Teшка сообраќајна несреќа се случи доцна попладнево на патниот правец Битола-Прилеп, во непосредна близина на населеното место Тополчани.
Според информациите засега, судрени се две возила, од кои едното од ударот излетало од коловозот.
Сообраќајот во моментов се одвива по една лента, а полицијата на лице место врши увид.
Засега нема информации за повредени лица.
Повеќе информации подоцна.
Премиерот Христијан Мицкоски тврди дека американскиот потпретседател Џеј Ди Венс не е претставник на крајната десница.
-Ако некој ја говори вистината и ако таа содржи вистински примери каде што јасно се прикажуваат двојните стандарди како што ги кажа претседателските избори во Романија, неколку примери во Велика Британија, Шкотска, Германија…тоа нас не треба да не оптеретува и не треба да се обидуваме да го цензурираме. На вистината треба да ѝ погледнете во очи и да барате начин да аргументирате и борите ако сакате таа вистина да ја промените. Сега во Вашингтон на најголемиот настан на Републиканците, разговарав со десетици луѓе. Таа е линијата, тоа е новото нормално кое што доаѓа од Вашингтон и кое што ќе го преплави светот. Тука нема играње. Ние сме тие кои први го запоседнуваат теренот. Тоа е мој начин на работа. Нема втора шанса за прв впечаток. Запоседни го теренот, па потоа кој и да дојде, се реди позади тебе. Мораме да го запоседнеме теренот и да се пронајдеме во едно ново нормално, кажа премиерот денеска од скопско Ченто за политиките на новата американска администрација низ светот.
-Ако некому му пречи тоа што го кажа Џеј Ди Венс… и на мене ми пречи што 20 години не можам ниту милиметар да се мрднам, не затоа што не сум добар, туку затоа што некој треба да решава прашања од 10-ти век во 21-от век. Треба да си ја кажеме вистината. Ако отидете во тие центри и седнете со луѓето, тоа е вистинскиот начин. Ќе се борам и понатаму, додаде Мицкоски.
Претседателот на Владата информира дека во петок патува во Истанбул, на приватен ручек со тамошниот претседател Реџеп Таип Ердоган за, како што вели, потврда на стратешкото партнерство меѓу Македонија и Турција. За наредниот понеделник и вторник, предвидена е меѓувладина конференција во Будимпешта.
1978 година, прилепскиот градски оркестар на чело со диригентот Илија Јанчулески маршира низ центарот на Прилеп. Време во кое се живеело еден поинаков мирен живот, во кое имало хармонија, во кое градот доживувал ренесанса. Улици со калдрма како во европските метрополи, зеленило, многу народ и по некое “фиќо” по улиците.
Време кога Прилеп имал градски оркестар, имал градски хор, кога улиците и центарот на градот блескале за време на празници и свечености.
Уживајте во глетката во продолжение во видеото кое го објави “ПРИЛЕП СТАРИ ФОТОГРАФИИ” – прилепската ризница која носталгично не потсетува на овие убави времиња од минатото:
Неодамна се одржа Zoom состанок помеѓу тимот на Про Бокс Македонија, локалната комисија за професионален бокс – официјален претставник на Европска Боксерска Унија(EBU) и Светскиот Боксерски Совет(WBC), американскиот претставник д-р Andrew Kluger и претставниците на WBC BoxMed, на кој беше претставена иновативната платформа која го следи здравјето и физичката состојба на боксери низ целиот свет.
Главната тема на состанокот беше официјалната регистрација на македонските професионални боксери на платформата WBC BoxMed. Целта на оваа иницијатива е да се обезбеди континуирано следење на нивната тежина, исхрана, тренинг, и здравствената состојба, со што ќе се гарантира нивната безбедност и подготвеност за настапи во професионалниот бокс.
WBC BoxMed, развиена од Светскиот боксерски совет (WBC) во соработка со Conexión Fácil 2.0, обезбедува лесен пристап до важни медицински информации и препораки. Платформата нуди следење на повреди, вреднување на медицинските сертификати и препораки за одржување на здравјето.
“Регистрацијата на нашите боксери во BoxMed претставува значаен чекор кон поголема безбедност и професионализам. Оваа платформа ќе ни помогне за нашите спортисти да ја одржат најдобрата форма и да бидат под постојан медицински надзор, што е од суштинско значење во професионалниот бокс”, изјави претседателот на Про бокс Македонија, Весна Чатлеска.
Д-р Оливер Тасески, медицински претставник на ПБМ, додаде:
“BoxMed ни овозможува детално следење на здравствената состојба на боксерите со сите детални медицински прегледи, што е од клучно значење за нивната безбедност. Со ова, навремено ќе се детектираат можни ризици и ќе се преземат соодветни мерки. Со редовното следење на нивната здравствена состојба, можеме навремено да реагираме и да ги спречиме потенцијалните ризици. Ова е особено важно во професионалниот бокс, каде што здравјето и формата се клучни за успеси“
“Со оваа регистрација, македонските боксери ќе бидат во чекор со најдобрите професионалци во светот, бидејќи BoxMed е задолжителна за сите шампиони и првите 15 рангирани боксери во секоја категорија на WBC“-истакна секретарот на Про Бокс Македонија Дарко Чатлески
Линк до инстаграм:
Македонија слави уште еден историски успех! По освоениот сребрен медал на Европското првенство во 2024 година, оваа година, Даниела Алексовска, членка на „Д Стронгест“, се закити со златен медал на Европското ММА првенство 2025 во Белград, Србија.
Во финалето на женската дивизија, Алексовска ја совлада Анастасија Хородивска од Украина – актуелната светска вицешампионка – во првата рунда за помалку од една минута со зафат (триаголник), освојувајќи ја првата европска ММА титула за Македонија во женска конкуренција.
Овој успех претставува значајна победа за македонскиот ММА спорт, а Алексовска уште еднаш докажа дека припаѓа на европскиот врв.
Ракометарите на Прилеп ги загубија и последните надежи за пласман во плеј-оф разигрувањето во Супер лигата, откако вчера на гостински терен беа поразени од Тиквеш.
Иако избраниците на Божидар Мојсов одиграа солидно прво полувреме, каде во повеќе наврати водеа, кавадарчани одлично ги користеа одбраните на голманот Арсиќ како и најслабата точка кај Прилеп – одбраната, и постојано беа во водство во вториот дел.
Прилеп имаше повеќе шанси да дојде на минус еден гол и да го направи натпреварот неизвесен, но дури пет пати не ги реализираа таквите напади, па Тиквеш стигна полесно од планираното до победа од 30:24.
Најдобри стрелци во победничкиот тим беа Кривокапиќ со седум и Коцев со шест погодоци, a по пет дадоа Темелкоски и Анастасовски, додека кај Прилеп се истакнаа Шабановиќ со седум и Квастеск со пет гола. Во следното коло Тиквеш гостува кај Вардар, а Прилеп ќе ја пречека Струга.
На локација на улица “Кеј 1-ви Мај”, во непосредна близина на основното училиште “Кочо Рацин”, во правец кон старата автобуска станица, “ЕЛЕКТРО ЕЛЕМЕНТИ – ИД” е местото каде ќе најдете буквално сe’ од електро материјали и лед расвета.
Во изминатите две години, ЕЛЕКТРО ЕЛЕМЕНТИ – ИД стана број еден партнер на стотици домаќинства и изведувачи.
А зошто тоа е така? Па најмногу поради снабденоста, квалитетот и цените, кои патем се најниски во целиот град, а второ и поради квалитетната услуга која ги краси како тим.
Веќе добро сите знаеме дека во ЕЛЕКТРО ЕЛЕМЕНТИ – ИД, ќе најдете се’ од програмите на VIKO и PANASONIC, за кои се овластени дистрибутери, а застапници се и за ЕТI осигурувачи, како и за висококвалитетната палетна на производи од ЕXEN.
Во нивниот продажен салон ќе најдете избор на секакви видови на подземни и воздушни кабли, а нивниот тим ви стои на располагање и за изведба на секаков вид електрични инсталации.
Особено драга им е понудата и широкиот избор на ЛЕД светилки, кои пак ги има во сите дизајни, од модерни LED светила, кои штедат енергија и нудат прекрасна осветленост, до класични дизајни кои никогаш не излегуваат од мода.
НАЈНОВО ВО ЕЛЕКТРО ЕЛЕМЕНТИ е тоа што отсега тие се ЗАСТАПНИК ЗА ПРИЛЕП за НАЈКВАЛИТЕТНИОТ БРЕНД за осветлување – WELLMAX!
Станува збор за водечки бренд во делот на осветлувањето кој од 2004 година се фокусира на иновации и производство на LED светилки. Основан во 1987година брендот WELLMAX е посветен на обезбедување производи со највисок квалитет преку строг систем на контрола на квалитетот.
Заштедете во домот и во вашите деловни простории! Набавете ги уште утре одличните лед сијалици кои се на промотивна цена од само 35 денари!
Народен театар Битола, по повод јубилејот 75 години Народен Театар „Војдан Чернодрински“, гостуваше во Прилеп со претставата ,,КОКОШКА”. Долготрајните аплаузи и стоечки овации само го потврдија фактот дека оваа претстава е една од најпопуларните на НТБ за која секогаш се бара карта повеќе.
Комедијата на авторот Николај Кољада, е во режија на Марјан Ѓоргиевски. Во истата играат: Јулијана Мирчевска, Катерина Аневска Дранговска, Соња Ошавкова, Александар Димитровски, Никола Пројчевски. За сценографијата се погрижи Валентин Светозарев, костимографија Благој Мицевски, драматург Оливера Павловиќ, светло Игор Мицевски, тон Николче Терзиевски, инспициент Оливер Петровски.
Николај Кољада – „сонцето на руската драматургија“, како што самиот еднаш се нарече, и како што го нарекуваат, кој иронично, кој со уважување, театарските дејци ширум светот, веќе три децении предизвикува голем интерес во театарскиот свет. Неговите пиеси се поставувани во најзнаменитите театри во Русија, преведени се на многу јазици и се изведуваат во Германија, Италија, Англија, САД, Швајцарија. „Феноменот Кољада“ во театарот не е случаен: тој е извонреден драматург – неговите пиеси се интересни за анализа и во нив има за што да се размислува. Кољада е можеби суров во својот натурализам, тој не нуди лажна утеха за животот таков каков што е, но и не го остава човекот без потпора во неговата потрага да се извлече од празнината и небитието. Прифаќајќи ја драмата на својот живот како свој живот, неговите ликови создаваат можност да се прифатат себеси како луѓе, а со тоа и светот светот на сопствените можности како добар свет за себе.
Tокму со оваа претстава Битолски театар ќе го честита 8.март празникот на жените, нудејќи им специјален попуст од 50% ако набават влезници на билетарата на НТБ.
Спортските игралишта во ОУ „Даме Груев“ во Битола, ќе добијат комплетно нов лик. Подлогата на овие спортски игралишта не е обновена повеќе од 20 години, со видливи оштетувања на асфалтот, кои ги отежнуваат училишните спортски активности на учениците.
Градоначалникот на општина Битола Тони Коњановски, денес на терен од стручните служби беше запознат со идејните решенија за новите спортски
игралишта во ова училиште.
Според проектната документација, новата постоечка асфалтна подлога ќе биде заменета со нов, модерен материјал, погоден за спортските
активности на учениците. Паралелно со тоа, ќе се изврши и проширување на димензиите на постоечките игралишта, кои ќе овозможат и официјални
школски спортски натпревари. Во училишниот двор ќе бидат сместени игралиштата за тенис, кошарка, одбојка, а ќе има и дополнителна фитнес
зона. Во состав на училишниот двор предвидена е и училница на отворено, со клупи за седење и можност за оджување на настава во дворот.
Просечната месечна исплатена нето-плата по вработен, во декември лани изнесувала 43 587 денари и во однос на истиот месец во 2023 година, била повисока за 9.0 %, соопшти Државниот завод за статистика.
Ваквото зголемување се должи, пред сѐ, на растото на просечната месечна исплатена нето-плата по вработен во секторите: Административни и помошни услужни дејности (13.2 %), Транспорт и складирање (12.3 %) и Рударство и вадење на камен (12.0 %).
Зголемување на просечната месечна исплатена нето-плата по вработен, во однос на претходниот месец, е забележано во секторите: Рударство и вадење на камен (13.4 %), Административни и помошни услужни дејности, Градежништво (7.0 %) и Финансиски дејности и дејности на осигурување (5.6 %).
Просечната бруто-плата во декември 2024 година изнесувала 65 582 денари.
