова се двојките:

19:00 Водовод Прилеп – Изофас
19:50 Фенербахче – ВИК
20:50 Фенербахче – Outdoorfitness
21:40 Струшка – Слаткарница Шар
22:30 Фенербахче – Ангромеханика First Time

Победникот оваа година ќе подели 300.000 денари, второпласираната екипа дома ќе си замине со 180.000 денари, а третопласираната со 70.000.

Турнирот е поддржан од Министерството за спорт на Република Македонија и компанијата “Комфи Ангел”.

Од 15 декември до 15 јануари повеќе од 650 производи со пониски цени за граѓаните во рамки на Новогодишната кошница.

Новогодишната кошница е креирана на предлог на стопанските комори, производителите и дистрибутерите на прехрамбени производи и пијалаци, кои излегоа во пресрет на повиците на јавноста да ја покажат нивната општествена одговорност, каде крајниот бенефит ќе го имаат граѓаните на Македонија!

-Концептот за Новогодишната кошница го презентиравме со премиерот Христијан Мицкоски, министерот за економија и труд Бесар Дурмиши и претставниците на сите бизнис комори и учесници во акцијата, а крајната цел е на полиците во маркетите граѓаните да имаат широка лепеза на производи со попуст од најмалку 10 проценти. Ние како Влада даваме поддршка на мерката и во тек е изготвување на интернет страната – www.mojakosnica.mk на која ќе бидат објавени сите потребни информации поврзани со акцијата.Голема благодарност до сите општествено одговорни компании кои се дел од оваа акција, апел до сите заинтересирани да се приклучат на истата. Министерството за економија и труд и Владата на Република Македонија се грижат за стандардот на народот – напиша на ФБ заменик министерот за економија и труд, Марјан Ристески.

Новогодишната потрошувачка кошничка се состои од листа на прехранбени производи и алкохолни и безалкохолни пијалаци предложени од страна на производителите и трговците кои за време на новогодишните празници ќе бидат понудени на потрошувачите по ниски цени.

“Законот за локална самоуправа е поставен на здрава основа, станува збор за системски закон којшто произлегува од еден исклучително тежок процес за Република Македонија, а тоа е Охридскиот рамковен договор и ова е законско решение кое што е постаро од две декади и нормално е да има потреба од подобрување, модернизирање на законското решение.

Главната иницијација за отворање на овој системски и двотретински закон е од изразеното незадоволство на граѓаните од одредени сегашни градоначалници. Откако ќе го добијат мандатот, не можат да бидат отповикани по ниту еден основ, освен судот ако оцени дека направиле кривично дело или не дај Боже најлошото. Сметаме дека ние треба таа можност да им ја дадеме на граѓаните, и тоа постоело како законско решение во Законот за локална самоуправа од 1995 година. Тоа не е битно, тоа е препорака на Венецијанската комисија во извештајот од 2019 година – вели министерот за локална самоуправа Златко Перински.

Тој во синоќешното гостување во „Заспиј ако можеш“ на ТВ Алфа посочи треба да се даде можност на референдумско изјаснување за отповик на градоначалник, но да се внимава тој механизам да не се злоупотребува.

-Процесот го отпочнавме со УНДП, во него се вклучени 4 домашни експерти и еден интернационален експерт којшто очекуваме да се вклучи во периодот кој што ќе следи. Целата процедура ќе се прави на максимално транспарентен и отворен начин.Планирано е со дополнувањето на Законот да биде овозможено и функционирање на комунална полиција, со цел да се елиминираат девијантни однесувања на групи граѓани, а во законска рамка планирано е да се вметне и дел со кој ќе се овозможи поголемо учество на граѓаните во креирање на локалните буџети – нагласи Перински.

Прилепскиот народен театар “Војдан Чернодрински” денеска одржа прес конференција за најновата премиера “По име господин”, која за прв пат ќе се одигра на 6.12.2024, со почеток од 20.00 ч.

“ПО ИМЕ ГОСПОДИН” – Филип Лoле

Режија: Борис Василески
Драматургија: Лидија Митоска-Ѓорѓиевска
Сценографија: Ненад Тонкин
Костимографија: Марта Дојчиновска
Музика: Серафим Чернит
Дизајн на светло: Бобан Смилкоски

Играат:

ГОСПОДИН – Димитар Ѓорѓиевски
АНЕТА, МАЈКАТА – Даниела Иваноска
ЕНДИ, КАРЛ ЕНГЕРЛИНГ, ПРВ ИСЛЕДНИК – Михајло Миленкоски
НОРБЕРТ, ХАЈО – Дарко Карбески
СИЛВИЈА, ВТОР ИСЛЕДНИК – Наталија Ристеска

Идејата да се отфрлат општествените правила и да се живее живот надвор од капиталистичките и потрошувачки рамки – и тоа денес, во Западниот свет – тоа, за волја на вистината, се граничи со апсурд. Но за Господин, апсурдни и бесмислени се бесконечните наметнати потреби и норми на денешното живеење кои ги трошат и ги обезвреднуваат нашите животи. Преку глава му е од сѐ, па решава да се ослободи, да живее едноставно и да достигне апсолутна индивидуална слобода и независност, надвор од „капиталистичката работничка мелница“. Ниту прифаќа да работи, ниту да користи пари. Неговата идеја е радикална, но тој не гледа друга можност за себе. За да се издржува, во подрумот сместува еден необичен придружник – лама, која му помага да се одржува во живот без да се предаде на бескрупулозното секојдневие и материјализмот.

-На 04.12.2024 во 21.30 часот во Полициската станица Прилеп било пријавено дека на ул.„Александар Македонски“ во Прилеп, патничко возило „форд“ со прилепски регистарски ознаки, управувано од М.С.(29) од Прилеп излетало надвор од коловозот.

Во несреќата со тешки телесни повреди се здобила М.С., додека со телесни повреди се здобил нејзиниот сопатник П.Ш.(24) од Прилеп, констатирани во Општата болница Прилеп.

Извршен бил увид од увидна екипа од ОВР Прилеп – стои во соопштението од МВР.

Новогодишната кошничка ќе опфаќа повеќе од 600 производи и ќе трае од 15 декември до 15 јануари. Со неа се очекува намалување на цените на производите за 10 и повеќе проценти.

Листата на производи, како што кажа денеска премиерот Христијан Мицкоски, е договорена заедно со стопанските комори, синдикатите, производителите, дистрибутерите и трговците.

-Во присуство на производителите и дистрибутерите, повторно на едно исто место беа и производителите и дистрибутерите, направивме нешто што досега можеби никогаш не е направено, а тоа е дека сите заедно ние разговаравме извесен период и за време на тие разговори дојдовме до компромис во којшто сите страни се согласивме дека во периодот од 15-ти декември до 15-ти јануари цените на одредени производи, а тоа се повеќе од шестотини артикли, ќе бидат намалени и брендирани како што беше до сега, помалку трошоци повеќе за тебе, и се грижиме.

Тоа е многу важно, бидејќи на тој начин ќе можат и граѓаните сето тоа да го препознаат. Нормално ова не е направено со интервентна мерка од страна на Владата, не е направено со ограничување на цените, туку е консензуално решение и поради тоа нема да има за ова казнување, се разбира, туку ќе има само мониторинг на тоа дали на сите тие производи ќе бидат залепени сите овие налепници за коишто зборуваме за да биде визибилно за граѓаните, за да можат тие да ги препознаат овие производи.

И покрај овие еден месец дена колку што планираме сето ова да функционира беспрекорно, ќе повторам повеќе од 600 производи артикли, кои што се добиени по основ на консензус помеѓу сите овие страни за кои што зборував, очекувам и понатаму да продолжиме заеднички да бидеме општествено одговорни за овие тешки моменти, заеднички да работиме да помогнеме на македонските граѓани, на македонската економија, стандардот на македонските граѓани и на тој начин да има повеќе за секого, истакна Мицкоски.

Нагласи дека не се работи за интервентна мерка на Владата и со ограничување на цените, туку за консензуално решение поради што нема да има казнување, туку ќе има мониторинг дали на тие производи ќе бидат залепени налепниците за да бидат визибилни за граѓаните.

На забелешките од новинарите дека во листата на производи во новогодишната кошничка има производи чии цени во изминатиов период се зголемени, премиерот Мицкоски му предочи на директорот на Пазарниот инспекторат да направи контрола какви се цени на пазарот сега и потоа дали тие ќе бидат намалени.

Вицепремиерите Александар Николоски и Арбен Фетаи денеска во Брисел ќе учествуваат на традиционалниот форум во организација на бриселскиот тинк тенк Пријатели на Европа, „Самит ЕУ-Западен Балкан“, кој годинава е насловен „Обновен пристап кон регионот“.

Целта на „Самитот“ е да се изгради кохезивна и сеопфатна стратегија за интегрирање на регионот на Западниот Балкан во ЕУ, притоа приспособувајќи ги неговите амбиции и политики на новата реалност на проширена и посложена Европа.

Во најавата на форумот организаторите посочуваат дека поради геополитичката итност создадена од руската инвазија врз Украина, до 2030 година Европската Унија би можела да прими неколку нови земји членки од Западниот Балкан и од Источна Европа.

– Кога станува збор за проширувањето на ЕУ, постсоветските – Грузија, Молдавија и Украина и Западниот Балкан се како две страни на една иста паричка. Двата региони се клучни во обликувањето на идниот пејзаж на ЕУ. На нивниот интегративен пат, Молдавија, Украина и Западниот Балкан се соочуваат со слични предизвици поврзани со владеењето на правото, реформите во правосудството и борбата против корупцијата, геополитичкиот притисок и странските мешања и манипулации со информациите, се наведува во најавата.

Организаторите на собирот посочуваат дека во одредувањето на темпото и приоритетите на процесот на проширување на ЕУ клучна улога ќе имаат новоизбраниот Европски парламент и новоформираната Еврокомисија.

– Следниот нивни мандат ќе биде клучен, бидејќи ќе се совпадне со периодот на значајни геополитички промени, поради што од суштинско значење за новата Комисија ќе биде да даде приоритет на стратешките реформи кои ја подобруваат институционалната подготвеност и кохерентноста на политиките на ЕУ. Како што е потенцирано во политичките насоки на Урсула фон дер Лајен за следната Европска комисија, „проширувањето како геополитички императив“ е централна тема, што ја одразува итноста за интегрирање на новите земји членки за зајакнување на европската безбедност и издржливост. Самитот на Западен Балкан во 2024 година има за цел да го редефинира дијалогот за проширување на ЕУ преку фокусирање на процесите на пристапување на земјите од регионот преку инклузивен и иновативен пристап, посочува тинк тенкот Пријатели на Европа.

На собирот ќе стане збор за пошироките импликации од проширувањето на ЕУ врз долгорочните цели на Унијата. Според организаторите, додека во ЕУ продолжуваат да се зголемуваат општествената поларизација и политичката фрагментација, новата Комисија ќе треба да преземе решителни мерки за да се осигура дека процесот на проширување ги зајакнува општествата, наместо да ги зголемува овие поделби.

– Фокусот ќе биде ставен на забрзување на внатрешната интеграција и подобрување на кохерентноста на политиките, со цел ЕУ да се подготви за вклучување на нови земји членки со различно економско и социјално потекло. Самитот, исто така, се поврзува со пошироките избори за социјална политика за кои се дебатира во рамките на иницијативата Обновен социјален договор, особено во однос на меката моќ на ЕУ и нејзината улога во промовирањето на европската безбедност и издржливост. Проширувањето, политичката интеграција, владеењето на правото и заедничките вредности се директно поврзани со овие политички избори, кои имаат за цел да обезбедат дека ЕУ останува предвидлив, инклузивен, фер и влијателен глобален актер, се додава во најавата на собирот.

Вицепремиерот и министер за транспорт Александар Николоски ќе биде панелист на втората сесија на форумот „Отклучување на економскиот потенцијал: Раст и интеграција преку пристапување во ЕУ“.

Покрај него, на оваа сесија ќе говорат и претседавачот на Делегацијата на Европскиот парламент во Мешовитиот парламентарен комитет ЕУ-Северна Македонија, Карло Реслер, раководителот на Одделот за политика и регионална стратегија за Западниот Балкан при Генералниот директорат за соседство и преговори за проширување на Европската комисија (ДГ НЕАР), Томас Хаглајтнер, директорката за конкурентност, владеење и политички прашања во Европската банка за обнова и развој (ЕБОР), Милица Делевиќ, програмската директорка и главна истражувачка на Мрежата на жените на Косово, Никол Фарнсворт и генералната секретарка за Западниот Балкан на Коморскиот инвестициски форум, Татјана Штерјова Душковска.

Во најавата за оваа сесија се посочува дека додека Европската Унија ја обновува својата посветеност на процесот на проширување, со новиот План за раст на Западниот Балкан на Европската комисија се нуди патоказ за поттикнување на економската конвергенција, зајакнување на регионалната соработка и интеграција на регионот во единствениот европски пазар.

– Главна цел на овој план е да се забрзаат реформите во клучните области, како што се владеењето на правото, економското управување и демократските институции и истовремено да се обезбеди структуриран пат кон членството во ЕУ. Додека земјите од Западен Балкан ја поздравија оваа иницијатива, останува загриженоста во врска со буџетската конзистентност, политичкото усогласување и неговата интеграција во пошироката рамка за пристапување, посочуваат организаторите.

Според нив, економската иднина на Западниот Балкан не може да се замисли без да се земе предвид улогата на приватниот сектор, како во регионот, така и надвор од него.

– Разбирањето како бизнисите ги перципираат економските трендови, изгледите за раст и капацитетот на локалните, наспроти странските инвестиции е од клучно значење. Овие сознанија ќе помогнат да се обликува насоката на развојните иницијативи и да се влијае на интеграцијата на регионот во европската и глобалната економија, се додава во најавата.

Вицепремиерот задолжен за добро владеење Арбен Фетаи, пак, ќе биде еден од панелистите на третата сесија „Заедничка правда: Градење поправедни и поинклузивни системи во регионот“,

Покрај Фетаи, панелисти на оваа сесија ќе бидат и црногорскиот министер за правда Бојан Божовиќ, европратеникот и член на Комисијата за надворешни работи на Европарламентот, Хелмут Брандштатер, кипарскиот пратеник, потпретседател на Парламентарното собрание на ОБСЕ и специјален претставник за Југоисточна Европа, Киријакос Хаџијани, извршната директорка на Албанскиот хелсиншки комитет, Ерида Скендај и членот на Одборот и холандскиот национален член на Евроџаст, Александар ван Дам.

Во најавата за сесијата се посочува дека во текот на изминатите три децении, воспоставувањето на владеењето на правото на Западниот Балкан беше предизвик, бидејќи и покрај значајните законски промени, прашањата за политичко влијание, корупција и неефикасноста опстојуваат во судските системи во регионот, поради што од клучно значење за регионалната стабилност е обезбедување транспарентното, непристрасно и ефикасно судство.

– Оваа сесија ќе ги истражи критичните аспекти на реформите во правосудството на Западниот Балкан. Оваа сесија ќе размислува за минатите реформски напори, ќе ги идентификува областите за подобрување и ќе ги истражи иновативните пристапи за идните реформи, се вели во најавата, при што се додава дека дискусиите ќе бидат водени во насока на обезбедување цврста основа за развивање на сеопфатен и напреден пристап кон реформите во правосудството во регионот.

„Самитот ЕУ-Западен Балкан“ ќе започне со сесијата „Проширување на ЕУ: Улогата на нормите и вредностите во пристапниот пат“ на која панелисти ќе бидат еврокомесарката за проширување Марта Кос, црногорскиот претседател Јаков Милатовиќ, претседателката на српското Собрание и поранешна премиерка Ана Брнабиќ, молдавската вицепремиерка за европски интеграции Кристина Герасимов, украинската вицепремиерка за европски и евроатлански интеграции и министерка за правда Олха Стефанишина, генералниот директор на ДГ НЕАР, Герт Јан Копман и европратеникот и поранешен естонски министер за надворешни работи Урмас Пает.

Оваа сесија ќе ги истражи политичките димензии на проширувањето на ЕУ, фокусирајќи се на критичните институционални и геополитички предизвици кои го обликуваат процесот на пристапување за Западен Балкан кон Унијата.

– Среде глобалните промени, како што е војната во Украина и растечкото надворешно влијание на Русија и Кина, ја интензивираа геополитичката важност на евроинтеграцијата на Западниот Балкан. Стабилноста во регионот е од клучно значење за безбедносната и надворешната политика на ЕУ. Оваа сесија исто така ќе испита како Западниот Балкан може да се движи кон овие предизвици и да ги унапреди политичките реформи. Со фокус на политичкото лидерство, демократското владеење и одговорноста, оваа дискусија ќе има за цел да обезбеди увид во иднината на односите на ЕУ со Западниот Балкан и во политичките реформи потребни за успешна интеграција, се додава во најавата.

Францускиот претседател Емануел Макрон вечерва ќе и се обрати на нацијата, откако опозицијата во Франција и изгласа недоверба на владата на премиерот Мишел Барние, соопшти Елисејската палата.

Лидерката на француската крајна десница, Марин Ле Пен, изјави дека притисокот врз Макрон расте, но дека таа не бара негова оставка, нагласувајќи дека само Макрон може да одлучи за тоа.

На малцинската влада на францускиот премиер Мишел Барние синоќа и беше изгласана недоверба во Долниот дом на француското Национално собрание со гласовите на пратениците на екстремната левица и екстремната десница. Со ваквата очекувана разврска во парламентот Франција запаѓа во политичка криза, по само тримесечното управување на малцинска влада на премиерот Барние.

Колапсот, што беше предизвикан од предлог буџетот на Барние за штедење, ја втурна земјата, која е еден од најмоќните европски играчи, во подлабоки политички превирања среде големите економски предизвици, наведува ДПА.

Последен пат една француска влада била соборена со гласање недоверба во далечната 1962 година.

Барние, конзервативниот француски политички ветеран, кој ги водеше преговорите на Европската унија со Велика Британија за излезот на земјата од ЕУ, на оваа функција беше поставен од претседателот Емануел Макрон во септември годинава.

Барние ја презеде функцијата по неколкунеделната неизвесност предизвикана од одлуката на Макрон да одржи предвремени парламентарни избори во јуни и јули. Поради сето тоа Барние од самиот старт на работата на неговата малцинска влада беше во ослабена позиција.