Осум лица се здобиле со тешки телесни повреди во верижна сообраќајна несреќа што се случила кај Битола, а во која учествувале четири патнички моторни возила.

Според информациите од СВР Битола, сообраќајната несреќа се случила на регионалниот патен правец Прилеп-Битола-Охрид, на околу три километри од влезот во Битола.

Веднаш по сообраќајката, во интервенцијата за итна помош на повредените биле включени повеќе болнички возила. Сите повредени лица се пренесени и згрижени во битолската Клиничка болница.

Стручен тим од СВР Битола извршил увид на местото на настанот за да ги истражи причините што довеле до несреќата, а надлежните најавија дека наскоро ќе биде соопштен и идентитетот на сите учесници.

Со нова инфраструктура, Крушево дополнително ја зацврстува позицијата на една од најпознатите европски параглајдинг дестинации.

Крушево, еден од најпознатите европски центри за параглајдинг, влегува во нова развојна фаза. Започна изградбата и инфраструктурното проширување на две нови модерни полетувалишта, со што значително ќе се подобрат условите за полетување, безбедноста на пилотите и организацијата на големи меѓународни натпревари.

Проектот предвидува изградба на полетувалишта со висококвалитетна вештачка и природна трева, со што капацитетот на параглајдинг центарот практично ќе се удвои. Новите услови ќе овозможат истовремено полетување на поголем број пилоти за време на светски и европски натпревари, но и подобро искуство за сите љубители на овој спорт.

Активностите се реализираат во рамките на проектот „Крушево и Елбасан – Патување низ природата и авантурата“, финансиран од Европската Унија преку Програмата за прекугранична соработка помеѓу Република Северна Македонија и Република Албанија во рамките на Инструментот за претпристапна помош (ИПА III). Носител на проектот е Општина Крушево, во партнерство со Центарот за одржлив развој АЛКА – Скопје, Општина Елбасан и организацијата Тјетер Визион од Елбасан.

Современа инфраструктура за поголема безбедност

Проектот опфаќа уредување на нови полетувалишта со вкупно 2.008,08 квадратни метри висококвалитетна вештачка трева и 1.503,81 квадратни метри природна трева. Покрај зголемениот капацитет, инвестицијата ќе обезбеди и повисоко ниво на безбедност и функционалност.

Со уредувањето на теренот ќе се елиминираат нерамнините околу полетувалиштата, ќе се намали ризикот од оштетување или заплеткување на параглајдерските крила и јажиња, а пилотите ќе добијат побезбедни услови за подготовка, полетување и собирање на опремата.

Нов поттик за авантуристичкиот туризам

Покрај спортската инфраструктура, проектот има за цел да го зајакне прекуграничниот авантуристички туризам и да го позиционира регионот Крушево – Елбасан како препознатлива туристичка дестинација.

Додека во Крушево инвестициите се насочени кон унапредување на параглајдинг инфраструктурата и спортско-рекреативниот центар „Гумење“, во Елбасан се реализира изградба на авантуристички парк, пристапна зона со паркинг во близина на туристичкиот центар Фунар, како и обележување на пешачки патеки до кањоните Допај.

Со оваа инвестиција Крушево дополнително ја зацврстува својата репутација како домаќин на најголемите светски и европски параглајдинг натпреварувања и една од водечките дестинации за активен и авантуристички туризам во регионот.

Проектот е финансиран од Европската Унија преку Програмата за прекугранична соработка помеѓу Република Северна Македонија и Република Албанија во рамките на Инструментот за претпристапна помош (ИПА III). Содржината на ова соопштение е единствена одговорност на партнерите во проектот и не мора да ги одразува ставовите на Европската Унија.

Европскиот автомобилски шампион Игор Стефановски – Иџе, започнува ново поглавје во својата богата тркачка кариера. По освоените европски титули и бројните успеси на најпознатите ридски патеки, оваа сезона тој ќе настапува со прототип болид, најмоќната и најпрестижната класа во ридскиот автомобилизам.

Со овој историски чекор, Стефановски станува првиот македонски возач што ќе се натпреварува со прототип болид на официјални меѓународни натпреварувања, испишувајќи нова страница за македонскиот автомобилизам.

„Отворам ново поглавје во мојата кариера. За овој момент сонувам цел живот. Ќе бидам првиот возач од Балканот кој ќе настапува со прототипот Норма, еден од само 12 вакви болиди произведени во светот. Станува збор за исклучително моќно возило, прототип чија технологија и перформанси се блиски до болидите во Формула 1.

Денес го тестирам токму на Водно, местото каде што започна мојата тркачка приказна. Со овој болид влегуваме во нова категорија, со исклучително силна и бројна конкуренција. Верувам дека и во оваа класа ќе бидеме конкурентни и ќе се бориме за нови подиуми на европските ридски трки“, изјави Стефановски.

Новиот прототип болид претставува врв на инженерството во ридскиот автомобилизам. Конструиран е исклучиво за натпреварување, со ултралесна шасија, исклучителен однос меѓу тежината и силата и аеродинамика што овозможува максимални перформанси на најтешките планински патеки. Управувањето со ваков автомобил бара врвна физичка подготвеност, големо искуство и беспрекорна прецизност.

Со овој чекор, Игор Стефановски – Иџе не само што отвора ново поглавје во својата кариера, туку поставува нови стандарди за македонскиот автомобилизам, носејќи ја Македонија во највисоката класа на европските ридски натпреварувања.

Во Битола денеска беше асфалтиран новиот паркинг простор во поранешната касарна, изграден на локацијата СТУ 9 АРМ, Четврт 3. Со реализацијата на проектот се обезбедуваат нови паркинг места и се подобрува инфраструктурата во овој дел од градот.

Новиот паркинг зафаќа површина од 1.550 квадратни метри, а покрај паркинг-просторот, проектот опфати изградба на коловоз, атмосферска канализација, сообраќајна сигнализација и улично осветлување.

Проектот е реализиран преку вториот владин повик преку Министерството за транспорт, а вредноста на договорот изнесува 6.256.014,18 денари.

Од Општина Битола информираат дека во моментов се работи и на други локации во градот, со цел да се обезбедат што повеќе нови паркинг места и да се подобрат условите за паркирање, во согласност со заложбите за унапредување на сообраќајната инфраструктура.

Врз основа на одлуката на ЕЛС- Кривогаштани за спроведување на превентивна систематска дезинсекција, се информира населението дека на ден 06.08.2026 год. во периодот од 22 до 04 часот на територијата нa Општина Кривогаштани екипа од Центарот за јавно здравје- Прилеп ќе спроведува адултицидна теристична (од земја) дезинсекција со цел уништување на комарци. Дезинсекцијата ќе се изведува со УЛВ-апаратура за ладно замаглување поставена на пикап возило со претходница на друго возило означено со ротационо светло. Со дезинсекцијата ќе бидат опфатени следните населени места и локации:

Н.м-Врбјани, Н.м-Годивље, Н.м-Крушеани, Н.м-Обршани, Н.м-Бела Црква, Н.м-Пашино Рувци, Н.м-Боротино, Н.м-Славеј, Н.м-Кривогаштани, Н-м Подвис, Н-м Воѓани, Н-м Кореница, Депонија, Блато река, Пречистителна станица, Пилана, Резервоар, попатни канали и шамаци и места со стоечки води.

Со цел избегнување на евентуални несакани последици се информираат пчеларите да превземат превентивни мерки за заштита на пчелните семејства. Во случај на појава на неповолни временски услови (ветар,дожд) дезинсекцијата се одложува за следниот поволен ден.

Доколку граѓаните не се придржуваат на горенаведените превентивни мерки ЦЈЗ-Прилеп се оградува од секаква одговорност од појава на несакани последици.

Компанијата Кожувчанка денеска преку соопштение реагираше на обвинувањата изнесени од СДСМ во врска со набавката на флаширана вода за потребите на Општина Гостивар. Од компанијата ги отфрлаат, како што велат, „безочните манипулации“ и појаснуваат дека нивната понуда била значително пониска од редовната продажна цена, при што разликата во цената ја преземаат на сопствен трошок.

Во продолжение интегрално го објавуваме демантот на Кожувчанка:

Како општествено одговорна компанија на која здравјето и квалитетот на животот на нашите сограѓани од цела Македонија ни се приоритет пред профитот, со индигнација ги отфрламе безочните манипулации на опозициската СДСМ.

Во име на вистината тврдиме дека учествувавме на јавниот повик на службите на Владата, за набавка на флаширана вода за потребите на Општина Гостивар, при што нашата компанија Кожувчанка од Кавадарци се пријави со понуда од 12,5 денари по шише, цена која е значително пониска од редовната продажна цена на производот која изнесува 25 денари.

Разликата помеѓу редовната продажна цена и понудената цена за оваа набавка компанијата целосно ја презема на свој товар, како наш гест на општествена одговорност, солидарност и филантропија.

Кожувчанка гарантира дека предметната количина на вода ќе биде бесплатно транспортирана до Општина Гостивар, а сѐ со единствена цел навремено да им се помогне на граѓаните во услови кога тоа им е најпотребно.

Уверени сме дека во вакви околности, најголемата корпоративна вредност не смее да биде профитот, туку солидарноста и поддршката на заедницата. Како домашна компанија, Кожувчанка и понатаму ќе остане посветена на својата општествена улога и ќе продолжи да помага таму каде што помошта е најнеопходна.

Општина Прилеп ги известува граѓаните дека водата од мерно место:

Локален водоснабдителен систем – Ореовец – јавна чешма сред село – не е здравствено исправна заради наод на бактерии, наод на еscherichia colli, наод на intestinal enterococcus и не смее да се користи за пиење. Водата мора редовно да се хлорира и количината на резидуален хлор во мрежата да се движи во граници од 0.2 до 0.5 мг./л. вода.

Исто така водата од мерно место, л.в.с. Плетвар – јавна чешма не е здравствено исправна заради наод на зголемен број колиформни бактерии, наод на еscherichia colli, наод на intestinal enterococcus и не смее да се користи за пиење. Неопходно е соодветно техничко решение за објектот со можност за редовна дезинфекција на водата.

Водата од л.в.с Плетвар – крајпатна “Че” не е здравствено исправна заради наод на зголемен број колиформни бактерии, и не смее да се користи за пиење. Неопходно е соодветно техничко решение за објектот со можност за редовна дезинфекција на водата.

Исто така водата од л.в.с Беловодица – двор не е здравствено исправна заради наод на зголемен број колиформни бактерии, зголемен број колонии и бактерии на 37 степени и не смее да се користи за пиење без претходно вриење од 10 минути. Неопходно е соодветно техничко решение за објектот со можност за редовна дезинфекција на водата.

Неколку нови плочки на плоштадот „Александрија“ и веднаш објава на социјалните мрежи. Добро е што се работи, а сега останува да продолжи истото темпо и на останатите оштетени тротоари, улици и плоштади низ Прилеп. Мал чекор за Комуналец, голема надеж за прилепчани.

Средното медицинско училиште „Д-р Јован Калаузи“ во Битола ја заврши обновата на фасадата која беше оштетена во пожар, со што објектот повторно доби уреден и препознатлив изглед.

Од училиштето истакнуваат дека обновата претставува силна порака дека грижата, одговорноста и заедништвото секогаш ќе бидат посилни од вандализмот.

„Благодарност до сите што придонесоа во обновата. Да го чуваме нашето училиште – тоа е наша заедничка гордост и наш заеднички дом“, порачуваат од СМУ „Д-р Јован Калаузи“.

За реализација на проектот за обнова на фасадата биле издвоени 625.754 денари.

Со завршувањето на реконструкцијата, училиштето повторно е подготвено да ги пречека учениците во уреден и безбеден амбиент, а од раководството апелираат до сите за одговорен однос и заедничка грижа за училишниот имот.

На 7 август 2026г. /петок/ од 20.00 часот во Ликовната галерија од ЦК „Марко Цепенков“ ќе биде отворена изложбата на фотографии и дигитални дела “ДОМА – меѓугенерациски дијалози за денот и ноќта“ – колаборативен проект на Александра Ацеска и Илија Ацески (ќерка и татко). Изложбата е поддржана од Министерството за култура и туризам.
За проектот:

Изложбата е визуелен дијалог во кој се откриват две перспективи на поглед кон светот. И од тука лежи една фундаментална тензија. Едената перспектива, на Ацеска е аспект од нашата природа кој се стреми да разбере преку дисекција — да разложува, анализира и поедноставува, во потрага по значење. Другата перспектива е таа на Ацески, и е аспектот кој ја сфаќа суштината на нештата не преку прекумерна анализа, туку преку директно искуство и прифаќање.

Изложбата се позиционира токму во тој простор меѓу двата пола: место каде што едноставниот симбол може, всушност, да содржи цел универзум, и каде што значењето се појавува како соработка што го чека доаѓањето на набљудувачот.

Податоци за авторите;

Ацеcка Александра, Родена во Прилеп, Македонија Живее и работи во Фошан, Кина. Во 2017 г. дипломирала на Универзитет „Св. Кирил и Методиј“, Факултет за ликовни уметности Скопје, одсек сликарство и графички дизајн, во 2023 г. магистрира на сликарство на Факултетот за ликовни уметности, Скопје.

Самостојни изложби:

2024: – „FLORAL LIMBO“, Музеј на уметноста Сан Та, село Зини, област Панју, Гуангџоу, Кина; 2023: – „II“, Галерија на ФЛУ (Факултет за ликовни уметности), Скопје, РСМ; – „Реформации“, Федерација на книжевни и уметнички кругови, област Нанхаи, Фошан, Гуангдонг, Кина; 2018; – „PORTA PINUS“, Музеј на град Скопје, Скопје, РСМ;
2019: – „DIDYMUS“, Културен центар Марко Цепенков, Прилеп, РСМ;
–„DIDYMUS“, Културен центар Кочо Рацин, Кичево, РСМ;

Групни изложби:

2024: – „Three hundred miles away“, изложба за современа уметност по повод 30-годишнината на Fangyuan, Музеј за уметност Baozhen hall, Гуангџоу, Гуангдунг, Кина;
– „2nd Healing expo“, Центар за конференции и изложби, Футијан, Шенџен, провинција Гуангдунг, Кина;
– „Joy, Life“, Меѓународен конвенционен и изложбен центар Xi’an, Xi’an, провинција Шаанкси, Кина;
– „Encountering Blossoms“,Музеј за уметност Parallel lines Baozhen hall, Гуангџоу, Гуангдунг, Кина;
2023: – Уметнички саем ART CANTON, групна изложба, Културен центар Чиошан, град Сичјао, Фошан, Гуангдонг, Кина;
2019: – „Rencontre Franco-Macedonienne“, групна изложба на македонски и нормандиски уметници, Јавна соба, Скопје, РСМ;
2019: – „Portals“, групна изложба на млади уметници, дел од проектот CreArt, Музеј на град Скопје, Скопје, РСМ.
Награди:
2024 – Награда „Извонреден меѓународен IB наставник“, Училиште Guandong Country Garden, Фошан, Гуангдонг, Кина;
2017 – Награда и грант „Борко Лазески“, најинвентивен сликар од генерацијата 2017, Факултет за ликовни уметности, Скопје;
– Награда „Ponte di Pietra“, четврто издание на Меѓународен саем за современа уметност – Paratissima, Скопје, РСМ; – Drimon и INKA награден уметник, Меѓународен саем за современа уметност Paratisima, Скопје, РСМ;

Илија Ацески подолго време се занимава со фотографирање. Освоил награда во Патиказ магазин за фотографија Момата 2012 г Ехо фестивал, за планинарска фотографија -трета награда, Корабски водопад – Фото на неделата во Нова Македонија во 2023 г и уште еднаш во 2024 г.

Учествувал на годишната изложба на ФФК Прилеп во 2024г. Фотографирал за списанието на Водостопанство на Македонија во неколку броја за активностите на Тутунски окомбинат во Прилепско поле, фотографирал и за каталози за повеќе прилепски фирми уште во 1990 година.