-На 03.11.2025 во 02:43 часот на ул.„Тодор Проески“ во Крушево, полициски службеници го лишија од слобода В.М.(28) од Крушево. Претходно, тој со патничко возило „фолксваген голф“, кое го управувал, удрил во паркирано патничко возило и го напуштил местото. По преземени мерки, тој бил пронајден и било констатирано дека е под дејство на алкохол, односно дека има 1,80 промили алкохол во крвта, по што веднаш бил исклучен од сообраќај и задржан во полициска станица, информираат од МВР.
Основното јавно обвинителство Битола поведе постапка против две лица за кривично дело – Убивање и мачење животни од член 233 став 3 во врска со член 22 од Кривичниот законик.
Осомничените се 44-годишен посредник во организација на борби со кучиња и 43-годишник кој во дворот на семејна куќа во битолското село Црнеец подготвил заграден ринг каде се организирале борбите.
Со постапката за истото кривично дело се опфатени и еден грчки и еден косовски државјанин кои во моментот се во бегство. Сите заедно, на 1 ноември во вечерните часови, заради користољубие, грубо злоупотребувале и изложиле на непотребни маки куче од расата „пит бул”, сопственост на осомничениот грчки државјанин, наведувајќи го да се бори со куче од расата „американски стафорд“, сопственост на осомничениот косовски државјанин.
Во борбата кучето од расата „пит бул” се здобило со повреди – угризи од другото животно. Борбата ја следеле други лица од Косово, Грција и од Македонија, кај кои полициските службеници пронашле парични средства во различни апоени на евра и денари, а двајцата сопственици на кучињата во рингот веднаш по пристигнувањето на полицијата избегале од местото на настанот. Тие се идентификувани и по нив се трага.
Јавниот обвинител до судијата на претходна постапка од Основниот суд во Битола достави предлог за определување мерка притвор за македонските државјани инволвирани во организација на забранетите борби. Сепак, Судот донесе решение со кое им определи мерка куќен притвор. Битолското обвинителство ќе вложи жалба на одлуката.
Прилепчани дојдоа и до третата победа од исто толку натпревари во Првата кошаркарска лига. Овојпат на домашен терен, Мега Баскет беше подобар од Водно санс (110:84).
По изедначената прва четвртина во која домашниот тим сепак се стекна со предност од три поени (26-23), во втората дојде до првото посериозно резултатско одвојување. Прилепчани заиграа уште поефикасно во нападот, и до големиот одмор се стекнаа со висока позитива (56-41).
Одличната игра домаќините ја потврдија со слично одигран втор дел, особено висока предност постигнаа во последната четвртина (29-17), за убедлив триумф изразен со 26.поени.
Нова одлична партија прикажа Враниќ, кој застана на бројката од 30.поени, следен од Нешиќ, кој постигна 21, Митков кој даде 19, и Радически, стрелец на 14.поени.
Кај Водно санс шутерски расположен беше Сребров, кој дојде до 28.реализации, Бајалџиев имаше 15, а Јоскоски уште 11.поени.
Овие резултати на стартот од сезоната треба да бидат аларм за општината и бизнис секторот максимално да го поддржат Мега Баскет. Да помогнеме сонот да стане реалност – Прилеп одново да има СУПЕРЛИГАШ!
Фудбалскиот натпревар меѓу Победа и Шкендија Арачиново (0-1) доби свое „трето полувреме“. Се случи скандал кога лут навивач од Прилеп го скрши прозорот на соблекувалната со гостински навивачи, а веднаш потоа беше тргнат од страна на полициски службеник.
Поради тоа, со официјална реакција решија да се обратат и од страна на прилепскиот второлигаш. Победа објасни дека инцидентот е предизвикан од страна на гостинските фудбалери. Имено, дел од играчите на Шкендија Арачиново по крајот на мечот фрлале со шишиња вода кон трибината на која беа навивачите, по што следел инцидентот.
„Фудбалскиот клуб Победа од Прилеп уште еднаш покажа високо ниво на организација при одигрувањето на натпреварот против екипата на Шкендија Арачиново, кој се одигра во фер и спортска атмосфера сè до последниот свиреж на судијата.
Иако мечот помина без поголеми проблеми на теренот, по неговото завршување настана инцидент предизвикан од провокација на дел од гостинската екипа. Според присутните сведоци, кон домашната публика беа фрлени шишиња од страна на играчи и членови на гостинскиот тим, што предизвика реакција од дел од прилепската публика.
Навивачите на Победа, испровоцирани од ваквиот потег, спонтано реагираа, но ситуацијата брзо беше ставена под контрола благодарение на брзата интервенција на обезбедувањето и присутните редари, како и полицијата.
Од клубот ФК Победа истакнуваат дека натпреварот бил организиран според сите пропишани стандарди и мерки за безбедност, и дека инцидентот настанал исклучиво како резултат на несоодветното однесување на гостинската екипа по завршувањето на мечот.
И покрај непријатниот епилог, прилепскиот клуб останува посветен на спортскиот дух, фер-плејот и почитта кон сите противници, со надеж вакви појави да не се повторуваат на фудбалските терени, соопштија од клубот.
Се очекува да се види реакцијата од страна на Фудбалската федерација на Македонија и Дисциплинската комисија за ситуацијата.
Со 19 гласови разлика, Нико Чонески победи во вториот изборен круг над својот конкурент од СДСМ, Томе Христоски, и ќе биде нов градоначалник на Крушево. По прославата на победата, Чонески се обрати на социјалните мрежи и вети многу работа, но и ревизија на досегашното работење во општината.
ФБ статусот на новиот градоначалник на Крушево во целост во продолжение:
-Победата не е моја, таа е на сите нас!
Сите заедно победивме со желбата Крушево да биде поубаво и попросперитетно место за живеење, но и попривлечно за посетување!
Од утре ќе работиме на она кое го ветивме во текот на изборната кампања, но и на многу повеќе од тоа.
Победата ми е особено драга бидејќи одлучија малку гласови, а тоа е уште еден доказ дека СЕКОЈ ГЛАС Е ВАЖЕН.
Во иднина, кога ќе го видите Крушево какво сакаме да биде-ЕСНАФСКО, сетете се дека токму вие пресудивте! И јас ќе се сетам на тоа и ќе ја оправдам вашата доверба.
Ви ветувам ревизија на досегашното работење во општината и институциите и ветувам дека ќе имате градоначалник за сите луѓе, за сите проблеми и градоначалник кој нема да користи службено возило, дневници и репрезентации.
Вечерва е време да прославиме, од утре е време за акција!
Во деновите што му претходеле на ослобудувањето и конечното изгонување на германскиот и бугарскиот окупатор од територијата на Прилеп, претходеле жестоки борби. Многумина ќе кажат дека Македонците биле помогнати од овој или оној, но според историските податоци македонскиот народ речиси целосно сам го избркал непријателот, особено во Прилеп. Градот херој бил главното упориште и во овој дел на историјата, нескршливоста и упорноста на прилепчани била главниот бедем со кој се соочил непријателот.
На Брдо, под пиварата, 3 топа противавионски и една чета Германци кај железничката станица.
На “Црвени Брегови”, на излезот кон Битола 2 противавионски топа и 2 артилериски, како и 300 Германци.
Штабот на 15 корпус на 24 октомври издал наредба да на 28/29 октомври 41 и 49 девизија да го нападне и ослободи Прилеп. Претходно на 27 октомври единиците на 41та девизија го ослободиле Кавадарци.
На 29 октомври бил запоседнат Плетвар од страна на XI бригада. Германците биле опседнати околу селото Плетвар. Наредниот ден првиот баталјон го започнал нападот, но германските сили ги збиле своите редови и го одбиле првиот и вториот јуриш. По четириесет часовна борба Германците биле совладани. Наредниот 31 октомври, Германците биле потпомогнати со засилени трупи и вршеле силен притисок да продрат повторно до Плетвар, но сите нивни заложби биле неуспешни, бидејќи бргадата се држела добро и пружала силен отпор.
Силни борби се воделе и на Маркови Кули. Таму германските сили биле потпомогнати и од артилериско оружје, а нашите трупи иако биле со малку муниција го напаѓале непријателот, дури и со камења. Ги држел силниот дух и желбата за слобода. Во повлекувањето кон Варош и Прилеп, Германците ги запалиле зградите на Институтот за тутун, за веднаш потоа сите сили ги упатат повторно кон Плетвар каде и успеале да направат продор помеѓу позициите на XI бригада. Но обидите биле спречени од страна на Штабот кој издал наредба V бригада да изврши напад од кај касарните и да го пресечи патот за Плетвар.
Во мугрите на трети ноември започнал и последниот напад за ослободување на Прилеп. Последните германски истрели откај гробиштата и Варош набргу запреле. Најтешката задача ја имал Третиот баталјон кој во огромен јуриш, правејќи жртва, настојувал да зароби што повеќе непријателски војници. Кај седум часот се слушнала и последната германска детонација, кога биле активирани мините под Ленишки мост. Тоа е последната акција за Прилеп и оттогаш градот живее слободно.
Во последните два дена треба да се напомене дека Прилеп дал 78 жртви, херои на Народноослободителната војска на Македонија. Германците претрпеле 160 жртви и стотици ранети и заробени. Со запленетото оружје, борците се упатиле кон Битола, при што ја ослободиле на 4ти ноември.
ВЕЧНА НЕКА ИМ Е СЛАВАТА НА ЗАГИНАТИТЕ ХЕРОИ, ПРИЛЕП ПАМЕТИ И ДОСТОЈНО СЕ СЕЌАВА НА СЕКОЈ ОД НИВ.
Имено во овие денови во Прилеп распоредот на германските сили бил следниот: 600 војници и офицери во касарната, северно од неа 2 топа и 5 митралески гнезда. Кај месноста “Садика”, од едната страна на реката 2 тешки митралези, а од другата уште 3.
Кандидатот за градоначалник на ВМРО-ДПМНЕ Александар Јовановски победи во Кичево.
Неофицијално, според првичните резултати од овие локални избори кандидатот на ВМРО-ДПМНЕ го победи Фадмир Дехари од ДУИ во вториот круг и после 12 години владеење на ДУИ во оваа општина, Македонец ќе ја предводи општината.
Нико Чонески е нов градоначалник на Крушево, според информации од ВМРО-ДПМНЕ, тој победи над актуелниот градоначалник Томе Христоски во вториот изборен круг со триесетина гласа разлика.
Чонески во првиот круг беше во негатива од околу 400 гласа, но во вториот круг крушевчани и жителите на околните населени места масовно излегоа на гласање и се случи пресврт.
Во највисокиот град на Балканот имаше исклучително висока излезеност од 70%.
Со тоа Христоски после два мандати ќе ја напушти градоначалничката функција и ќе ја отстапи на човек со визија и проекти за целосна промена на Крушево.
На 01.11.2025 во 23:00 часот во с.Црноец, битолско, полициски службеници од СВР Битола ги лишија од слобода А.Д.(49), К.С.(43), Р.Б.(48) и Б.Н.(53), четворицата од Косово, Г.С.(51), И.Ж.(41), М.Х.(43) и В.Л.(43), сите од Битола и В.М.В.(59) од Штип. Тие се затекнати во дворното место на М.Х. во селото, каде што организирале нелегални борби со кучиња. Притоа, пронајдено е едно повредено куче и предмети кои потекнуваат од кривичното дело.
По целосно расчистување и документирање на настанот, против лицата ќе биде поднесена пријава по член 233 од Кривичниот законик – „мачење животни“.
И на Балканот ништо ново… не стивнуваат реакциите по големиот гаф што го направи познатата фолк-пејачка на концертот во Македонија.
Кралицата на балканската фолк-музика, Светлана Цеца Ражнатовиќ, концертот во Македонија ќе го памти засекогаш.
Имено, таа на 31 октомври одржа концерт во спортската сала Гемиџии во Велес кога заради еден непромислен чекор што го направи на сцената, и веруваме, ненамерно, следуваше вистинско фијаско.
Имено, Цеца во еден момент доби бугарско знаме од публиката кое го бакна, a потоа и го префрли преку рамениците.
Овој гаф што пејачката го направи во Велес предизвика негодување кај самата публика, но и бурни реакции на социјалните мрежи.
Цеца веднаш се извини, но…
По концертот се огласи и Цеца, која истакна дека знамето го добила од фанови од публиката и дека сакала само да ги испочитува, без намера никого да навреди, а најмалку публиката во Македонија.
И како што самата вели во своето обраќање, не и е прв пат да истакнува знаме на сцената, без никаква намера некого да повреди.
„Тоа е моја публика, мој народ, мои луѓе. Нас не поврзува љубовта кон песната, без разлика кој од каде доаѓа“, изјави таа по концертот.
Со слична изјава се огласи и Мики Секуловски, кој беше со неа на сцената кога пејачката испровоцира многумина со бугарското знаме.
Од снимките што испливаа на социјалните мрежи, може јасно да се види дека тој во прв момент се фати за главата кога виде што се случува, а потоа се обидуваше да ја смири публиката во салата.
И како што самиот вели, Мики најпрво не видел дека станува збор за знаме, туку мислел дека е некоја порака за Цеца од нејзините фанови. Но кога публиката почнала да реагира, Мики сфатил каква „глупост“ направиле, па веднаш и го земал знамето на Цеца и го отстранил, но како што самиот вели, штетата веќе беше направена.
Мики во ова свое обраќање и се извини на публиката, но и потенцираше дека Цеца не знаела за проблемот што Македонија го има со Бугарија, бидејќи во спротивно, најверојатно поинаку ќе реагирала.
Таа ме погледна збунето, не знаеше ни што се случува. Но штетата веќе беше направена“, вели Мики во видеото.
„Можеби требаше јас порано да изреагирам, но навистина не забележав дека се работи за бугарско знаме… Навистина жално, навистина штета што се случи оваа случка, никој не очекуваше дека, во мојот град, во Македонија, ќе се вее бугарското знаме, никој не го помисли тоа“, вели Мики.
Навистина ми е жал, требаше да биде прекрасен концерт, и беше додека не се случи оваа.. несреќна случка“, изјави пејачот.
Обраќањето на Мики погледнете го во продолжение, но погледнете и дел од реакциите под истото на социјалните мрежи.
