Полициски службеници од Полициската станица Центар, по распишан централен распис од СВР Битола го лишиле од слобода Х.В(42) од с.Канатларци, прилепско, поради сомнение за сторени повеќе кривични дела.

Тој бил предаден во СВР Битола и во службен разговор со полициски службеници признал дека извршил осум кривични дела тешка кражба, две кражби и една тешка кражба во обид во куќи и продажни објекти.

Тој бил задржан во полициска станица и по целосно документирање на случаите, против него ќе биде поднесена соодветна пријава.

Поглаварот на Македонската Православна Црква ‒ Охридска Архиепископија г.г. Стефан реагира и бара извинување од МРТ за тоа што за време на синоќешниот Божикен концерт што беше пренесуван на МТВ1 на кајронот наместо титулата „Архиепископ Охридски и Македонски“ стоеше скратената титула „Архиепископ Охридски“, пренесува порталот Инфомакс.

– За време на вчерашниот Божикен концерт на празнични песни – одржан како завршен дел од манифестацијата „Бадникови поворки“, беше направена груба, се надеваме ненамерна, грешка. Имено, за време на Нашиот благодарствен говор на кајронот на МТВ1 наместо титулата „Архиепископ Охридски и Македонски“ стоеше скратената титула „Архиепископ Охридски.

Не сакајќи да веруваме дека станува збор за свесно или нарачано искривување на титулирањето на Поглаварот на Македонската Православна Црква ‒ Охридска Архиепископија, Ве замолуваме уште денеска во средствата за информирање на Јавниот сервис да објавите извинување за овој голем превид. Во спротивно ќе бидеме принудени и Ние лично како Архиепископ Охридски и Македонски и сите свештенослужители на Скопската епархија и на други македонски епархии да ја преиспитаме нашата соработка со Јавниот сервис, а којашто сè досега, беше исклучително коректна и плодотворната. Верувајќи дека ќе излезете во пресрет на ова наше Барање и дека во иднина нема да се прават вакви сериозни грешки, Ве поздравуваме со торжествениот христијански позив:

Х Р И С Т О С С Е Р О Д И!, се наведува во реакцијата на поглаварот на Македонската Православна Црква ‒ Охридска Архиепископија г.г. Стефан до директорот на јавниот сервис Македонска радио-телевизија (МРТВ) Марјан Цветковски.

Владата на Република Северна Македонија денеска на 118-та редовна седница го разгледа и го усвои предлогот на Министерството за образование и наука, второто полугодие од учебната 2022/23 година наместо на 18 јануари да започне на 23 јануари (понеделник) со физичко присуство за сите ученици.

Во образложението од Министерството за образование и наука е наведено дека зимскиот распуст се продолжува поради заштеда на греење и заштита на здравјето на учениците.

Годината е 1978, а филмот е “Златни години” во режија на Иван Митевски и според сценарио на Русомир Богдановски. Дејствието е снимано во Прилеп и прилепската Стара чаршија.

Играат: Ацо Стефановски, Петре Прличко, Тодор Николовски, Данчо Чевревски, Предраг Дишленковиќ, Лидија Велкова, Коле Ангеловски.

Филмот е во продукција на Телевизија Скопје. Едно убаво потсетување за постарите генерации и едно убаво видување за помладите како пред 50-тина години се живеело во градот под Марковите Кули.

Oсмоодделенката Кирана Иваноска го освои првото место на светскиот фестивал WAF CONTEST 2023 кој синоќа се одржа во хотел Хилтон во Скопје.

Натпреварот е организиран од “Светска асоцијација на фестивали- WAF“, а Кирана е втората ученичка од ООУ “Климент Охридски” од Прилеп која освои место на истиот.

Претходно информиравме дека и 12-годишната Михаела Пурдеска, ученичка во петто одделение во истото училиште освои второ место во нејзината категорија.

Натпреварувачите беа поделени во 5 категории, а на сцената учество зедоја напреварувачи од сите балкански земји, како и Словачка, Украина Казахстан, Чешка, Полска, Австрија и др.

Честитки за големиот успех и желби за уште поголеми достигнувања во иднина!

Светиниколскиот турнир во мал фудбал не заврши со финалниот натпревар и доделените медали. После 15 одлично организирани натпреварувачки денови во сала кои донесоа голем број возбудливи натпревари, на ред дојде нашата хумана мисија, што ни претставува особена гордост – велат од Здружението “Марков Град” кои беа организатори на турнирот.

Соопштението во целост го пренесуваме во продолжение:

-Во пресрет на празниците ги посетивме дечињата од посебните паралелки во ООУ “Климент Охридски” и ги израдувавме со новогодишни пакетчиња. Колетчиња имаше и за дечиња од социјално загрозени семејства, а доделени беа и 20 пакети со производи за семејства со самохрани родители, како и парични средства за нашата сограѓанка Весна Крстеска која боледува од тешка болест.

Хуманиот дел го продолживме и со донација за семејствата од четирите опожарени куќи од нашиот град, со што веруваме дека внесовме барем малку надеж и малку радост кај овие наши сограѓани во овие празнични денови. Вкупната вредност на донациите изнесува 110.000 денари.

Огромна благодарност до компанијата “Комфи Ангел”, која беше носител на овој турнир, благодарност до Локалната Самоуправа на општина Прилеп, до ООУ “Добре Јованоски”, како и до голем број на општествено одговорни компании кои што не’ поддржаа да создадеме успешна приказна.

Иако со скромен буџет и одличен награден фонд и покрај сите препреки што ги имавме како организатори, oсобено околу одбивањето на државните власти да ни ја отстапат Универзалната сала, која во минатото беше душата на овој турнир, на крајот сепак успеавме и докажавме дека доколку се влезе со чисто срце и упорност, успехот е секогаш неизбежен.
Со надеж дека наредниот турнир ќе го организираме каде што му е и местото, во Универзалната сала во Прилеп, спортски ве поздравуваме!

Од оваа година повратот на данокот на додадена вредност од фискалните сметки наместо 1.800 денари ќе се зголеми на 2.100 денари. Предлог-законското решение е во собраниска процедура и ставено е како шеста точка на денешната 99. пленарна седница. Законот се носи по скратена постапка.

Правото на враќање на ДДВ се остварува за секое календарско тримесечје во кое е издадена фискалната сметка.

На предлог на Министерството за финансии, Владата на 27 декември 2022 година го утврди текстот на Предлог-законот со кој се зголемува максималниот износ на поврат на ДДВ што може да го добие едно физичко лице со скенирање на фискални сметки за едно тримесечје.

На 24 декември охриѓанката Симона Трповска се спушти до 102 метери во длабочините на Црвеното море во Египет, што е македонски рекорд во техничко нуркање. За подвигот оваа млада успешна дама интензивно се подготвувала една година, во што и помогнал искусен инструктор од Египет, кој воедно е сопственик на светскиот рекорд во длабинско нуркање, објави порталот Охридњуз.

-За да можеш да одиш на длабочини над сто метри треба да поминеш низ интензивни тренинзи и едукација. Јас сум рекреативен нуркач од 2007 година, а со техничко нуркање почнав да се занимава од минатата година, на што ме поттикна мојата пријателка, Ирина Милошевска, првата жена технички нуркач во Македонија. Контактирав повеќе инструктори, меѓутоа најмногу впечаток ми остави Ахмед Габр, инструктор од Египет кој воедно го држи гинисовиот рекорд за најдлабоко нуркање од 332,5 метри. После неколку разговори со него се договоривме да започнам со тренинзи. – истакна Трповска во емисијата Спорт + на Охридњуз.

Тренинзите и подвигот, внимателно биле планирани со сета потребна логистика поддржана од тимот на „Габр Тек“. Истите, Трповска ги реализирала под водство на Габр со повеќе миксови на гасови. Покрај интензивните тренинзи на различни локации во светот, Симона пред поставување на националниот рекорд во длабинско нуркање, се здобива со Меѓународен сертификат „Advanced Trimix Diver“, за техничко нуркање до 100 метри, што воедно е највисок сертификат за длабинско техничкото нуркање, кој овозможува нуркање со мешавина од три гасови (хелиум, кислород и азот), кои се комбинираат согласно планираната длабочина.

Симона Трповска води сопствена фирма за консалтинг и пристап до финансии, И-ДС Коучинг и Консалтинг дооел, а нуркањето и е големо хоби на кое, исто така, му пристапува исклучително сериозно. Потврда на тоа е подвигот остварен во Египет.

Со бурек, греано вино и чај, општина Прилеп годинава по втор пат кај Градската саат кула ќе организира заедничко празнување на празникот Св. Василиј Велики или народски кажано Стара Нова година – Василица.

За таа цел општината упатува покана до сите граѓани на ден 13.01.2023 од 11 до 13 часот заедо да го одбележиме доаѓањето на православната Нова година.