-На 17.05.2026 во 02:00 часот на ул. „Димо Наредникот” во Прилеп, полициски службеници од ОВР Прилеп лишија од слобода 16- годишен прилепчанец, бидејќи при преглед кај него била пронајдена марихуана. По документирање на настанот ќе следува соодветен поднесоk, информираат од МВР.
Секторот за внатрешни работи Битола со јавен апел, предупредува граѓаните да бидат внимателни во врска со кривични дела „измама“ за лажни сообраќајни несреќи.
Од СВР Битола посочуваат дека посебно внимателни треба да бидат повозрасните и да не наседнуваат на измами кои сторителите го прават по пат на телефонска комуникација.
Измамниците ги доведуваат во заблуда лицата на тој начин што им се јавуваат телефонски и им се претставуваат како службени лица, најчесто полициски службеници, доктори и од нив бараат финансиски средства за ослободување од кривичен прогон на нивни деца или внуци кои, наводно, непосредно пред јавувањето направиле сообраќајна несреќа со смртни последици или во која истите биле тешко повредени па треба да се даде одредена сума на пари за да се изврши операција. За да бидат поуверливи во позадина се слуша глас кој бара помош.
СВР Битола ги известува граѓаните да не наседнуваат на ваквиот вид на измами, а доколку бидат контактирани, веднаш да пријават во полиција.
Футсал екипата на СОУ “Ристе Ристески – Ричко” го заврши својот настап на Европското првенство во Бања Лука, освојувајќи го високото седмо место.
На натпреварите учество зедоја најдобрите 15 училишни екипи од цела Европа, а прилепската екипа покажа како се бори за училишниот дрес и за македонските бои на секој натпревар.
-Пласманот меѓу најдобрите седум на континентот е резултат на извонредниот турнир кој го одиграа нашите футсалци. Учениците од „Ричко“ беа вистински амбасадори на нашето училиште и достоинствено ја претставија Македонија на европската спортска сцена. Ова седмо место за нас е повеќе од обичен резултат – тоа е чист доказ за огромниот талент, напорната работа и светлата иднина што ја има нашето училиште и македонскиот спорт, велат од училиштето.
Зад овој историски успех стои силен тимски дух, предводен од нашите ученици и професори:
Тимот на теренот: Виктор Анѓелевски, Мартин Деркоски, Теодор Героски, Ведран Магленски, Леонид Митрески, Димитар Оклески, Давид Паскоски, Андреј Петрески, Бернис Селимоски, Бруно Стефаноски.
Тренери: Илија Ангелески (тренер) и Христијан Митрески (помошен тренер)и
Димитар Здравески (судија).
Успехот не е случајност, тој е резултат на напорна работа, посветеност и заедништво. Нашите ученици покажаа дека ’Ричко’ има европски квалитет.
-СВР Битола до Основното јавно обвинителство Битола поднесе кривична пријава против М.Ѓ.(36) од Битола поради основано сомнение за сторено кривично дело “разбојништво во обид”. На 16.05.2026 во 01:00 часот, полициски службеници од СВР Битола го лишиле од слобода М.Ѓ. и при извршен претрес со Наредба од основен суд Битола во неговиот дом бил пронајден и одземен пиштол.
Според пријавеното, истиот на 30.04.2026 во 18:10 часот во канцеларија за кредитирање лоцирана на ул. „Столарска” во Битола се обидел да изврши разбојништво со закана со огнено оружје , но не успеал и се дал во бегство, информираат од МВР.
Песна за отсуството што вечно останува присутно – видеоспот кој ја следи темата на загубата, сеќавањето и тишината што останува по оние што физички исчезнуваат, но продолжуваат да живеат во нас.
Македонскиот алтернативен музички проект Луциден сон го објави видеоспотот за „И пак те нема“ – своето најемотивно и најинтимно музичко поглавје досега, песна што ја претвора загубата во звук и слика.
„И пак те нема“ е петти сингл на Луциден сон, по претходно објавените „Немирно време“, „Тајната“, „Строј“ и „Дожд“, со што проектот продолжува да го гради својот препознатлив авторски израз на домашната алтернативна сцена.
Музички, песната се движи низ темна и меланхолична атмосфера, со внимателно изградена динамика, емотивен вокален израз, пијано, гитарски текстури и суптилна драматичност.
„И пак те нема“ е темна и емотивна приказна за луѓето што продолжуваат да живеат во нас – песна за отсуството што не поминува, за сеќавањата што остануваат и за тивката болка што не секогаш може да се каже со зборови.
Автор на музиката и текстот е Костадин Стојаноски, кој ги отсвири гитарите, а стои и зад визуелниот концепт и монтажата на видеоспотот. Вокалот е на Гоце Кантар, додека пијано-делниците, како важен дел од меланхоличната атмосфера на песната, ги носат Гоце Кантар и Иле Алавантиоски.
Со ова издание, Луциден сон го продолжува својот авторски пат како проект што ја истражува границата меѓу сонот и јавето, личната болка и колективното чувство на немир, создавајќи музика со мрачен, поетски и искрен карактер.
Министерот за внатрешни работи Панче Тошковски изјави дека во иднина ќе следуваат законски измени, кои ќе бидат порестриктивни во однос на управувањето со електричен тротинет.
Тошковски одговарајќи на новинарско прашање денеска на официјалната промоција на Кампањата за побезбеден сообраќај: Одговорно со технологијата, на А1 Македонија и МВР, рече дека во моментов не може да каже дали ќе има ограничување на возраста до 16 или до 18 години за оние кои ќе можат да управуваат електричен тротинет.
Тошовски посочи дека ова едно од многуте горливи прашања, со повеќе европски амбасадори разговарал на оваа тема. Истакна дека во моментов европскиот просек во однос на бројот на жртви е околу 44 на милион жители.
-Но, во последниот период таму е констатиран пораст на смртни случаи како последица на несоодветно управување со електрични тротинети, нивно несоодветно вклучување во сообраќајот и нивно несоодветно користење, особено од страна на малолетни лица – рече Тошковски и додаде дека во моментов се прави компаративна анализа и се разгледуваат искуствата на другите држави.
Министерот истакна дека Грција е една од државите што во последниот период имплементираше порадикални мерки во оваа насока.
-Ќе ја искористам оваа прилика да кажам дека во иднина ќе следуваат законски измени што ќе бидат порестриктивни во оваа област. Не можам сега да навлегувам во детали, дали ќе станува збор за ограничување до 18 или до 16 години, дали ќе одиме со забрани или со порегулиран систем, но во секој случај, апсолутно е јасно дека на ова поле ни се потребни законски измени, сè со цел зголемување на безбедноста поврзана со овој тип превозни средства, најави тој.
За тоа дали во текот на летниот период ќе се зголеми и контролата врз лицата кои управуваат со мотор, имајќи предвид дека овие превозни средства и повеќе се користат во тој период, Тошковски истакна дека вистинските моторџии ги почитуваат сообраќајните правила.
-Сакам да кажам дека оние што се вистински моторџии, а такви познавам лично многу, никогаш во град не ги прекршуваат сообраќајните правила. Вистинските моторџии, особено оние што членуваат во мото-организации, се и тоа како посветени на почитување на сообраќајните правила, бидејќи многу добро знаат какви се последиците кога тие не се почитуваат. Но, за сите оние што „глумат“ моторџии, возат без кацига, со далеку поголема брзина, возат на едно тркало низ град, поминуваат на црвено светло и мислат дека „Сејф сити“ нема да ги детектира сакам јавно да порачам дека Министерството за внатрешни работи во наредниот период ќе биде особено фокусирано токму на нив, особено во градските средини. Ќе останат и без мотори и без можност да „глумат“ моторџии. За нив се подготвува посебен план за постапување и тие ќе бидат главен таргет, затоа што претставуваат огромен ризик во сообраќајот – нагласи министерот.
Тошковски додаде дека човечкиот живот нема цена и секој што не ги почитува сообраќајните правила, особено во урбаните средини, претставува потенцијален ризик да предизвика трагедија што никогаш повеќе не може да се исправи, особено ако згасне човечки живот.
Прегазено дете пред една недела, судрени три автомобили пред два дена, синоќа одново тешка сообраќајка на раскрсницата меѓу улиците “Димо Наредникот” и “Сотка Џигиџик” во Прилеп.
Утрово тротоарите осамнаа со испокршени делови од автомобили, истечено масло по улиците, а неофицијално синоќа имало и повредени.
Оваа раскрсница е црна точка во Прилеп, и жителите од околните куќи не случајно стравуваат за својата и безбедноста на своите најблиски. Тука поминуваат учениците кои настава посетуваат во ООУ “Климент Охридски”, а и покрај тоа што раскрсницата е обележана и има знак ‘СТОП’, несовесни возачи возат и со 80км/ч, излегуваат без да застанат од споредните улички и настануваат несреќни случаи.
Жителите од околните куќи замолуваат надлежните итно да реагираат и да постават т.н. “легнати полицајци” на улицата, се со цел да се спречат во иднина нови катастрофи и жртви.
Контејнери на шпедитар низ прилепските улици, кај може да одат?
Министерката за образование и наука Весна Јаневска вели дека се работи на законските измени со кои ќе се предвидуваат санкции за родителите чии деца прават насилни дела. На денешната прес-конференција министерката рече дека со пратениците веќе се работи на дефинирање на законските измени.
– Државниот секретар е во постојан контакт со пратениците. Ммислам дека во овој момент се во Собранието за да ги дооформат овие предлози. Веќе е донесена одлука, тие измени ќе се направат и останува глобата од 250 евра за секое сторено насилно дело на детето да биде казнет родителот, но и тоа што е многу важно – и кога родителот ќе одбие да соработува со училиштето и другите институции – рече Јаневска одговарајќи на новинарско прашање.
Министерката Јаневска ги најави законските измени пред два дена посочувајќи дека мора да се создаде безбедна училишна средина откога во изминатиот период јавноста е сведок на неколку случаи на врсничко насилство, од кои последниот во основното училиште „25 Мај“ во Ченто кога со остар предмет беше повреден 15-годишен ученик.
Во ЈЗУ Општа болница „Борка Талески“ – Прилеп денеска официјално беа промовирани нов дигитален рендген-апарат и современ видео ЕЕГ кабинет за деца, со што болницата прави значаен исчекор кон модернизација и целосна дигитализација на здравствените услуги.
На настанот симболично беше означен крајот на аналогната ера во радиодијагностиката. Последната аналогна рендген снимка во историјата на болницата ја направил директорот на Фондот за здравствено осигурување, Сашо Клековски, додека првата дигитална снимка на новиот апарат ја направил директорот на болницата, Кире Јоноски.
Новиот дигитален рендген-апарат е веќе имплементиран во постојната инфраструктура на радиолошкиот оддел, кој годишно изработува околу 30.000 снимки. Со ова, Одделот за радиодијагностика во Прилеп станува еден од првите целосно дигитализирани оддели надвор од скопските клиники.
Од болницата информираат дека станува збор за една од најголемите поединечни инвестиции во медицинска опрема во поновата историја на установата, реализирана целосно со сопствени средства. Процесот на набавка започнал пред речиси две години, веднаш по назначувањето на директорот Јоноски, кога модернизацијата на радиологијата била поставена меѓу приоритетите на менаџментот.
Опремата е набавена од италијанската компанија Villa Sistemi Medicali, со компоненти произведени во Соединетите Американски Држави. Новиот апарат овозможува и снимање на целиот ’рбет, што значително ќе ја подобри дијагностиката и квалитетот на услугите за пациентите.
Покрај новиот рендген, денеска официјално беше пуштен во употреба и нов видео ЕЕГ кабинет на Детското одделение, единствен од ваков тип надвор од Клиника за детски болести.
Видео ЕЕГ методата овозможува истовремено снимање на мозочната електрична активност и видео следење на движењата и однесувањето на детето, што е од особено значење за прецизна дијагностика на епилептични напади, разликување на епилептични и неепилептични состојби, како и следење на ефектите од терапијата.
Од болницата посочуваат дека новиот кабинет ќе биде од огромно значење не само за децата од Прилеп, туку и за пациентите од целиот Пелагониски регион и пошироко.
Со овие инвестиции, прилепската болница продолжува со процесот на модернизација и унапредување на здравствените услуги, со фокус на современа медицинска опрема, дигитализација и подобри услови за пациентите и медицинскиот персонал.
