„Стапица за глувци“ oд Агата Крист, во петок (15.03.), со почеток од 19:30ч. во прилепскиот народен театар “Војдан Чернодрински”.

Режисер- Борис Василески
Драматург – превод- Лидија Митоска Ѓорѓиевска
Сценографија и дизајн на светло – Мартин Манев
Костимографија – Марта Дојчиновска
Музика – Томе Темелкоски
дизајн на плакат – Илина Василеска

Играат:

Сара Спиркоска
Илија Волчески,
Дарко Карбески,
Марија Спиркоска Илијеска
Александар Тодески,
Даниела Иваноска
Михајло Миленкоски,
Димитар Ѓорѓиевски

Побрзајте, набавете влезници на телeфонскиот број: 076 442 378

Специјалната антитерористичка единица „Тигар“ денеска одбележува 43 години од формирањето.

На 13 март 1981 година за првпат во Министерството за внатрешни работи беше формирана во рамките на тогашниот републички секретаријат за внатрешни работи на СР Македонија Единицата за специјални задачи под името „Тигар“.

Нејзина примарна цел при формирањето била посебни задачи, обезбедување на јавни личности, справување со кризи, специјални задачи за кои не била подготвена тогашната милиција, а подоцна за антитероризам, специјални задачи како на пример диверзантски акции, инфилтрирање позади линијата на непријателот, обезбедување на терен, подготовка на терен за воени дејствија на останати воени државни структури, приведување и апсење на криминалци или личности барани од законот, нуркање, извлекување на давеници, затрупани во лавини, експлозиви, и кучиња трагачи, обезбедување на лица од витално значење. Во поново време единицата беше надградена со воена метода за решавање на воени конфликти надвор од урбана средина.

На 13 март 2021, покрај 40 годишниот јубилеј од формирањето на единицата, Единица за специјални задачи (ЕСЗ) беше преименувана во Специјална антитерористичка единица (САЕ).

САЕ Тигар е организирана како посебна единица во Бирото за јавна безбедност со намена за:

Планирање и извршување најсложени задачи во борба против тероризмот
Решавање заложнички ситуации и ситуации со забарикадирани опасни лица
Апсење криминалци и криминални групи
Решавање ситуации во случај на пружање отпор со огнено оружје
Обезбедување загрозени ВИП личности и објекти
Давање асистенција во борбата против организираниот криминал
Спасувачки мисии во високопланински и други недостапни терени
Обука и едукација на кадри

СВР Битола поднесе кривична пријава против С.Ј.(34) од Прилеп поради постоење основи на сомнение за сторено кривично дело „загрозување со опасно орудие при тепачка или караница“.

На 12.12.2023 на ул. „Тризла“ во Прилеп, пријавениот со пиштол упатил закани кон Е.А. – информираат од СВР Битола.

СВР Битола – Отсек за криминалистичка полиција поднесе кривична пријава против Џ.Р., полициски службеник во Полициската станица Битола, поради постоење основи на сомнение за сторено кривично дело „телесна повреда при вршење на семејно насилство“, казниво по член 130 став 2 од Кривичниот законик.

На 29.01.2024 во Битола, Џ.Р. физички ја нападнал неговата невенчана сопруга и ѝ нанел телесна повреда. Исто така, Одделот за внатрешна контрола, криминалистички истраги и професионални стандарди при МВР поднесе предлог за поведување на постапка за потешко кршење на работниот ред и дисциплина по член 210 став 1 точка 10 и 20 од Колективниот договор на МВР и член 26 од Етичкиот кодекс за однесување на работниците на МВР.

Одделот за внатрешна контрола изрече и мерка за одземање на оружјето од пријавениот полициски службеник – информираат од МВР.

Прилепчаните Матеј Чатлески и Ице Трајкоски ќе боксуваат на спектакуларен боксерски настан во главниот град на Албанија

Настанот “ЧЕЛИЧНА ТУПАНИЦА” во Тирана, Албанија, закажан на 22 март 2024 година, претставува вистинско боксерско воодушевување. Ова е момент кога тројца македонски боксери ќе настапат во рингот со цел да го докажат својот потенцијал.

Ице Трајкоски ќе се бори во својата петта професионална борба против боксер од БиХ, додека дебитантите Тоше Цветков и младиот перспективен боксер Матеј Чатлески ќе се појават за првпат во професионалниот ринг, спремни да ја покажат својата боксерска умешност и талент.

-Ова е шанса на сите македонски боксери да го покажат својот потенцијал и да чекорат во добра професионална кариера. Сите боксери се во одлична форма, очекуваме борби полни со експлозивни акции. По настанот, планираме да организираме неколку боксерски ревии во Македонија, со што ќе продолжиме да ги презентираме нашите титани во рингот со цел да ги внесеме во фокусот на вниманието на публиката – вели Дарко Чатлески секретар и менаџер на “Про Бокс Македонија”.

Македонија располага со фудбалски таленти, а такви деца има и во Третата фудбалска лига.

Доказ за тоа е дерби натпреварот помеѓу Росоман и прилепско Големо Коњари, на кој домаќините ги изненадија прилепчани и славеа со 3:1.

Победата на овој натпревар ја најави Стефан Костовски, кој во 65-та минута со маестрален удар стрелаше за 2:1.

Со овој пораз клубот од прилепско сега е на втората позиција со 25 бода после 12 одиграни кола. Пред нив со еден бод предност е велешки Борец, а Превалец и Росоман се трето и четврто пласирани, со 23, односно 22 освоени бодови.

Од ФК Големо Коњари после овој натпревар се пожалија од судењето, па на социјалните мрежи напишаа: “Судиската тројка КАТАСТРОФАЛНО го водеше натпреварот, очигледно треба друг да биди прв”.

Во продолжение погледнете го погодокот на Костовски:

Истражете ја волшебната убавина на прилепското вештачко езеро преку извонредно ДРОН ВИДЕО на Гоце Дојчиноски од Прилеп.

Видеото е снимено во 4K FPV резолуција снимена од DJI Air 3 и ја прикажува прекрасната природа и живописните пејсажи.

Уживајте во глетката во продолжение:

За повеќе вакви видеа претплатете се и следете го јутјуб каналот Skyscapes Production

Општина Прилеп и Здружението на граѓани „ПРИЛЕПСКИ МЕЧКАРИ“, како организатори на годинешното 22 издание на Kарневалот „ПРОЧКА 2024“, се подготовуваат за одржувањето на оваа значајна манифестација, која во изминатите години постигна голем успех во поглед на промоција на градот Прилеп во пошироки рамки.

Активностите ќе започнат на 15.03. со отворање на изложба, богатство од креации на маски/сурати, изработени од учениците во основните и средните училишта, под менторство на нивните наставници по ликовно образование и оделенска настава, кои се партнери во целокупната организација. Ова се нашите најмлади учесници, кои во иднина ќе ја продолжат традицијата на чување и презентирање на културното наследство, а годинава за прв пат своја креативна работилница имаат и градинките, кои го најавија своето учество.

Изложбата ќе биде поставена во Центарот за култура Марко Цепенков, каде ќе бидат прогласени и најдобрите избрани маски, а стручна жири комисија ќе го спроведе изборот.

Во сабота на 16.03. на Платото кај Градскиот Саат предвидена е презентација на народниот обичај АМКАЊЕ од страна на Здружението Преродба. Истата ќе биде изведена во автентичен амбиент, привлечен за минувачите, кои во тој период ги има многу, како прилепчани, така и гости, а настанот ќе биде збогатен со настап на младите уметници Марко и Антонио како етно состав Пиреј.

Централен настан е дефилето на маски во недела, на кое ќе се претстават групни и поединечни маски од Прилеп и од други градови од Македонија, а стартот е од пред НУЦК Марко Цепенков. Трасата ќе се движи се до плоштадот Методија Андонов Ченто, каде што ќе биде главното претставување со изведена кореографија и музика. Очекуваме околу 500 учесници во повеќе групни маски, а гости ќе има од Кавадарци, Пробиштип, Куратица, Мокриево, Берово, Сопот, Струмица и други. Покрај дефилето ќе има куклено шоу, магионичари, жонглерски и други атракции, кои се карактеристични за овај празник. Почетокот на дефилето е во 12.00 часот, а претходно во 11.00 часот на Камената Бина ќе започне забава со Роби реј Робот, единствениот Дј во Македонија препознатлив по неговите уникатни костуми за сценско шоу.

Пријавувањето е сеуште отворено и сите заинтересирани треба да ја посетат страницата на карневалот: www.karnevalprilep.mk, или фан страницата на социјалната мрежа Facebook, каде има пријава која можат да ја испратат по електронски пат или пак непосредно пред карневалот да дојдат на централната бина на плоштад. За најубавите маски ќе има и награди, а за истите ќе одлучува стручна жири комисија.

Исто така Карневалот „Прочка“, како еден од најзначајните културни манифестации во пелагонискиот регион ќе биде извонредна можност за фотографите да ги збогатат своите портфолија. Имено Фото Кино Клубот од Прилеп ги повикува на дружење сите професионални фотографи и фото-аматери од земјата и странство да се пријават и да земат учество, додека после завршувањето на карневалот, ФКК – Прилеп, во соработка со Општина Прилеп и Национална фото унија на Македонија, ќе објави меѓународен конкурс за уметничка фотографија. На овој конкурс ќе се примаат исклучиво фотографии креирани на овогодинешниот карневал.

За најдобрите и најкреативни фотографии стручното жири ќе додели соодветни парични награди.

Проектот ќе биде заокружен со изложба на фотографии која ќе се одржи на 17 мај 2024 год.

Одлуката за продолжување на работното време на сите кафетерии и ресторани, донесена од Советот на Општина Прилеп е со важност, така да забавата во вечерните часови ќе може да потрае на задоволство на младите генерации. Сите кафетерии, ресторани, пицерии имаат своја предвидена програма, со настапи на ДЏеи и бендови во живо, како за денска така и за вечерна забава.

Се надеваме на уште еден успешно организиран карневал во рамките на предвидениот буџет за оваа година.

Карневалските случувања се завршуваат во понеделник со традиционален заеднички ручек на здружението Прилепски Мечкари во Манастир Св. Ѓоргија.

Предвидени награди:

Изложба:

девет награди во три категории, една Гран При награда и една Специјална награда.

1,2 и 3 место во категорија до 6 одд

1, 2 и 3 место во категорија до 9 одд

1, 2 и 3 место во категорија на средни училишта

Дефиле:

1, 2 и 3 место и една Гран При награда

Наградите се во форма на ваучер за патување/претставување на други манифестации.

ПРОГРАМА

15. МАРТ 2024 (петок) 12:00 часот:
ИЗЛОЖБА на рачноизработени трaдиционални маски/сурати

Свечено отворање и доделување на признанија

Локација: Центар за култура „Марко Цепенков“ Ликовен салон

16. МАРТ 2024 (сабота)

11:00-13:00 Презентација на народниот обичај АМКАЊЕ – Здружение Преродба

Етно состав Пиреј – Марко Солески и Антонио Трајкоски

Локација: Плато кај Градскиот Саат

17. МАРТ 2024 (недела)

11:00-14:00 – Robbie Ray Robot Show – Камена Бина

12:00 – Карневалска поворка

Дефиле на маски и настап на жонглери, кловнови, акробати, куклари

Траса: НУЦК Марко Цепенков / Булевар Гоце Делчев/ Плоштад Методија Андонов – Ченто – Централна бина

18. МАРТ 2024 (понеделник)
12:00: Одбележување на „Чист понеделник“

Традиционален заеднички ручек со Здружението Прилепски Мечкари

Локација: Манастир Св. Ѓоргија – Присад

Откако стана јасно како ќе изгледа гласачкото ливче за претседателските избори, парламентарните се враќаат во фокусот особено откако вчера, опозицискиот лидер Мицкоски речи си ги официјализираше носителите на листи со кои ВМРО-ДПМНЕ ќе се натпреварува на изборите. Тој ќе ја предводи листата во првата изборна единица, во двојка ќе биде потпретседателот Мисајловски, пратеникот Ковачки во тројка, Александар Николоски во четворка и пратеничката Дафина Стојановска во шестката.

Петтата изборна единица опозицијата се уште ја нема дефинирано. Во СДСМ се уште нема официјални информации, но неофицијално Ковачевски веќе потврди дека ќе биде носител во првата изборна единица.

Двојката би требало да биде за Сања Лукаревска иако таму шанси има и Фатмир Битиќи. Во тројката се прави анализа меѓу Љупчо Николовски и Оливер Спасовски. Четворката веројатно ќе биде за Венко Филипче, а во петката се споменува името на Славјанка Петровска. Се уште се бара кандидатот за шестата изборна единица.

Од останатите партии кои ќе учествуваат на изборите во првата изборна единица се најави лидерот на Левица Апасиев и скопската градоначалничка Арсовска.

Албанските политички партии главната битка ќе ја водат во шестката. Таму се очекува дуел на Ахмети со Касами додека Меџити и Гаши се очекува да се распоредат во првата и втората изборна единица.

Се ќе биде дефинирано до крајот на месецов имајќи предвид дека последниот рок за пријавување на кандидатските листи истекува на 3 април. Кампањата за парламентарните избори почнува на 18 април, две недели претходно на 4 април ќе стартува и кампањата за претседателските избори.

По повод одржувањето на меѓународниот карневал „Прочка 2024“, работното време на угостителските објекти во градот се продолжува за 2 часа, согласно чл.23 од Законот за угостителска дејност: „Советот на општината, односно Советот
на градот Скопје, за одредени туристички, културни и друг вид манифестации, содржани во годишните програми, можат да го продолжат работното време најмногу за два часа, за угостителските објекти од ставот 1 на овој член,
но во времетраење најмногу до три дена.

Продолженото работно време се однесува само за деновите на одржување на карневалот, односно од петок 15 март до недела 17 март 2024 година.

Одлуката за продолжувањето на работното време на угостителските објекти замеѓународниот карневал „Прочка 2024“ е донесена од Советот на Општина Прилеп, на седницата одржана на 29.02.2016 година и таа се’ уште е со важност.