Пожарот во прилепскиот дел на Мариово, кој синоќа зафати делови од селото Чаниште, денеска околу пладне повторно се активирал поради засилениот ветер.

Директорот на Дирекцијата за заштита и спасување, Стојанче Ангелов изјави дека огнената линија во моментов се протега на околу 20 километри, и тоа од течението на Црна Река до врвот Маргаро.

На терен се прилепските пожарникари, тимови на Дирекцијата за заштита и спасување составени од доброволци од Битола, а дополнително се ангажирани и доброволци од Кочани и Виница.

Главна задача во текот на ноќта, според Ангелов, ќе биде заштитата на селото Крушевица, кое се наоѓа на неколку километри од пожарот.

Тој посочи дека гаснењето на огнот го отежнуваат високата сува трева и ветерот, кој постојано дува. Во интервенцијата биле ангажирани и „ер трактори“ на ДЗС, кои успеале да прекинат дел од огнената линија и значително да го намалат делот што го загрозува блискиот манастир и селото.

Ангелов оцени дека пожарот во Мариово во моментов е најголем активен пожар во државата.

Тој информира дека пожарот на подрачјето на Старо Нагоричани е ставен под контрола, додека кај селото Слеп останале само остатоци од огнот.

Во однос на последиците од пожарот во Чаниште, Ангелов појасни дека куќите што изгореле синоќа биле одамна напуштени.

– Не изгоре ниту една куќа во која што активно живеат луѓе, посочи Ангелов, додавајќи дека десетината жители на селото се вратиле во своите домови.

Сепак, како што посочи, постои можност да е изгорена и некоја куќа која сопствениците ја користеле како викендичка или за повремен престој.

Два месеци по објавата на Маркукуле и реакциите на вљубениците во фудбалот и спортската јавност во Прилеп, надлежните конечно се сетија на градскиот стадион “Гоце Делчев” во Прилеп и се фатија за работа да го вратат теренот во нормална состојба.

Денеска од ЈКП “Комуналец” се пофалија на социјалните мрежи дека теренот на “Градски” е зелен, чист и подготвен за натпревари, ама за какви натпревари нема кој да каже….

Пред стартот на новата сезона, никој не знае што се случува со прилепска Победа, чиј дом е стадионот “Гоце Делчев”. Никој не знае дали клубот е подготвен за натпревари, дали има фудбалери, дали воопшто се’ уште постои….

Фудбалските вљубеници во Прилеп чекаат позитивна вест, па макар на “Градски” да се гледа ТРЕТОЛИГАШКИ ФУДБАЛ… Во спротивно, не е лошо општината стадионот да им го отстапи на фудбалските школи, нека тренираат млади деца, којзнае, можеби од нив ќе изникнат нови таленти кои ќе го предводат фудбалот во Прилеп и ќе ги полнат трибините на “Гоце Делчев”.

За еден месец во земјава се регистрирани 11 нови случаи на ХИВ/СИДА – покажуваат податоците од месечниот билтен на Институтот за јавно здравје (ИЗЈ) за движењето на акутните заразни заболувања. Според пријавеното, деветмина од заразените се мажи, а две жени. Пациентите се на возраст од 20 до 49 години.

„Согласно постоечката евиденција на пријавени случаи (заклучно со 30.06.2026), кумулативниот број на лица регистрирани со ХИВ/СИДА во С Македонија, за периодот од 1987 до 2026 година, изнесува 765 и тоа: 141 починато лице, 508 лица кои живеат со ХИВ/СИДА и 116 лица кои се водат како изгубени за следење (иселени)“се наведува во билтенот на ИЈЗ.

Од другите сексуално и крвно преносливи инфекции, во јули се пријавени седум случаи на сифилис, четири случаи на вирусен хепатитис Б и по еден случај со гонореја, инфекција со хламидија и вирусен хепатит Ц.

Голем пожар што вчера попладне избувнал во близина на прилепското село Чаниште брзо се проширил кон селото, при што биле опожарени повеќе од 20 куќи и плевни, а четворица жители побарале медицинска помош поради вдишување чад.

Пожарот бил пријавен во 15 часот во ОВР Прилеп, откако Полициската станица за граничен надзор Старавина известила дека огнената стихија избувнала на околу 200 метри пред селото.

Според пријавеното, најпрво гореле сува трева и нискостеблести грмушки на површина од околу три хектари. Силниот пожар, меѓутоа, набргу се проширил кон Чаниште и навлегол меѓу објектите во селото.

Во огнот биле зафатени над 20 куќи и плевни, а поради густиот чад четворица жители морале да побараат помош од екипа на Итната медицинска помош.

Од Територијалната противпожарна единица Прилеп пожарот бил ставен под контрола, по што продолжиле активностите за негово целосно гаснење.

Според информациите од ТППЕ Прилеп и Дирекцијата за заштита и спасување, пожарот во селото е изгаснат, но постои опасност истиот да се врати. Огнениот појас е поделен на два дела, при што едниот крак се движи кон Река Црна и Расинбегов мост, а вториот кон битолскиот дел од Мариово.

Чаниште се наоѓа во прилепскиот дел на Мариово и е дел од Општина Прилеп. Селото се наоѓа во ридско-планински предел, што дополнително го отежнува гаснењето на пожарите и движењето на противпожарните екипи.

Засега нема официјални информации за точниот број целосно и делумно оштетени објекти, ниту за причината за избувнувањето на пожарот. За овие околности се очекуваат дополнителни информации од надлежните институции.

Случајот е пријавен во полицијата, а се преземаат мерки за расчистување на околностите под кои избувнал пожарот.

Од стручно работење бележиме огромна дупка пред градинката “Гоце Делчев”… Супер што вака е обележана, сигурно и навечер добро сите ќе ја забележат, па нема да настане некоја несакана последица…

ФОТО: МОЈ ПРИЛЕП

Битола ќе биде домаќин на одбележувањето на 25-годишнината од формирањето на Единицата за брзо распоредување (ЕБР), по повод значајниот јубилеј посветен на професионалноста, храброста и пожртвуваноста на нејзините припадници.

Во рамки на одбележувањето, на 19 и 20 август 2026 година, со почеток во 16:00 часот, на платото пред Офицерскиот дом во Битола ќе се одржат вежбовни активности. Граѓаните ќе имаат можност да проследат дел од професионалноста, подготвеноста и вештините на припадниците на Единицата за брзо распоредување.

Централниот настан ќе се одржи во сабота, 22 август, со почеток во 18:00 часот, повторно на платото на Офицерскиот дом. Во рамки на настанот ќе биде реализирана показна вежба на ЕБР, преку која присутните одблиску ќе можат да ја видат нивната обученост, тактичка подготвеност и професионално делување.

Јубилејот од 25 години претставува значаен момент за Единицата за брзо распоредување, која низ годините е препознатлива по својата подготвеност и ангажман во служба на граѓаните и безбедноста на државата.

Битола ги пречекува оние кои секојдневно се грижат за безбедноста на сите нас.

Организаторите упатуваат отворена покана до сите битолчани во сабота да бидат дел од одбележувањето и заеднички да го одбележат јубилејот на Единицата за брзо распоредување.

25 години храброст, професионалност и пожртвуваност – 25 години ЕБР.

На 18.08.2026 во 01:00 часот во Прилеп, полициски службеници од ОВР Прилеп го лишија од слобода И.Ѓ.(47) од Прилеп.

-При претрес во неговиот дом во Прилеп, извршен со наредба од Основен суд Прилеп, биле пронајдени 85 стебла марихуана, две дигитални ваги, две ќеси со семки од канабис и повеќе различни пакувања со марихуана.

Тој е задржан во полициска станица и по целосно документирање на настанот ќе следува соодветна пријава.

Прилеп повторно живее со ракомет! Во четврток (20.08.) започнува XI Меморијалниот ракометен турнир „Миле Нешкоски“, традиционалната спортска манифестација посветена на една од најзначајните личности во прилепскиот и македонскиот ракомет.

Од 20 до 23 август, спортската сала „Ристе Ристески – Ричко“ ќе биде местото каде шест екипи ќе се борат за престижниот трофеј, но и каде низ спортот повторно ќе се оживее споменот на Миле Нешкоски – човекот чие име со години е нераскинливо поврзано со ракометот во Прилеп.

Турнирот ќе започне со традиционалното положување цвеќе пред споменикот на Миле Нешкоски, како чин на почит кон ракометарот и спортскиот работник кој остави длабока трага во спортската историја на градот.

На теренот, пак, следуваат четири денови исполнети со квалитетен ракомет и голема борба. Екипите се поделени во две групи:

Група 1:
РК Прилеп
РК Мулти Есенс
РК Младост 1997 Богданци

Група 2:
РК Бутел Скопје
ГРК Тиквеш 2014
РК Еурофарм Пелистер 2

Првиот ден на програмата се два натпревари. Од 18:00 часот силите ќе ги одмерат РК Бутел Скопје и ГРК Тиквеш 2014, додека од 20:00 часот домаќинот РК Прилеп ќе го одигра првиот натпревар на турнирот против РК Мулти Есенс.

Домашниот терен секогаш носи посебна енергија, а кога се игра во чест на човек кој оставил неизбришлива трага во ракометот, таа атмосфера е уште посилна.

Следуваат четири дена ракомет, спортска борба, дружење и емоции, а љубителите на ракометот од Прилеп ќе имаат можност да уживаат во натпревари на квалитетни екипи и да бидат дел од уште едно издание на турнирот кој прерасна во вистинска прилепска ракометна традиција.

Се гледаме во сала – затоа што легендата живее!

Од 18 до 25 август 2026 година ЦК „Марко Цепенков“ ќе ја реализира 18 -та ликовна колонија „Марко Цепенков – Дрен 2026“. На колонијата годинава ќе творат Дамјан Ѓуров, Никола Пијанманов, Марјан Стојаноски, Слободан Милошески, Озбек Ајваз, Славчо Павлески и Емил Солески, кои ќе работат монументални скулптури за во јавен простор.

Колонијата е дел од годишната програма на Центарот за култура „Марко Цепенков“ за 2026 година во визуелни дејности поддржана од Министерството за култура и туризам.

Со особено задоволство информираме дека 18-та ликовна колонија „Марко Цепенков – Дрен 2026“ годинава за првпат ја поддржува и Општина Прилеп.

Колонијата годинава става посебен акцент на монументалната скулптура и нејзината улога во јавниот простор.

„Колонијата е значајна средба на уметници, идеи и современи скулпторски изрази, со една јасна цел, уметноста да излезе од галерискиот простор и да стане дел од секојдневниот живот на заедницата. Создавањето монументални скулптури отвора можност за трајни уметнички интервенции кои го збогатуваат просторот, го градат неговиот идентитет и стануваат дел од колективното сеќавање. Преку непосредната работа и размената на идеи, уметниците го истражуваат односот меѓу материјалот, формата, просторот и времето. Особено ни значи што Ликовната колонија „Марко Цепенков“ е добитник на наградата „3-ти Ноември“ на Општина Прилеп, признание кое го потврдува нејзиното значење и долгогодишниот придонес кон културниот и уметничкиот живот на градот”, вели Марјан Стојаноски, координатор на колонијата.

Во кино-салата „Мис Стон“ при Домот на културата „Марко Цепенков“ вчера започна првото издание на меѓународниот шаховски турнир „ПРИЛЕП ЈУНИОР 2026“, настан кој на едно место собра млади шахисти од Македонија, Србија и Австрија.

На турнирот учествуваат 12 шахисти, од кои 10 момчиња и две девојки. Она што ветува особено интересни партии е фактот што нема изразит фаворит, бидејќи квалитетот на учесниците е исклучително изедначен. Секоја партија носи борба за секој поен, а дополнителен мотив е и фактот што турнирот е регистриран и се рангира преку Светската шаховска федерација – ФИДЕ.

Организатор на „ПРИЛЕП ЈУНИОР 2026“ е Шаховскиот клуб „Прилеп“, еден од најуспешните шаховски клубови во земјава. За силата на клубот зборува и фактот што, заедно со ШК „Алкалоид“, е единствениот клуб во Македонија кој има по две прволигашки екипи во машка и женска конкуренција на претстојното Државно првенство во Струга.

Шаховскиот клуб „Прилеп“ има и посебно значајна страница во својата историја. На Купот на европските шампиони во 2021 година, за прилепскиот клуб настапуваше индискиот велемајстор Домарају Гукеш, денес актуелен светски првак. Гукеш тогаш, играјќи за ШК „Прилеп“, го освои златниот медал како најдобар играч на турнирот.

Од клубот најавуваат дека и годинава постои амбиција повторно да го претставуваат Прилеп на Купот на европски шампиони, кој ќе се одржи во Херцег Нови, Црна Гора. За реализација на оваа цел, како што велат, потребно е обезбедување на минимални финансиски средства.

Првото издание на „ПРИЛЕП ЈУНИОР 2026“ е уште еден чекор кон создавање традиција и популаризација на шахот меѓу младите во Прилеп. Квалитетни партии, борбеност и неизвесност до последниот потег се очекува да го одбележат турнирот, со надеж дека ова меѓународно шаховско дружење од година во година ќе расте и ќе прерасне во препознатлив спортски настан за градот.