Во храмовите на Македонската православна црква – ОА утре и в петок по литургијата на претходно осветени дарови, ќе биде отслужен парастос за жртвите во трагедијата во Кочани, а потоа и молитва за исцеление на повредените.

– Неговото Блаженство Архиепископот Охридски и Македонски г.г. Стефан повелува утре, среда, 19.3.2025 и в петок, 21.3.2025 г. по Претходноосветената Литургија да се отслужи Парастос за невино настраданите во трагедијата во Кочани. Веднаш по Парастосот, пак, да се принесен Молитва за исцеление на повредените – се вели во известувањето до верниците.

Во сабота во 9.00 часот, во манастирот „Св. Јован Крстител“ во Капиштец, пак, со благослов на г.г. Стефан, ќе се служи Заупокоена литургија за покој на душите на сите настрадани во неодамнешната трагедија во Кочани, како и за прерано починатиот студент по теологија на Православниот богословски факултет Јане Глигороски.

Поранешниот министер за економија, Крешник Бектеши ќе заврши во притвор за следните 48 часа, исто како и поранешниот директор на Пазарниот инспекторат, откако судот го прифати барањето на обвинителството.

Судот на Кочани го прифати барањето на обвинителството за Бектеши да биде испратен во „краток притвор“, заедно со уште седуммина други осомничени, додека се уште се чека да се утврди во кој затвор ќе биде испратен.

48 часа притвор доби и Беким Максути, поранешниот директор на Дирекцијата за заштита и спасување.

Трагедијата која се случи на 16 март 2025 година во дискотеката „Пулс“ во Кочани, кога во пожар загинаа минимум 59 лица, стана една од најголемите катастрофи во Македонија од осамостојувањето на земјата, по бројот на жртви. Оваа трагедија ја поставува на третото место, веднаш по две големи авионски несреќи кои ја потресоа Македонија.

Првите две најголеми трагедии во историјата на Македонија се:
Авионска несреќа на Авиоимпекс кај Охрид (20.11.1993) – Оваа трагедија се случи кога авион од типот „Јак-42Д“ на компанијата „Авиоимпекс“ се сруши во близина на Тројани, на патот од Женева до Скопје. Поради лошите временски услови, авионот бил пренасочен. Во несреќата загинаа вкупно 116 лица, вклучувајќи 108 патници и 8 членови на екипажот. Еден патник успеал да преживее, но подоцна подлегнал на повредите. Ова беше најтешката авионска несреќа во историјата на Македонија.
Авионска несреќа на Палер Македонија во близина на скопскиот аеродром (05.03.1993) – Во овој инцидент, авион „Фокер 100“ на компанијата Палер Македонија се урна веднаш по полетувањето од скопскиот аеродром, на 400 метри од пистата. Загинаа 83 лица, а 14 патници успеале да ја преживеат несреќата. Авионот бил на пат од Скопје до Цирих, но трагичната несреќа го прекина неговиот лет.

Третото место на оваа несреќа од Кочани беше ставено по бројот на жртви, иако на крајниот број се уште се работи. Пожарот во дискотеката „Пулс“, која се случи за време на концерт на групата ДНК, го зафати целиот простор на клубот, а жртвите беа претежно млади луѓе. Според досегашните информации, најмалку 59 лица загинаа, а повеќе од 20 други лица се борат за живот во болниците.

Оваа трагедија е особено тешка за Македонија, која не се сеќава на толку голем број на жртви од една случка. По неа, во редот на големи трагедии, се наоѓаат и несреќата со автобусот на Беса Транс во Бугарија (23.11.2021), каде што загинаа 45 лица, вклучително и 12 деца, и пожарот во модуларната болница во Тетово (08.09.2021), при кој животите ги загубија 14 лица.

Меѓу другите трагедии, кои исто така оставиле големи последици за земјата, се автобусната несреќа кај Ласкарци (13.02.2019) со 16 загинати, бродската несреќа во Охрид (05.09.2009) со 15 загинати, и поплавите во Стајковци (06.08.2016), при кои животите ги загубија 22 лица.

Трагедиите од ваков тип ја потсетуваат јавноста на важноста на безбедноста во јавните простории и на потребата од безбедносни мерки кои ќе спречат вакви несреќи. Сепак, и по секоја трагедија, солидарноста и помошта за преживеаните и семејствата на жртвите остануваат најважниот аспект во лекувањето на настраданите и обновата на општеството.

Започнува теренска контрола на сите субјекти регистрирани како кабаре, дискотеки или ноќни клубови по што властите ќе излезат со детални информации.

Почнувањето на контролите вчера го најави премиерот Христијан Мицкоски по координативниот состанок со директорот на Државниот пазарен инспекторат Влатко Стојкоски и министерот за економија и труд Бесар Дурмиши на кој се разговарало за досегашните постапки кои се преземани од надлежните институции и опсежната анализа за сите субјекти регистрирани како кабаре или дискотеки, ноќни клубови.

Премиерот Мицкоски уште завчера на прес-конференција во Владата рече дека ќе почне робусна акција на проверка на сите документи во угостителските објекти, по страотниот пожар во дискотека во Кочани, во кој досега загинаа 59 лица, а 155 се повредени.

-Почнува робусна акција во насока на проверка на сите документи, сите лиценци, сите дозволи за градба, сите дозволи за употреба, дозволи за работа, и убеден сум дека ќе најдеме стотици, десетици… Милиметар да недостасува ќе бидат затворени, тука нема да има милост кон никого, рече Мицкоски.

Последиците од азбестот се страшни и предизвикуваат разни проблеми по здравјето на граѓаните, апелира доктор Бојан Трајковски.

Неговиот Фејсбук статус го пренесуваме во продолжение:

Гледам по социјалниве медиуми се шират апели за проверка на сите кои биле дел од трагедијата во Кочани поради азбестните табли во покривот и се дига особена паника па малку да појасниме зошто се предупредувањата:

Азбестот е минерал кој се користел уште во 19 тиот век во изградба на различни објекти, пред се покривите на објектите, поради тоа што имал одлични термички и звучни изолациски својства, но и поради неговата огноотпорност. Особено популарен до некаде 2005 кога е целосно забранет на ниво на ЕУ поради сериозните ризици по здравјето на луѓето особено луѓето кои работеле во вакви објекти поради што и е влезен во списокот на професионални болести.

Најчесто е користен како азбестни-цементи плочи дел од многу покриви во државава кои поради нивната отпорност на оган нашле широка примена и вака целосен како плоча нема голема опасност од истиот.

Главниот проблем кај нас е што најголем дел од овие времени објекти како локалов во Кочани имаат огромен број оштетени азбестни плочи кои се ронат, се издробени и скршени па при силен пожар азбесните честички лесно се пренесуваат преку чадот и прашината и се до толку опасни што азбестот е ставен во класа 1 канцерогена материја според меѓународната агенција за истражување на ракот.

Последиците се страшни и предизвикуваат разни проблеми како:

• Мезотелиом – неоплазма на плеврата и перитонеумот, кои обично се јавуваат по долгорочна изложеност
• Азбестоза – пнеумокониотична болест, белодробно заболувања кое најкарактеристично што доведува до белодробна фиброза.
• Рак на белите дробови – често се јавува кај лица кои биле изложени на азбест на долг рок.
• Проблеми со дишните патишта – вдишувањето на овие честитки може да предизвика долготрајна кашлица, задушување, градни болки.

На крај е многу важно да се нагласи дека најголема опасност е по здравјето на луѓето кои долготрајно се изложени на азбестно труење или кај оние со краткорочно интензивно и екстремно изложување.

Жители на Кочани, изреволтирани и гневни по вчерашната трагедија, денес излегоа на улиците во градот.

Кога дел од присутните на протестот почнаа да го покажуваат гневот на насилен начин, ним им се обрати свештеник од Кочани.

Ги повика на смиреност, ги повика да се помолат во црква. Ги потсети дека жртвите уште не се ни закопани.

Неговиот говор слушнете го во продолжение:

https://www.facebook.com/share/r/1FAoGZ3WDw/

Стотици млади прилепчани вечерва на плоштадот “Методија Андонов-Ченто”, запалија свеќи во знак на почит кон жртвите од трагедијата во Кочани.

Во солзи и со голема тага, присуствуваа средношколци и ученици од основните училишта, како и професори и граѓани кои палеа свеќи и оставаа цвеќе.

Денот и во Прилеп денеска беше исполнет со тага. Градот под Марковите Кули се солидаризира со семејствата на настраданите и повредените и се моли ваква трагедија повеќе да не се повтори.

Пожарот предизвикан од пиротехнички средства зеде 59 животи, додека 155 лица се хоспитализирани.

Со голема тага и болка ја примивме веста за трагедијата во Кочани, каде што животот го загубија 59 млади луѓе, а повеќе од 155 се повредени. Во овие тешки моменти, тимот на Еко Логистик Сервис упатува искрено сочувство до семејствата на настраданите, нивните пријатели и најблиски.

Во знак на поддршка и солидарност, ЕЛС ќе врши бесплатна достава на донации и помош до болниците каде што се згрижени повредените, како и до семејствата и роднините кои се сместени во Скопје. Доколку сакате да испратите облека, хигиенски средства, медицинска опрема или друга неопходна помош, можете да дојдете во најблискиот хаб на ЕЛС и нашиот тим ќе се погрижи пратките да стигнат веднаш до оние на кои им се најпотребни.

Ова се болни моменти кога сите треба да бидеме и да помагаме заедно.

Револтирани граѓани претежно млади луѓе денеска го демолирале кафичот Класик, вториот локал на газдата на Пулс.

По спонтан собир на граѓани во центарот на Кочани група од стотина млади се упатила кон локалот и искршиле дел од инвентарот.

По откритието дека дискотеката Пулс работела без лиценца граѓаните биле револтирани по што се случил денешниот инцидент, велат граѓани на Кочани кои апелираат на смиреност.

Видеото на овој линк:

https://www.facebook.com/share/v/1BT1psMKqr/