СООПШТЕНИЕ ОД ОПШТИНА ПРИЛЕП ЗА ИСПРАВНОСТ НА ВОДАТА ВО ПРИЛЕПСКО:

-Општина Прилеп ги известува граѓаните дека водата од мерно место локален водоснабдителен систем Канатларци – бензинска – на основа на резултатите од извршените испитувања и стручната анализа, примерокот одговара за употреба,
согласно прописите за здравствена исправност.

Л.в.с – Ерековци – Кочоски Пецо – на основа од извршените испитувања и стручната анализа, примерокот одговара за употреба, но количината на резидуален хлор во мрежата да се зголеми и да се движи во гранаците од 0,2-0,5 мг/л.вода.

Додека водата од Л.в.с –Оревоец – јавна чешма сред село, Л.в.с – Беловодица – двор, како и Л.в.с -Плетвар – јавна чешма – водата не е здравствено исправна заради наод на бактерии од цревно потекло и не смее да се користи за пиење без претходно вриење од 10 мин. Неопходно е соодветно техничко решение за објектот со можност за редовна дезинфекција на водата.

Времето денеска ќе биде сончево и топло со мала до умерена облачност. Во попладневните часови ќе има изолирана појава на нестабилност проследена со дожд, грмежи и засилен ветер. Локално процесите ќе бидат поинтензивни во форма на невреме со пороен дожд, засилен ветер и појава на град. Ќе дува слаб до умерен ветер од променлив правец, соопшти Управата за хидрометеоролошки работи.

Минималната температура ќе биде во интервал од 11 до 19, а максималната ќе достигне од 30 до 38 степени.

Во Скопје сончево и топло со мала до умерена облачност. Во делови од котлината ќе има услови за појава на краткотрајно невреме. Минималната температура ќе се спушти до 15, а максималната ќе достигне до 35 степени.

Според прогнозата на УХМР, утре и задутре во попладневните часови ќе има изолирана појава на нестабилност, проследена со дожд, грмежи и засилен ветер. Локално процесите ќе бидат поинтензивни во форма на невреме со пороен дожд, засилен ветер и појава на град.

За време на викендот и почетокот на следната седмица времето ќе биде претежно сончево и топло.

Летото на TERASA започна, а со летните температури оди и одлично освежување. Кога на тоа ќе се додаде прекрасниот амбиент и музика, тогаш навистина нема подобра викенд дестинација за добар помин.

Овој петок за забавата ќе се погрижат дечките од МЕTROPOLIS BAND, познати по своите енергични настапи, препознатливата харизма и музика која ги крева сите на нозе.

А за целосно уживање, Terasa подготви и специјална коктел понуда по промотивни цени.

Изберете помеѓу: 🍸 Johnnie Lemonade 🍹 The Faithful и 🍓 Pretty Woman и нека започне викенд одморот од работните обврски.

И секако, резервирајте навреме на 070-304-967, за да не барате маса во 5 до 12, оти ќе нема!

Комисијата за финансирање и буџет при Советот на Општина Прилеп, одржа седница на ден 05.05.2026 година во состав Игор Николоски-Претседател, Александар Китаноски, Христијан Тунески, Билјана Ристеска и Дарко Андреески – членови на која седница ги разгледа барањата за распределба на средства од буџетот на Општина Прилеп за 2026 година, наменети за финансирање на спортски клубови, професионални спортски клубови, здруженија и фондации, информираат од општина Прилеп.

Еве како ги распредели комисијата средствата од буџетот на општината:

Третата лига Југ во следната сезона ќе брои 16 екипи, а меѓу нив ќе биде и прилепска Победа. Друштво на некогашниот двократен шампион на Македонија, ќе им прават екипите на:

Башкими, Борец, Бучин, Фоца Нова, Младост 1930, Млекар, Питу Гули, Превалец, Росоман 83, Тополка, Ултрас, Вардар Неготино, Венец и Влазними Јуниор.

Во оваа конкуренција е и екипата ФК Големо Коњари, која заедно со Победа испадна од Втората лига.

Ќе биде интересно повторно да се гледа локалното дерби меѓу двете екипи, кое минатата сезона привлече големо внимание кај фудбалските вљубеници во Прилеп и прилепско.

“Чисто е убаво” милуваат да кажат од Јавното комунално претпријатие “Комуналец” од Прилеп, ама не ќе да е баш така…

Ова е прилепскиот АМАЗОН, каналот на Река Дабничка, каде уште само змии што не се појавиле, а со оглед на тоа дека жешките летни денови се пред нас, и тоа ќе биде.

Веќе трет пат наши читатели ни испраќаат фотографии од речното корито на Дабничка, па нека биде ова краен апел до комуналците, да го исчистат.

Денес во Народниот театар Битола се одржа прес-конференција по повод претстојната премиера на претставата „Госпоѓа Бовари“, од Гистав Флобер, во режија на Дејан Пројковски, која ќе биде изведена на 25 јуни во 20:00 часот на сцената на Народниот театар Битола. Пред претставниците на медиумите се обрати директорот на Народниот театар Битола, Васко Мавровски.

„Премиерата е дел од Бит Фест оваа година, со поддршка од КИЦ Битола и Општина Битола, на што сум особено благодарен, бидејќи Општината сè уште стои зад националните установи со финансиска поддршка. Сметам дека централната и локалната власт треба заеднички да вложуваат напори за културата да може да функционира. Според моето лично мислење, бидејќи ги следам културните лета во другите градови, без да потценувам никого, мислам дека Битолското културно лето е на највисоко ниво – најдобро, најдолго, најорганизирано, и што е најважно, нуди настани со врвен квалитет кои вреди да ги проследи битолската публика, како и сите што се наоѓаат во Битола во моментов“.

Тој истакна дека му претставува огромна чест и задоволство што режисерот Дејан Пројковски е дел од најновата продукција на театарот.

„Со Дејан Пројковски имаме заедничка историја. Тој е многу актуелен режисер. Имавме периоди кога работевме на различни места, но ја споделувавме историјата, а сега повторно создаваме заедничка приказна. Заедно сме од средината на деведесеттите години и многу ми е драго што израсна во еден од најголемите режисери. Такви луѓе веќе се бројат на прсти. Тој е еден од најдобрите режисери во нашата држава и во регионот, и за мене е голема чест и задоволство што повторно го имаме на сцената на Битолскиот народен театар“.

Мавровски се осврна и кон реализираните проекти во изминатиот период.

„Во првото полугодие од оваа година, односно во двата квартали, реализацијата на буџетот што го добивме и делегиран буџет за Народниот театар од Битола е 67%, што е навистина висока бројка. Имаме пет премиери во овие шест месеци. За време на фестивалот во Романија, Народниот театар од Битола официјално стана основач и член на новата Балканска асоцијација на театри и фестивали, што се надевам дека ќе ни отвори нови врати и ќе донесе нови соработки во иднина.

На 10 јули ќе се видиме на уште една прес-конференција, посветена на следната премиера во режија на Џон Блондејл, со која на 15 јули ќе имаме македонска премиера на Охридско лето, а на 21 јули светска премиера во Верона, на Верона Шекспир Фестивалот“.

На прес-конференцијата се обрати и самиот Дејан Пројковски, кој упати искрена благодарност до Народниот театар Битола и до директорот за поканата и довербата да ја реализира оваа претстава. Тој не ја криеше благодарноста ниту кон актерската и техничката екипа, истакнувајќи дека зад претставата стои огромна посветеност, труд и љубов кон театарот.

„Госпоѓа Бовари“ носи со себе некои вечни теми и прашања. Мислам дека „Госпоѓа Бовари“ е некаков женски „Хамлет“. Тоа е женскиот поединец кој се спротивставува на системот, на општествените и моралните рамки што ги создаваме и кои се дел од сите нејзини проблеми, додека системот се обидува да ја вовлече да биде дел од тие лажни вредности.
Самата претстава зборува за слободата на личниот избор. Момо Капор вели дека слободата треба да ја земаме онолку колку што сме подготвени да ја платиме цената за неа. Говорам за личната слобода и за личниот избор. Госпоѓа Бовари во претставата го минува својот пат, каде што е растегната меѓу телото и душата, меѓу телото и страстите што ја влечат надолу, на земјата, во калта, и од друга страна, душата што се обидува да гледа кон небото, да го бара Бог и повисоката смисла на постоењето.

Во тоа растегнување меѓу телото и душата, Госпоѓа Бовари е како затегната жица на гитара или харфа, која пука пред нашите очи. Има еден аргентински поет што вели дека разликата меѓу обичниот и совршениот звук е во еден полутон; дека така е и во животот. Разликата меѓу доброто и лошото, или меѓу ангелското и ѓаволското, е во еден полутон; тие многу тешко се разликуваат. Во тој полутон се движи нашата Госпоѓа Бовари, меѓу ангелското и ѓаволското“.

Секако, ниту една прес-конференција не би била целосна без дел од актерската екипа. Денес пред медиумите се обратија Маја Андоновска Илијевски, која го толкува ликот на Ема Бовари, и Никола Стефанов во улогата на Леон. Двајцата актери со голем ентузијазам зборуваа за соработката со Пројковски и за креативниот процес низ кој поминале во текот на подготовките. Тие истакнаа дека ликот на Ема Бовари и денес е исклучително актуелен и дека секоја современа жена и девојка ќе може да препознае дел од своите соништа, желби, разочарувања и стремежи во оваа безвременска приказна.

„Актерски, а и женски, за мене е една многу значајна претстава и процес кој што го поминавме изминатиот месец дена. Процес кој што ме натера да се занимавам со сите жени на светот, но највеќе со себе, за така да ја родиме нашата Мадам Бовари. Верувам дека во нашата претстава и во сѐ она што сработивме како екипа заедно, нема да постои жена во публиката која што во еден одреден момент нема да си ги постави истите прашања: дали е доволно добра мајка, дали е доволно добра жена? Дали постои совршена љубов? Каде е тој совршен маж и кој е тој совршен живот за кој што Мадам Бовари, за којашто пишувал Флобер, некогаш живеел во кориците на старите библиотеки во книгите? И која е таа Мадам Бовари денес и кое е тоа совршенство по кое што таа копнее? Дали тоа се социјалните медиуми и светот кој што не опкружува? Ние воопшто не се занимаваме со тоа во нашата претстава. Меѓутоа, појдовната точка на една современа жена, како што сум јас и на еден актер и на еден уметник, буквално шеташе низ сите годишни времиња и низ сите историски времиња, за да ја најдеме онаа Мадам Бовари која што вие ќе ја видите на сцената денес, утре и уште два пати во месец јули“, рече Маја Андоновска Илијевски и додаде:

„Јас сум искрено многу благодарна на довербата на Дејан и на честа што ми ја даде да ја разбудам, да ја оживеам и да ја изиграм оваа навистина посакувана женска улога. И иако многу пати сме се сретнувале на „Глумците пеат“, на различни настани и манифестации на кои соработувавме, ова е наша прва театарска соработка. Се надевам не и последна и јас мислам дека ова е еден од процесите на кој што ќе се сеќавам додека сум жива. За мене актерски еден навистина голем предизвик. Така што благодарна сум и на Дејан и на Олга Панго со која што ги работевме кореографиите за претставата. Претстава во која што освен емотивно и физички и актерски и духовно си ги изместив сите лични граници“.

„Дејан Пројковски е мој професор и јас завршив во негова класа. Ова е моја петта соработка со него и тој на некој начин е мој театарски татко и прво се радувам дека е тука. И после долго, некои седум години мислам, работиме претстава. Многу сум радосен и чувствувам огромна одговорност во целата претстава. „Мадам Бовари“ беше едно патување во кое секој ден бевме и физички и психички истоштени, но стигнавме до еден резултат за кој мислам дека ќе се зборува и се радувам кога ќе видам колега или колешка во моментот, дека на некаков начин ја живее својата, можеби улога во животот. И тоа ме радува многу и таа радост мислам дека треба да се развие и да расте“, додава Никола Стефанов.

Покрај нив во претставата играат: Иван Јерчиќ (Шарл), Огнен Дранговски (Родолф), Мартин Мирчевски (Лере), Сандра Грибовска Илиевска (Слугинка), Петар Мирчевски (Свештеник), Борче Ѓаковски (Исус Христос) и Ива Лазарова (Ќерката на Ема и Шарл). Авторскиот тим го сочинуваат: асистент на режија Андреј Цветановски, драматург Сашо Димовски, сценограф Валентин Светозарев, костимограф Андреј Ѓоргиевски, кореограф Олга Панго, композитор Горан Трајкоски, видео дизајнер Сергеј Светозарев, светло мајстор Игор Мицевски, тон мајстор Александар Димовски, видео оператор Владимир Переловски, инспициент Оливер Петровски и суфлер Гордана Михајловска.

Една од варијантите на плакатот е изработка на Михајло Димитриевски – Мичо. Има уште еден плакат, дело на Сергеј Светозарев, кој од септември, кога ќе се продолжи со настапи по фестивали ќе биде презентиран на прес-конференција. Наредните изведби на претставата се закажани на 04.07.2026 и 07.07.2026 во 20 часот.

Хорот при КУД „Пере Тошев“ од Прилеп, под диригентство на Софија Рибароска, успешно ја претстави Македонија на меѓународниот фестивал во Паралија, Грција, кој се одржа од 18 до 22 јуни во организација на MIOFF.

Прилепското културно-уметничко друштво беше единствениот претставник од Македонија на фестивалот, каде преку својата музичка изведба ја донесе автентичноста на македонската песна, традиција и културно наследство пред бројна меѓународна публика.

Настапот на хорот претставува уште една потврда за посветената работа на КУД „Пере Тошев“, кое со години е препознатлив носител и афирматор на македонската култура. Преку своите активности, настапи и учества на фестивали во земјата и странство, друштвото континуирано ја промовира богатата македонска фолклорна традиција и вредностите кои се пренесуваат низ генерациите.

Учеството на овој престижен меѓународен настан е значајно признание за членовите на друштвото, кои со љубов, ентузијазам и посветеност продолжуваат да го чуваат и презентираат македонскиот културен идентитет.

Со својот настап во Паралија, КУД „Пере Тошев“ уште еднаш покажа дека македонската песна и традиција имаат свое место на меѓународната културна сцена.

Универзитетот „Св. Климент Охридски“ – Битола (УКЛО) со задоволство ја информира јавноста дека е рангиран во THE Impact Rankings на реномираната британска куќа Times Higher Education (THE) — единственото глобално рангирање што го мери придонесот на универзитетите кон 17-те Цели за одржлив развој на Обединетите нации (SDGs).

Ранг-листата е објавена денес, 24.06.2027 година, на веб-адресата:
https://www.timeshighereducation.com/impactrankings

Според објавените резултати, УКЛО е рангиран во опсегот 1001–1500 место на глобално ниво, со особено истакнати резултати (рангиран од 400 до 600 место) кај целите за одржлив развој:

8. Достоинствено вработување и економски раст
16. Мир, правда и силни институции

Што всушност мери ова рангирање?

За разлика од традиционалните светски рангирања, кои го оценуваат академскиот престиж и истражувачката моќ, THE Impact Rankings го мери реалното општествено влијание на универзитетите — нивниот придонес кон одржливоста, инклузијата, климатската акција, квалитетното образование и партнерствата за развој.

Секоја институција се оценува според вкупниот придонес кон остварување на SDG 17 (Целите за одржлив развој), заедно со нејзините пет најдобро рангирани цели.

Се вреднуваат четири димензии:

• истражувањето;
• институционалното управување (внатрешни политики и практики на самиот универзитет);
• активностите кон заедницата (outreach);
• наставата поврзана со секоја од целите.

Како ова рангирање се разликува од другите релевантни светски рангирања?

Во меѓународниот простор вообичаено се цитираат три престижни референтни рангирања, секое со различна перспектива:

QS World University Rankings — се темели претежно на академска и работодавачка репутација, цитираност и интернационалност. (УКЛО е рангиран на QS европската листа)

THE World University Rankings — ги мери наставата, истражувачката средина, квалитетот на истражувањето, меѓународната ориентираност и приходите од индустрија. (УКЛО е референциран, но не и рангиран)

ARWU (Shanghai Ranking) — е силно насочен кон елитни истражувачки резултати, Нобелови награди и високоцитирани истражувачи. (УКЛО не е рангиран)

Додека овие три рангирања одговараат на прашањето:
„Колку е силен универзитетот академски и репутациски?“

THE Impact Rankings одговара на прашањето:
„Колку универзитетот придонесува за општеството и одржливиот развој?“

Станува збор за комплементарни, а не исклучиви показатели.

Зошто ова рангирање е особено значајно за УКЛО како регионален универзитет?

Рангирањето во THE Impact Rankings има посебно значење за УКЛО токму поради неговата мисија како регионален универзитет длабоко вкоренет во заедницата:

• Ова рангирање му овозможува на УКЛО, како универзитет со изразено општествено и регионално влијание, да се истакне на глобалната сцена според конкретни и мерливи резултати.
• Рамката на SDG директно се совпаѓа со приоритетите на европските фондови (Horizon Europe, Erasmus+, Creative Europe), кои сè повеќе ги вреднуваат одржливоста, инклузијата и општественото влијание. Признанието го зајакнува наративот и кредибилитетот на УКЛО при идни апликации и меѓународни партнерства.
• Овој резултат претставува објективно меѓународно потврдување на улогата што УКЛО ја има во развојот на југозападниот регион — преку образованието, соработката со локалните заедници, институции и стопанството, како и придонесот кон одржлив и инклузивен развој.

Ова рангирање за УКЛО го валидира и учеството во Европската универзитетска алијанса COLOURS, која има мисија усогласена со SDG17 (Целите за одржлив развој).

COLOURS означува: Соработувачки, иновативни, одржливи регионални универзитети
(COLlaborative innOvative sUstainable Regional univerSities)

Рангирањето во THE Impact Rankings е признание дека вистинската вредност на еден универзитет не се мери само со академскиот престиж, туку и со реалниот придонес што го дава за луѓето и заедницата.

За УКЛО, како регионален универзитет, ова е потврда дека неговата мисија — образование во служба на општеството и одржливиот развој — има тежина и видливост на глобално ниво.

По повеќегодишните проблеми со дотраената инфраструктура, започна реализацијата на проектот за целосна реконструкција на улицата „Дебарска“ во Битола.

Од Општина Битола информираат дека проектот е подготвуван во изминатиот период, а активностите сега влегуваат во фаза на реализација согласно Програмата за развојни планови и договорот со Министерството за транспорт, со обезбедени средства преку унгарскиот кредит од вториот владин повик.

Градежните работи започнаа на првата делница од улицата, односно потегот од улицата „Димитар Влахов“ до улицата „Илинденска“.

Проектот опфаќа целосна реконструкција на инфраструктурата, при што за реконструкција на мешовитата канализација се предвидени 12.148.109 денари, за водоводната линија 4.991.136 денари, додека за реконструкција на коловозот 20.146.392 денари.

Вкупната должина на улицата која ќе биде реконструирана изнесува околу еден километар.

Од локалната самоуправа посочуваат дека по долг период на проблеми, изработен е проект, обезбедени се средства и избрани се изведувачи за целосно уредување на улицата „Дебарска“.

Воедно, од Општина Битола нагласуваат дека инфраструктурните проекти се еден од главните приоритети во 2026 година, со над 900 милиони денари планирани средства за оваа намена.