Основното јавно обвинителство Скопје поведе истражна постапка против 33-годишник од Арачиново, бидејќи постои основано сомнение дека сторил кривично дело – Убиство според член 123 став 3 во врска со член 19 (во обид). Освен тоа, за осомничениот е поведена постапка и за – Предизвикување општа опасност по член 288 став 1 од Кривичниот законик.

На 11 септември, осомничениот се обидел со умисла да лиши од живот две лица, кои вербално протестирале затоа што со голема брзина управувал автомобил „Ленд ровер“ по плочникот кај трговскиот центар „Бисер“ во Аеродром, предизвикувајќи значителна опасност за животот и телото на луѓето.

Во моментот кога оштетените му забележале за опасноста што ја предизвикува, тој завртел со возилото и со голема брзина се упатил кон нив со намера да ги прегази. Тие се тргнале, па осомничениот излегол од автомобилот со нож во раката и на двајцата им нанел по четири убодни рани, предизвикувајќи им повеќе тешки телесни повреди.

Во тој момент се собрала поголема група граѓани кои почнале да викаат и му се спротивставиле на осомничениот со што го спречиле да го доврши кривичното дело, па тој се вратил во неговото возило и веднаш го напуштил местото.

Јавниот обвинител до судијата на претходна постапка од Основниот кривичен суд Скопје попладнево достави предлог за определување мерка притвор за осомничениот, бидејќи постојат околности што укажуваат на опасност од бегство, можност да ја попречува кривичната постапка со влијание врз сведоците и особени околности кои го оправдуваат стравот дека ќе го доврши обиденото кривичното дело.

Патниот правец Битола – Граничен премин Меџитлија е во прекин за сите возила поради случена сообраќајна незгода, информираа од АМСМ.

Инаку, сообраќајот на државните патишта се одвива непречено, по суви коловози.

Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

Потсетуваат дека поради асфалтирање на регионалниот пат Р1102 Велес – Градско (стариот пат), сообраќајот ќе биде во прекин утре во периодот од 08:00 до 18:00 часот.

На Крим се одржаа првите осум аукции за продажба на национализираниот имот на украинските олигарси, објави претседателот на Кримскиот парламент Владимир Константинов.

Склучени се купопродажните договори во вредност од над 815 милиони рубљи (околу 8,5 милиони долари), рече тој и додаде дека станува збор за станбени и деловни објекти.

Како што наведе, по аукциите буџетот на Крим треба да се зголеми за околу 27 милиони рубљи.

Претходно, парламентот донесе одлука за национализација на неколку украински олигарси поврзани со “режимот” во Киев.

Меѓу нив се и имотот на најбогатиот Украинец Ринат Ахметов, бизнисменот Игор Коломојски кој неодамна беше уапсен во Киев под обвинение за корупција, поранешниот украински премиер Арсениј Јацењук.

Планирано е на овој начин да се продадат околу 100 згради, меѓу кои и станот на украинскиот претседател Володимир Зеленски во одморалиштето Ливадија.

Лидерот на Чеченската Република Рамзан Кадиров е во кома, соопшти Украинската тајна служба (ГРУ).

Како што пренесуваат странските и украинските медиуми, претставникот на тајните служби на Киев, Андриј Јусов изјавил дека здравствената состојба на чеченскиот лидер во последните денови значително се влошила.

Како што се наведува, влошувањето на неговата здравствена состојба не е последица на некаква повреда, туку веројатно на веќе постоечки болести.

Russian and Chechen Telegram channels are writing that the Chechen head of state and staunch Putin supporter Ramzan Kadyrov has fallen into coma. Ukrainian intelligence is also reporting it. #geopolitics pic.twitter.com/yWmb6YitMG

— Velina Tchakarova (@vtchakarova) September 15, 2023

По поразот на гостувањето кај Башкими, црвено-белите од Прилеп доживеаја нов неупех на гостувањето кај Беласица во Струмица.

Домаќините поведоа со голот на Стојанов во 5-та минута, а струмичани заминаа со сигурна предност од 2:0 на полувремето со погодокот на Милушев во 38-та минута.

Во вториот дел Победа немаше сили за изненадување, а Беласица стави крај на натпреварот со погодокот на Мичковски во 82-та минута за 3:0.

Прилепчани сепак успеаја да го ублажат поразот преку Амил Табаковиќ кој прецизно стрелаше во 87-та минута.

Победа се наоѓа на 8-та позиција на табелата со 7 освоени бодови, а местата кои водат во повисок ранг веќе изгледаат далечни, иако одиграни се само 5 кола.

На прилепчани во среда им следува дуел од 16-финалната рунда во Купот на Македонија, а ќе гостуваат во Струга кај Јанг тим.

Во следното коло пак од шампионатот во Втората лига, црвено-белите ќе го пречекаат Новаци.

Министерот Оливер Спасовски во интервју за „Фокус“ запрашан дали МВР има информации за прегрупирање на криминалните групи во освојувањето на наркопазарот, а во врска со последните неколку пресметки во кои беа убиени неформални лидери на криминални банди, потенцираше дека најважната работа е што МВР сериозно се насочи кон криминалните групи и сузбивањето на криминалот во државата.

„Без никакви калкулации и најефикасно работиме во сузбивањето на било која од тие криминални групи што делувале не само сега, туку делувале и биле градени изминатите 30 години по независноста на Македонија и најмногу простор им се даде во делот на функционирањето на режимот. Паднаа во вода кажувањата дека едните или другите групи, не знам – од Грчец, од Арачиново, Сарај, Чаир итн. – не биле процесуирани. Во последните месец дена три најголеми криминални имиња се уапсени и одведени пред лицето на правдата“, рече Спасовски појаснувајќи дека станува збор за три лица поврзани со случајот ‘Планина’, кои беа од кланот Грчец. Тој додаде дека врз основа на сите обезбедени докази, МВР жестоко се бори против криминалните структури, а тоа е задача и на оперативната акција „Безбеден град“ и на сите активности што беа преземани во изминатиот период. „Нема да има пардон за никого и во ниту еден момент“, истакна министерот Спасовски.

За наводните информации дека нарко-групата „Барон“ периодов зема замав и дека уапсените за двојното убиство во „Шиша бар“ се припадници на оваа група, министерот Спасовски објасни дека штом се уапсени – веќе не постои група, таа е разбиена.

„Важно ми е дека секој еден кој смета дека е посилен од државата, длабоко мора да се разочара, затоа што нема посилен од државата – ни криминалец, ни функционер, ни граѓанин, никој не може и не смее да биде посилен од државата“, порача министерот за внатрешни работи Оливер Спасовски.

На нешто помалку од четири месеци до почетокот на Европското ракометно првенство, организаторите објавија дека овој турнир ќе биде убедливо најпосетениот во историјата.

Германија можеби најдобрата земја за домаќинство на еден континентален собир, најмногу поради одличната инфраструктура, големите сали и стадиони, а од организацијата најавија дека веќе е срушен првиот рекорд, иако првенството не ни започнало.

Токму македонската репрезентација ќе ја има честа да настапи на премиерниот натпревар, кога на „Меркур-Шпил Арена“ во Дизелдорф, ќе се соочиме со силната Франција.

Генералниот секретар на ЕХФ, Мартин Хауслајнтер, изрази големо задоволство од интересот и официјално соопшти дека повеќе нема билети за првиот натпреварувачки ден од првенството. Франција ќе биде голем фаворит против Македонија, но нашата репрезентација ќе има историска можност да заигра на отворен стадион, пред 50.000 ракометни фанови.

Организаторите велат дека сѐ уште има многу билети за останатите мечеви, но првиот ден е комплетно распродаден и се најавува спектакл на отворањето на туринирот. Македонија и Франција ќе се сретнат на 10 јануари во 18:00 часот, а домашната Германија ќе игра против Швајцарија, со почеток во 20:45 часот.

Нашите ракометари се во тешка група со Германија, Франција и Швајцарија, но надежите за позитивни резултати секогаш постојат. Се очекува и големо присуство на „фалангата“, која сигурно ќе им даде огромна поддршка на нашите репрезентативци. Европското првенство во ракомет започнува на 10 јануари, а натпреварот за златниот медал е закажан за осумнаесет дена подоцна.

Минатата недела се случи еден од најголемите срамови коишто правото и правосудството ги видело во Македонија. На шверцерски начин протнувајќи го Кривичниот законик со европско знаменце, со цел ВМРО ДПМНЕ да не може да поднесе илјадници амандмани и на тој начин да го блокира носењето се вршат измени во два клучни члена, едниот е членот 353 којшто се однесува на злоупотреба на службена положба и овластување и вториот е членот 394 којшто се однесува на злосторничко здружување. Тоа се двата члена по којшто се гонат сите којшто вршат злоупотреба на службена положба и овластување, односно да бидам подиректен сите оние коишто своите извршни функции ги користат за криминал. Тоа се двата клучни члена за да се гони било кој функционер. Затоа што на пример за злосторничко здружување многу јасно пишува во законот кој помина дека се прави измена со којашто зборовите “до 10 години” се заменува со “до 3 години” што значи дека застареност настапува за 6 години. Да преведам, кривични дела коишто на пример Зоран Заев ги направил во 2017 година како Премиер заедно со двајца министри и тројца директори потенцијално, и така се формира злосторничко здружение веќе во моментов се застарени, пишува во колумна за „Фокус“ потпретседателот на ВМРО-ДПМНЕ Александар Николоски.

Владата којашто дојде на чело на Македонија со паролата “нема правда нема мир” ја убива правдата во Македонија со застарување на кривични дела. Владини коалициони партнери коишто предлагаа измени на Уставот со цел да немало застарување на кривичните дела за криминал и корупција сега гласаа измени на кривичен законик со којшто ќе се овозможува застарување на кривични дела за криминал и корупција. Надежта на актуелната власт е дека в година ќе се случат избори коишто ќе се случат максимално подоцна колку што можат и на тие избори знаат дека ќе изгубат, надежта им е кривичните дела да застарат затоа што гледаат како да стигнат до застареност од 6 односно 10 години зависи за кое кривично дело се работи, така што калкулираат колку долго биле на власт, кои биле на власт со цел да застарат делата во иднина.

Јасна е целта, знае власта на СДСМ и ДУИ дека ги пакува куферите и се обидуваат да си изгласаат амнестија за себе, но да им кажам правдата ќе ги стигне сите! Идната Влада на ВМРО-ДПМНЕ апсолутно ќе ги гони, ќе се најде правен начин како да се гонат. Нека не се надеваат дека поблагиот закон ќе можат да го користат и дека ќе може да се повикуваат на застареност. Ќе се најдат начини како да се гонат. Не се само два члена во кривичниот законик, не е само злосторничко здружување и злоупотреба на службена положба и овластување си има и други членови по коишто ќе им се најде начин да се гонат. Знам дека ова звучи како закана, но мора на крај и закани да испраќаме затоа што е јасно дека се оди на амнестија. Најдобар доказ дека се работи за закон којшто е безобразен и којшто значи амнестија за криминал е што Министерот за правда не го потпишал, а пратениците на неговата партија не го гласаа. Министерот знаел што има во законот и не сакал да го потпише и не беше присутен во Собранието да го брани истиот овој закон, затоа што ова е закон што не се брани.

Самото тоа што законот се предлага со европско знаменце и се закажува комисија во 18 часот попладне во денови кога број 1 скандал и случај во Македонија е случајот со Онкологија со цел да не се пренесе ова во јавност покажува дека намерите овдека не се чесни односно дека намерите се амнестија за криминал . Но тоа следната Влада на ВМРО ДПМНЕ нема да го дозволи. Одворност ќе има, казни и правда ќе има!, пишува Николоски во својата колумна.

На 12ти септември, во Министерството за надворешни работи беше повикан Амбасадорот на Руската Федерација кому му беше врачена дипломатска нота, со која тројца дипломати во Амбасадата на Руската Федерација во Скопје беа прогласени како непожелни во државата (persona non grata), известија од Министерството за надворешни работи преку писмено соопштение испратено до медиумите.

-Ваквата одлука е донесена по информациите добиени од надлежните органи за превземени активности кои се во спротивност со Виенската конвенција за дипломатски односи, појаснија од ресорното министерство.

На ова реагираше и Русија преку портпаролката Марија Захарова, која рече дека протерувањето на руските дипломати од Македонија немало да помине без одговор.

Времето денеска ќе биде променливо облачно со сончеви периоди и нестабилно со локален пороен дожд и грмежи, особено во попладневните часови. Претежно во источните делови процесите локално ќе бидат поинтензивни во форма на невреме со силен ветер и појава на град.

Минималната температура ќе биде во интервал од 11 до 17, а максималната ќе достигне од 24 до 31 степен. УВ-индексот ќе има вредност 5.

Во Скопје ќе биде променливо облачно со сончеви периоди, попладне во делови од котлината нестабилно со пороен дожд, грмежи и засилување на ветерот. Минималната температура ќе се спушти до 15, а максималната ќе достигне 29 степени.

Според прогнозата на УХМР, и во недела времето ќе биде нестабилно со локален пороен дожд и грмежи, на места со поинтензивни процеси во форма на невреме со силен ветер и појава на град.

-Потоа следува сончево и топло време со мала до умерена облачност, попладне со изолирана појава на краткотраен дожд и грмежи, соопшти Управата за хидрометеоролошки работи.