-“Aко си бил во Крушево, а не си го посетил Шапе, исто како да не си бил”. Ова ќе ви го рече секој Крушевчанец и секој оној кој го посетил ресторанот на Шапевци во Крушево. Историја долга повеќе од 30 години, вкусот на македонската традиција, амбиент за боеми, кралска трпеза, сето на едно место, направено со многу љубов од рацете на врвни мајстори. Ресторан Шапе е единственото место кое носи име на човек што живеел во Крушево.
Ресторанот на Шапевци е приказна која долго време ќе ги опива вашите мисли, ќе ве натера со сласт да се сеќавате и да раскажувате.
Само да ги погледнете ѕидовите на ресторанот, ќе ви проговорат и ќе ви ги пренесат сите насмеани лица кои поминале тука, сите забавни случувања, ќе ви го стоплат срцето и душата, и ќе знаете дека само тука сте биле вистински боеми.
Кај Шапе поминале политичари, амбасадори, естрадни уметници, гости од сите страни на светот. Секој од нив оставил впечатлива порака.
Жан Здравески, најмладиот oд семејството кој ја продолжува гурманската традиција, ќе ви ги раскаже сите анегдоти и интересни случувања поврзани со овој ресторан. Жан е голем човек со уште поголемо срце. Со гордост говори за својот ресторан, а има и зошто. Шапевци се познати по тоа што секогаш користат свое свежо месо и продукти при подготовката на специјалитетите. Ниту еднаш не ги послужиле своите гости со готово месо купено од продавниците.
Храната која се подготвува тука е уметност за очи и мевлем за душа. Ќе се почувствувате дека сте нагостени како богови, со многу внимание, а ќе бидите запрашани и за вашето мислење, ваша сугестија, нешто што ретко каде се случува. Комитската плескавица, каре ќебапот, каре плескавицата, домашниот колбас се само дел од специјалитетите кои можете да ги дегустирате.
Тука како највпечатливо би го одделиле Крушевското грне, кое кај Шапевци е приказна самото по себе. Комитски треба да се намачите за да го совладате, а впечатокот е вчудовидувачки.
За време на зимската сезона на ски патеките работи и Брвнарата Шапе, од каде со топол чај, кафе или некоја закуска можете да уживате во снежното Крушево и да се топите во прекрасните пејсажи.
Вистинско репрезентативно место, не само за Крушево, туку и за целокупната туристичка понуда на државата.
Многумина ќе речат: – “Кога ќе се сетам на Крушево три работи ми идат во мислите. Едната работа е Шапе, втората е Шапе, а за третата и не можам баш да се сетам”.
И навистина е така, Шапевци се врвни мајстори кои покрај љубовта кон угостителството ги краси и љубов и патриотизам кон родниот крај Крушево. Се што прават, прават со желба да биде забележано и вкусно примено од нивните гости, а со тоа да ги направат задоволни и повторно да го посетат Крушево и нивниот ресторан.
За крај ќе ве поканиме да ги посетите, она што ќе го доживеете ќе ви остави трајно сеќавање.
A.Г.
