Премиерот Христијан Мицкоски во Прилеп изврши увид во градежните активности за реконструкција на водоводната мрежа на улицата Кузман Јосифовски и во изградбата на кружниот тек кај мостот „Табана“.

Тој во своето обраќање истакна:

“Би сакал да ја искористам оваа можност да потенцирам дека овие проекти се многу значајни за сите општини во Македонија. Ова што го кажа градоначалникот на Прилеп, но и потпретседателот на Владата и министер за транспорт дека со овие проекти додаваме вредност и го зголемуваме квалитетот на живот е вистина бидејќи имаме повеќе од 1.200 градилишта коишто се резултат на проектот за децентрализација на средства од централниот буџет кон општините. Во оној неврзан муабет со градоначалникот бев информиран дека повеќе од 12 милиони евра се проектите коишто од страна на Владата се финансираат во Прилеп преку оваа програма. И кога на тоа ќе се додадат и средствата коишто Општина Прилеп ги издвојува како средства за капитални инвестиции, плус други програми коишто доаѓаат од другите министерства надвор од оваа програма, тогаш доаѓаме до една огромна бројка и огромна бројка на проекти коишто ќе имаат за задача да го подобрат квалитетот на живот во Прилеп.

Би сакал да ја искористам оваа можност да се заблагодарам на градоначалникот и да честитам за посветената работа којашто ја прави изминатиов период, на советниците коишто ја поддржуваат неговата работа како градоначалник, на пратениците коишто се од Прилеп и коишто се борат за проект повеќе за Прилеп и овој дел од Македонија. Да се заблагодарам се разбира тука и на колегите од Владата, на сите оние коишто учествуваат во реализацијата на овие проекти бидејќи нашата цел како Влада уште на самиот почеток беше да испорачаме што е можно повеќе проекти во рамките на нашите можности со коишто ќе го подобриме онолку колку што можеме квалитетот на живот на нашите сограѓани.

Така што уште еднаш еве честитам на сите и би посакал да се движиме во рамките на роковите коишто се зададени за да овие проекти бидат пуштени во употреба и ја имаат својата полна намена“.

Крушево е подготвено за јубилејното, 10-то издание на меѓународниот FIS Rollerski Cup „Тоше Проески“, кој годинава ќе се одржи на 22 и 23 август, во организација на Скијачката федерација на Македонија.

Купот и оваа година ќе ги собере љубителите на нордиските дисциплини и натпреварувачи од повеќе земји, а спортската програма ќе биде проследена со дружење, натпреварувачки дух и промоција на спортските вредности.

Церемонијалното отворање е предвидено во петок пред спомен-куќата на македонската музичка легенда Тоше Проески, по кого традиционално го носи името оваа спортска манифестација.

Натпреварите ќе се одржуваат во повеќе категории и на различни должини. Во машка конкуренција предвидени се трки на 7,5 и 10 километри, додека жените ќе се натпреваруваат на 5 и 7,5 километри. Посебен дел од програмата е предвиден и за најмладите учесници во категориите У8, У10, У12 и У14.

Завршницата на купот е закажана за недела, 23 август, кога на Градскиот плоштад во Крушево ќе се одржат свеченото доделување на наградите и официјалното затворање на манифестацијата.

FIS Rollerski Cup „Тоше Проески“ претставува значаен спортски настан кој, покрај промоцијата на нордиските спортови, придонесува и за афирмација на Крушево како атрактивна дестинација за спортски туризам и активности на отворено.

Поддржувачи на настанот се Министерството за спорт, УНИБанка, Меѓународната скијачка федерација (FIS) и Општина Крушево, додека технички организатори се клубовите Скии Рис и Ски Нордиски.

Крушево уште еднаш ќе биде во знакот на спортот, а јубилејното издание на купот се очекува да донесе уште една атрактивна спортска приказна посветена на нордиските дисциплини и на споменот на Тоше Проески.

Директорот на Дирекцијата за заштита и спасување Стојанче Ангелов изутринава информира дека целосно е изгаснат пожарот во околината на селото Лопатица кое ноќеска беше загрозено од пламените јазици. Ангелов повтопрно апелира до граѓаните да бидат внимателни бидејќи доволна е само искра која ако падне на сува трева може да настане вистинска катастрофа.

– Утрово селата Бонче, Подмоље и Лопатица се безбедни. Тешка ноќ имаа пожарникарите од Прилеп, доброволните пожарникари ангажирани преку ДЗС, сите ние кои се наоѓаме во селото Лопатица кое синоќа беше загрозено од пламените јазици. Пожарната линија која беше видлива од регионалниот пат Прилеп Битола е целосно изгасната, активен е само уште еден крак високо над селото Бонче. Голема благодрност до прилепските пожарникари кои ноќва со контра пожар којшто го правеа над една противпожарна пресека во непосредна близина на село Лопатица, претходно изработена со механизациј успеаја да го прекинат огнот и да не му дозволат да ја премине пресеката и на тој начин да го загрози селото Подмоље – рече Анеголов.

Тој исто така му се заблагодари и на тимот за Брз одговор на ДЗС, составен од пожарникари од Битола и Кочани кои се качиле високо на ридовите околу селата и ја гаселе со километри долгата огнена линија.

Ангелов вели дека е загрижен дека зголемувањето на температурите околу пладне на одредени делови огнената линија да биде реактивирана.

– Но, наша задача е да внимаваме на неа. Овде има пожарникари од Прилеп и исто така се наоѓаат и посадите на двата Пинцгауери кои ќе внимаваат и доколку дојде до реактивирање, да ја изгаснат. Пожарот и од мариовската страна е изгаснат или ставен под целосна контрола. Оптимист сум дека денеска имаме можност да му го зададеме последниот удар па и на мое изненадување целосно да го изгаснеме овој најголем пожар оваа сезона – рече Ангелов.

Повторно неизвесни „облаци“ надвиснале над Прилеп и иднината на Победа. Сепак, како светло на крајот на тунелот се јавува можна иницијатива за организирање и преземање на клубот. Се најавува нова ера и продолжување на успесите од минатото.

„Постојат моменти кога минатото и иднината се среќаваат, кога нешто што се сметало за заборавено почнува повторно да дише. Наследство изградено низ генерации, пренесено низ спомени, страст и срцата на оние кои никогаш не престанале да веруваат. Можеби поминало време, и можеби тишината го презела своето место, но некои работи никогаш навистина не исчезнуваат. Тие чекаат. Тие опстојуваат. И кога ќе дојде вистинскиот момент, тие се враќаат — не за да го повторат она што некогаш било, туку за да започнат нешто поголемо. На хоризонтот се наѕира нова ера. Приказната продолжува, и овојпат, ова е само почеток“, се вели во најавата која деновиве се појави на социјалните мрежи.

View this post on Instagram

A post shared by FK POBEDA PRILEP 1950 (@fkpobeda1950)

Победа минатата сезона испадна од Втората лига и вторпат во својата историја по осамостојувањето ќе игра во третиот ранг на натпреварување.

СВР Битола поднесе кривична пријава против Љ.Б.(59) од Прилеп поради постоење основи на сомнение за сторени кривични дела „проневера во службата“, „злоупотреба на службената положба и овластување“ и „фалсификување службена исправа“, К.С.(60) од Прилеп поради постоење основи на сомнение за сторено кривично дело „несовесно работење во службата“. Ј.Д.(41) од Прилеп поради постоење основи на сомнение за сторени кривични дела „прикривање“ и „фалсификување службена исправа“ и правно лице село Мало Коњари, прилепско, поради постоење основи на сомнение за сторено кривично дело „прикривање“.

Првопријавениот Љ.Б., во 2021/2022 година работел во АД „Тутунски Комбинат“ – Прилеп на работно место координатор на група за обезбедување, а второпријавениот во истиот период бил генерален извршен директор на АД „Тутунски Комбинат“, третопријавениот Ј.Д. е сопственик и управител на четвртопријавениот правен субјект, овластена фирма за откуп и продажба на отпадни материјали со која АД „Тутунски Комбинат“ Прилеп има склучено договор за откуп на отпадни материјали.

Во првото тримесечие на 2022 година, првопријавениот Љ.Б., спротивно на член 3 од Одлуката за одобрување на отпис од сметководствена евиденција и продажба на основни средства, ситен инвентар и резервни делови како отпадни материјали, по негов усмен предлог од тогашниот генерален извршен директор, второпријавениот К.С., му било овозможено тој да ја спроведе продажбата на отпад наместо референтот за управување со отпад.

Во текот на февруари 2022, првопријавениот со помош на третопријавениот Ј.Д. прикриле најмалку 185.000 килограми отпадно железо од Работна единица Заводи – Мажучиште и не ја евидентирале на сметка на тутунскиот комбинат, а била предадена и откупена од правното лице од с.Мало Коњари по повисока цена за два денари од килограм. Но, наместо на сметката на АД Тутунски комбинат, од правното лице од с.Мало Коњари биле изготвени фиктивни откупни белешки за предадено отпадно железо во просек по околу 25 000 килограми по лице на име на осум физички лица (блиски лица на првопријавениот), со изјави за потеклото на отпадот.

Воедно, и паричните средства биле префрлени на банкарски сметки на седум физички лица, како и на личната банкарска сметка на првопријавениот Љ.Б.. По префрлањето на паричните средства на нивните трансакциски сметки во банки, тие ги подигнувале во готово и му ги предавале на првопријавениот.

На ваков начин на сметките биле префрлени парични средства во вкупен износ од 3.338.328 денари и за тој износ е оштетен АД Тутунски Комбинат Прилеп. Додека, на АД Тутунски Комбинат по основ на продажбата на отпадното железо, од правното лице од с.Мало Коњари исплатени се парични средства во вкупен износ од 1.274.560 денари.

Здружението за субкултура „ПП ЏЕЗ ФЕСТИВАЛ ПРИЛЕП“, организатор на фестивалот Prilep Jazz Weekend, го најавува почетокот на јубилејното 15. издание со концерт на еден од најпознатите македонски музичари, Драган Даутовски.

Концертот ќе се одржи на 23 август 2026 година, недела, со почеток во 18:30 часот, на археолошкиот локалитет Врбјанска Чука.

Со овој настан продолжува традиционалната соработка меѓу Prilep Jazz Weekend и Центарот за истражување на праисторијата, преку која музиката и културното наследство се поврзуваат во уникатен амбиент. Врбјанска Чука и годинава ќе биде место каде посетителите ќе имаат можност да уживаат во музички настап во непосредна близина на еден од значајните археолошки локалитети во регионот.

Организаторите посочуваат дека ваквите настани имаат за цел не само да понудат квалитетна музичка програма, туку и да придонесат кон промоцијата на археолошкото и културното наследство, создавајќи несекојдневно искуство за посетителите.

Од Prilep Jazz Weekend упатуваат благодарност до Општина Прилеп, Општина Кривогаштани, општествено одговорната компанија GURMANO, како и до сите добронамерници кои несебично го поддржуваат реализацијата на настанот.

Овој концерт ќе биде вовед во јубилејното издание на Prilep Jazz Weekend, чија официјална програма ќе биде претставена на 1, 2 и 3 октомври во просториите на НУЦК „Марко Цепенков“.

Со концертот на Драган Даутовски на Врбјанска Чука, Prilep Jazz Weekend уште еднаш ја потврдува својата препознатлива концепција – спој на музиката, културата, историјата и уникатните простори кои му даваат посебна атмосфера на секој фестивалски настан.

PR текст

Август полека се ближи кон крајот, но летото сè уште не е готово.

Останаа уште неколку викенди, уште неколку убави денови за прошетка, вечера со друштвото, кратко патување или она спонтано „ајде да одиме некаде“ пред да започне септемврискиот ритам.

И токму сега најмалку ти треба плановите да ги одложуваш затоа што следната плата сè уште не е стигната.

Со Авaнс до плата од Минт Кредит (ФД Минт СН), можеш да си обезбедиш дополнителни средства кога ти се најпотребни – до 40.000 МКД, со 0% камата и 0% трошоци.

✔ За последните летни планови .

✔ За спонтано патување или викенд.

✔ За деновите кога едноставно сакаш да уживаш, без да го чекаш календарот.

Затоа што летото можеби е при крај, но има уште време за едно последно „ајде“.

Планот е денес. Летото е сега. Зошто да чекаш?

Аплицирај за Авaнс до плата од Минт Кредит(ФД Минт СН) и искористи ги последните летни денови за она што ти значи.

Контактирај нѐ на 15 007, нашата веб страна, или во најблиската филијала до тебе.

*Оваа понуда важи за прв земен кредит од ваков тип.

Прилеп во сабота, 22 август, ќе биде домаќин на едно од најатрактивните случувања за љубителите на моторите, блузот и рок музиката. На Плоштад “Александрија”, на камената бина, ќе се одржи традиционалниот мото фестивал „Рисови 2026“, кој најавува ден исполнет со мотори, музика, дружење и вистинска рок атмосфера.

Фестивалот започнува во 15:00 часот со отворање на настанот и пречек на гостите, по што во 15:30 часот за музичката атмосфера ќе се погрижи Диџеј Биџо.

Централниот дел од мото-програмата е големото мото дефиле, кое е закажано за 18:30 часот и низ прилепските улици ќе донесе колона од мотори и препознатливата атмосфера која ги следи ваквите собири.

По дефилето следува музичкиот дел од фестивалот. Во 19:30 часот на сцената ќе настапат Hound Dogs од Србија, бенд кој на прилепската публика ќе ѝ донесе моќна доза блуз и рок музика.

Вечерта ќе кулминира во 22:30 часот со настапот на „Бело Копче“, македонскиот Bjelo Dugme tribute бенд, кој ќе ги оживее безвременските хитови на легендарната група.

„Рисови 2026“ е настан кој ги спојува љубителите на мото-културата и рок музиката, а организаторите најавуваат целодневно дружење и атмосфера која ќе го претвори Плоштад Александрија во место за вистинските љубители на моторите и рокот.

Сабота, 22 август, од 15:00 часот, Плоштад Александрија – Камена бина. Прилеп е подготвен за ден и ноќ исполнети со мотори, музика и рок.

Европската централна банка (ЕЦБ) подготвува целосно нов визуелен редизајн на евро-банкнотите, што претставува прва поголема промена од ваков вид за единствената европска валута.

И покрај сè поголемата застапеност на картичките и дигиталниот начин на плаќање, од ЕЦБ децидно порачуваат дека готовината нема да исчезне од употреба.

За идниот изглед на банкнотите се разгледуваат две главни теми: европската култура, со мотиви на познати личности од уметноста, музиката и науката, или пак природата, посветена на природните богатства.

ЕЦБ веќе спроведува јавно советување за граѓаните, а победничкото дизајнерско решение треба да биде официјално објавено во декември годинава.

Сепак, новите банкноти нема веднаш да заминат во оптек, а нивното реално воведување не се очекува пред 2029 година.

Директорката на одделот за банкноти во ЕЦБ, Дорис Шнеебергер, го спореди редизајнот со реновирање куќа, истакнувајќи дека не би се вложувало во нешто што наскоро треба да исчезне.

Според неа, целта е идните банкноти да бидат поблиски до граѓаните и да содржат современи безбедносни карактеристики за заштита.

Паралелно со ова, ЕЦБ работи и на воведување дигитално евро, кое исто така би можело да стане достапно од 2029 година како дополнување, а не замена за хартиените пари.

„Нашата цел е плаќањето со јавни пари секогаш да биде опција, било со готовина или со дигитално евро“, порача Шнеебергер, додавајќи дека граѓаните и понатаму ќе можат слободно да избираат меѓу готовина, дигитално евро или други начини на плаќање.

Ова ќе биде втор поголем редизајн, откако првите банкноти од 2002 година беа освежени со серијата „Европа“ од 2013 до 2019 година, додека новиот концепт ќе содржи вистински личности, птици и градби.

На 21 август 2026г. /петок/ од 20.00 часот во Ликовниот салон од ЦК „Марко Цепенков“ ќе се одржи концерт на класична музика на кој ќе настапи ТРИО ДОЛЧЕ. Концертот е со поддршка на Министерството за култура и туризам.

Учесници :
Светлана Богданоска Ристеска – флејта,
Андријана Дукоска – виолончело,
Марија Шамоска Буџаковски – пијано

Програма:

1. Astor Piazzolla – Libertango

2. Astor Piazzolla – Oblivion

3. Weber – Trio in G minor – Op. 63 for piano, flute and cello
– Scherzo (Allegro vivace)
– Schäfers Klage ( Andante espressivo)

4. Трајко Прокопиев – Дојранка

5. Philippe Gaubert – Trois Aquarelles
No. III Sérénade

6. P. I. Tchaikovsky – The Seasons Op. 37

– February | Carnival
– April | Snow bell
– Octobre | Chant d’Automne

7. Nelio Milotti – Охридски бисери

Податоци за TRIO DOLCE:

TRIO DOLCE е музички состав кој е формиран во 2016 година. Aктивно концертираат во многу градови низ нашата држава (Битола, Прилеп, Штип, Гостивар, Охрид, Кавадарци, Валандово, Велес) и во странство ( Concerti del tempieto – Рим, Италија). Во изведувачкиот опус може да се најдат и се опфатени композиции од сите стилски епохи. Овој музички состав, во периодот јануари/февруари 2021 год. ја освои Првата награда – LAUREATЕ, на Меѓународниот уметнички фестивал во Италија – Future Stars на фондацијата Sopravista International Festoval – Contest, во категоријата Инструментална музика. Во септември 2021 год. ја освои Втората награда, во категоријата Инструментална музика за камерни состави на Меѓународниот музички натпревар во Москва, Русија – International Moscow Music Online Competition / Second prize winners. Во декември 2021 година, ја освои Првата награда (Laureate) на on line натпреварот “Prometheus”, во категоријата Инструментална музика. TRIO DOLCE го сочинуваат: Светлана Богданоска Ристоски – флејта, Андријана Дукоска – виолончело и Марија Шамоска Буџаковски – пијано.

Податоци за уметниците:

Светлана Богданоска Ристоски е родена во Охрид, каде што го започнува своето музичко образование во О.М.У.,,Методи Патче”(класа: Н.Момировска). Средното образование го завршува во СМУ во Битола (класа: П.Талевски). Дипломира на ФМУ во Скопје(класа: Б.Станковска).Магистрира на Педагошкиот факултет во Битола, на насоката: Образование на надарени и талентирани (под менторство на проф.д-р Љупчо Кеверески).Се усовршува на работилници и мастер-клас семинари кај:Илија Зимбо (со кого има долгогодишна соработка),Луис Меирелес, Елена Стојчевска,Пјер Ив Арто,Гаспар Оџос,Џазмин Чои,Лаура Леваи Аксин,Дамјан Крајачиќ др.Има учествувано на државни и меѓународни натпревари, каде што ги има освоено следниве награди:Втора награда(прва не беше доделена), Јули 2002 год.-“Млади Таленти”-Сан Бартоломео ал Маре, Италија; Прва награда-Државен Натпревар-Април 2003; Прва награда (клавирско трио)- Државен натпревар за камерна музика-Април 2005; Прва Специјална награда-Државен натпревар-Април 2006; Прва награда-“Музички натпревар за млади”-Приштина 2007, Прва награда – LAUREATЕ, на on-line натпреварот “Future Stars” 2021 година (Trio Dolce), Втората награда, во категоријата Инструментална музика за камерни состави (Trio Dolce) “International Moscow Music Online Competition” – 2021 год, Прва награда (Laureate) на on line натпреварот “Prometheus” (Trio Dolce), 2021 год. и други. Член е на Trio Dolce, заедно со Андријана Дукоска-виолончело и Марија Шамоска Буџаковски -пијано, со кои од 2016 година заедно концертираат низ Македонија и странство. Во моментов e професор по флејта во ООМУ во Струга и ДСМУ ,,Тодор Скаловски -Тетоец”-Тетово,паралелка Струга.

*************************

Андријана Дукоска е родена во 1987 година во Прилеп. Средно Музичко училиште завршува во 2006 г. во Битола, во класа на Проф. Панде Тунтевски, како музичар изведувач – Виолончелист. Своето Високо образование го продолжува на Факултетот за Музичка Уметност во Скопје, во класа на Проф. м-р Живко Фирфов, а го завршува во 2010 г. со највисока оцена (10), со што се закитува со титулата Виолончелист. Учествувала на повеќе државни натпревари и е добитник на: втора државна награда за соло виолончело во 2004 г. и прва државна награда за камерна музика во 2005 г. Учествувала на мајсторски часови и семинар кај светски познатиот и маестрален виолончелист Јоханес Мозер – Германија. Настапува на многу значајни и културни манифестации низ државава, соло изведби на свечено отворање изложби и промоции на книги, бројни настапи како член во гудачки квартети, камерни и симфониски оркестри и е добитник на повеќе први меѓународни награди (LAUREATE) во Италија и Русија, како член, виолончелист во пијано-трио „TRIO DOLCE“, со кое реализирале целовечерен концерт на Фестивалот „Festival Musicale delle Nazioni“ во Рим, Италија во Teatro di Marcello. Пее во црковниот хор “Св.Петка” во Прилеп, со кој како активен и долгогодишен член и еден од основачите, оствариле бројни настапи и концерти на духовна музика. Во рамки на меѓународната културна соработка, хорот “Св.Петка” реализирал целовечерен концерт на духовна музика во Капелата Chapelle Saint Vincent de Paul во Париз, Франција, претставувајќи ја македонската духовна и хорска традиција пред меѓународна публика. Работела како Наставник по Музичко образование во повеќе основни училишта во Прилеп. Во моментов работи како образовен асистент на деца со попреченост во развој.

*****************************

Марија Шамоска Буџаковски е родена во Битола,каде го завршува основното и средното музичко училиште. Потоа се запишува на факултетот за музичка уметност во Скопје во класата на м-р Милица Шперовиќ-Рибарски, кај која ги завршува и магистерските студии и се стекнува со звањето Магистер. Учествувала на повеќе државни и меѓународни натпревари и е добитник на повеќе награди. Учествувала на семинари кај познати пијанисти.
Настапувала на повеќе значајни културни манифестации како: ”Денови на македонската музика”, ”Денови на полската култура во Македонија”, ”Ресенско културно лето”, ”Денови на битолска ликовна колонија во Скопје”, ”Музички вторник”, ”Хераклејски вечери”, ”Интерфест”, ”Битолско културно лето”, “Прилепско културно лето”, “Битфест”, “Concerti del Tempietto” и др.

Моментално работи како професор по пијано во Државното музичко училиште во Битола каде како професор по пијано и камерна музика постигнува врвни успеси со своите ученици, како наградуван педагог и успешен пијано соработник.
Во 2013 година со нејзината колешка, челистката Андријана Дукоска, го формираат дуото DUO NUOVO, виолончело и пијано, а во 2016 година, нив им се придружува и флејтистката Светлана Богданоска и го формираат триото TRIO DOLCE со кое активно концертираат низ многу градови низ државава, како и надвор од неа. Дел е од триото за шест раце – Трио Трифоника – трио со кое што настапуваат во повеќе наврати и кое што пред себе има светла иднина на домашната и меѓународната сцена.

Шамоска – Буџаковски одржала сопствени семинари и предавања на теми од областа на пијанизмот и пијанистичката педагогија во склоп на “ЕПТА” пијано –фестивалот и во склоп на културната програма на О.Новаци, како и меѓународни предавања во Србија на значајни меѓународни манифестации. Дел е од основачите на здружението на пијанисти и музички педагози”Пијано”со кое го организира меѓународниот натпревар по пијано “Пијанофест”-Битола и натпреварот “Виена Гала Фест”. Здружението активно организира различни случувања од областа на пијанизмот и класичната музика како : концерти, натпревари, европски проекти, семинари и сл. Во 2023 година Здружението “Пијано” ја доби престижната награда “4ти Ноември” како признание за успешна работа во областа на културата и образованието. Марија Шамоска Буџаковски е дел од многу државни и меѓународни жири комисии на државни натпревари, како и на меѓународни натпревари во Србија, Италија и др. На натпреварот “Euterpe” во Итлија, како и на натпреварот “Slavenski” во Нови Сад, прогласена е за најуспешен професор на натпреварите, со највисоко рангирани ученици кои биле учесници на овие натпревари. Во моментов Шамоска – Буџаковски извршува раководна функција во Државно музичко училиште, во кое реализира активности и проекти кои придонесуваат за напредок на учлиштето и промоција на младите музички таленти.