Со цел да се подигне свеста за значењето на превенцијата и раното откривање на карциномот на дојка, во организација на Комисијата за еднакви можности меѓу мажите и жените при Советот на Општина Прилеп, се одржа едукативна трибина посветена на женското здравје.
На трибината, специјалистите по хирургија, д-р Димитар Иваноски и д-р Гордана Љушиќ, говореа за факторите на ризик, препознавањето на првите знаци, редовните превентивни прегледи и важноста од навремена дијагноза. Преку стручни совети и отворен разговор, присутните имаа можност да добијат корисни информации и одговори на прашања поврзани со оваа болест.
Пораката од трибината е јасна, карциномот на дојка не треба да биде тема за која се молчи или се одложува разговорот. Редовните прегледи, информираноста и навременото реагирање се важни чекори во грижата за сопственото здравје.
Општина Прилеп продолжува да поддржува активности кои придонесуваат за здравствена едукација, подигање на јавната свест и поголема грижа за здравјето на жените.
Затоа што превенцијата почнува со информираноста, а грижата за здравјето не треба да чека.