Драги деца, за неколку дена ќе го славиме Божик, светиот ден кој е исполнет со значење за сите деца во секое семејство па затоа Божикното празнување ќе добие своја полнота кога вие младенците, ќе дојдете при јаслите на Богомладенецот зашто вие, со вашите невини души, чисти срца и искрени насмевки ги претставувате ангелите кои околу јаслите на Богомладенецот пееја: „Слава на Бога во висините, на земјата мир а меѓу луѓето добра волја.“

Драги младенци, Богомладенецот чие раѓање ќе го доживееме за неколку дена, откако ќе порасне, како возрасен човек, како Учител на божествената вистина, ќе покаже извонредна љубов кон децата. Тој ќе им рече на апостолите: „Оставете ги децата да дојдат кај Мене, не ги попречувајте“, и ќе додаде: „зашто на таквите им припаѓа Божјото царство“ (Мк. 10, 14). Друг пат ќе рече: „Ако не се повратите и не бидете како деца, нема да влезете во царството небесно“ (Мт. 18, 3).

Драги млади, гледате дека вие сте навистина важни во очите на Исус! Можеме дури и да кажеме дека Евангелието е полно со вистината за децата. Впрочем, Исус децата ги посочува како примери на кои возрасните треба да се огледаат ако сакаат да влезат во рајските населби. Детската едноставност, детската добрина, доверба, чистота на душата, детската искреност се особините со кои треба да бидат украсени сите возрасни луѓе кои сакаат да станат Божји деца и да влезат во вечниот живот.

Затоа, како што Христос повикувал да не им пречат на децата да појдат при Него, и ние како Црква, повикуваме и советуваме: Дојдете кај Новороденчето Христос! Вие родители, баби, дедовци, донесете ги младенците при Богомладенецот па преку причесната да се соединат со Него. На овој голем ден, апелираме и советуваме децата да се причестат. Во однос на подготовката за причест, според учењето на Црквата се препорачува децата од мали нозе да се учат на пост но, во случајов, барем последните неколку дена пред Божик. Ова не е задолжително за децата до седумгодишна возраст. Убаво би било но, не мора да постат ниту, пак, некој друг треба да пости за нив. За повозрасните деца се препорачува, поучно, да постат (пост на масло) како што рековме, барем последните два-три дена пред Божик. Утрото пред богослужбата младите треба да бидат гладни и жедни, освен бебињата до едногодишна возраст.
Бог ве сака, драги деца! Ова е она најважното што треба да го знаете во овие Божиќни празници, кои на посебен начин се ваши празници.

Се надевам дека ќе ви бидат радосни и мирни и ќе доживеете поинтензивно доживување на љубовта на вашите родители, на вашите браќа и сестри и на другите членови на вашето семејство.

Оваа љубов потоа мора да се прошири на целата заедница, дури и на целиот свет, токму преку вас, драги деца, и ќе може да допре до оние на кои им е најпотребна.

За божикните празници со радост ве очекуваме во нашиот храм „Св. Петка“ каде ќе можете да ја проследите и уметничката изложба од вашите врсници кои цртаа и пишуваа за Празникот на децата – Божик.

В.д. старешина на храм “Св. Петка Римјанка” -Точила
Протоереј Љупче Петрески

И за ова ли не знае министерката за одбрана Славјанка Петровска, прашува пратеникот Драган Ковачки, откривајќи нов скандал во Министерството и Армијата на Македонија.

-Во Министерството за одбрана имаме најнов изум на кој никој во институцијата се немаше сетено. Барем досега. Имено, политичкиот габарит Славјанка Петровска која си се испофали дека веќе инвестирала и ќе инвестира во човечки ресурси, има “иновативен” пристап во инвестирањето. Еве ја најновата иновација и “инвестиција” во човечки ресурси на Петровска: За да бидат примени како професионални војници, Албанци биле принудени да се пишуваат дека се Македонци. На тој начин им ги земале местата на кандидатите кои биле Македонци (?)!! Овде има партиска математика и истата е пред се’ поради партиските договарања и обидите на распаднатите од СДС да им се додворат на зелените од ДУИ за да на изборите одат со заеднички листи. Славјанка Петровска треба да знае дека одбраната на државата не трпи импровизации и изигрување на законите. За да го спаси трајно неспособниот Ковачевски од дебакл, не смее да им удоволува на своите газди од ДУИ и да си игра со полнење на армијата со кадри на кои утре ќе им ја довери одбраната на државата, а кои со лажна етничка припадност биле примени на работа во МО. Славјанка Петровска е директно одговорна за ова изигрување на законите и партиските пазарења во кои СДС повторно е искористен еднократно од страна на газдите од ДУИ. Се поставува прашањето дали Славјанка Петровска повторно потпишала нешто за кое не знаела, или да се изразам во нејзин стил – знаела ама не била информирана?, прашува Ковачки.

ЦРКВА СВЕТИ КИРИЛ И МЕТОДИЈ (ПАРАКЛИС)

ПЕТОК (05.01.2024)
– Преп. Наум Охридски – утринска богослужба и царски часови со почеток во 7:00 часот
САБОТА (06.01.2024)
– Бадник, преп.мчца. Евгенија – Утринска богослужба со Златоустова литургија и вечерна, со почеток во 7:00 часот.
НЕДЕЛА (07.01.2024)
– Рождество Христово – Божик – празнична утринска богослужба со Света Василиева литургија со почеток во 7:00 часот.
ПОНЕДЕЛНИК (08.01.2024)
– Собор на Пресвета Богородица – втор ден Божик – утринска празнична богослужба со Света Златоустова литургија со почеток од 7:00 часот.
ВТОРНИК (09.01.2024)
– Св. првомаченик и архиѓакон Стефан – празнична утринска богослужба со Света Златоустова литургија со почеток во 7:00 часот.

ЦРКВА СВ. ПЕТКА (ТОЧИЛА)

ПЕТОК (05.01.2024)
– Преп. Наум Охридски – утринска богослужба и царски часови со почеток во 7:00 часот
САБОТА (06.01.2024)
– Бадник, преп.мчца. Евгенија – Утринска богослужба со Златоустова литургија и вечерна, со почеток во 7:00 часот.
НЕДЕЛА (07.01.2024)
– Рождество Христово – Божик – празнична утринска богослужба со Света Василиева литургија со почеток во 7:00 часот.
ПОНЕДЕЛНИК (08.01.2024)
– Собор на Пресвета Богородица – втор ден Божик – утринска празнична богослужба со Света Златоустова литургија со почеток од 7:00 часот.
ВТОРНИК (09.01.2024)
– Св. првомаченик и архиѓакон Стефан – празнична утринска богослужба со Света Златоустова литургија со почеток во 7:00 часот.

ЦРКВА СВ. БЛАГОВЕШТЕНИЕ (СТАРА ЦРКВА)

ЦРКВА СВ. ПРЕОБРАЖЕНИЕ ГОСПОДОВО

На 02.01.2024 година полициски службеници од СВР Битола го лишиле од слобода Н.Ш.(60) од Битола. Имено, при претрес на тезга во новиот пазар во Битола и во неговиот дом на ул.„Охридска”во Битола пронајдени и одземени се над 200 парчиња петарди.

Лицето е приведено во полициска станица Битола при што по документирање на настанот ќе следува соодветна пријава по чл.396 од КЗ – информираат од СВР Битола.

Во организација на Детската Амбасада за Сите Деца во Светот, традиционално по 18-ти пат во Прилеп, над 400 деца ќе се дружат на свечен Божиќен ручек и ќе го прослават Христовото раѓање.

Вредностите кои се промовираат со самиот настан се: еднаквоста, љубовта и мирот помеѓу децата. Ништо не е позначајно од среќата на детското лице, па затоа на оваа Божиќна трпеза заедно се дружат деца од другите верски заедници, од исламската, католичката, еврејската и евангелско-методистичката, кои заедно го празнуваат еден од најголемите христијански празници – Христовото раѓање.

На оваа прослава Детската Амбасада за Сите Деца во Светот го доделува најпрестижното признание за општествена одговорност ОРДЕН ЗА НОСИТЕЛ НА МИРОТ.

Настанот традиционално се одржува на прв ден Божиќ, а оваа година дечињата ќе се дружат на трпеза во Хотел “Салида”.

Во Финска и Шведска денеска се забележани најниски температури во текот на оваа зима околу минус 40 Целзиусови степени.

Во селото Никалуокти, населено со домородното население Лапонско население во северна Шведска, температурата утрово се спушти на минус 41,6 степени, јави шведската јавна телевизија СВТ.

„Тоа е најниската температура забележана досега оваа зима, а на север и понатаму ќе биде прилично студено“, изјави метеорологот Нилс Холмквист.
Екстремно студеното време предизвика големи проблеми во железничкиот сообраќај во северна Шведска, соопштија железничките оператори, пренесе АП.
Шведскиот метеоролошки и хидролошки институт соопшти дека на неколку локации во северна Шведска се забележани температури од минус 30 степени.

Исто така, издаде предупредување за снег и ветер за централна и јужна Шведска, велејќи дека снежните врнежи и силните ветрови можат да предизвикаат проблеми во среда.

Неговото второ предупредување е на сила од полноќ до среда.

Во соседна Финска утрово е забележана рекордно ниска температура оваа зима во северозападниот град Јливијеска од минус 37,8 степени.

На неколку локации во регионот на Арктичката Лапонија забележани се температури пониски од минус 30 степени.

Главниот град на Финска, Хелсинки, исто така е погоден од силен студ, а се очекува оваа недела температурите да се движат меѓу минус 15 и минус 20 степени.

Финскиот метеоролошки институт издаде предупредување за екстремно студено време оваа недела со прогноза за пад на температурите под минус 40 степени.

На 01.01.2024г. во 18:30часот во СВР Битола е пријавено дека на регионалниот пат Битола-Прилеп кај местото викано “Џаферица”, на И.С.(67) од Прилеп додека управувал со патничко моторно возило марка “сузуки” со прилепски регистарски ознаки, му се слошило и возилото излетало од патот.

И.С. починал на лице место, а смртта ја констатирал лекар од итната медицинска помош. Во консултација до јавен обвинител телото на починатиот е предадено на семејството – стои во соопштението од СВР Битола.

Оваа година за прв пат во Прилеп ќе се одржи Божиќно село. Настанот ќе се одржи на паркингот од “КАМ” маркет во населбата “Точила” на прв и втор ден Божик, а почетокот на настанот е од 16.00h двата денови.

-Ќе уживате во пријатна божиќна атмосфера, божиќна музика, варено вино, греена ракија, топли напитоци, топла храна, bubble tea, божиќни колачи, божиќно катче за фотографирање со Дедо Мраз. Повелете сите заедно на овие убави празнични денови да создадеме спомени кои секогаш ќе ги памeтиме – велат организаторите на настанот.

Од два до четири денари поскапуваат цигарите и разни други тутунски производи од денеска поради измените на Законот за акцизите донесен во октомри годинава.

Тој предвидува усогласување на акцизната стапка кај цигарите со минималната акцизна стапка во ЕУ, како и изедначување на учеството на вкупната акциза на цигарите во пондерираната просечна малопродажна цена со онаа пропишана во Директивата на ЕУ.

-Овие измени произлегуваат од Директивата од 21 јуни 2011 година за структурата и износот на акциза за тутунски производи, со која се предвидува усогласување на вкупната акциза со утврдениот минимален износ на вкупна акциза во ЕУ кај цигарите. Дополнително, во Предлог Законот се предвидува доуредување на членовите од Законот за акцизите во делот на денатурираниот алкохол. Оваа измена произлегува од Директива од 29 јули 2020 година за усогласување на структурите на акцизите за алкохол и алкохолни пијалоци – пишува во образложението на законот.

Со предложените измени, мерните уреди за мерење на количина се различни од мерните уреди за мерење на волумен, се врши дополнување на одредбите за постапката на денатурирање на етил алкохол. Исто така се олеснува постапката за издавање на одобрение за повластен корисник на наведените субјекти имајки предвид дека овој услов се применува за издавање на одобрение за повластен корисник на деловни субјекти кои акцизните добра ги користат при производство. Исто така се уредува воведување растителен билен производ за пушење по пат на загревање, независно дали содржи или не содржи никотин, кој ќе подлежи на акциза, со цел ограничување на здравствените ризици поврзани со употребата на истиот, односно дефинирање на растителниот (билен) производ за пушење.

Се дефинира новиот акцизен календар, се дефинира износот на акцизата на цигарите и другите тутунски производи, како и течноста за електронска цигара. Потоа се врши усогласување со Законот за прекршоци во делот за водење на прекршочна постапка и ревидирање на прекршоците согласно тежината на прекршокот.

Предлагачите на овие законски измени, предвиделе дека со спроведувањето на измените на Законот за акцизите ќе има позитивни прилив во Буџетот на Македонија во износ од 797 милиони денари во 2024 година, 883 милиони денари во 2025 година и 782 милиони денари во 2026 година.

Бензините од ноќеска на полноќ поевтинуваат за половина денар за литар, а цената на дизел горивата се намалува за еден денар, одлучи денеска Регулаторната комисија за енергетика, водни услуги и услуги за управување со комунален отпад (РКЕ). Со одлуката се врши намалување на малопродажните цени на нафтените деривати во просек за 1,19 отсто.

Новата малопродажна цена на ЕУРОСУПЕР БС – 95 е 77 денари за литар, ЕУРОСУПЕР БС – 98 ќе се продава за 79,5, ЕУРОДИЗЕЛ БС (Д-Е V) за 73,5, а Екстра лесното масло за горење ЕЛ-1) за 73 денари за литар. Со одлуката на РКЕ за 0,839 денари за килограм се намалува и малопродажната цена на Мазутот М-1 НС и ќе изнесува 41,236 денари.

Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат намалување кај бензините во просек за 0,085 отсто, кај дизелот за 2,120, кај екстра лесното масло 2,043 и кај мазутот за 1,589 отсто. Курсот на денарот во однос на доларот по кој беа формирани цените со претходната пресметка е повисок за 0,869 отсто.