Првиот снег за оваа година ги израдува прилепчани, особено што минатата зима изостанаа снежните врнежи во градот под Марковите Кули.

Снежната бајка го предизвика фотографот Андреј Златаноски преку дрон фотографии да ни го долови градот од причја перспектива.

Сакам да ги споменам пензионерите кој што ги гледаме со месеци буквално измрзнати, гладни чекорат по плоштадите и улиците барајќи правична распределба на средствата од буџетот, барајќи линеарно зголемување на пензиите кои што тие во оние средби кои што јас ги имав со нив изминативе два месеци го поставија тој праг на околу 5.000 денари, истакна Христијан Мицкоски, претседател на ВМРО-ДПМНЕ на денешната дебата на тема „Економски принципи“ која е во рамки на настанот „Важно е! Платформа за иднина“ која е дел од кампањата „Важно е! Од тебе зависат промените“.

Претседателот Мицкоски во текот на своето обраќање најави дека следната влада на ВМРО-ДПМНЕ во рок од една година ќе ги зголеми линеарно пензиите од 5.000 денари за сите пензионери во Македонија.

-Преку една дебата која што ја водиме во рамките на партијата во изминатиот период и преку оние информации кои што ги имаме за моменталната состојба на буџетот, но и за очекувањата за обврските во периодот што следи можам да кажам дека следната влада на ВМРО-ДПМНЕ во рок од една година линеарно ќе ги зголеми пензиите од 5.000 денари за сите пензионери во Македонија. И ова е ветување кое што сакам да го дадам од оваа говорница, од оваа трибина дека во рок од една година од изборот на влада на ВМРО-ДПМНЕ пензионерите ќе ги добијат линеарно тие 5.000 денари зголемување на пензиите, потенцираше Мицкоски.

Toj порача дека пензионерите го заслужуваат тоа.

-Наместо тие сега да ги чуваат внуците или да уживаат во своите пензионерски, заслужени денови, ги гледаме како премрзнати, гладни протестираат на плоштадите и низ улиците, додаде Мицкоски.

Од секогаш сум сакала нешто повеќе, а тоа ми го понуди Словенија. Не само во образованието, туку и во сегашната работа и животот тука, во Копер, во еден систем кој нуди можности за добар живот, сигурност и напредок. Вака 30-годишната радовишанка Сандра Атанасов ја почнува својата приказна за сонот за кој мечтаела, а денес на јаве го има. По диплома е физиотерапевтка, а по занимање осигурителен агент. Таа е сопруга и мајка на три деца.

РАДОВИШ – МАРИБОР – КОПЕР

„Во Словенија сум од 2012 година. Дојдов сама во Марибор, каде ме примија како редовна студентка. Тогаш моите мечти почнаа да се остваруваат. Бев во држава која ти нуди можност да работиш и да студираш и од млади години да научиш како сам да си го оствариш сонот, како да си ја оствариш својата животна визија. Таа можност секако дека многу значи, но само за оние кои имаат цел во животот“, раскажува Сандра за првите години од нејзиниот живот во Словенија.

Во 2013 година го запознала нејзиниот денешен сопруг. Набргу од Марибор се преселиле во Копер, каде и денес живеат. Во 2016 им се родила ќерката, а првиот син во 2018. Веќе во 2019 година купуваат сопствена куќа, а во 2022 им се раѓа и вториот син.

Сопругот на Сандра е електричар во „Лука Копер“, а таа работи како агент во осигурителна компанија. Вели, задоволни се и од условите за работа и од платата и од односот на колегите и претпоставените. Се присетува на првите денови кога дошла во Словенија и кога, како странец, вели, не очекувала премногу. Но, средината и односите со луѓето ја демантирале, па сега со радост повторува дека особено и е мило што со колеги од факултетот и ден денеска другаруваат, иако таа е на едниот, а тие на другиот крај на Словенија.

ПОЧНАВМЕ ОД НУЛА

Почнале од нула, вели Сандра, а сега се презадоволни што постигнале.

„Да се биде дел од словенечкиот систем е навистина задоволство. Професионални институции, коректен однос, култура на високо ниво, европски стандард, високи еколошки стандарди, менталитет… Особено како родител сум презадоволна што имам сигурност за иднината на моите деца, пред сè во делот на образованието и средината во која растат. И јас и сопругот сме задоволни и од третманот на работа и од висината на платите. Можности за напредување секогаш има, а ниту јас ниту сопругот ни за момент не сме биле деградирани затоа што сме странци. Никогаш не ни било речено – тоа за вас не важи, странци сте. Почнавме од нула, но комбинацијата од нашата желба и упорност со можностите што ги нуди словенечката држава, ни овозможи да си го остваривме сонот – и приватно и професионално“, вели Сандра.

РЕФОРМИТЕ СЕ КЛУЧОТ

Паралела меѓу Македонија и Словенија не ѝ тешко да направи, бидејќи како што вели, нивоата се сосема различни – од приватен живот и менталитет, до професионален ангажман и однос.

Во Македонија, вели, го почувствувала животот и во мала и во поголема средина. Детството го поминала во Радовиш, а средношколските денови во Штип, кога се јавила желбата за поразвиен свет, за напредување во образованието, за спокоен и безбеден живот. Тогаш ја одбрала Словенија. И, како што вели, не погрешила.

Не крие дека никогаш не размислувала да се врати назад, но не крие и дека сака и Македонија да го достигне нивото на Словенија. Но, од она што го гледа непосредно во „новата дома“, Македонија мора да запне повеќе со реформите, особено во образованието и здравството. Роднините, пријателите и Македонија, вели, никогаш не ги заборавила, ги посетува секогаш кога може. И додава дека би била пресреќна кога Македонија би била на нивото на Словенија, од секој аспект.

Во периодот од 9 до 23.11.2023 год., во детското село Песталоци во Троген – Швајцарија, 40 ученици и 6 наставници – супервизори од ООУ “Климент Охридски” Прилеп, учествуваа на меѓукултурна размена со други држави од Европа.

-Во работните денови учениците посетуваа настава, каде низ работилници на креативен начин ги надоградија своите знаења за детските права, и ги применија во различни активности. Низ деновите на оваа размена беа посетени градовите Констанц, Луцерн и Сент Гален, уживаа во глетката на водопадите на реката Рајна, Боденско Езеро и посетија видиковец од кој можеа да се видат прекрасните Алпи. Во воннаставните активности беше посетен и музејот Технорама. Учениците имаа презентација на нашето училиште, градот Прилеп и нашата држава Република Македонија на локалното радио, низ емисија емитувана во живо. Изработија и акциски планови за активности кои следат во наредниот период,
и преку кои ќе ги запознаат своите соученици со стекнатите знаења и вештини – информираат од училиштето.

Низ приказните од Старата битолска чаршија исполнети со историјата, традицијата и безвремениот мелос, Битола започнува да ја ткае својата „Зимска приказна“.

Зачинета со вкусот на топлото турско кафе, мирисот на варено вино и вкусна храна низ занаетчиските улици, трговските сокаци каде спојот на денешната и минатото создава носталгија, чаршијата се подготвува да ја доближе својата приказна до младите генерации, но и да го врати џагорот, заживувајќи низ светлината која ја заслужува.

Токму затоа, Општина Битола, годинава во својата „Зимска приказна“, го става срцето на Старата чаршија, од каде ќе започне новогодишното украсување на градот. Иако, изостана понуда на идејно решение за новогодишно украсување на Битола на јавниот повик, објавен од општината во април годинава, сепак повеќе субјекти од градот покажаа интерес за свој придонес во планирањето на овогодишната Зимска приказна и новогодишниот блесок на градот.

На состанокот одржан со претставници од чаршијата и невладиниот сектор кој се залага за нова гастрономска култура инспирирана од традицијата, беше договорено, општината преку своите соработници да ја креира главната слика на украсувањето на чаршијата, збогатена со новогодишни елки, светлечки и други елементи, а новогодишниот базар презентиран низ штандови и куќарки, да биде збогатен со културно – забавни содржини, кои ќе придонесат чаршијата да живее во текот на целиот ден. Согласно планираното, се повикуваат и сите дуќанџии преку украсување на своите дуќани, во духот на приложената фотографија, да дадат свое учество во креирањето на магичната зимска приказна на Битолската Стара чаршија.

Во новогодишна светлина, општината ќе се погрижи да заблескаат и Саат кулата, плоштадот Магнолија и Широк Сокак, а програмата на „Зимската приказна“, со содржини за сите генерации ќе продолжи околу новогодишната елка и детските реквизити кај Офицерскиот дом. Локалната самоуправа, го повикува и јавното претпријатие за стопанисување со станбен и деловен простор, со украсување на Безистенот да земе свое учество во креирањето на новогодишната слика на Битола.

Општина Битола е отворена за соработка и со сите деловни субјекти кои сакаат да учествуваат во заедничкото украсување на Битола и преку свои компактни содржини, ќе ја збогатат целосната слика. Само на овој начин, преку соработка на јавниот и приватниот сектор, може успешно да продолжи Зимската приказна која во досегашниот период покажа дека преку привлекување на многу гости, има голем туристички потенцијал, зошто најголемото богатство на градот се неговите култура, историја и традиција, кои заслужуваат да бидат соодветно презентирани.

Во прилог Ви го претставуваме идејното решение, планирано за Старата битолска чаршија, во кое се препорачува да се вклопат и индивидуалните украсувања на корисниците на објектите.

Во текот на изминатата вечер (25/26.11.2023) во периодот од 22.00 до 04.00 часот на територија на Битола и Прилеп спроведена е засилена акциска контрола за санкционирање на возачи кои управуваат возило под дејство на алкохол.

При контролата, санкционирани се 17 возачи под дејство на алкохол. Од нив 12 на територија на Битола, а 5 во Прилеп.

За време на контролата биле санкционирани и други видови прекршоци. Акциските сообраќајни контроли продолжуваат и во наредните денови.

Апелираме до граѓаните да ги почитуваат сообраќајните правила и прописи – стои во соопштението од СВР Битола.

Во вторник и во среда претпладне се очекува нов влажен бран, на планините и на некои повисоки места со врнежи од снег, а на пониските места со врнежи од дожд.

УХМР соопшти дека утре времето ќе биде сончево и многу студено, особено во утринските часови, кога температурата во најголем дел од земјава ќе се спушти под -5, а на места и под -10 степени.

Во вторник и во среда претпладне се очекува нов влажен бран, на планините и на некои повисоки места со врнежи од снег, а на пониските места со врнежи од дожд. Во вторник ќе дува засилен јужен ветер.

Според УХМР, кон крајот на неделата дневната температура ќе се зголеми.

После 8 кола без триумф, екипата на РК Прилеп вечерва конечно победи. На домашен терен е совладан Мулти Есенс и повторно потешко од очекувањата.

Крајниот резултат на семафорот беше 34:31 (16:19 на полувремето). Иако прилепчани имаа водство во првиот дел, кон крајот на полувремето гостите од Скопје стигнаа до 3 гола разлика.

Сепак, четата на прилепчани предводена од капитенот Филип Велески “отрезна” во вториот дел, и иако се мачеа на теренот, сепак стигнаа до толку посакуваната победа.

Владан Кастратовиќ и Пеце Рајатоски постигнаа по 7 погодоци, а еден помалку даде Денис Шабановиќ.

До крајот на есенскиот дел од сезоната, РК Прилеп ќе одигра уште натпревари дома против Еурофарм Пелистер и ќе гостува кај Голден Арт.

Во рамки на 13-то коло од Втората фудбалска лига, прилепска Победа гостуваше во Тетово кај Арсими и прими дури 8 голови.

Домаќините како со денови да тренирале на тешкиот каллив терен, па беа далеку поснаодливи и уште во провото полувреме постигнаа 5 погодоци.

Победа успеа да намали на 5:1, но до крајот прими уште 3 гола. Единствениот погодок за црвено-белите го постигна Бојан Ивчески.

Со овој нов пораз победашитие се се поблиску до опасната зона за испаѓање. После ова коло остануваат на 15 бода и паднаа на 12-то место на табелата.

Во наредното коло на програмата е пелагониското дерби. Во Прилеп доаѓа Пелистер кој е третопласиран.