Денес од раните утрински часови под раководство на јавен обвинител од Основното јавно обвинителство за гонење на организиран криминал и корупција, Управата за финансиска полиција извршува претреси на повеќе локации во Прилеп и се приведуваат осомничени лица. Акцијата е резултат на повеќемесечна предистражна постапка, под кодно име „Цицач“, за кривични дела против службената положба, јавните финансии, платниот промет и стопанството што ја спроведе Управата за финансиска полиција во координација со Основното јавно обвинителство за гонење на организиран криминал.

Управата за финансиска полиција, како резултат на повеќемесечна предистражна постапка под кодно име „Цицач” до Основното јавно обвинителство за гонење на организиран криминал и корупција поднесе кривична пријава против повеќе физички и две правни лице, поради постоење на основано сомнение за сторени кривични дела ИЗМАМА и ПЕРЕЊЕ ПАРИ И ДРУГИ ПРИНОСИ ОД КАЗНИВО ДЕЛО од Кривичниот Законик на Република Македонија, со што е предизвикана штета на Фондот за здравствено осигурување на Република Македонија во износ од 35.551.472 денари.

Првопријавениот во својство на овластен потписник на банкарски сметки на пријавените правни лица како и овластен потписник на банкарските сметки на повеќе физички лица, заедно со второпријавениот и третопријавениот во својство на управители и сопственици на пријавените правни лица, во период од септември 2020 до октомври 2023 година со намера да се стекнат со противправна имотна корист за себе, со лажно прикажување на факти го довеле во заблуда Фондот за здравствено осигурување на Република Македонија да исплати парични средства по основ на користење на право за надоместок на плата за време на отсуство од работа поради бременост, раѓање и мајчинство на поголем број бремени жени-родилки, на начин што фиктивно ги вработувале во пријавените правни субјекти, како продавачки без да одат на работа, под услов да се бремени, притоа исплаќајќи им месечни примања во висина на минималната плата, за да по исполнувањето на законскиот услов од 6 месеци, извршат корекција на плата на многу поголеми износи од минималната, давајќи невистинити и лажни податоци во Управата за јавни приходи.

Првопријавениот во својство на овластен потписник на сметките на фиктивно вработените бремени жени – родилки, поголем дел од паричните средства кои биле исплатени од Фондот за здравствено осигурување по основ на плата за време на отсуство од работа поради бременост, раѓање и мајчинство ги присвоил за себе на начин што дел од паричните средства ги подигал во готово, а останатиот дел ги пуштил во оптек односно ги префрлил кон банкарските сметки на пријавените правни лица и кон сметката на шестопријавената по основ давање или враќање позајмици, а се со цел да го прикрие потеклото на нелегално стекнатите парични средства.

Со таквите дејствија пријавените лица го оштетиле Фондот за здравствено осигурување на Република Македонија за износ од 35.551.472 денари.

Среќна нова година, скопски стритери. Така стои во објавата на Никола Писарев. Тој има изработено 10 шарени куќички за вдомување на кучињата кои живеат во скопските маала. Тие се неговиот новогодишен подарок за кучињата во Скопје.

Никола најавува дека во текот на денот, куќичките ќе бидат наместени на различни локации во Скопје.

Македонските пензионери нема да добијат пензија на 1-ви јануари во 2024 година. Ова го соопштија од Министерството за труд и социјална политика. Причина за тоа е, неработниот ден по повод Новата година.

Од министерството ги известуваат сите пензионери дека пензиите ќе се исплатат на 2-ри јануари. Сите пензионери веќе на вториот ден од новата година ќе може да ги подигнат своите пензии од банкомат.

На 1-ви нема да работат ниту експозитурите на Банките.

Во 2023 година во дел од месеците Владата исплаќаше и порано пензии поради економската и ковид криза.

Во сабота бесплатни новогодишни пакетчиња за сите дечиња кои ќе дојдат кај Градскиот Саат во Прилеп

-Почитувани мои сограѓани, драги дечиња, родители, баби и дедовци ве поканувам во сабота 30.12.2023 со почеток од 11:00 часот на платото околу Градскиот саат, заедно во една пријатна атмосфера во рамките на Новогодишниот базар.

Празничните мигови носат светлост во секој дом, хармоничната атмосфера на претстојните празници нека донесе топлина во срцата – напиша градоначалникот на општина Прилеп, Борче Јовчески.

Учениците од нижото музичко училиште “Ордан Михајлоски – Оцка”, по којзнае кој пат докажаа дека Прилеп е огромен расадник на музички таленти.

Во вторникот талентираните ученици заедно со нивните ментори, во преполната сала на Центарот за култура “Марко Цепенков”, го одржаа својот традиционален Новогодишен концерт. Дечките се претставија со одлични изведби и ги воодушевија присутните.

Зад нив е уште една успешна година и голем број освоени награди и признанија, како на домашна сцена, така и надвор од Македонија.

Им посакуваме уште поуспешна 2024година!

Добротворната организација „The Big Help Project“ од Кенсингтон го објави на социјалните мрежи писмото на 10-годишната Лили до Дедо Мраз, кое многумина ги расплака.

„Драг Дедо Мраз, мама ми рече дека си болен оваа година и не можеш да дојдеш кај нас. Се надевам дека ќе оздравиш наскоро. Мислам дека тоа би го израдувало мојот брат! Те сака Лили (10 години). П.С. Бевме навистина добри“, се вели во писмото.

„Ниту едно дете не треба да пишува вакво писмо. „Едно од седум деца нема да добие подарок под дрвото овој Божиќ, а 24.000 деца во Ливерпул живеат во сиромаштија“, напиша организацијата и ги повика следбениците да се приклучат на проектот за донации.

View this post on Instagram

A post shared by Come Together Chrismas 2023 (@cometogetherchristmas2023)

Бордот на директори на Тутунскиот комбинат Прилеп донесе одлука да ги зголеми за 10% цените за откуп на тутунот од веќе договорените цени, соопшти министерот за земјоделие, Љупчо Николовски

„Исто така сакам да соопштам дека оваа година субвенцијата за прва класа ќе биде зголемена за дополнителни 20 до 30 денари односно ќе постигнеме рекордни субвенции по класи.

Најавувам уште неколку други мерки за тутунарите што ќе ги спроведеме за прв пат со што обезбедуваме досега најголема историска финансиска поддршка.

Македонската Влада и министерството не ги остава тутунарите сами. Државата прави се и ја вреднува маката на секој земјоделец. Затоа очекувам и другите компании при откупот на тутунот да ја следат оваа политика“ вели министерот Николовски.

Изложба на дела од ликовната колонија “Дрен 2023”, што се одржа годинава во јули, по 15. пат, отворена е во ликовната галерија од ЦК „Марко Цепенков“ во Прилеп.

На изложбата се претставени вредни дела од уметниците Павлина Копано, Славица Танеска, Александра Димитрова, Мирјана К. Массети, Дамјан и Елена Ѓуров, Стефан Анчевски, Благојче Наумоски – Бане, Методи Исков, Маја Ралева Миладиновски, Филип Јовески, Филип Перески, Маја Танеска, Тони Чатлески, Верче Николоска, Славчо Павлески, Габриел Димитровски, Филип Ристески, Елена Пантелиќ и Марјан Стојаноски, кои користејќи различни материјали, дрво, метал, прилепски мермер, односно природни материјали, содадоа творби кои остануваат трајно наследство за Центарот и државата, бидејќи колонијата се реализира со поддршка на Министерството за култура.

Преку 30 дела од меѓународната ликовна колонија „ДРЕН 2023“ се на увид пред љубителите на уметноста.

-Од многубројното и разнообразно творештвото коешто го создадоа уметниците – сликари и скулптори, можат да се препознаат и дефинираат повеќе разни ликовни стилови: експресионизам, минимализам, асоцијативна и геометриска апстракција, како и фантастичен реализам – вели м-р Викторија Димеска, историчар на уметност.

Денеска (27.12.2023), од страна на полициски службеници од СВР Битола -ОВР Прилеп при претрес во дом и други простории во Прилеп и на тезга во Градски пазар во Прилеп, во сопственост на А.Б.(47) од Прилеп, пронајдени се и одземени вкупно 2472 парчиња пиротехнички средства.

Заради сомнение за сторено кривично дело по член 396 од Кривичниот законик лицето е лишено од слобода и по документирање на случајот, против него ќе биде поднесена соодветна пријава – информираат од ОВР Прилеп.

Доколку праламентарните избори се одржат следната недела на гласање би излегле 46,4 проценти од гласачите, покажува анкетата на Институтот за политички истражувања – Скопје, изготвена по барање на Канал 5.

Анкетата покажува двојно поголема предност на ВМРО-ДПМНЕ пред СДСМ, а според испоитаниците политичар со најголема доверба е Христијан Мицкоски. Резултатите од анкетата детално ни ги пренесува Владимир Божиновски. Со него разговара Јован Ѓорговски.