Основното јавно обвинителство Прилеп поведе постапка против едно лице за кое постои основано сомнение дека сторило кривични дела – Полово вознемирување од член 190-а, Загрозување на сигурноста од член 144 став 5 и Демнење од член 144-а став 1 од Кривичниот законик, соопштија од ПР службата на Јавно обвинителство.

Основното јавно обвинителство Прилеп поведе постапка против едно лице за кое постои основано сомнение дека сторило кривични дела – Полово вознемирување од член 190-а, Загрозување на сигурноста од член 144 став 5 и Демнење од член 144-а став 1 од Кривичниот законик, соопштија од ПР службата на Јавно обвинителство.

-Во текот на ноември, осомничениот на својот Фејсбук профил во повеќе наврати поставувал текстуални објави и вклучувања во живо со кои се заканувал дека ќе нападне врз животот на основната јавна обвинителка на ОЈО Прилеп и членови на нејзиното најблиско семејство. Намерата му била да ја вознемири и да ја исплаши, а врз основа на пол, личен, семеен и општествен статус на оштетената како Јавен обвинител. Во објавите осомничениот неовластено користел приватни и семејни фотографии на оштетената. Преку социјалните мрежи тој директно праќал пораки со вознемирувачка содржина до ќерката на јавната обвинителка, предизвикувајќи кај неа непријатност, навреденост и страв. Осомничениот е претходно осудувано лице за кривично дело – Загрозување на сигурноста, а против него во последниот период се поднесени и повеќе други кривични пријави, што укажува на опасноста тој да повторува вакви кривични дела, истакнуваат од ЈОРСМ

Поради тоа, како и фактот дека постојат околности кои укажуваат на опасноста осомничениот да се даде во бегство доколку се брани од слобода, јавниот обвинител до судијата на претходна постапка од Основниот суд во Прилеп достави предлог за определување мерка притвор. Предлогот е прифатен и Судот со решение му определи притвор во траење од 8 дена, додаваат од ЈОРСМ

Со пригодна програма и положување на цвеќе пред бистата на Св. Климент Охридски, истоименото училиште од Прилеп денеска го започна одбележувањето на својот патрон празник.

На положувањето на цвеќе му претходеше литературно читање и ликовна работилница, а во текот на денот ќе се одржат и спортски натпревари.

“Ние никогаш не го имавме видено без работа, туку секогаш, дење и ноќе ги учеше младите да читаат и пишуваат на различни начини, некому покажуваше како се пишуваат буквите, на другите им ја појаснуваше смислата на Писмото, а на трети пак им ја водеше раката за да пишуваат. Понекогаш во исто време правеше две работи, пишуваше книги и ги подготвуваше младите за некоја наука” – напишаа од училиштето во чест на Светиот Климент Охридски.

Инаку, ова основно училиште во Прилеп важи за едно од најуредените и со најдобри услови за работа, не само во градот под Марковите Кули, туку и на ниво на целата држава.

Родителите се горди што нивните деца посетуваат настава во ова училиште, а наставниците се благодарни на одличните услови за работа.

Нека е честит и нека е вечен споменот на духовникот и еден од најистакнатите ученици на светите браќа Кирил и Методиј, како и прв македонски архиепископ – Светиот Климент Охридски.

Македонија денес го чествува св. Климент Охридски, најистакнатиот ученик на солунските браќа св. Кирил и Методиј и учесник во извршувањето на познатата Моравска мисија.

Според календарот на МПЦ (Јулијанскиот календар) денеска е 25 ноември.

Денеска е Св. Климент Охридски – Чудотворец.

Свети Климент се роди во Рим, а потекнуваше од царски род. Во младоста отпатува на Исток, каде што се запозна со верата во Христос. Учители му беа самите апостоли.

По враќањето во Рим беше избран за епископ во престолниот град. Подоцна, во времето на императорот Трајан, свети Климент беше протеран во Херсон, каде беше осуден на смрт и фрлен в море со камен околу вратот. Пострада за Христа во 101 година. Своевремено, неговите мошти ги пронајдоа светите браќа Кирил и Методиј и ги пренесоа во Рим.

Свети Климент Охридски го носеше своето име по углед на овој голем Христов светилник.

Свети Климент Охридски, родоначалник на словенската литература и црковно беседништво, прв оригинален словенски и македонски поет, говорник, преведувач, заштитник на Охрид бил назначен за прв словенски епископ на Балканот.

Овој ден е прогласен за Ден на свети Климент Охридски, патронен празник на Македонската православна црква. Во негова чест, во Република Македонија се доделува секоја година наградата „Св. Климент Охридски“ со која се оддава највисоко признание за долгогодишни остварувања во областа на воспитанието, образованието, културата, уметноста, здравството, спортот и заштитата и унапредувањето на човековата околина и во социјалната дејност.

Свети Климент е основач на познатата Охридска книжевна школа која е наречена уште и прв словенски универзитет, каде што се образувале над 3 500 ученици. Паралелно со црковната и со педагошката дејност се занимавал и со книжевна и преведувачка дејност. Нему му се припишува авторството на опширните житија на св. Кирил и Методиј познати како Панонски легенди, најзначајниот извор за проучувањето на животот и делото на солунските браќа.

Извадоци од полицискиот билтен на МВР

-На 06.12.2023 во 12.30 часот во СВР Скопје, Д.Д.(26) од Прилеп пријавил дека на подрачјето на Карпош бил физички нападнат од Д.С.(48) од Скопје. По целосно документирање на случајот ќе следува соодветен поднесок.

-ОВР Прилеп поднесе кривична пријава против И.Р.(22) од Прилеп, поради постоење основи на сомнение за сторено кривично дело „загрозување со опасно орудие при тепачка или караница“. На 14.11.2023 во семејниот дом, по претходна расправија, пријавениот се обидел со нож да го нападне својот татко.

-ОВР Прилеп поднесе кривична пријава против И.Д. (31) од Прилеп поради постоење основи на сомнение за сторено кривично дело „напад врз службено лице при вршење на работи од безбедноста“. На 31.10.2023 во Прилеп, пријавениот физички нападнал полициски службеник кој извршувал службени дејствија.

-ОВР Прилеп поднесе кривична пријава против Б.Б.(39) од с.Крушејани, поради постоење основи на сомнение за сторено кривично дело „загрозување со опасно орудие“. На 09.11.2023 во с.Крушејани, пријавениот физички го нападнал М.З., по што се обидел да го нападне и со тврд предмет.

Културниот сектор на Ученичкиот парламент при СОУ Гимназија „Мирче Ацев“ Прилеп организира „МЕСЕЦ НА МАКЕДОНСКИ ФИЛМОВИ“. Имено, во месец декември, секоја среда, кабинетот по Физика ќе биде преуредуван во училишна кино сала во која ќе има проекција на некој македонски филм.

Капацитетот на училишната „кино сала“ е 70 посетители. Целта на ваквата активност е учениците да се запознаат со некои од македонските филмови, да им се вроди љубов кон нив и воопшто кон филмската уметност, да го почувствуваат кино амбиентот, макар и во импровизирани услови, да се дружат, да се забавуваат и да се подигне културната свест кај учениците.

Оваа иницијатива произлезе од учениците Евгенија Димитриовска, Софија Димитриеска, Горјан Ристески и Елена Јандреовски, кои воедно се и реализатори на проекциите.

Оваа среда, 06.12, во 20 часот, се прикажуваше филмот „Викенд на мртовци“. Импровизираната кино сала беше исполнета до последното место.
По завршувањето на проекцијата учениците имаа позитивни коментари за настанот.

Проекцијата се реализира со техничка поддршка на проф.Николче Богданоски.

Во тек е подготовка на нови ставка во сметките за струја, таканаречена “Пристап до мрежа“, која ќе биде покрај постојната за мрежарина, открива првиот човек на Регулатрна (РКЕ) Марко Бислоимовски, за „Независен“.

Бислимовски уверува дека тоа нема да ги зголеми сметките, или тоа ќе биде незначително, но истовремено ќе придонесе да се направи правична распределба на трошоците меѓу оние кои редовно ја користат мрежата, од другите кои тоа го прават повремено, како во викендичките, или пак поради тоа што користат сопствено производство на струја од фотоволтаици.

„Просечната цена за мрежарина останува иста.

Овој пристап кон мрежа кај домаќинствата ќе биде минимален, три-четири евра и тој ќе се плаќа месечно, вели првиот човек на РКЕ.

Никој нема да биде оштетен, само правиме поправична распределба. Јас имам викендичка во Галичник, кога ќе отидам вклучувам и имам струја. Во годината трошам 400 киловат-часови. Но, не учествувам со ништо за одржувањето во текот на годината. Со минимален пристап кон мрежа, како трошок, ќе имаме правична распределба и јас ќе учествувам заедно со домаќинствата кои што плаќаат редовно. За сметка на тоа, за да не се разбере погрешно, ќе се намали трошокот за мрежарина.

Значи тие активно што користат ќе имаат бенефит од тоа“, вели Бислимовски во интервју за Независен.

Теодора Силјаноска од Прилеп е избрана за најдобар студент на Факултетот за информатички и комуникациски технологии, при Универзитетот “Св. Климет Охридски” во Битола.

Запишана во академската 2019/2020 година, Теодора студиите ги заврши со висок 9,80 просек, а за постигнатиот успех денеска на свеченото доделување на дипломите, и’ беше доделена посебна Пофалница.

Честитки за младата прилепчанка и желби за уште поголеми успеси во иднина! Прилеп треба да се гордее на вакви млади луѓе!

На 13 декември 2023/ среда/ од 19.30 ч. во кино “Мис Стон” ќе се одржи премиерата на првиот долгометражен документарен филм за Блаже Конески – „Јанѕа“, според мотиви од „Дневник по многу години“ на Конески, од истакнатиот македонски документарист, Никола Т. Калајџиски. Филмот е подготвен во продукција на „Контраст филм“, а продуцент е Златко Димески.

Режисер и сценарист на филмот е Никола Т. Калајџиски. Монтажата е на Аристид Филактов, додека композитор на музиката е Златан Миливоевиќ, а дизајнер на звук е Дарко Спасовски. Како директори на фотографија се јавуваат Дејан Димески и Петар Кочишки.

Филмот се остварува сo поддршка од Агенцијата за филм на Северна Македонија.

Филмот „Јанѕа“ е подготвуван и сниман во период од три години и го следи животот и делото на професорот, академик, поет и еден од кодификаторите на македонскиот литературен јазик, Блаже Конески. Огромното значење на делото на Конески за македонската култура и наука и воопшто за нашата држава се претставува преку кажувањата на повеќе истакнати академици, универзитетски професори и воопшто научници / истражувачи од областа на македонистиката и воопшто од областа на лингвистиката, книжевната наука и културологијата, вклучително и странски македонисти кои важат за познавачи на делото на великанот – негови современици и потомци.

Сценаристот и режисер на филмот, познатиот документарист Калајџиски, зад себе има кариера со голем број документарни филмови кои се прикажувани на домашни и меѓународни фестивали. Овој негов најнов филм, посветен на централната личност на македонскиот XX век, се очекува да фрли нова светлина врз ликот и делото на Конески, затоа што не само што во целост го претставува неговиот влог за македонската култура и наука, како и воопшто за современата македонска држава, туку опфаќа и димензии на неговата личност кои не се многу коментирани во досегашните осврнувања за великанот и малку познати сегменти од неговата биографија.

Во организација на Боречкиот клуб “7-ми Мај” од Прилеп, денеска во спортската сала на ООУ “Гоце Делчев” се одржа осмиот по ред меѓуучилишен натпревар, на кој учество зедоја млади борачи од речиси сите основни училишта во Прилеп.

Борачите прикажаа одлични борби, а најдобрите добија и дипломи. Натпреварот го посети и градоначалникот на општина Прилеп, Борче Јовчески, на кого организаторите му доделија Благодарница за поддршката на прилепското борење.

Овој натпревар е загревање за тоа што ги чека борачите на “7-ми Мај” Прилеп пред крајот на есенската сезона на натпревари. Утре женската екипа патува на силен турнир во Белград, а машките борачи ќе заминат за Петрич, Бугарија.

Се надеваме дека како и секогаш одново ќе не’ израдуваат со нови успеси и медали. Да им посакаме среќен пат и успешно претставување на борилиштата.

Американската амбасадорка во земјава Анџела Агелер денеска изјави дека постојат различни начини и во различни етапи за да се изрази незадоволството на лицата кои САД ги поместуваат на „црната листа“. Таа денеска за време на посета на Криволак одговараше за новинарски прашања во врска со најавите на поранешниот вицепремиер Кочо Анѓушев дека ќе ја обжали одлуката на Стејт департментот, кој го стави на „црната листа“ поради значителна корупција.

Таа повтори дека листата ќе се проширува со нови лица, но не кажа кога и со кого, нагласувајќи дека не може да предвиди што ќе одлучи Вашингтон.

-Има различни етапи и различни начини на кои луѓето кои се наоѓаат на „црната листа“ можат да пријават незадоволство но во секој случај ние имавме најавено санкција. Оваа санкција е воведена и ова не е нешто што лесно го прифаќаме и лесно го спроведуваме, но сепак ги следиме позитивните законски прописи на САД при воведувањето на ваквите санкции. Сите ве уверувам дека ќе има и други имиња. Нема конкретна временска рамка кога ќе се објават, рече Агелер, додавајќи дека во земјава има епидемија на корупција, која треба да биде спречена.

Американскиот Стејт департмент во вторникот објави дека го означува Кочо Анѓушев како генерално неподобен за влез во Соединетите Американски држави, поради неговата вмешаност во значителна корупција.

– Додека ја извршуваше функцијата вицепремиер, Анѓушев ја злоупотреби својата службена положба во корист на неговите приватни деловни интереси, поткопувајќи ја довербата на јавноста во Северна Македонија во нивните владини институции и јавни процеси, се наведува во соопштението објавено од Стејт департментот.

Оваа ознака, посочуваат од Стејт департментот, ја потврдува посветеноста на САД за борба против корупцијата, која му штети на јавниот интерес, го попречува економскиот просперитет на земјите и ја намалува способноста на владите ефективно да одговорат на потребите на својот народ.

Агелер се огласи истиот ден преку платформата X, нагласувајќи дека именувањето на Кочо Анѓушев е уште еден доказ дека САД ќе продолжат да ги санкционираат корумпираните актери во земјава и во регионот, без разлика на нивната позиција, политичка определба или времето на злоупотребите.

– Ќе следуваат повеќе назначувања, но факт е дека нашите напори и нашите санкции не можат да ја поправат епидемијата на корупција во Северна Македонија. На крајот на краиштата, останува на функционерите и граѓаните на оваа земја да побараат одговорност и промени, објави Агелер тогаш на платформата Х.