Се известуваат сите верници дека по повод христијанскиот празник Богојавление (Водици), чинот на Големиот Богојавленски водосвет и фрлањето на светиот Крст ќе се изврши во водите на базенот при хотелот Салида (Аквапарк), на 19 јануари (недела) со почеток во 12:00 часот – информираат од општина Прилеп.
-Пријавувањето за учесниците ќе биде во Општина Прилеп (во приемно одделение), задолжително со копија од лична карта, на 15. и 16. јануари (среда и четврток) од 09:00 до 15:00 часот – стои во соопштението на општината.
Со гордост ја информираме јавноста за пуштањето во употреба на експресниот пат Градско – Дреново, проект кој има огромно значење за граѓаните на Прилеп, Битола, Ресен, Крушево, Градско и целиот Прилепско-Пелагониски регион кој е потврда на вистинските политики на СДСМ, рече на денешната прес конференција пратеникот на СДСМ, Миле Талески.
„Овој проект, вреден над 37 милиони евра, е резултат на посветената работа на Владата предводена од СДСМ, која преку одговорни и визионерски политики вложуваше во развојот на патната инфраструктура и подобрувањето на животот на нашите граѓани,“ рече Талески.
Проектот, реализиран со над 92% од страна на претходната влада на СДСМ и опфати:
Изградба на трите клучки кај Градско, Росоман и Дреново;
Четири вијадукти;
Сите мостови, надпатници и подпатници;
Поставување на 98% од асфалтот.
„Актуелната власт денеска ќе се кити со туѓи перја, завршувајќи само 50 метри асфалт пред пуштањето во употреба. Но важно е што граѓаните конечно добиваат целосно функционален пат кој ги задоволува највисоките европски стандарди,“ додаде Талески.
СДСМ очекува дека наскоро ќе биде завршена и делницата од Дреново до Фариш, која е веќе над 80% реализирана благодарение на претходната работа на владата на СДСМ.
„Ова е пат кој значи економски развој, подобра поврзаност и повисока безбедност за сите жители на регионот,“ истакна Талески, потсетувајќи на претходните инвестиции во патната инфраструктура:
Обновената делница кај Плетвар;
Патот од Прилеп кон езерото;
Започнатата изградба на автопатот Прилеп-Битола, дел од Коридорот 10д, прв автопат во овој регион.
Талески упати благодарност до сите градежни работници, инженери и проектанти кои вложија труд во реализацијата на овој значаен проект.
„Ова е потврда дека СДСМ работи за реалните потреби на граѓаните, создавајќи проекти кои го унапредуваат животот во нашата земја,“ заклучи пратеникот на СДСМ, Миле Талески.
-На 13.01.2025 во 04.40 часот и во 06.30 часот, полициски службеници од ОВР Неготино ги лишиле од слобода Н.А.(33) и Б.Б.(54), двајцата од Прилеп.
Тие се сомничат дека во периодот од 11.01.2025 до 13.01.2025 одзеле повеќе предмети од хала и товарни возила во халата, сопственост на правно и физичко лице.
Дел од предметите биле пронајдени и вратени на сопствениците, a Н.А. и Б.Б. биле задржани во полициска станица.
Известен бил јавен обвинител и по целосно документирање на настанот, против нив ќе биде поднесена соодветна пријава – информираат од МВР.
Од 12:00 часот укината е забраната за движење тешки товарни возила на планинскиот премин Плетвар, информира АМСМ.
Сообраќајот на државните патишта се одвива во зимски услови по влажни коловози со остатоци од кашест снег на коловозот. Врнежи од снег со слаб интензитет се бележат во Кичево,на Пресека и Буково.
Забрана за движење на тешки товарни возила се уште има на патните правци: Гостивар – Маврово – Дебар, Гостивар – Стража – Кичево, Струмица – Берово и Тетово – Попова Шапка.
Вицепремиерот и министер за транспорт, Александар Николоски денес присуствуваше на отворање на пуштање во употреба на делницата Градско-Дреново.
-Во рок од само десетина дена, второ големо отворање. Денес го отвараме експресниот пат кој ќе нè поврзува од Градско до Дреново. Еден преубав експресен пат кој ќе значи многу во поврзувањето и на Прилеп, Битола, Могила, Новаци, Кривогаштани, Крушево, Росоман, со главниот град. Ќе значи и поврзување со соседна Грција и поврзување со Коридорот 10 кој треба да значи целосно или автопатско или експресно поврзување со ГП Меџитлија, рече тој.
Николоски посочи дека штом ја презел функцијата се соочил со документација која говори за скандалозно однесување на минатата власт.
-Ние сме избрани да работиме, а не да се жалиме и даваме образложенија, но пред мене имам нешто и рачно пишувано, нешто со маркер , го имам и првиот документ кој што го добив кога станав министер, првата голема главоболка со која се соочив – Извештајот за состојбата, во каква состојба беше изградбата на овој експресен пат. Ќе ви кажам кратко, директно, работници немаше, активности немаше, не беа решени косините и фалеа некаде околу 13 милиони евра за да се исплати и да се доврши реализацијата на овој експресен пат. Изведувачот се спремаше за арбитража, првите чекори беа преземени. Работниците беа повлечени. Причината беше претходната Влада која година ипол не сакала да потпише два адендуми кои беа договорени заедно со европската делегација и не сакала да формира Комисија која што ќе ги спроведува. Новата Влада за само месец дена ја формираше Комисијата во јули, во август се работеше на содржината на овие два анекси и на 12-ти септември проблемите беа решени. Од тогаш до буквално Нова година се работеше тука, се заврши и честитам, истакна Николоски.
Архиепископот на Македонската православна црква ОА, неговото блаженство господин господин Стефан ќе раководи со чинот на осветувањето на водите на Охридското Езеро за големиот христијански празник Богојавление.
Архиепископот Стефан ќе го положи Светиот крст во езерото кај Градското пристаниште во Охрид, пред традиционално голем број верници и оние што ќе влезат во студените езерски води.
Празникот Водици традиционално се одбележува на 19 јануари. Чествувањата на Богојавленските празници во Охрид ќе се одбележат со сите црковни обичаи, но ќе има и сенародна веселба во организација на локалната самоуправа.
За добро празнично расположение на Водици се задолжени Сузана Спасовска, Бојана Скендеровски, Миле Кузмановски и групата „Де-Ен-Ка“, со композиции од музичкиот проект „Македонијо во срце те носиме“, додека за утредента кога се празнува Денот на рибарите за забава се ангажирани членови од охридскиот музички еснаф.
Македонската машка ракометна репрезентација утре го стартува настапот на Светското првенство кое се одржува во Хрватска, Данска и Норвешка, а започнува денеска.
Македонија е во групата Д која натпреварите ќе ги одигра во Вараждин, Хрватска, заедно со Унгарија, Холандија, Гвинеја.
Избраниците на Кире Лазаров и овој пат ќе имаат поддршка од трибините. Според последните податоците од организаторот, потврдени се најмалку 1.000 македонски навивачи кои ќе бидат на трибините во „Вараждин арена“.
Црвено-жолтата боја во голем дел ќе ја обои спортската сала во Вараждин, а „Фалангата“ е веќе подготвена за жестоко навивање и максимална поддршка за ракометарите.
Македонија првенството го отвора утре со натпревар против Унгарија закажан во 20:30 часот.
Ова е трето големо натпреварување за Македонија на хрватско тло. По СП 2009 и ЕП 2018 година.
На шампионатот што ќе трае до 2 февруари ќе учествуваат 32 репрезентации поделени во осум групи.
Осмиот ден после раѓањето, Христос бил однесен во храмот и обрезан. Во Стариот завет со тоа се запечатувала припадноста на народот наследник на Божјите ветувања. Обрезанието инаку е праслика на тајната на крштението и како такво има значење и во новозаветната Црква.
Овој празник се празнувал уште во првите векови на христијанството. Денес се слави и свети Василиј Велики, кој се упокоил на овој ден. Тој е еден од тројцата најголеми црковни учители од четвртиот век.
Родум бил од Кападокија, завршил школа во Атина. Бил голем христијански философ, а се прославил и како епископ и заштитник на чистотата на православното учење. Се упокоил во 379 година.
Премиерот Христијан Мицкоски утре во 11 часот ќе присуствува и свој говор ќе има на пуштање во употреба на делницата Градско-Дреново (дел од експресниот пат Градско-Фариш).
Делницата Градско-Дреново е во должина од 15,5 километри плус 1 километар од делницата Фариш-Дреново, или вкупно 16,5 километри од експресниот пат.
Вредноста на проектот е 37.300.000 евра од кои 26.700.000 евра се обезбедени преку ИПА фондовите и 10.600.000 евра се обезбедени од Буџетот.
Делот што се пушта во употреба содржи 3 клучки Градско, Росоман, Дреново, 4 вијадукти, 1 мост, 4 надпатници и 3 подпатници.
