Во изминатото деноноќие во целата држава беа евидентирани вкупно 27 пожари на отворен простор, од кои 1 е сѐ уште активен, а 26 се успешно изгаснати благодарение на навремената интервенција на надлежните служби, велат од Центарот за управување со кризи.

Во Прилеп и прилепско во изминатото деноноќие изгаснати се пожари на неколку места:

– с. Канатларци – с. Шелеверци (арско ѓубриво)

– м.в. „Маркова Чешма“ (ниска вегетација)

– ул. Димче Антулески (ѓубриште и ниска вегетација)

– ул. Димче Антулески бр.15 (ниска вегетација)

– стар млекар (ниска вегетација)

„Центарот за управување со кризи продолжува со внимателно следење на состојбите и координација со сите надлежни институции. Апелираме до граѓаните за внимателно и одговорно однесување на отворен простор“, велат од ЦУК.

На античкиот локалитет Хераклеја Линкестис, вечерва со Концерт на групата „Леб и сол“, започнува 17 издание на Битолското културно лето „БИТ ФЕСТ“. Со концертот во Битола, легендарната група, ја започнува својата турнеја за одбележување на 50 години на музичката сцена. Влезници по цена од 400 денари, можат да се набават во Офицерски дом и Хераклеја од 10:00 до 20.30 часот.

Официјалната програма на БИТ ФЕСТ ќе трае од 26 јуни до 31 август, но културната понуда на Битола, како прет и постпрограма е застапена за време на целиот период од календарското траење на летото и истата е исполнета со содржини од различни културни жанрови, поддржани од Општина Битола и Министерството за култура и туризам.

Пред официјалниот старт вечерва, публиката имаше можност да ужива во Празникот на музиката „Солстис“, да биде со програмските содржини на Интернационалниот младински арт фестивал „Битола отворен град“, кој трае до 28 јуни, а од синоќа вљубениците во пишаниот збор имаат можност да го проследат саемот на книга „Критична маса“ кој се одржува на малото плато пред Офицерски дом од 09:00 до 23:00 часот и ќе трае до 28 јуни.

Утревечер, на 27.06, од 20:00 часот дел од програмата на Битолското културно лето е Концертот со авторска музика на Стефанија мјузик ворлд, кој ќе се одржи на Нова сцена во Центар за култура. Станува збор за јубилеен концерт кој слави една деценија посветеност, креативност и љубов кон музиката. Стефанија е дипломирана поп-џез пејачка, артистка со препознатлива интерпретација и оригинален звук, која заедно со искусните музичари, најавува музичко патување исполнето со емоции, слобода и звук што допира до срцето.
Концертот носи љубов кон музиката, искреност и стил кој спојува повеќе жанрови. Публиката во живо ќе ги слушне нејзините најистакнати авторски композиции, преработени во современи џез, џез-рок и босанова аранжмани, џез стандарди – звук што го спојува класичното и модерното, нежното и енергичното.

Настапуваат: Стефанија Милевска Враниќ – вокал, Билјана Трајковска – вокал и пратечки вокали, Владимир Враниќ – гитара, Владимир Николиќ / Dadoni – труба, Ристо Крстевски – клавијатура, Зоки Паркет – контрабас и бас и Павел Талевски – тапани.

За овој конецрт билети по цена од 250 денари, можат да се набават во Анастасија Центар и Порта Џез.

Претедателот на Владата и претседател на ВМРО-ДПМНЕ Христијан Мицкоcки вечерва на трибина во Прилеп, пред граѓаните даде отчет за сработеното во изминатата година, и притоа соопшти дека во наредниот период ќе бидат објавени две мерки за самовработување.

– Првата, во рамки на мерката за поддршка за самовработување, предвидуваме 7.000 евра по лице, за самовработување на младо лице до 29 години предвидуваме неповратна поддршка од 10.000 евра, додека за здружување на корисници до две лица да основаат бизнис, висината на финансиска поддршка изнесува од 14.000 до 20.000 евра при што 20.000 евра се однесува содружници кои се до 29 години. На овој начин ќе обезбедиме поддршка на приватната иницијатива и потикнувам што повеќе луѓе ова да го искористат, рече премиерот Мицкоски.

Со втората мерка вработување и раст на правни субјекти се предвидува да се опфатат 1720 лица, каде при вработување на млади лица предвидена е највисока сума во износ од 250.000 денари. Мицкоски притоа потсети дека во изминатата година откако тој ја презема Владата отворени се нови 15.000 работни места.

Мицкоски истакна дека состојбата е конечно стабилизирана и дека може да се зборува за економски раст.

Токму мерките од Оперативниот план за вработување на Владата, деновиве преку отворени денови во голем број општини, ги презентира заменик министерот за економија и труд од Прилеп, Марјан Ристески.

Од 21 до 24 август во Прилеп ќе се одржи десеттото јубилејно издание на Меѓународниот меморијален ракометен турнир, кој се одржува во чест на прилепската ракометна легенда, Миле Нешкоски.

Организаторите денеска ги одредија групите и распоредот за турнирот. Како и секоја година, така и оваа, на турнирот покрај домаќинот Прилеп, ќе играат уште пет екипи од Македонија и странство, а оваа година во градот под Марковите Кули доаѓа екипата на белградска Црвена Ѕвезда.

Група 1:

РК Прилеп
РК Бутел
РК Тиквеш

Група 2:

РК Црвена Ѕвезда
РК Пролет
РК Еурофарм Пелистер 2

Покровители на турнирот се: Општина Прилеп, компаниите “Кули” и “Комфи Ангел”, кафемати “Булевар” и Министерството за спорт.

Распоредот на натпреварите ќе биде следен:

21.08.2025
15:30 часот положување на цвеќе пред споменикот на Миле Нешкоски
18:00 Пролет – Еурофарм Пелистер 2
20:00 Прилеп – Бутел Скопје

22.08.2025
18:00 Црвена Звезда – Еурофарм Пелистер 2
20:00 Прилеп – Тиквеш

23.08.2025
18:00 Црвена Звезда – Пролет
20:00 Тиквеш – Бутел Скопје

24.08.2025
15:00 натпревар за 5 место
17:00 натпревар за 3 место
19:00 финале
20:30 доделување награди и свечено затворање на турнирот

Информативен ден за презентирање на мерките од Оперативниот план за вработување за 2025 година денес се одржа во Општина Охрид, каде мерките и активностите пред присутните ги презентираа претставници од министерството за економија и труд, Агенцијата за поддршка на претприемништво и Агенцијата за вработување.

Во рамки на информативниот ден на присутните им се обрати Пеце Стефаноски од Охрид кој им ги пренесе своите искуства од користењето на мерката „Вработување со грант“. Тој користејќи ја оваа мерка ја основа својата фирма „Лидер Стакло“ специјализирана за стакларски услуги, која благодарејќи на неговата посветеност и визија бележи успешен развој. Дополнително, преку искористување на мерката „Субвенционирање на плати“ Стефаноски во компанијата вработува уште едно лице со што директно придонесува кон локалниот економски раст и креирање на нови работни места.

Во моментов активните се два јавни повици од Оперативниот план за активните програми и мерки за вработување и услуги на пазарот на трудот за 2025 година.

Првиот јавен повик е за мерката „Поддршка за креирање на нови работни места“, подмерка – Вработување и раст на правни субјекти, преку која се дава поддршка во креирање на нови работни места во микро, мали и средните претпријатија, социјални претпријатија и граѓански организации. Со мерката на претпријатијата им се дава грант за вработување на невработени лица, каде истата се движи од 160.000 до 220.000 денари, во зависност од целната група, а јавниот повик отворен до 04.07.2025 година.

Вториот активен јавен повик е за подмерката „Обука на работно место кај конкретен работодавач“ со која на невработените лица им се овозможува обука во времетраење до (3) месеци во работните простории на работодавачите согласно Програма за обука. Во овој период на невработеното лице ќе му биде исплатен месечен паричен надомест од 12.000 денари месечно со вклучено осигурување и данок на личен доход за времетраењето на обуката до 3 месеци, додека работодавачот има обврска да вработи најмалку 50% од вклучените лица во обуката со полно работно време во траење од најмалку 3 месеци.

На работодавачот ќе му биде исплатен еднократен износ од 25.000 денари по обучено лице по завршена обука, а огласот е активен до 30.11.2025 година.

Во просториите на општина Прилеп, градоначалникот Борче Јовчески и претставник од хрватската компанија Tehnix-eko d.o.o., го потпишаа договорот за доградба на фабриката за отпад преку набавка на опрема.

-Оваа инвестиција во износ од 49.578.043 денари, претставува сериозен чекор напред во модернизацијата и зголемување на капацитетите за управување со отпадот во Прилеп и регионот. Времетраењето на договорот е 365 дена, а истиот опфаќа набавка и монтажа на современа опрема што ќе овозможи поефикасна и еколошки прифатлива селекција на отпадот. Продолжуваме посветено со реализација на проекти кои обезбедуваат подобра животна средина и повисок стандард за сите граѓани – напиша Јовчески на ФБ.

Во меѓувреме изведувачот, компанијата “Ибо Под”, ја привршува доградбата на фабриката за отпад на површина од 1300м2, во месноста Омец Алинци.

Целокупниот комплекс се гради на површина од 5780м2. Во моментов се работи на инсталација на електричната мрежа и контролните табли во халата, како и бетонирање на плоча за поставување на монтажни бараки за вработените кои опфаќаат: административен дел, кујна за вработените, соби-гардеробери, тушеви и санитарни јазли. Поставена е водоводната мрежа, како и атмосферската и фекалната канализација. За потребите на објектот се изведува био јама со прочистителна станица.

Овој еко стопански клмплекс е започнат со градба во 2016 година, исклучиво со финансиски средства од ЈКП,, Комуналец, -Прилеп. Целокупниот комплекс ќе биде дореализиран со финсиски средства од Министерството за животна средина и просторно планирање по аплициран проект од страна на Локалната самоуправа во износ од 90.000.000,оо денари.

СВР Охрид поднесе кривична пријава против И.С.(22) од Прилеп, со престој во Охрид и К.М.(19) од с.Лескоец, охридско, поради постоење основи на сомнение за сторено кривично дело „тешки дела против безбедноста на луѓето и имотот во сообраќајот“. На 19.06.2025, второпријавениот му овозможил на првопријавениот да го управува неговото патничко возило „голф“ без да поседува возачка дозвола и притоа со возилото удрил двајца пешаци, од кои едниот починал. На двајцата им е одредена мерка притвор во траење до 30 дена – информираат од МВР.

Денес во 19:30 часот ВМРО-ДПМНЕ ќе одржи трибина во општина Прилеп на тема: „Економски раст и дигитална трансформација“, на која модератори ќе бидат Марија Митева, портпарол на Владата и член на ИК на ВМРО-ДПМНЕ и Валентин Манасиевски, член на ЦК на ВМРО-ДПМНЕ и говорници:

– Христијан Мицкоски, претседател на ВМРО-ДПМНЕ;

– Гордана Димитриеска Кочоска, министер за финансии;

– Стефан Андоновски, министер за дигитална трансформација;

– Елена Петрова, директор на Управа за јавни приходи;

– Бојан Стојаноски, пратеник во македонското Собрание.

-На 24.06.2025 во 21.27 часот во Полициското одделение Ропотово било пријавено дека во с.Дреновци, прилепско, настанал пожар во штала сопственост на П.В.(67). Пожарот бил изгаснат од Територијалната противпожарна единица Прилеп, а со повреди се здобил малолетник од с.Дреновци, прилепско, констатирани во Градската општа болница Прилеп. Исто така, во пожарот изгореле три домашни животни. Извршен е увид и се преземаат мерки за расчистување на настанот – информираат од МВР.

Во четврток – 26 јуни 2025г со почеток во 21.00ч, Општина Прилеп ќе започне со реализација на третата сезона од проектот: ОД НУЛА ДО КУЛТУРА – ПРОЕКТ ЗА МУЗИЧКО И КУЛТУРНО ОПИСМЕНУВАЊЕ НА ГРАЃАНИТЕ ОД ОПШТИНА ПРИЛЕП.

На Камената бина во центарот на градот настапуваат дечките од прилепскиот бенд BANDA BEND, кои ќе ги поздрават прилепчани со звиците на култните NIRVANA.

Банда бенд како еден од прилепските алтернативни рок и хард-рок состави веќе долги години ја одржува, промовира и развива оваа сцена, со што допринесува во зголемувањето на културната понуда, како и афирмација на музички стилови, што подоцна го креираат правецот на новите генерации.

Во своето постоење од 2012 година па наваму, имаат настапувано во речиси сите поважни алтернативни локали, во сите градови низ Македонија.

На 26ти јуни (четврток), заедно со неколкуте свои гости ќе ги свират култните НИРВАНА!

Илија Чакароски – ел. гитара и вокал

Методија Костоски – бас гитара и вокал

Александар Стеваноски – тапани