Фудбалерите на футсал клубот Победа стигнаа и до третиот триумф во Втората лига, откако синоќа ја поразија екипата на Кораби со 6:4.
Ова беше прв пораз за Кораби сезонава, и сега заедно со Победа имаат по 10 бода на третото и четвртото место на табелата.
За Победа головите ги постигнаа: Борче Сркески, Виктор Тошески 3 и Борче Макешоски 2.
Во наредното коло прилепчани гостуваат кај Конзули.
Пејачката Соња Тарчуловска ја објави својата нова песна и видео спот насловени како “Маки македонски”. Се работи за една прекрасна носталгична балада посветена на сите Македонци, особено на тие чие потекло е од Егејска Македонија.
Слушнете ја во продолжение:
На 12.11.2023 во 02.30 часот, во ноќен клуб во Охрид, од страна на полициски службеници приведен е М.И.(34) од Битола.
Полициските службеници од Одделението за недозволена трговија со дрога кај М.И. пронашле кокаин.
По целосно документирање на настанот, против М.И. ќе биде поднесена соодветна пријава – информираат од МВР.
СВР Битола ги потсетува возачите на моторни возила дека од 15 ноември па се до 15 март треба да ја поседуваат пропишаната зимска опрема, согласно одредбите утврдени во Правилникот за задолжителна опрема на возилото, за безбедно учество во сообраќајот на патиштата.
Согласно Правилникот, како зимска опрема на моторните возила со најголема дозволена маса која не надминува 3.500 кг. се подразбира:
· зимски пневматици на сите четири тркала, со минимална длабочина на шарите на нагазниот слој по обем и широчина од четири милиметри;
· пневматици со летен профил на сите четири тркала со длабочина на нагазниот слој по обем и широчина, со минимум од најмалку 4 мм., ако возилото во приборот поседува синџири за снег со адекватна големина за погонските тркала или други соодветни помагала.
Како зимска опрема за моторни возила со погон на четири тркала (4×4) се подразбира:
· зимски пневматици на сите четири тркала, со минимална длабочина на шарите на нагазниот слој по обем и широчина од 6 мм;
· пневматици со летен профил на сите четири тркала со длабочина на нагазниот слој по обем и широчина со минимум од најмалку 4 мм., ако возилото во приборот поседува синџири за снег и во случај кога имаат постојан погон, синџири за снег треба да имаат најмалку за задната осовина, а во случај на преклоплив погон, синџири за снег треба да имаат најмалку на постојано вклучената осовина.
Како зимска опрема на моторните возила со најголема дозволена маса која надминува 3.500 кг. се подразбира:
· зимски пневматици на погонските тркала со минимална длабочина на шарите на нагазниот слој по обем и широчина од 6 мм.
· пневматици со летен профил на сите четири тркала, со длабочина на шарите на нагазниот слој, по обем и широчина со минимум 4 мм, ако возилото во приборот има синџири за снег со адекватна големина за погонските тркала или други соодветни помагала;
· автобуси и товарни моторни возила кои поради технички причини не можат да постават синџири за снег на погонските тркала треба да имаат зимски пневматици на погонските тркала и прирачен алат – лопата.
Зимски пневматици се оние пневматици кои на својата бочна страна имаат ознака „MS”, “M+S”, “M & S” и знак на снегулка на стилизирана планина со три врва.
Во согласност со Правилникот за задолжителна опрема на возилата, во патниот сообраќај на возилата е забрането поставување на пневматици со клинци.
Апелираме до граѓаните да се придржуваат кон законската обврска за поседување на зимска опрема, бидејќи така овозможуваме непречено и безбедно одвивање на сообраќајот на патиштата во зимски услови.
„Потребно е да се донесе закон во кој што ќе има јасно нивелирање на примањата на функционерите.
Треба тоа да биде достоинствено имајќи в предвид одговорноста што ја имаат, но не треба да биде толкава разликата колкава што е сега“, изјави лидерот на ВМРО-ДПМНЕ Христијан Мицкоски, во интервју за „Република“.
Тој најавува промени во тој правец кога ќе дојде неговата партија на власт.
„ВМРО-ДПМНЕ ќе донесе закон кој што ќе биде фер, закон кој што ќе ги намали примањата од оваа сума која што е сега“, порача Мицкоски.
Тој изрази загриженост за состојбата на Буџетот која била катасстрофална и алармантна.
„Во која смисла е алармантна и катастрофална? Во смисла дека покрај тоа што има многу криминал, многу сива економија и приливите не се онака како што се планира и посебно во делот на данокот за додадена вредност“, рече претседателот на ВМРО-ДПМНЕ.
Мицкоски додаде дека потребни се параметри според кои може да се види точно каква е состојбата во Буџетот и така ВМРО-ДПМНЕ врз основа на тие параметри ќе каже што може граѓаните да очекуваат.
По трета минута во видеото:
Жители на долненското село Дебреште се собраа пред обложувалницата во нивното село и побараа отстранување на ВЛТ апаратите.
Тие велат дека ако апаратите не бидат доброволно отстранети, самите ќе преземат чекори за нивно отстранување.
Најавија и нов протест, на кој како што велат ќе бидат многу побројни.
На 11.11.2023 во 22.30 часот во Прилеп од полициски службеници е лишен од слобода Р.Р.(51) од Прилеп, затоа што кај него биле пронајдена и одземена прашкаста материја.
По целосно документирање на случајот ќе биде поднесен соодветен поднесок – информираат од ОВР Прилеп.
Во емисијата „Слободен печат“, Вицепремиерот за економски прашања Фатмир Битиќи уште еднаш истакна дека владините мерки даваат резултат, а инфлацијата е на ниво како пред кризата.
– Мерките што ги преземаме даваат резултат. Кажавме дека до крајот на годината ќе ја завршиме на висина со скоро исто ниво на инфлација како што имавме и пред кризата. 3.5% последната инфлација, последниот месец, порача вицепремиерот за економски прашања Фатмир Битиќи.
Тој напомена и дека последниов месец има зголемување на цените во малопродажбата за само 1 процент, што укажува на минимална промена. Понатаму, Битиќи најавија зголемување и на минималната и на просечната плата, при што минималната плата во март ќе достигне 22.500 денари.
Во текот на изминатата вечер (11/12.11.2023) во периодот од 22.00 до 04.00 часот на територија на СВР Битола спроведена е засилена акциска контрола за санкционирање на возачи кои управуваат возило под дејство на алкохол. При контролата санкционирани се 48 возачи.
Од нив 34 на територија на Прилеп, по 5 во Битола и Македонски Брод, 2 Ресен и по еден во Демир Хисар и Крушево. За време на контролата биле санкционирани и 48 други видови прекршоци.
Засилените сообраќајни контроли продолжуваат и во наредните денови. Апелираме до граѓаните да ги почитуваат сообраќајните правила и прописи.
Ракометарите на РК Прилеп го претрпеа и седмиот пораз во Супер лигата, откако попладнево загубија од фенерџијата на табелата, екипата на Вардар Неготино.
Ако во пресрет на натпреварот сите ракометни вљубеници во Прилеп очекуваа лесен триумф, а во тоа веруваа и самите ракометари, екипата на Боби Мојсов повторно разочара.
Крајниот резултат на семафорот беше 32:28 (18:12 на полувремето), резултат кој најблаго речено е срамен, особено за екипа која во пресрет на стартот на првенството ветуваше дека ќе се бори за плеј-оф разигрувањето.
За една недела Прилеп гостува во Скопје, кај другиот Вардар, а пред плеј-аут разигрувањето ќе игра уште со Мулти Есенс на домашен терен и кај Голден Арт.
