130 млади шахисти учествуваа на традиционалниот Меѓународен младински шаховски турнир “Наум Наумоски – Борче”. Шахистите беа поделени во 3 групи, и тоа: во категорија до 8 години, до 10 и до 18 годишна возраст.

Учество на турнирот зеде и 15-годишниот Никола Павлески од Прилеп, на кого за влакно му избега првото место на турнирот во категорија до 18 години.

Никола забележа 5 победи и две реми партии, а ова е негов највреден шаховски успех досега.

Да му посакаме желби за уште поголеми успеси во иднина и искачување на европски и светски шаховски пиедестали.

Пред музичкиот дел на 7.издание на Џез фактори фестивалот во Битола, се одржа промоција на книгите на новинарот и публицист
Љупчо Јолевски, “Радио“ и “Неправилен ритам- Приказни од современата македонска музичка сцена“, во Центарот за култура. Авторот заедно со повеќе уметници направија мултимедијална промоција.

За музичкиот дел се погрижија Јордан Костов и Глигор Кондовски, а водител беше актерот Игор Трпчески.
Дел од промоцијата беа и видео пораките на Крсте Роџевски, Бранко Николов (Фолтин), Сашо Поповски.
На промоцијата говореше и рецензентот, Дејан Трајкоски.

„Во нашиот медиумски контекст, Јолевски е УЧИТЕЛОТ. Се разбира, воопшто не е претерано да се каже така. Всушност, неправедно е да не се каже така. Затоа што на прстите од една рака се бројат луѓето со повеќедецениски стаж коишто со елан на младич пишуваат за состојбите во културата, а со таква силна наобразба. Доказ за тоа е тоа што, барем во музиката, нема новинар којшто подобро ја знае не само џез музиката, туку и музиката на светот, домашната андерграунд музика, и кој во исто време бил активен сведок на цела една повеќе од четири децениска музичка, но и културна историја“, истакна Трајкоски.

Присутните воодушевени, а авторот Јолевски истакна:
„Многу ми е драго кога ќе слушнам дека некој си поминал добро на некоја промоција. Кога ги подготвував моите две книги сакав да направам нешто што ќе ги надмине рамките кои се веќе востановени, работејќи и во електронски медум, но и во печатен, решив да направам магазински тип на книга, каде подеднакво важна ќе биде и фотографијата, но и пишаниот збор. Да се сретнат двете работи, да се вкрстат и да се направи нешто ќе го испровоцира читателот и визуелно, меѓутоа она што ќе го прочита, барем малку да му отвори некоја нова страница, некој нов видик, некои нови авантури да му донесе. Треба да се излезе од постоечките рамки и на промовирање на едно дело, музика, настан“.

Рече дека е посебно среќен затоа што се сретна со двајца многу добри колеги, пријатели, битолчани.

„Така е. Се сретнав со Панде Димитровски со кого своевремено бевме во весникот „Млад Борец“, еден од весниците кој го донесе македонското новинарство, македонската медиумска демократија. Тука е и Петар Ставрев со кого патував низ Европа, зборувајќи за колекциите на винил плочи и мојата желба е еден ден да ја стигнам таа негова колекција“.

„Радио“ е објавена пред пет години и е книга која се занимава не со радиото како медиум, туку со нешто друго, со сето она, што, како културна рубрика која Јолевски или како новинар, во културната рубрика на Радио Слободна Европа, успеа да го вообличи во радио прилог, во интервју, рецензија, во осврт, нешто што беше емитувано на програмата, нешто што, беше трка со времето, стигна на време, сето тоа, да излезе во час, час и половина, прво како текст, па како радио прилог, па потоа како, веб-сајт.

„Неправилен ритам“ се занимава со современата музичка сцена, книга во која на 800 страници се поместени бројни интервјуа, со по авторот најзначајните ликови на она што претставува наша музика, македонска музика: Анастасија, Архангел, Влатко Стефаноски, Леб и сол, Симон Трпчески, Дарија Антовска итн.

На самата промоција вниманието го привлече девојчето кое едноставно се качи на сцената и танцуваше додека одеше видео записот на Сашо Поповски.

„Иднината на македонската култура, танцот, македонскиот џез“ коментираа сите.
„Неправилен ритам“ е посветена на трите внуци на Јолевски.

„Книгата е посветена и на сите оние деца, идни генерации кои ќе имаат услови да направат нешто повеќе за нашата Македонија, ваква каква што ја знаеме, што би рекол Симон Трпчески центарот на светот и Македонија лулка на културата“, додаде Јолевски на промоцијата.

Љупчо Јолевски професионалната новинарска кариера ја започнал во почетокот на 1980-те во весникот на младите на Македонија – „Млад борец“. Безмалку едновремено со почетокот од Интердисциплинарните студии по новинарство на Универзитетот „Свети Кирил и Методиј“ во Скопје. Најнапред бил соработник, потем и новинар и уредник на културната рубрика во Редакцијата. Паралелно соработувал во Македонската радио телевизија, на почеток во младинските емисии на Втората програма во Радиото, а потоа како автор и водител на музичко-забавната емисија ВИДЕОМЕТРОНОМ и на контактната НЕДЕЛНО ПОПЛАДНЕ. Една деценија подоцна, во 1990-те се префрла во Втората програма на Македонското радио, каде бил новинар и водител на неколку контактни и музички емисии, за да од 1995 година покрај редовните програмски обврски, цели четири години биде уредник – координатор на култната Стотројка (Музичкото радио – Канал 103), која во тој период за своите програмски дострели ја добива и Годишната награда на МРТВ. Истото ова признание што го доделуваше МРТВ Љупчо Јолевски, како новинар и уредник, ќе го добие во 1998 година. Во таа декада и половина, тој со своите текстови бил присутен во ревијата Екран, изданијата на Детска радост – посебно НАШ СВЕТ, во НОВА МАКЕДОНИЈА (соработник на Оливер Белопета во подготовката на саботната Музичката страница), магазините „Рок“, „Време – забаве“, „Македонско време“, „Град“… На почетокот на новиот милениум Јолевски од МРТВ заминува во Телевизија Скопје (подоцна Алфа) и неделникот „Старт“. Од таму, патот го води во ДНЕВНИК, каде скоро четири години бил новинар и уредник на Забавната рабрика. Потем исто толку време поминал во новооснованиот дневен весник ВРЕМЕ и во наредните три години бил задолжен за екипата новинари од оваа област во НОВА МАКЕДОНИЈА. Паралелно, цели деценија и половина ја водел сопствената музичка авантура „Скопје, Париз – Тексас“ на РАДИО РАВЕЛ, бил уредник и на македонскиот месечник за култура LIFE MAGAZIN, соработувал во подготовката на единици за македонската музика во Светската музичка енциклопедија и на делот за Македонија и нејзината современа музика во енциклопедиското издание на МУЗИКА, оригинално објавено во Велика Британија и потем преведено во балканските земји од белградска „Просвета“. Речиси од самото основање на Радио Слободна Европа на македонски јазик и се до пензионирањето (октомври 2022 година), Љупчо Јолевски беше новинар и дописник на овој светски медиум. Инаку, Љупчо Јолевски има објавено две книги „Радио“ и „Неправилен ритам – Приказни од современата македонска музичка сцена“ и за својата долгогодишна работа во новинарството минатата година ја доби наградата „13 ноември“ што ја доделува Град Скопје.

На 6 април 2024 /сабота/ во 12.00 ч. во кино Мис Стон ќе се прикажи анимираниот филм „Кариран нинџа“. Влезниците по цена од 100 денари ќе се продаваат на билетарницата од киното во петок од 10 до 13.00 ч. и сабота – два часа пред проекцијата на филмот.

Податоци:

„Кариран нинџа“

Тема: Булинг
Rежија: Торбјорн Кристоферсен и Андерс Матесен
Сценарио: се базира на книгата од данскиот комичар Андерс Матесен, кој исто така го режира филмот заедно со Торбјорн Кристоферсен
Улоги: Андерс Матесен, Ема Сехестед Хоег, Алфред Бјере Ларсен

Приказна за Алекс, ученикот што добива нинџа-кукла од неговиот чичко Стјуарт по патувањето во Тајланд. Алекс наскоро сфаќа дека чудната шарена кукла со копчиња неместо очи е всушност жива и може да му помогне да се заштити од насилниците на училиште. Меѓутоа, кога Алекс одлучува да возврати на услугата, открива дека нинџа-куклата е опседната и дека тој има мисија да ја одмазди.

Времетраење: 81′

земја: Данска
жанр: Анимиран, авантура, комедија

*Синхронизиран на македонски

Филмот е добитник на наградата „Роберт“ од Данската филмска академија за најдобар филм за деца и млади како и наградата за најдобро адаптирано сценарио.

Празникот Свето Благовештение се вбројува во постојаните празници и секогаш е на 7 април според новиот, (или на 25 март според стариот) календар. Меѓу народот повеќе е познат како Благовец, Благоец, Блошчојне и сл.

Се смета за тежок празник поради што тогаш не се работи. Некои дури го сметаат за голем празник како Велигден поради што се вели: „Благовец, прв ден Велигден“. Тогаш се оди на именден кај оние што имаат име Благоја, Блаже, Благојка, Благица итн.

Свето Благовештение е празник на Пресвета Богородица, а со тоа е и денот на мајките, затоа што Богородица е заштитничка на сите мајки кои зачнале и станале мајки.

Тоа е ден на мајката која дала нов живот. Тогаш децата и благодарат на мајката, ја гушкаат и и даваат дарови во знак на љубов, почит и внимание. Мајките, пак, ги благословуваат децата и тие да имаат свои рожби и радости.

Така што првото нешто што треба да го направите тоа утро – бакнете ја мајка ви!

На овој ден се покажува особена сострадалност и помош кон сирачињата, кон бедните и кон унесреќените.

Оние кои сакаат да имаат деца да одат во црквите и манастирите, кај иконите посветени на Благовештение и да се помолат.

Според народните верувања овој ден е благ, па и раната не боли, па затоа на малите деца им ги дупат ушите за обетки. Се верувало дека Благовештение жените не треба да се чешлаат.

Со Благовец е поврзано и доаѓањето на птиците преселници, штркот, ластовицата, кукавицата, пупунецот, славејот и др. Се верува дека тие ќе дојдат на овој ден дури и да врне снег.

-Во училиштето, не се учи само знаење, туку се учи и зборување со почит, работење со тим, градење на креативни решенија, патриотизам, сакање и почитување на својата држава, знаме, идеи за разубувавување на просторот. Училиштето е место каде што се почитуваат различностите и се одгледуваат лидерите на иднината. Добро утро од нас – напиша на ФБ директорот на ООУ “Климент Охридски” Прилеп, Ахил Јаков, и објави неколку фотографии од прекрасните паркови во училишниот двор, кои ги красат цвеќиња во форма на македонското знаме

Претседателот на ВМРО-ДПМНЕ, Христијан Мицкоски, не гледа зошто би го променил својот став околу името на македонската држава ако ја добие довербата од граѓаните на претстојните парламентарни избори.

„Не знам зошто ние мора да го промениме однесувањето ако ја добиеме довербата на граѓаните. За мене, Македонија е Македонија и ќе биде Македонија. За мене, мојата држава е и ќе биде Македонија. Моите предци ќе бидат горди на мене, а не како на некои кои се срамат од своето поколение“, рече Мицкоски во ТВ-дуелот на Канал 5 со лидерот на СДСМ, Димитар Ковачевски.

За шефот на опозицијата, не е лидерство тоа што го направи експремиерот Зоран Заев, означувајќи го потпишувањето на Преспанскиот договор како отворање на Пандорината кутија.

„Тие прашања се решаваат стратешки. Тоа што се направи во Преспа беше на маса со години уште од времето на Глигоров. Не е тоа така, си подадоа рака и готово. Имало причина зошто сите претходници не го потпишале. Требаше да учиме од сопствените грешки и од грешките на нашите претходници. Ние ги исполнивме сите критериуми и претходно, но политичкиот момент беше проблемот. Чекор по чекор се доведовме во оваа ситуација. Е, јас кога ќе дојдам на власт, нема да го дозволам тоа“, порача Мицкоски.

Македонската женска ракометна репрезентација обезбеди пласман на Европското првенство (ЕП) кое ќе се одржи во декември, откако попладнево го совлада Азербејџан во Баку со 37-22 (19-12) во претпоследниот натпревар во квалификациската група 5.

За избраничките на селекторот Кристијан Грчевски ова е трета победа во петтиот квалификациски дуел со која се зацврстија на второто место на кое и ќе го завршат квалификацискиот циклус доколку Литванија вечерва загуби на гостувањето од фаворитот Шпанија.

Јована Саздовска со седум голови беше најефикасна во македонскиот табор во триумфот над Азербејџан.

Место на континенталниот собир ќе обезбедат и четирите најдобро третопласирани репрезентации во осумте групи што пласманот на Македонија на ЕП го прави сигурен уште пред завршното коло во кое избраничките на Грчевски в недела во Скопје ќе ја пречекаат Литванија.

Европското првенство ќе се одржи во декември во Австрија, Швајцарија и Унгарија.

Изложба на дигитални фотографии „Божури„ од Милан Темелкоски ќе биде отворена на 5 април 2024 /петок/ од 13 часот во Ликовната галерија од ЦК „Марко Цепенков“.

Милан Темелкоски ќе се претстави со 23 фотографии, на кои се претставени божури.

-„Божурите“ се фотографирани на Плаошник, Охрид во 2010 година. Се работи за постари фотографии во боја. Инспирацијата за создавање на фотографиите беше слика од уметникот Кирил Гегоски, која исто носи наслов „Божури“ изработена 1993 година. Кога ги видов божурите ме поттикнаа и ги реализирав фотографиите – вели Темелкоски.

Милан Темелкоски со фотографија се занимава од 1980 година. Досега има реализирани неколку изложби на фотографии.

„Созреано е времето на 8 мај граѓаните да ги претворат гласачките ливчиња во црвени картони и да им ги поделат на сите политичари и функционери од власта, кои изминативе 4 години само ветуваа и ветуваа и ништо не остварија, но ја фаулираа Македонија! Нови играчи ќе знаат да дадат голови за сите во земјата да почнеме да победуваме и во економијата и во образованието и во здравството…“ – вели бизнисменот и поранешен новинар Никола Тасев во својата колумна со наслов „Власта да даде отчет, а не само нови (стари) ветувања!“, која ја објави весникот „Скопско ехо“.